1 عِبُرَ مَ تٌ بَرَ حّ تٌنفٌ سٌلٌمَنَانِ نُن سٌلٌمَنَانِ سْتْ سِمَيَ رَ، عَلَتَلَ نَشَ مِنِ عَ مَ، عَ قَ يِ مَسٍن عَ بّ، «ﭑ تَن نَن نَ عَلَ سّنبّ كَنيِ رَ. عِ مَحّرّ ﭑ يَ تٌدٍ رَ تِنشِنيِ كُي. 2 ﭑ قَمَ نّ سَاتّ تٌنفٌدٍ وٌن قِرِن تَفِ. ﭑ قَمَ بْنسْي فبٍفبٍ قِدٍ عِ مَ.» 3 عِبُرَ مَ نَشَ عَ شِنبِ سِن، عَ يَتَفِ رَقٍلٍن بْشِ. عَلَتَلَ نَشَ عَ مَسٍن عَ بّ، 4 «ﭑ بَرَ يِ سَاتّ تٌنفٌ عِ بّ. عِ قَمَ نّ قِندِدٍ سِ وُيَشِ بَبَ رَ. 5 عِ شِلِ مُ قَلَمَ سْنْن عِبُرَ مَ، عِ شِلِ قَمَ نّ قَلَدٍ عِبُرَهِمَ، بَرِ مَ ﭑ عِ قِندِ مَ سِ وُيَشِ بَبَ نَن نَ. 6 ﭑ قَمَ نّ عِ قِندِدٍ حَمَ فبٍفبٍ بَبَ رَ. عِ قَمَ نّ دِيٍ سْتْدٍ نَشٍيٍ قِندِ مَ سِ وُيَشِ رَ، مَنفّيٍ قَن قَمَ نّ مِنِدٍ عِ شَ دِيٍ يَ مَ. 7 ﭑ نَن ﭑ مَ سَاتّ مَبَنبَنمَ نّ وٌن قِرِن تَفِ، هَلِ عِ دَنفِ شَنبِ، عَ نُن عِ بْنسْي، فبِلٍن نٍيٍ قَن بْنسْي بْنسْي. عَ قِندِ مَ سَاتّ رَ دَن مُ نَ نَشَن مَ. نَ كُي، ﭑ تَن نَن نَ عِ مَرِفِ عَلَ رَ. ﭑ تَن نَن نَ عِ بْنسْي مَرِفِ عَلَ رَ، هَلِ عِ دَنفِ شَنبِ. 8 ﭑ قَمَ نّ يِ بْشِ قِدٍ عِ تَن نُن عِ بْنسْي مَ، وٌ قَشِ سَبَتِدٍ دّننَشّ. كَنَان بْشِ بِرِن قِندِ مَ نّ وٌ فبٍ رَ عَبَدَن. ﭑ تَن نَن نَ عِ بْنسْي مَرِفِ عَلَ رَ.»

9 عَلَ مَن نَشَ عَ مَسٍن عِبُرَهِمَ بّ، «عِ تَن نُن عِ بْنسْي، فبِلٍن نَ قَن بْنسْي بْنسْي، وٌ لَن نّ وٌ شَ ﭑ مَ سَاتّ رَتِنمّ. 10 وٌن مَ سَاتّ نَن يَ، ﭑ نَشَن سَشِ وٌ مَ، وٌ لَن وٌ شَ نَشَن نَتِنمّ، عِ تَن نُن عِ بْنسْييٍ؛ نَشَن بِرِن قِندِشِ شّمّ رَ وٌ يَ مَ، عٍ بِرِن لَن نّ عٍ شَ سُننَ. 11 وٌ شَ سُننَ قِندِ مَ سَاتّ تْنشُمَ نَن نَ وٌ تَن نُن ﭑ تَن تَفِ. 12 كٍلِ وٌ تَن مَ، عَ سَ دْشْ وٌ بْنسْي بْنسْي رَ، دِ شّمّ نَشَن بِرِن بَرِ مَ، عَ لَنمَ عٍ شَ سُننَ شِ سٌلٌمَسَشَن ندٍ. نَ سّرِيّ لَن نّ عَ شَ سَ وٌ شَ كٌنيِيٍ مَ نَشٍيٍ نَ وٌ يِ رَ، نَشٍيٍ بَرِشِ وٌ شْنيِ، عَ نُن كٌنيِ نَشٍيٍ سَرَشِ بْشِ فبّتّ مَ، هَلِ عَ مُ قَ نَ عِ بْنسْي شَ يَ مَ. 13 نَ كُي، كٌنيِ نَشَن بَرِشِ عِ شْنيِ عَ نُن عِ نَ نَشَن قَن سَرَ، عٍ بِرِن لَن نّ عٍ شَ سُننَ عَلَكٌ ﭑ مَ سَاتّ تْنشُمَ شَ لُ وٌ قَتٍ مَ عَبَدَن. 14 شّمّ نَشَن نَ لُ عَ قَتٍ مُ سُننَ، عَ قَمَ نّ رَ مِنِدٍ عَ بْنسْي يَ مَ، بَرِ مَ عَ مُ ﭑ مَ سَاتّ رَكَمَلِشِ.»

15 نَ شَنبِ، عَلَ نَشَ عَ مَسٍن عِبُرَهِمَ بّ، «عِ نَشَ سَرَيِ شِلِ قَلَ عِ شَ فِنّ شُن مَ سْنْن دٍ، عَ قَ شِلِ نّ كْرّ سَرَ. 16 ﭑ بَرَكّ سَمَ عَ شَ قٍ، عَ قَ دِ شّمّ بَرِ عِ بّ. ﭑ بَرَكّ سَمَ نّ سَرَ شَ قٍ، عَ قَمَ قِندِدٍ سِ فبٍفبٍ نفَ رَ. سِ دْشْ وُيَشِ مَنفّيٍ قَمَ نّ مِنِدٍ عَ شَ دِيٍ يَ مَ.»

17 عِبُرَهِمَ نَشَ عَ يَتَفِ رَقٍلٍن بْشِ مَ، كْنْ عَ نَشَ يٍلٍ، عَ قَ عَ قَلَ عَ بْحّ مَ، «ﭑ تَن نَشَن بَرَ حّ كّمّ سْتْ سِمَيَ رَ، ﭑ نْمَ دِ ندٍ سْتْدٍ سْنْن؟ سَرَ نَشَن بَرَ حّ تٌنفٌ سٌلٌمَنَانِ سْتْ سِمَيَ رَ، عَ قَن نْمَ دِ ندٍ بَرِدٍ قَ؟» 18 عَ نَشَ عَ قَلَ عَلَ بّ، «عِ حّنفِ سَ سُمَيِلَ شْن مَ. نَ بَرَ ﭑ وَ سَ.» 19 عَلَ نَشَ عَ يَابِ، «عَدٍ! عِ شَ فِنّ سَرَ قَمَ دِ شّمّ بَرِدٍ عِ بّ عِ نَشَن شِلِ سَمَ عِسِيَفَ. ﭑ نَن ﭑ مَ سَاتّ مَبَنبَنمَ نّ ﭑ تَن نُن عَ تَن تَفِ، عَ نُن عَ بْنسْي رَ هَلِ عَ قَشَ شَنبِ. سَاتّ نَن نَ كِ نَشَن مُ كَنَمَ عَبَدَن. 20 ﭑ بَرَ عِ شَ مَشَندِ سُشُ سُمَيِلَ شَ قٍ رَ. ﭑ بَرَكّ سَمَ نّ عَ شَ قٍ، ﭑ مَن قَ دِ فبٍفبٍ بَرِقٍ رَفِرِ عَ مَ، ﭑ بْنسْي وُيَشِ قِمَ نّ عَ مَ. عَ قِندِ مَ نّ مَنفّ دِ قُ نُن قِرِن بَبَ رَ، عَ نُن سِ شُنفبٍ كَنيِ رَ. 21 كْنْ، نَشَن قِندِ ﭑ مَ سَاتّ رَ، ﭑ قَمَ عَ مَبَنبَندٍ ﭑ تَن نُن عِسِيَفَ نَن تَفِ، سَرَ قَمَ دِ شّمّ نَشَن بَرِدٍ عِ بّ تَمُنَ يِ وَشَتِ.» 22 عَلَ تٌ فّ نَ مَسٍنيِ رَ، عَ نَشَ كٍلِ عِبُرَهِمَ شُن مَ.

23 عِبُرَهِمَ نَشَ عَ شَ دِ سُمَيِلَ تٌنفٌ، عَ نُن عَ شَ كٌنيِ نَشٍيٍ بَرِشِ عَ شْنيِ، عَ نُن عَ نَشٍيٍ سَرَشِ. شّمّ نَشَن بِرِن نَ عَ شَ بَنشِ كُي، عَ نَشَ عٍ بِرِن سُننَ نَ لْشْي عَلْ عَلَ عَ يَمَرِ كِ نَشّ. 24 عِبُرَهِمَ قَن نَشَ سُننَ. عِبُرَهِمَ سُننَ تّمُي نَشّ، عَ حّ تٌنفٌ سٌلٌمَنَانِ عَ نُن سٌلٌمَنَانِ نَن نُ نَ عَ رَ. 25 سُمَيِلَ سُننَمَ تّمُي نَشّ، عَ حّ قُ نُن سَشَن. 26 عٍ نَشَ عٍ بِرِن سُننَ لْشْي كٍرٍن، 27 عَ نُن شّمّ نَشَن بِرِن نُ نَ عِبُرَهِمَ شَ بَنشِ كُي، كٌنيِ نَشٍيٍ بَرِشِ عَ شْنيِ، عَ نُن عَ نَشٍيٍ قَن سَرَشِ كٍلِقٍ سِ فبّتّيٍ مَ.