1 عِسَ تٌ فّ يِ قٍ بِرِن مَسٍندٍ، عَ نَشَ عَ قَلَ عَ قْشِرَبِرّيٍ بّ، 2 «وٌ عَ كٌلٌن، شِ قِرِن نَن لُشِ سَيَمَلٍكّ دَنفِ سَلِ شَ عَ لِ. نَ تّمُي، عَدَ مَ شَ دِ سَمَ نّ مِشِيٍ بّلّشّ عٍ شَ عَ بَنبَن وُرِ مَفَلَنبُشِ مَ.»

3 نَ وَشَتِ، سّرّشّدُبّ كُنتِفِيٍ نُن يُوِقِيٍ شَ قٌرِيٍ نُ مَلَنشِ كَيَقَ شْنيِ، سّرّشّدُبّ كُنتِفِيٍ شُنيِ. 4 عٍ نَشَ لَن عَ مَ عٍ شَ عِسَ سُشُ يَنقَنتٍيَ سَابُي رَ، عٍ شَ عَ قَشَ. 5 كْنْ عٍ نَشَ عَ قَلَ، «وٌن نَشَ عَ سُشُ سَلِ لْشْي، شَ نَ مُ عَ رَ حَمَ عَ شُنيِ عِكٍلِمَ نّ.»

6 عِسَ تٌ نُ نَ بٍتَنِ، سِمْن كُنّ كَنيِ شْنيِ، 7 فِنّ ندٍ نَشَ قَ عَ يِرٍ. لَبُندّ تُرٍ نُ نَ عَ يِ رَ، نَشَن سَرٍ شْرْشْ كِ قَنيِ. عَ نُ سَشِ عَ بِتِرّ تٌقَنيِ كُي نَشَن نُ رَقَلَشِ عَلَبَتِرَ فّمّ رَ. عِسَ نُ نَ تٍيبِلِ رَ تّمُي نَشّ، فِنّ نَشَ قَ، عَ نَ لَبُندّ تُرٍ عِقِلِ عِسَ شُنيِ مَ. 8 عِسَ قْشِرَبِرّيٍ تٌ نَ تٌ، عٍ نَشَ شْنْ، عٍ عَ قَلَ، «يِ بِرِن مَكَنَشِ مُنقٍ رَ؟ 9 شَ يِ لَبُندّ تُرٍ سَ مَتِ نُ، كْبِرِ فبٍفبٍ نَن سْتْمَ نُ عَ شَ قٍ رَ، نَ قَن نْ قِدٍ سٍتَرٍيٍ مَ.»

10 عِسَ تٌ نُ عَ كٌلٌن عٍ نَشَن قَلَقٍ عٍ بٌرٍ بّ، عَ نَشَ عَ مَسٍن عٍ بّ، «وٌ نَ يِ فِنّ تْورْقٍ مُنقٍ رَ؟ كّوَلِ قَنيِ نَن يِ كِ، عَ نَشَن نَبَشِ ﭑ بّ. 11 سٍتَرٍيٍ لُمَ نّ وٌ يَ مَ تّمُي بِرِن، كْنْ ﭑ تَن مُ لُمَ وٌ يِ رَ بٍ عَبَدَن شّ. 12 يِ فِنّ تٌ لَبُندّ تُرٍ سَشِ ﭑ قَتٍ مَ، عَ عَ رَبَشِ ﭑ قُرٍ رَفَتَقٍ نَن شَ قٍ مَ. 13 ﭑ شَ نْندِ قَلَ وٌ بّ، عَلَ شَ شِبَارُ قَنيِ سَ كَوَندِ مَ دّدّ دُنِحَ بِرِن كُي، يِ فِنّ شَ كّوَلِ شَ قٍ قَن قَلَمَ نّ، مِشِيٍ شَ عٍ رَتُ عَ شَ قٍ مَ.»

14 نَ تّمُي، يُدَ سِ عِسِكَرِيٌتِ، نَشَن نُ نَ عِسَ قْشِرَبِرّ قُ نُن قِرِنيِيٍ يَ مَ، عَ نَشَ سِفَ سّرّشّدُبّ كُنتِفِيٍ شْن مَ، 15 عَ عٍ مَشْرِن، «وٌ مُنسٍ سٌمَ ﭑ يِ ﭑ شَ عِسَ سَ وٌ بّلّشّ؟» عٍ قَن نَشَ فبٍتِ كٌلٍ تٌنفٌ سَشَن سٌ عَ يِ. 16 كٍلِ نَ تّمُي مَ، عَ نَشَ سٌ وَشَتِ قٍنقٍ عَ نْمَ عِسَ سٌدٍ عٍ يِ رَ تّمُي نَشّ.

17 تَامِ لّبِنِتَرٍ سَلِ تٌ عَ لِ، عَ لْشْي سِنفٍ مَ، عِسَ قْشِرَبِرّيٍ نَشَ سَ عَ مَشْرِن، «عِ وَ مَ مُشُ شَ سَيَمَلٍكّ دَنفِ سَلِ دٌنيِ رَقَلَ عِ بّ مِندٍن؟» 18 عَ نَشَ عٍ يَابِ، «وٌ سِفَ تَا كُي شّمّ ندٍ شْن، وٌ عَ قَلَ عَ بّ، ‹كَرَ مْشْ نَشّ عَ عَ شَ وَشَتِ بَرَ مَكْرّ. عَ وَ مَ سَيَمَلٍكّ دَنفِ سَلِ رَبَقٍ عِ شْنيِ، عَ نُن عَ قْشِرَبِرّيٍ.›» 19 عِسَ قْشِرَبِرّيٍ نَشَ عَ رَبَ عَلْ عِسَ عٍ يَمَرِ كِ نَشّ، عٍ سَيَمَلٍكّ دَنفِ سَلِ دٌنيِ رَقَلَ.

20 نُنمَرٍ تٌ سٌ، عِسَ نُن عَ قْشِرَبِرّ قُ نُن قِرِنيِيٍ نُ نَ تٍيبِلِ رَ. 21 عٍ نُ عٍ دّفٍقٍ تّمُي نَشّ، عَ نَشَ عَ مَسٍن، «ﭑ شَ نْندِ قَلَ وٌ بّ، مِشِ كٍرٍن نَ وٌ يَ مَ نَشَن قَمَ ﭑ يَنقَدٍ.» 22 نَ نَشَ عٍ سُننُن كِ قَنيِ، كَنكَن نَشَ عَ مَشْرِن، «كْنْ ﭑ مَرِفِ، ﭑ تَن مُ عَ رَ دٍ، كَ؟» 23 عَ نَشَ عٍ يَابِ، «ﭑ نُن نَشَن بَرَ بّلّشّ رَفٌرٌ ثَانِ كٍرٍن كُي، نَ كَنيِ نَن ﭑ يَنقَمَ. 24 عَدَ مَ شَ دِ سِفَمَ نّ عَلْ عَ شَ قٍ سّبّشِ كِ نَشّ، كْنْ فبَلٌي نَن نَ عَدَ مَ شَ دِ يَنقَمَ بّ. عَ قِسَ نَ كَنيِ بّ هَلِ عَ مُ بَرِ نُ.» 25 يُدَ سِ نَشَن نُ قَقٍ عَ يَنقَدٍ، عَ نَشَ عِسَ مَشْرِن، «كَرَ مْشْ، ﭑ تَن مُ عَ رَ دٍ، كَ؟» عِسَ نَشَ عَ يَابِ، «عِ تَن نَن عَ قَلَشِ.»

26 عٍ تٌ نُ عٍ دّفٍقٍ، عِسَ نَشَ تَامِ تٌنفٌ. عَ تٌ تَنتُي رَ سِفَ عَلَ مَ، عَ نَشَ تَامِ عِفِرَ، عَ عَ سٌ عَ قْشِرَبِرّيٍ يِ رَ، عَ عَ مَسٍن عٍ بّ، عَ نَشّ، «وٌ ﭑ كٌ، وٌ عَ دٌن. يِ قِندِشِ ﭑ قَتٍ نَن نَ.» 27 نَ دَنفِ شَنبِ، عِسَ نَشَ تْنبِلِ قَن تٌنفٌ. عَ مَن تٌ تَنتُي رَ سِفَ عَلَ مَ، عَ نَشَ تْنبِلِ سٌ عٍ يِ رَ، عَ عَ قَلَ عٍ بّ، «وٌ بِرِن شَ عَ مِن. 28 يِ قِندِشِ ﭑ وُلِ نَن نَ، سَاتّ وُلِ نَشَن بَشِ مِشِ فبٍفبٍ بّ عٍ شَ يُنُبِيٍ شَقَرِقٍ رَ. 29 ﭑ شَ عَ قَلَ وٌ بّ، ﭑ تٌ يِ وّنِ مِنمَ، ﭑ مُ يِ مِنمَ سْنْن، هَن وٌن بِرِن مَن سَ عَ مِنمَ لْشْ نَشّ ﭑ بَبَ شْنيِ عَرِيَننَ.»

30 عٍ تٌ فّ بّيتِ بَدٍ، عٍ نَشَ تٍ عٌلِوِ فٍيَ قَرِ.

31 نَ تّمُي عِسَ نَشَ عَ مَسٍن عٍ بّ، «وٌ بِرِن فبِلٍنمَ نّ ﭑ قْشْ رَ تٌ كْي رَ، وٌ مّي ﭑ مَ قٍ رَ، بَرِ مَ عَ سّبّشِ، ‹ﭑ شُرُ سٍ دّ مَدٌنيِ قَشَمَ نّ، يّشّييٍ قَن يٍنسٍن.› 32 كْنْ ﭑ نَ كٍلِ قَشّ مَ، ﭑ سِفَمَ وٌ يَ رَ فَلِلٍ.» 33 ثِيّرِ نَشَ عَ قَلَ عَ بّ، «هَلِ بِرِن فبِلٍن عِ قْشْ رَ، ﭑ تَن مُ فبِلٍنمَ عِ قْشْ رَ.» 34 عِسَ نَشَ ثِيّرِ يَابِ، «ﭑ شَ نْندِ قَلَ عِ بّ، تٌ كْي يَتِ، بٍينُن كٌنكٌرٍ شَ عَ رَتٍ، عِ عِ يّتّ رَ سَنمَ نّ ﭑ مَ سَنمَيَ سَشَن.» 35 ثِيّرِ مَن نَشَ عَ يَابِ، «هَلِ وٌن بِرِن نَن سَ قَشَمَ، ﭑ مُ ﭑ يّتّ رَ سَنمَ عِ مَ!» عِسَ قْشِرَبِرّ بِرِن نَشَ نَ وْيّن كٍرٍن قَلَ.

36 نَ دَنفِ شَنبِ عِسَ نُن عَ قْشِرَبِرّيٍ نَشَ سِفَ يِرٍ ندٍ، دّننَشّ شِلِ فٍتٍسٍمَنِ. عِسَ نَشَ عَ قَلَ عٍ بّ، «وٌ دْشْ بٍ. ﭑ تَن شَ سِفَ مّننِ عَلَ مَشَندِدٍ.» 37 عَ نَشَ ثِيّرِ نُن سٍبٍدٍ شَ دِ قِرِنيِيٍ شَنِن عَ شُن مَ. سُننُنيِ نُن كْنتْقِلِ تٌ عِسَ بْحّ سُشُ، 38 عَ نَشَ عَ مَسٍن عٍ بّ، «سُننُنيِ بَرَ نْ ﭑ بْحّ رَ عَلْ عَ شَ ﭑ قَشَ. وٌ لُ بٍ، كْنْ وٌ نَشَ شِ.»

39 عِسَ نَشَ عَ مَسِفَ دٌندٌرٌنتِ، عَ عَ يَتَفِ رَقٍلٍن بْشِ مَ، عَ عَلَ مَشَندِ، «ﭑ بَبَ، شَ عَ سَ نْمَ رَبَدٍ، عِ شَ ﭑ نَتَنفَ يِ حَشَنكَتّ مَ. كْنْ ﭑ سَفٌ نَشَ رَبَ، عِ تَن نَن سَفٌ شَ رَبَ.» 40 عَ تٌ فبِلٍن عَ قْشِرَبِرّيٍ يِرٍ، عَ نَشَ عٍ لِ عٍ نَ شِقٍ. عَ نَشَ عَ قَلَ ثِيّرِ بّ، «عِ مُ نْشِ وَشَتِ كٍرٍن شِ شْلِ كَنَدٍ ﭑ مَ قٍ رَ؟ 41 وٌ نَشَ شِ. وٌ عَلَ مَشَندِ نّ عَلَكٌ وٌ نَشَ بِرَ تَنتَنيِ كُي. مَحْشُن قَنيِ نَ عَدَ مَ بّ، كْنْ عَ قَتٍ بّندّ تَن سّنبّ مُ نَ.»

42 عِسَ مَن تٌ عَ مَسِفَ عٍ رَ، عَ نَشَ فبِلٍن عَلَ مَشَندِ رَ، «ﭑ بَبَ، شَ يِ حَشَنكَتّ مُ نْمَ بَدٍ ﭑ يِ رَ، قٌ ﭑ شَ تِن عَ رَ، عِ سَفٌ نَن شَ رَبَ.» 43 عَ تٌ فبِلٍن عَ قْشِرَبِرّيٍ يِرٍ، عَ مَن نَشَ عٍ لِ عٍ شِقٍ، بَرِ مَ شِ شْلِ نُ بَرَ نْ عٍ رَ. 44 عَ نَشَ عٍ لُ نَا، عَ سِفَ سَنمَيَ سَشَن ندٍ، عَ سَ عَلَ مَشَندِ نَ مَشَندِ كٍرٍنيِ رَ. 45 نَ تّمُي، عَ نَشَ فبِلٍن عَ قْشِرَبِرّيٍ يِرٍ، عَ عَ مَسٍن عٍ بّ، «وٌ شِقٍ نّ؟ وٌ نَ وٌ مَلَبُقٍ هَن يَ؟ وٌ عَ مَتٌ، وَشَتِ بَرَ عَ لِ. عَدَ مَ شَ دِ قَقٍ سَدٍ يُنُبِتْييٍ بّلّشّ. 46 وٌ كٍلِ، وٌن شّي. وٌ عَ مَتٌ، ﭑ يَنقَمَ بَرَ قَ.»

47 عِسَ حَن مُ نُ فّشِ وْيّندٍ، يُدَ سِ، نَشَن نُ نَ عَ قْشِرَبِرّ قُ نُن قِرِنيِيٍ يَ مَ، عَ نَشَ قَ عٍ نُن حَمَ فبٍفبٍ، سَنتِدّفّمَيٍ نُن فبٍنفبٍتَيٍ سُشُشِ عٍ يِ رَ. سّرّشّدُبّ كُنتِفِيٍ نُن يُوِقِيٍ شَ قٌرِيٍ نَن نُ عٍ شّيشِ. 48 عِسَ يَنقَمَ نُن نَ حَمَ نُ بَرَ لَن عَ مَ، عَ عَ شَ عِسَ مَتْنشُمَ عٍ بّ. عَ نُ بَرَ عَ قَلَ عٍ بّ، «ﭑ نَ مِشِ نَشَن سُنبُ، عَ تَن نَن نَ كِ. وٌ نَ سُشُ.» 49 نَ كُي، يُدَ سِ نَشَ عَ مَسٌ عِسَ رَ كٍرٍن نَ، عَ عَ قَلَ، «كَرَ مْشْ، عِ نُوَلِ،» عَ قَ عَ سُنبُ. 50 عِسَ نَشَ عَ مَسٍن عَ بّ، «ﭑ بٌورٍ، عِ قَشِ نَشَن نَبَدٍ، عَ رَبَ.» نَ تّمُي، نَ مِشِيٍ نَشَ عٍ مَسٌ عِسَ رَ، عٍ عَ سُشُ. 51 عِسَ قْشِرَبِرّ ندٍ نَشَ عَ شَ سَنتِدّفّمَ رَ مِنِ، عَ سّرّشّدُبّ كُنتِفِ شَ كٌنيِ تُلِ بٌلٌن. 52 عِسَ نَشَ عَ قَلَ عَ بّ، «سَنتِدّفّمَ رَ سٌ عَ تّي عِ. نَشَن يٌ نَ قِندِ عَ شَ فٍرٍ سٌسٍ رَ، نَ كَنيِ قَن قَشَمَ سَنتِدّفّمَ نَن سَابُي رَ. 53 كَ عِ حْشْ عَ مَ عَ ﭑ مُ نْمَ ﭑ بَبَ شِلِدٍ، عَ مَلٍكّيٍ رَ سَنبَ ﭑ مَ كٍرٍن نَ، نَشٍيٍ دَنفِ مَلٍكّ فَلِ قُ نُن قِرِن نَ؟ 54 كْنْ شَ نَ رَبَ، كِتَابُييٍ شَ مَسٍنيِيٍ قَ كَمَلِمَ دِ؟ بَرِ مَ عٍ عَ مَسٍنشِ نّ عَ قٌ عَ شَ رَبَ يِ كِ نّ.»

55 نَ شَنبِ، عِسَ نَشَ عَ قَلَ حَمَ بّ، «وٌ تٌ مِنِشِ ﭑ شِلِ مَ سَنتِدّفّمَ نُن فبٍنفبٍتَ سُشُشِ وٌ يِ رَ، سُوتٍ نَن نَ ﭑ نَ؟ لْشْ يٌ لْشْ، ﭑ دْشْشِ هْرْ مْبَنشِ كُي، ﭑ كَوَندِ تِمَ، وٌ مُ ﭑ سُشُ. 56 كْنْ يِ بِرِن نَبَشِ نّ عَلَكٌ نَمِحْنمّيٍ نَشَن سّبّشِ كِتَابُي كُي، عَ شَ كَمَلِ.»

نَ شَنبِ، عِسَ قْشِرَبِرّيٍ بِرِن نَشَ عٍ فِ عَ شُن مَ.

57 مِشِ نَشٍيٍ عِسَ سُشُ، عٍ نَشَ عَ شَنِن سّرّشّدُبّ كُنتِفِ كَيَقَ شْنيِ، سّرِيّ كَرَ مْشْيٍ نُن قٌرِيٍ نُ مَلَنشِ دّننَشّ. 58 ثِيّرِ قَن، عَ نُ بِرَشِ عِسَ قْشْ رَ، كْنْ عَ ندٍدِ نُ مَكُيَشِ حَمَ رَ. عَ نَشَ بِرَ عَ قْشْ رَ هَن عَ سٌ سّرّشّدُبّ كُنتِفِيٍ شُنيِ شَ تّتّ كُي. عَ نَشَ دْشْ هْرْ مْبَنشِ كَنتَمَيٍ قّ مَ، عَلَكٌ عَ شَ عَ مَتٌ عِسَ شَ قٍ دَنفِمَ كِ نَشّ.

59 سّرّشّدُبّ كُنتِفِيٍ نُن يُوِقِيٍ شَ كِيتِسَ دْنشْي بِرِن، عٍ نُ وُلٍ سٍيدٍ ندٍ نَن قٍنقٍ نَشَن بَمَ عِسَ شِلِ مَ، عٍ سَ نْمَ عَ قَشَدٍ نَشَن مَ. 60 كْنْ عٍ مُ سٍ تٌ، هَلِ تْوحّفّتِ فبٍفبٍ تٌ قَ. عَ دْنشْي رَ، شّمّ قِرِن نَشَ قَ، 61 عٍ عَ قَلَ، «يِ شّمّ عَ قَلَ نّ، ‹ﭑ تَن نْمَ عَلَ شَ هْرْ مْبَنشِ كَنَدٍ، ﭑ مَن قَ عَ تِ شِ سَشَن بُن مَ.›» 62 سّرّشّدُبّ كُنتِفِ شُنيِ نَشَ كٍلِ، عَ عِسَ مَشْرِن، «ثٍ، عِ مُ عٍ يَابِمَ؟ يِ شّمّيٍ مُنسٍ سَقٍ عِ شُن مَ يِ كِ؟» 63 كْنْ عِسَ مُ سٍسٍ قَلَ. سّرّشّدُبّ كُنتِفِيٍ شُنيِ نَشَ عَ قَلَ عَ بّ، «ﭑ بَرَ عِ يَمَرِ عِ شَ عِ كَلِ عَلَ حِحّ رَ، عِ عَ قَلَ مُشُ بّ شَ عِ قِندِشِ عَلَ شَ مِشِ سُفَندِشِ نَن نَ، عَلَ شَ دِ.» 64 عِسَ نَشَ عَ يَابِ، «عِ تَن نَن عَ قَلَشِ. ﭑ مَن شَ عَ قَلَ وٌ بّ، كٍلِ يِ وَشَتِ مَ، وٌ قَمَ عَدَ مَ شَ دِ تٌدٍ، عَ دْشْشِ عَلَ سّنبّمَ يِرٍقَنيِ مَ، وٌ عَ تٌمَ قَ رَ نُشُييٍ كُي.»

65 نَ كُي، سّرّشّدُبّ كُنتِفِ نَشَ عَ يّتّ شَ دٌنمَ سُشُ، عَ عِبْو شْنّ رَ، عَ عَ قَلَ، «عَ بَرَ عَلَ رَ سْتْ! وٌن هَيِ نَ سٍيدٍ فبّتّيٍ مَ يِرٍ؟ وٌ بَرَ عَ مّ عَ عَلَ رَ سْتْشِ كِ نَشّ. 66 وٌ كِيتِ تٌشِ دِ؟» عٍ نَشَ عَ يَابِ، «عَ لَنمَ عَ شَ قَشَ نّ.» 67 نَ تّمُي، عٍ نَشَ دّيٍ بْشُن عِسَ يَتَفِ، عٍ كَمُي سِن عَ مَ. ندٍيٍ نَشَ عَ دّ رَفَرِن، عٍ نُ عَ قَلَ، 68 «عِ تَن، عَلَ شَ مِشِ سُفَندِشِ، نَمِحْنمّحَ رَبَ! عَ قَلَ بَ، نَشَن عِ بْنبْشِ!»

69 ثِيّرِ نُ دْشْشِ تَندٍ، سّرّشّدُبّ كُنتِفِ شَ تّتّ كُي. كٌنيِ فِنّ ندٍ نَشَ عَ مَكْرّ عَ رَ، عَ عَ قَلَ، «عِ تَن، وٌ نُن عِسَ فَلِلٍكَ بِرِن نَن نُ عَ رَ.» 70 كْنْ ثِيّرِ نَشَ عَ مَتَندِ بِرِن يَ شْرِ، عَ عَ قَلَ، «ﭑ مُ عَ كٌلٌن عِ نَ قٍقٍ قَلَقٍ!» 71 ثِيّرِ تٌ مِنِ قْلْ تّتّ نَادّ رَ، كٌنيِ فِنّ فبّتّ ندٍ نَشَ عَ تٌ، عَ عَ قَلَ مِشِيٍ بّ نَشٍيٍ نُ نَ نَا، «يِ شّمّ نَشَن يِ كِ، عٍ نُن عِسَ نَسَرّتِكَ نَن نُ عَ رَ.» 72 ثِيّرِ مَن نَشَ عَ مَتَندِ، عَ عَ كَلِ، «ﭑ مُ نَ شّمّ كٌلٌن!» 73 عَ مُ بُ، نَشٍيٍ نُ تِشِ نَا، عٍ نَشَ عٍ مَسٌ ثِيّرِ رَ، عٍ عَ قَلَ عَ بّ، «نْندِ نَن عَ رَ، عَ تَن مِشِ ندٍ نَن يَتِ عِ رَ، بَرِ مَ عِ وْيّنمَ عَلْ فَلِلٍكَ.» 74 ثِيّرِ نَشَ سٌ عَ كَلِقٍ، عَ عَ قَلَ «عَلَ شَ ﭑ دَنكَ! ﭑ تَن مُ نَ شّمّ كٌلٌن قٍوٌ!» نَ قَلَ شَنبِ، كٌنكٌرٍ نَشَ عَ رَتٍ. 75 ثِيّرِ نَشَ رَتُ قَ عِسَ شَ وْيّنيِ مَ، «بٍيمَنُن كٌنكٌرٍ شَ عَ رَتٍ، عِ عِ يّتّ رَ سَنمَ نّ ﭑ مَ سَنمَيَ سَشَن.» نَ كُي، عَ نَشَ مِنِ، عَ سَ وَ هَن.