1 سُمَيِلَ بْنسْييٍ تٌ يُسُقُ شَنِن مِسِرَ، مِسِرَ مَنفّ كَنتَمَيٍ شُنيِ ثٌتِقَرِ نَشَ عَ سَرَ كٌنيِ رَ. 2 عَلَتَلَ نُن يُسُقُ نَن نُ عَ رَ. يُسُقُ نُ قٍ نَشَن بِرِن نَبَمَ عَ شَ مَنفّ مِسِرَكَ شْنيِ، عَ بِرِن نُ قَنمَ نّ عَ يِ رَ. 3 عَ شَ مَنفّ نَشَ عَ كٌلٌن عَ يُسُقُ نُن عَلَتَلَ نَ عَ رَ، بَرِ مَ عَلَتَلَ نُ قٍ بِرِن سْونّيَمَ عَ بّ. 4 ثٌتِقَرِ نَشَ حّلّشِن عَ رَ، عَ نَشَ عَ قِندِ عَ شَ بَنشِ مِشِيٍ شُنيِ رَ. عَ نَشَ عَ هَرِفٍ بِرِن تَشُ عَ رَ.

5 ثٌتِقَرِ تٌ يُسُقُ قِندِ عَ شَ بَنشِ نُن عَ هَرِفٍ شُنيِ رَ، عَلَتَلَ نَشَ بَرَكّ سَ نَ مِسِرَكَ شَ بَنشِ مَ يُسُقُ سَابُي رَ. عَلَتَلَ نَشَ بَرَكّ سَ ثٌتِقَرِ شَ بَنشِ نُن عَ شَ شّيٍ بِرِن مَ. 6 نَ نَن عَ تٌ، ثٌتِقَرِ نَشَ عَ شَ سٍ بِرِن تَشُ يُسُقُ رَ. عَ تَن مُ نُ قَ عَ حّنفِ سَشِ قٍقٍ شْن مَ، قٌ عَ نُ دٌنسٍ نَشَن دٌنمَ.

مِشِ تٌقَنيِ نَن نُ لَنشِ يُسُقُ مَ. 7 تّمُي ندٍ تٌ دَنفِ، يُسُقُ شَ مَنفّ شَ فِنّ يَ نَشَ سِن عَ عِ. عَ نَشَ عَ قَلَ عَ بّ، «قَ بٍ، وٌن شَ قَ كَقُ.» 8 يُسُقُ نَشَ تٌندِ، عَ قَ عَ قَلَ عَ شَ مَنفّ شَ فِنّ بّ، «كَقِ ﭑ نَشَ قَ ﭑ مَ مَنفّ شْنيِ عَ مُ عَ حّنفِ سَشِ قٍقٍ شْن مَ كْرّ عَ شَ بَنشِ كُي. عَ بَرَ عَ هَرِفٍ بِرِن تَشُ ﭑ نَ. 9 عَ شَ بَنشِ كُي بٍ، ﭑ تَن نَن دَنفِ مِشِ بِرِن نَ. عَ مُ سٍسٍ رَقِسَشِ ﭑ بّ، قٌ عِ كٍرٍن، بَ عِ تَن بَرَ قِندِ عَ شَ فِنّ رَ. يَكْسِ، ﭑ قٍ حَاشِ رَبَمَ مُنقٍ رَ نَشَن قِندِ يُنُبِ قٍ رَ عَلَ بّ؟»

10 كْنْ نَ فِنّ نَشَ بِرَ يُسُقُ شَ قٍ دَلِلِ قْشْ رَ. عَ نُ عَ مَكَتَمَ لْشْي بِرِن، كْنْ يُسُقُ نَشَ تٌندِ عٍ شَ كَقُ. 11 لْشْي ندٍ يُسُقُ نَشَ سٌ بَنشِ كُي عَ شَ وَلِ رَبَدٍ. كٌنيِ فبّتّ يٌ مُ نُ نَ بَنشِ كُي نَ تّمُي. 12 ثٌتِقَرِ شَ فِنّ نَشَ عَ سُشُ عَ شَ دٌنمَ مَ. عَ نُ قَ عَ قَلَ عَ بّ، «وٌن كَقُ!» فِنّ تٌ يُسُقُ شَ دٌنمَ سُشُ، يُسُقُ نَشَ مِنِ عَ شَ دٌنمَ كُي عَ عَ لُ فِنّ بّلّشّ، عَ مِنِ عَ فِ رَ تَندٍ.

13 فِنّ تٌ بَرَ عَ كٌلٌن عَ بَرَ عَ فِ، عَ شَ دٌنمَ لُ عَ يِ رَ، عَ نَشَ مِنِ تَندٍ، 14 عَ نَشَ عَ شَ بَنشِ كٌنيِيٍ شِلِ، عَ قَ نَ دٌنمَ مَسٍن عٍ بّ، «وٌ يِ تٌ، ﭑ مَ شّمّ قَشِ عٍبُرُ نَشَن نَ، نَ نَن وَ مَ وٌن مَيَنقَقٍ كْوتَ رَ. عَ قَشِ نّ ﭑ يِرٍ عَ مُشُ شَ مُشُ سَ، كْنْ ﭑ نَشَ سْنشْي رَتٍ. 15 كَبِ ﭑ بَرَ سْنشْي رَتٍ، عَ نَشَ عَ فِ، عَ شَ دٌنمَ لُ ﭑ يِ رَ. عَ نَشَ مِنِ عَ فِ رَ تَندٍ.»

16 ثٌتِقَرِ شَ فِنّ نَشَ يُسُقُ شَ دٌنمَ رَفَتَ هَن بٍينُن عَ شَ مَنفّ سٌ تّمُي. 17 عَ نَشَ نَ قٍ تَفِ رَبَ عَ بّ، عَ نَشّ، «عِ قَشِ عٍبُرُ كٌنيِ شّمّ نَشَن نَ يِ كِ، عَ قَشِ نّ عَ شَ ﭑ مَيَنقَ كْوتَ رَ. 18 كْنْ ﭑ تٌ سْنشْي رَتٍ، عَ نَشَ عَ شَ دٌنمَ لُ ﭑ يِ رَ، عَ نَشَ مِنِ عَ فِ رَ تَندٍ. 19 عِ شَ كٌنيِ نَ نَن نَبَشِ ﭑ نَ.» يُسُقُ شَ مَنفّ تٌ عَ شَ فِنّ شَ وْيّنيِ مّ، 20 عَ بْحّ نَشَ تٍ عَ حَاشِ رَ. عَ نَشَ يُسُقُ بَلَن مَنفّ شَ فٍيلِمَنِيٍ نُ نَ دّننَشّ.

21 كْنْ مّننِ قَن، عَلَتَلَ مّينِ نّ عَ مَ. عَ نَشَ عَ رَفِرِ يُسُقُ نُن فٍيلِ مَنفّ دّ شَ قَن. 22 فٍيلِ مَنفّ نَشَ فٍيلِمَنِيٍ تَشُ يُسُقُ رَ. قٍ نَشَن بِرِن نُ رَبَمَ، عَ نُ دَنفِمَ عَ تَن نَن مَ. 23 فٍيلِ مَنفّ مُ نُ يُسُقُ شَ وَلِ شُن مَتٌمَ عَ رَ، بَرِ مَ عَلَتَلَ نُن يُسُقُ بِرِن نَ عَ رَ. عَلَتَلَ نُ قٍ بِرِن سْونّيَمَ يُسُقُ بّ.