46
يَشُبَ سِفَقٍ مِسِرَ
1 يَشُبَ نَشَ عَ هَرِفٍ بِرِن شَنِن عَ شُن مَ. عَ تٌ بٍرِ سٍيبَ لِ، عَ نَشَ سّرّشّ بَ عَ بَبَ عِسِيَفَ مَرِفِ عَلَتَلَ بّ. 2 عَلَ نَشَ عِسِرَيِلَ شِلِ شِيٍ كُي، «يَشُبَ، يَشُبَ.» عِسِرَيِلَ نَشَ عَ رَتِن، «ﭑ تَن نَن يَ.» 3 عَلَ نَشَ عَ مَسٍن عَ بّ، «ﭑ تَن نَن نَ عَلَ رَ، عِ بَبَ مَرِفِ عَلَ. هَلِ عِ مُ فَاشُ سِفَقٍ رَ مِسِرَ، بَرِ مَ ﭑ عِ قِندِ مَ سِ بٍلٍبٍلٍ نَن نَ. 4 وٌن بِرِن نَن سِفَمَ مِسِرَ، ﭑ تَن نَن مَن قَمَ عِ رَفبِلٍندٍ بٍ. يُسُقُ يَتِ نَن قَمَ عِ يَيٍ رَفَلِدٍ عِ حْن تّمُي.»
5 نَ كُي، يَشُبَ نَشَ كٍلِ بٍرِ سٍيبَ. عِسِرَيِلَ شَ دِيٍ نَشَ عٍ بَبَ يَشُبَ، عٍ شَ دِيٍ، عَ نُن عٍ شَ فِنّيٍ بَكِ فِسٍيٍ كُي، مِسِرَ مَنفّ نَشٍيٍ رَ سَنبَ. 6 عٍ نَشَ عٍ شَ شُرُ سٍيٍ تٌنفٌ، عَ نُن عٍ سٍ نَشَن بِرِن سْتْ كَنَان بْشِ مَ. يَشُبَ نَشَ سِفَ مِسِرَ عَ نُن عَ بْنسْي بِرِن. 7 عَ نَشَ عَ شَ دِيٍ نُن عَ شَ مَمَدِيٍ بِرِن شَنِن عَ شُن مَ. عَ نَشَ سِفَ عَ تَن نُن عَ بْنسْي بِرِن.
8 عِسِرَيِلَ شَ دِيٍ شِلِ نَن يَ نَشٍيٍ سِفَ مِسِرَ.
يَشُبَ نُن عَ شَ دِ شّمّيٍ شَ تَرُشُي نَن يَ؛
يَشُبَ شَ دِ سِنفٍ لَنشِ رُبٍن نَن مَ.
9 رُبٍن شَ دِيٍ نَن يَ؛
هَنٌكِ، ثَلُ، هٍسٍرٌن، نُن كَرِ مِ.
10 سِمٍيْن شَ دِيٍ نَن يَ؛
يٍمُوٍلِ، يَمِن، عٌهَدِ، يَكِن، سٌشَرَ، نُن سٌلِ.
سٌلِ قِندِ كَنَان فِنّ شَ دِ نَن نَ.
11 لٍوِ شَ دِيٍ نَن يَ؛
فٍرِ سٌن، كٌهَتَ، نُن مٍرَرِ.
12 يُدَ شَ دِيٍ نَن يَ؛
عٍرِ، عٌنَن، سٍلَهَ، ثٍرٍ سِ، نُن سٍرَ.
كْنْ عٍرِ نُن عٌنَن قَشَ كَنَان بْشِ نَن مَ.
ثٍرٍ سِ شَ دِيٍ قِندِ هٍسٍرٌن نُن هَمُلِ نَن نَ.
13 عِسَكَرِ شَ دِيٍ نَن يَ؛
تٌلَ، ثُوَ، يَسُبُ، نُن سِمِرٌن.
14 سَبُلٌن شَ دِيٍ نَن يَ؛
سٍرٍدِ، عٍلٌن، نُن يَشَلٍيلِ.
15 دِيٍ نَن نَ كِ، لٍيَ نَشٍيٍ بَرِ يَشُبَ بّ ثَدَن عَرَ مِ.
عَ مَن نَشَ عَ شَ دِ فِنّ دِنَ بَرِ نَا.
عَ شَ دِ شّمّيٍ نُن دِ فِنّيٍ
كْنتِ بِرِن نَلَنشِ مِشِ تٌنفٌ سَشَن عَ نُن سَشَن.
16 فَدِ شَ دِيٍ نَن يَ؛
سٍقٌن، هَفِ، سُنِ، عٍسِبٌن، عٍرِ، عَرٌدِ، نُن عَرٍلِ.
17 عَسٍرِ شَ دِيٍ نَن يَ؛
يِمِنَ، يِسِوَ، يِسِوِ، بٍرِيَ،
عَ نُن عٍ شُنيَ فِنّمَ سٍرَ.
بٍرِيَ شَ دِيٍ قِندِ هٍبٍرِ نُن مَلَكِيٍلِ نَن نَ.
18 دِيٍ نَن نَ كِ، سِلِثَ نَشٍيٍ بَرِ يَشُبَ بّ.
عٍ بِرِن نَلَنشِ مِشِ قُ نُن سٍننِ.
لَبَن نُ بَرَ سِلِثَ سٌ عَ شَ دِ فِنّ لٍيَ يِ رَ.
19 يَشُبَ شَ فِنّ رَشٍلٍ شَ دِيٍ نَن يَ؛
يُسُقُ نُن بُنيَمِن.
20 عَسٍنَ نَشَ دِ قِرِن سْتْ يُسُقُ بّ مِسِرَ بْشِ مَ؛
مَنَسِ نُن عٍقِرَ مِ.
عَسَنَ نَن لَنشِ عٌن سّرّشّدُبّ ثٌتِقَرِ شَ دِ فِنّ مَ.
21 بُنيَمِن شَ دِيٍ نَن يَ؛
بٍلَ، بٍكٍرِ، عَسِبٍلِ، فٍرَ، نَامَن،
عٍكِ، رٌ سِ، شُثِمِ، مُثِمِ، نُن عَرَدٍ.
22 دِيٍ نَن نَ كِ، رَشٍلٍ نَشٍيٍ بَرِ يَشُبَ بّ.
عٍ بِرِن نَلَنشِ مِشِ قُ نُن نَانِ.
23 دَنَ شَ دِ نَن يَ؛
شُسِمِ.
24 نَقَتَلِ شَ دِيٍ نَن يَ؛
يَشَسٍيلِ، فُنِ، يٍسٍرِ، نُن سِلٍمِ.
25 دِيٍ نَن نَ كِ، بِلَ نَشٍيٍ بَرِ يَشُبَ بّ.
عٍ بِرِن نَلَنشِ مِشِ سٌلٌقٍرٍ.
لَبَن نُ بَرَ بِلَ سٌ عَ شَ دِ فِنّ رَشٍلٍ يِ رَ.
26 يَشُبَ نُن مِشِ نَشٍيٍ بِرِن سِفَ مِسِرَ،
عَ بْنسْي بِرِن نَلَنشِ مِشِ تٌنفٌ سٍننِ نُن سٍننِ،
بَقٍ عَ شَ دِيٍ شَ فِنّيٍ رَ.
27 يُسُقُ دِ شّمّ قِرِن نَن بَرِ مِسِرَ.
يَشُبَ شَبِلّ نَشَن سِفَ مِسِرَ بْشِ مَ،
عٍ كْنتِ بِرِن نَلَنشِ مِشِ تٌنفٌ سٌلٌقٍرٍ.
28 يَشُبَ نَشَ يُدَ شّي عَ يَ رَ يُسُقُ شْن مَ، عَلَكٌ عَ شَ كِرَ يَءِلَن عٍ بّ سِفَقٍ رَ فٌسٍن. عٍ تٌ سٌ فٌسٍن بْشِ مَ، 29 يُسُقُ نَشَ عَ فِسٍ تٌنفٌ، عَ نَشَ سِفَ عَ بَبَ عِسِرَيِلَ رَلَندٍ نَا. عَ تٌ عَ لِ، عَ نَشَ قِندِفِلِن عَ مَ، عَ نُ قَ وَ رَ عَ شْنكُيٍ رَ. 30 عِسِرَيِلَ نَشَ عَ قَلَ يُسُقُ بّ، «هَلِ ﭑ قَشَ قَ، ﭑ بْحّ بَرَ سَ بَرِ مَ ﭑ بَرَ عِ يَتَفِ تٌ، عِ مَن نَ حّنفِقٍ.»
31 يُسُقُ نَشَ عَ قَلَ عَ تَارَيٍ بّ، عَ نُن عَ بَبَ شَ دٍنبَيَ، «ﭑ شَ سِفَ، ﭑ شَ سَ عَ قَلَ مِسِرَ مَنفّ بّ، ‹ﭑ تَارَيٍ نُن ﭑ بَبَ شَ دٍنبَيَ نَشٍيٍ نُ سَبَتِشِ كَنَان بْشِ مَ، عٍ بِرِن بَرَ قَ ﭑ يِرٍ. 32 يِ مِشِيٍ فْورّ كَنيِيٍ نَن عٍ رَ. عٍ شُرُ سٍيٍ نَن دّ مَدٌنمَ. عٍ بَرَ قَ عٍ شَ فْورّيٍ رَ، سِيٍ، يّشّييٍ، نِنفٍيٍ، نُن عٍ هَرِفٍ بِرِن.› 33 مِسِرَ مَنفّ نَ وٌ شِلِ تّمُي نَشّ، عَ وٌ مَشْرِنمَ نّ وٌ شَ وَلِ مَ. 34 وٌ شَ عَ يَابِ، ‹مُشُ تَن عِ شَ كٌنيِيٍ قِندِشِ شُرُ سٍ مَشُرِيٍ نَن نَ، كَبِ مُشُ دِ مّدِ تّمُي هَن يَكْسِ، عَلْ مُشُ بٍنبَيٍ نُ عَ رَبَمَ كِ نَشّ.› نَ كُي وٌ قَمَ لُدٍ فٌسٍن بْشِ نَن مَ، بَرِ مَ شُرُ سٍ دّ مَدٌنيِيٍ رَحَاشُ مِسِرَكَيٍ مَ.»