1 يُدَيَ مَنفّ سٍدٍكِيَ شَ مَنفّيَ حّ نَانِ، كِكٍ سُولِ ندٍ رَ، عَسُرُ شَ دِ عَننَبِ شَنَنِيَ فَبَيٌنكَ نَشَ وْيّن عَلَتَلَ شَ هْرْ مْبَنشِ كُي سّرّشّدُبّيٍ نُن حَمَ يَ شْرِ. 2 عَ نَشّ، «عِسِرَيِلَ مَرِفِ عَلَتَلَ بَرَ عَ مَسٍن، ‹ﭑ قَمَ نّ بَبِلْن مَنفّ شَ يَامَرِ كَنَدٍ. 3 بٍينُن حّ قِرِن شَ كَمَلِ، ﭑ مَن قَمَ نّ عَلَتَلَ شَ هْرْ مْلِنفِرَ شُنمَسٍ بِرِن نَفبِلٍندٍ بٍ، بَبِلْن مَنفّ نٍبُكَدَنسَرِ نَشَن تٌنفٌ، عَ عٍ شَنِن بَبِلْن بْشِ مَ. 4 عَلَتَلَ شَ مَسٍنيِ نَن يَ، ﭑ مَن قَمَ نّ يٍهٌيَكِمِ شَ دِ، يُدَيَ مَنفّ يٍهٌيَكِنِ رَفبِلٍندٍ، عَ نُن مِشِ بِرِن نَشٍيٍ نُ شَنِنشِ بَبِلْن. ﭑ بَبِلْن مَنفّ شَ يَامَرِ كَنَمَ نّ.›»

5 عَننَبِ يٍرٍ مِ نَشَ عَننَبِ شَنَنِيَ يَابِ سّرّشّدُبّيٍ نُن حَمَ يَ شْرِ عَلَتَلَ شَ هْرْ مْبَنشِ كُي. 6 عَننَبِ يٍرٍ مِ نَشَ عَ قَلَ، «عَمِنَ، عَلَتَلَ شَ عَ رَبَ نَ كِ. عَلَتَلَ شَ عِ شَ مَسٍنيِ رَكَمَلِ. عَ شَ عَ شَ هْرْ مْبَنشِ شُنمَسٍيٍ رَفبِلٍن بٍ كٍلِقٍ بَبِلْن بْشِ مَ، عَ نُن عِسِرَيِلَ حَمَ نَشٍيٍ نَ كٌنيِيَ كُي مّننِ. 7 كْنْ ﭑ شَ عَ قَلَ عِ بّ، عَ نُن حَمَ بِرِن بّ، وٌ شَ وٌ تُلِ مَتِ ﭑ نَ. 8 كَبِ تّمُي شْننَكُيٍ بٍينُن وٌن مَ وَشَتِ، نَمِحْنمّيٍ بَرَ مَسٍنيِ تِ حَمَنّيٍ نُن مَنفّيَيٍ شِلِ مَ، عَ قَلَقٍ رَ عٍ شَ فٍرٍ سْتْ، تْورّ، نُن قُرٍ حَاشِ. 9 كْنْ شَ عَ سَ لِ نَمِحْنمّ ندٍ مَسٍنيِ تِ بْحّسَ شَ قٍ رَ، قٌ نَ مَسٍنيِ شَ كَمَلِ نّ بٍينُن مِشِيٍ شَ عَ كٌلٌن عَلَتَلَ نَن نَ نَمِحْنمّ شّيشِ.»

10 عَننَبِ شَنَنِيَ نَشَ كَرَقٌي بَ عَننَبِ يٍرٍ مِ كْن مَ، عَ نَشَ عَ عِفِرَ. 11 نَ كُي عَ نَشَ عَ قَلَ حَمَ بّ، «عَلَتَلَ شَ مَسٍنيِ نَن يَ. بٍينُن حّ قِرِن، ﭑ قَمَ نّ بَبِلْن مَنفّ نٍبُكَدَنسَرِ شَ يَامَرِ بَدٍ حَمَنّ بِرِن مَ.» عَننَبِ يٍرٍ مِ نَشَ سِفَ.

12 عَننَبِ شَنَنِيَ تٌ فّ عَننَبِ يٍرٍ مِ شَ كَرَقٌي عِفِرَدٍ، عَلَتَلَ نَشَ يِ مَسٍنيِ تِ عَننَبِ يٍرٍ مِ بّ، 13 «سِفَ، عِ سَ عَ قَلَ شَنَنِيَ بّ، ‹عَلَتَلَ بَرَ عَ مَسٍن عِ بّ، عِ بَرَ كَرَقٌي وُرِ دَاشِ عِفِرَ، كْنْ ﭑ قَمَ كَرَقٌي وُرٍ دَاشِ نَن نَفٌرٌدٍ عِ كْن مَ.› 14 عِسِرَيِلَ مَنفّ عَلَتَلَ شَ مَسٍنيِ نَن يَ، ‹ﭑ قَمَ كَرَقٌي وُرٍ دَاشِ نَن سَدٍ حَمَنّ بِرِن كْن مَ، عَلَكٌ عٍ شَ لُ بَبِلْن مَنفّ نٍبُكَدَنسَرِ شَ يَامَرِ بُن مَ. ﭑ مَن بَرَ وُلَءِ سُبٍ بِرِن سَ عَ سَفٌي.›»

15 عَننَبِ يٍرٍ مِ نَشَ عَ قَلَ شَنَنِيَ بّ، «عِ تُلِ مَتِ شَنَنِيَ. عَلَتَلَ شَ مُ عِ شّيشِ. عِ شَشِلِسَ وْيّنيِ نَشَن قَلَقٍ حَمَ بّ، عَ قِندِشِ وُلٍ نَن نَ. 16 عَلَتَلَ نَشَ عَ مَسٍن، ‹ﭑ شَ عَ قَلَ عِ بّ، ﭑ عِ كٍرِ مَ نّ يِ بْشِ مَ، عِ قَ قَشَ تٌوقَرٍ، بَرِ مَ عِ بَرَ عَلَتَلَ شَ مَسٍنيِ مَتَندِ.›» 17 عَننَبِ شَنَنِيَ نَشَ قَشَ نَ حّ كُي، كِكٍ سٌلٌقٍرٍ ندٍ.