1 نَ تّمُي عِسَ قْشِرَبِرّيٍ نَشَ عٍ مَسٌ عِسَ رَ، عٍ عَ مَشْرِن، «ندٍ بِنيَشِ دَنفِ بِرِن نَ عَلَ شَ مَنفّيَ نِينِ بُن مَ؟» 2 عِسَ نَشَ دِ مّدِ ندٍ شِلِ، عَ عَ تِ عٍ تَفِ، 3 عَ عَ مَسٍن عٍ بّ، «ﭑ شَ نْندِ قَلَ وٌ بّ، شَ وٌ مُ وٌ يّتّ مَفٌرٌ، وٌ لُ عَلْ دِ مّدِيٍ، وٌ مُ سٌمَ عَلَ شَ مَنفّيَ نِينِ بُن مَ. 4 نَ كُي، مِشِ يٌ نَشَن عَ يّتّ مَفٌرٌ مَ عَلْ دِ مّدِ، نَ نَن قِندِشِ مِشِ شُنفبٍ رَ دَنفِ بِرِن نَ عَلَ شَ مَنفّيَ نِينِ بُن مَ. 5 مِشِ يٌ نَشَن يِ دِ مّدِ مْولِ رَ سّنّمَ ﭑ شِلِ رَ، نَ كَنيِ بَرَ ﭑ تَن يّتّ يَتِ رَ سّنّ.»

6 «مِشِ يٌ يِ مِشِ شُرِ كٍرٍن نَتَنتَن، نَشَن دَنشَنِيَشِ ﭑ مَ، عَ قِسَ نَ كَنيِ بّ فّمّ بِنيٍ شَ شِرِ عَ كْن مَ، عَ رَ سِن بَا مَ. 7 فبَلٌي نَ دُنِحَ مِشِيٍ بّ عٍ شَ مَرَتَنتَنيِ شَ قٍ رَ. عَ قّيرّ مُ نَ تَن، قٌ مَرَتَنتَنيِ شَ مِنِ، كْنْ فبَلٌي نَ مِشِ بّ نَشَن قِندِ مَ نَ سَابُي رَ. 8 شَ عِ بّلّشّ، شَ نَ مُ عِ سَنيِ قِندِ عِ رَتَنتَنسٍ رَ، عَ بٌلٌن، عِ عَ وْلّ. عِ سٌقٍ عَرِيَننَ عِ بّلّشّ، شَ نَ مُ عِ سَنيِ بٌلٌنشِ، نَ قِسَ عِ بّ دِنّ عِ بّلّشّ قِرِن نُن عِ سَنيِ قِرِن لُشِ نَ، كْنْ عِ وٌلِ يَهَننَمَ، تّ مُ شُبٍنمَ دّننَشّ. 9 شَ عِ يَ قِندِ عِ رَتَنتَنسٍ رَ، عَ بَ نَ، عِ عَ وْلّ. عِ سٌقٍ عَرِيَننَ عِ يَ كٍرٍن كَنَشِ، نَ قِسَ عِ بّ دِنّ عِ يَ قِرِن لُ نَ، كْنْ عِ وٌلِ يَهَننَمَ.»

10‏-11 «وٌ نَشَ يٌ يِ مِشِ شُرِ سٍسٍ مَ، بَرِ مَ ﭑ شَ عَ قَلَ وٌ بّ، عٍ شَ مَلٍكّيٍ ﭑ بَبَ يَتَفِ تٌمَ تّمُي بِرِن، نَشَن نَ عَرِيَننَ.»

12 «وٌ عَ تٌشِ دِ؟ شَ يّشّي كّمّ نَ مِشِ ندٍ يِ رَ، كٍرٍن قَ لْي عٍ يَ مَ، عَ مُ نَ يّشّي تٌنفٌ سٌلٌمَنَانِ نُن سٌلٌمَنَانِ لُمَ شّ فٍيَ قَرِ، عَ سِفَ نَ كٍرٍنيِ قٍندٍ؟ 13 ﭑ شَ نْندِ قَلَ وٌ بّ، شَ عَ سَ عَ تٌ، عَ حّلّشِنمَ نّ نَ يّشّي كٍرٍنيِ شَ قٍ رَ، دَنفِقٍ يّشّي تٌنفٌ سٌلٌمَنَانِ نُن سٌلٌمَنَانِ بٌورٍ رَ، نَشٍيٍ مُ لْي. 14 عَ نَ نَ كِ نّ قَن، وٌ بَبَ نَشَن نَ عَرِيَننَ، عَ مُ تِنمَ يِ مِشِ شُرِ سٍسٍ شَ لْي.»

15 «شَ عِ نفَشَكٍرٍنيِ بَرَ هَاكّ سْتْ عِ رَ، سِفَ، وٌ قِرِن شَ سَ لُ يِرٍ كٍرٍن، عِ شَ عَ مَسٍن عَ بّ عَ تَنتَنشِ كِ نَشّ. شَ عَ سَ عِ شُي مّ، عِ نفَشَكٍرٍنيِ بَرَ رَفبِلٍن عِ مَ. 16 كْنْ شَ عَ تٌندِ عِ شُي مّدٍ، عِ شَ مِشِ كٍرٍن شَ نَ مُ مِشِ قِرِن قٍن، وٌ بِرِن شَ سِفَ عَ يِرٍ عَلَكٌ كِيتِ شَ سَ سٍيدٍ قِرِن، شَ نَ مُ سٍيدٍ سَشَن شُي مَ. 17 شَ عَ تٌندِ نٍيٍ قَن شُي مّدٍ، نَ قٍ مَسٍن دَنشَنِيَتْي حَمَ بّ. شَ عَ تٌندِ دَنشَنِيَتْي حَمَ شُي قَن مّدٍ، عَ شَ لُ وٌ بّ عَلْ كَاقِرِ، شَ نَ مُ عَ رَ، دُوتِ مَشِلِ. 18 ﭑ شَ عَ قَلَ وٌ بّ عَ نْندِ كِ مَ، وٌ نَ نَشَن شِرِ دُنِحَ، عَ شِرِ مَ نّ كٌورٍ قَن مَ. وٌ نَ نَشَن قُلُن دُنِحَ، عَ قُلُنمَ نّ كٌورٍ قَن مَ. 19 ﭑ مَن شَ عَ قَلَ وٌ بّ، شَ مِشِ قِرِن لَن قٍقٍ مَ وٌ يَ مَ يِ دُنِحَ مَ، عٍ عَلَ مَشَندِ، ﭑ بَبَ نَشَن نَ عَرِيَننَ، عَ نَ قٍ رَبَمَ نّ عٍ بّ. 20 مِشِ قِرِن، شَ نَ مُ عَ رَ مِشِ سَشَن نُ مَلَن ﭑ شِلِ رَ دّدّ، ﭑ نَ عٍ يَ مَ.»

21 نَ تّمُي، ثِيّرِ نَشَ عَ مَسٌ عِسَ رَ، عَ عَ قَلَ عَ بّ، «ﭑ مَرِفِ، ﭑ لَنمَ ﭑ شَ دِحّ ﭑ نفَشَكٍرٍنيِ شَ هَاكّ مَ سَنمَيَ يٍرِ؟ هَن سَنمَيَ سٌلٌقٍرٍ؟» عِسَ نَشَ عَ يَابِ، 22 «ﭑ شَ عَ قَلَ عِ بّ، سَنمَيَ سٌلٌقٍرٍ شَ مُ عَ رَ دٍ! عِ شَ دِحّ عَ مَ سَنمَيَ سٌلٌقٍرٍ دْشْ تٌنفٌ سٌلٌقٍرٍ.»

23 «عَلَ شَ مَنفّيَ مَنِيَشِ مَنفّ ندٍ نَن نَ، نَشَن نُ وَ مَ عَ شَ كْبِرِ قٍ يَ عِبَقٍ عَ تَن نُن عَ شَ وَلِكّيٍ تَفِ. 24 عَ تٌ عَ قْلْ، عٍ نَشَ قَ عَ شَ وَلِكّ ندٍ رَ عَ شْن، مَنفّ شَ دٌنِ نُ نَشَن مَ هَن فبٍتِ كِلٌ وُلُ كّمّ سَشَن، كِلٌ وُلُ تٌنفٌ نَانِ. 25 كٌنيِ تٌ مُ نُ نْمَ عَ شَ دٌنِ قِدٍ، عَ شَ مَنفّ نَشَ يَامَرِ قِ، عَ تَن يٌ، عَ شَ فِنّ يٌ، عَ شَ دِيٍ يٌ، عٍ نُن عَ هَرِفٍ بِرِن شَ مَتِ عَلَكٌ نَ دٌنِ شَ قِ. 26 نَ وَلِكّ نَشَ عَ عِفٌرٌ بْشِ، عَ سُيِدِ مَنفّ بّ، عَ عَ مَشَندِ، ‹يَندِ، دِحّ ﭑ مَ. ﭑ قَمَ عِ شَ دٌنِ بِرِن قِدٍ.› 27 نَ كُي، مَنفّ نَشَ كِنِكِنِ عَ شَ وَلِكّ مَ، عَ دِحّ نَ دٌنِ بِرِن مَ، عَ عَ شَ وَلِكّ رَبّحِن.»

28 «كْنْ عَ تَن وَلِكّ تٌ مِنِ، عَ نَشَ عَ بٌورٍ وَلِكّ ندٍ تٌ عَ شَ فبٍتِ كِلٌ تَفِ دٌنِ نُ نَ نَشَن مَ. عَ نَشَ بَفَن عَ مَ، عَ عَ كْنيِ دٍكُن، عَ سْنشْ عَ رَ، ‹ﭑ مَ دٌنِ قِ!› 29 عَ بٌورٍ نَشَ سُيِدِ عَ بّ، عَ عَ مَشَندِ، ‹يَندِ، دِحّ ﭑ مَ. ﭑ عِ شَ دٌنِ قِمَ.› 30 كْنْ عَ نَشَ تٌندِ. عَ نَشَ عَ رَ سٌ فٍيلِ كُي، عَ شَ لُ مّننِ هَن عَ شَ فّ دٌنِ قِدٍ.»

31 «عَ بٌورٍ وَلِكّيٍ تٌ نَ تٌ، عٍ نَشَ كِنِكِنِ. عٍ نَشَ نَ بِرِن دّنتّفّ سَ مَنفّ بّ نَشَن نُ عٍ بِرِن شُن مَ. 32 نَ كُي، مَنفّ نَشَ نَ وَلِكّ سِنفٍ شِلِ، عَ عَ قَلَ عَ بّ، ‹عِ تَن وَلِكّ كٌبِ! عِ تٌ ﭑ مَيَندِ، ﭑ تَن دِحّ نّ عِ شَ دٌنِ بِرِن مَ. 33 عَ دِ، عَ مُ لَنمَ شّ نُ عِ قَن شَ كِنِكِنِ عِ بٌورٍ مَ، عَلْ ﭑ كِنِكِنِشِ عِ تَن مَ كِ نَشّ؟› 34 عَ شَ مَنفّ تٌ شْنْ عَ مَ، عَ نَشَ عَ سٌ كْسِبِلِيٍ يِ، عٍ شَ عَ سَ فٍيلِ، عٍ شَ عَ حَشَنكَتَ هَن عَ شَ فّ دٌنِ بِرِن قِدٍ.»

35 «ﭑ بَبَ نَشَن نَ عَرِيَننَ، عَ نَ نَن نِيَمَ وٌ قَن نَ، شَ وٌ مُ دِحّ وٌ نفَشَكٍرٍنيِ مَ وٌ بْحّ بِرِن نَ.»