1 «عِ نَ وَ مِشِ تِقٍ ﭑ مَ سّرّشّدُبّ وَلِ رَبَقٍ رَ، عِ شَ تُورَ نُن يّشّي كٌنتٌنيِ قِرِن تٌنفٌ، لَنيُرُ يٌ مُ نَ نَشٍيٍ مَ، 2 عَ نُن تَامِ لّبِنِتَرٍ، تَامِ لّبِنِتَرٍ تُرٍ مَسُنبُشِ نَشَن نَ، نُن تَامِ لّبِنِتَرٍ شُنشُرِ تُرٍ مَسٌشِ نَشَن مَ. عِ شَ نَ بِرِن نَبَ سَنسِ شْرِ لُشُتَشِ رَ. 3 عِ شَ نَ تَامِ بِرِن سَ دٍبٍ كُي، عِ عَ شَنِن هْرْ مْلِنفِرَ يِرٍ، عَ نُن تُورَ، نُن يّشّي كٌنتٌنيِ قِرِن. 4 عِ شَ هَرُنَ نُن عَ شَ دِيٍ تِ سّرّشّدُبّ وَلِ رَ هْرْ مْلِنفِرَ سٌدٍ، ﭑ عٍ لِمَ دّننَشّ. عِ نَ فّ عٍ مَشَدٍ يٍ رَ عٍ رَ سّنِيّنقٍ رَ، 5 عِ شَ هَرُنَ شَ سّرّشّدُبّ سٌسٍيٍ رَفٌرٌ عَ مَ، عَ شَ دٌنمَ بُن مَفٌرٌي، عَ شَ دٌنمَ كُيٍ بُن مَفٌرٌي، عَ شَ دٌنمَ كُيٍ، عَ شَ دٌنمَ كَنكٍ رَشُنمَسٍ رَ، نُن عَ شَ بّلّتِ دٌنمَ كَنكٍ رَشُنمَسٍ شِرِ مَ نَشَن نَ. 6 عِ شَ شُنمَسٍ دْشْ عَ شُنيِ مَ، عِ قَ نَ تْنشُمَ شّيمَ دَاشِ شِرِ نَ رَ. 7 عِ شَ تُرٍ سّنِيّنشِ سُرُ سُرُ عَ شُنيِ مَ عَ تِقٍ سّرّشّدُبّ رَ. 8 عِ نَ فّ نَ رَ، عِ شَ سّرّشّدُبّ دٌنمَ كُيٍ بُن مَفٌرٌي رَفٌرٌ هَرُنَ شَ دِيٍ قَن مَ. 9 عِ شَ هَرُنَ نُن عَ شَ دِيٍ تَفِ عِشِرِ بّلّتِ رَ، عِ شَ شُنمَسٍ دْشْ عٍ شُنيِ مَ. عِ هَرُنَ نُن عَ شَ دِيٍ تِمَ سّرّشّدُبّيٍ رَ نَ كِ نّ. نَ شَ قِندِ سّرِيّ رَ نَشَن مُ كَنَمَ عَبَدَن.»

10 «عِ شَ تُورَ ندٍ شَنِن هْرْ مْلِنفِرَ سٌدٍ دّ رَ، ﭑ عِ لِمَ دّننَشّ. هَرُنَ نُن عَ شَ دِيٍ نَ عٍ بّلّشّ سَ عَ شُنيِ، 11 عِ شَ نَ تُورَ كْن نَشَبَ عَلَتَلَ يَ شْرِ هْرْ مْلِنفِرَ سٌدٍ دّ رَ، ﭑ عِ لِمَ دّننَشّ. 12 عِ شَ نَ تُورَ وُلِ تٌنفٌ، عِ ندٍ سَ سّرّشّبَدٍ قٍرِ نَانِ مَ عِ بّلّشّسٌلٍ رَ. وُلِ نَشَن لُشِ، عِ شَ نَ عِقِلِ سّرّشّبَدٍ سَنبُنيِ مَ. 13 عِ نَ فّ نَ رَ، عِ شَ نَ تُورَ تُرٍ تٌنفٌ نَشَن نَ عَ قُرِنفّ مَ، عَ لَارٍ نَشَن عَ بْحّ مَكٌتٌشِ، عَ فُنفُييٍ نُن تُرٍ نَشَن نَ عٍ مَ، عِ شَ نَ بِرِن فَن سّرّشّ رَ سّرّشّبَدٍ قَرِ. 14 كْنْ عَ سُبٍ، عَ كِرِ، نُن عَ شَ حَحّ، عِ شَ نٍيٍ فَن تَا قَرِ مَ، بَرِ مَ يُنُبِ شَقَرِ سّرّشّ نَ عَ رَ.»

15 «عِ نَ فّ نَ رَ، عِ شَ يّشّي كٌنتٌنيِ كٍرٍن تٌنفٌ. هَرُنَ نُن عَ شَ دِيٍ عٍ شَ عٍ بّلّشّ سَ عَ شُنيِ، 16 عِ قَ عَ كْن نَشَبَ. عِ شَ عَ وُلِ تٌنفٌ، عِ عَ عِقِلِ سّرّشّبَدٍ رَبِلِنيِ مَ. 17 عِ شَ نَ يّشّي كٌنتٌنيِ بٌلٌن عَ شُنتُنيِ رَ. عِ شَ عَ قُرِنفّ نُن عَ سَنيِيٍ مَشَ، عِ قَ عٍ مَلَن عَ سُبٍ نُن عَ شُنيِ قَرِ، 18 عِ نَ بِرِن فَن سّرّشّبَدٍ قَرِ. سّرّشّ فَن دَاشِ نَن نَ كِ عَلَتَلَ بّ، نَشَن نَقَن عَلَتَلَ مَ.»

19 «عِ نَ فّ نَ سِنفٍ رَ، عِ شَ نَ يّشّي كٌنتٌنيِ قِرِن ندٍ تٌنفٌ. هَرُنَ نُن عَ شَ دِيٍ نَ عٍ بّلّشّ سَ عَ شُنيِ مَ، 20 عِ شَ عَ كْن نَشَبَ. عِ شَ نَ وُلِ تٌنفٌ، عِ ندٍ سَ هَرُنَ نُن عَ شَ دِيٍ يِرٍقَنيِ تُلِ كِرِيٍ مَ، عٍ يِرٍقَنيِ بّلّشّ، نُن سَنكُرَيٍ مَ. وُلِ نَشَن لُشِ، عِ شَ نَ عِقِلِ سّرّشّبَدٍ رَبِلِنيِ. 21 عِ شَ وُلِ ندٍ تٌنفٌ سّرّشّبَدٍ قَرِ، عَ نُن تُرٍ ندٍ نَشَن نَوَلِشِ مِشِ تِقٍ سّرّشّدُبّ رَ، عِ شَ نٍيٍ كَسَن هَرُنَ، عَ شَ دِيٍ، نُن عٍ شَ دُفِيٍ مَ. نَ كُي هَرُنَ نُن عَ شَ دِيٍ بَرَ تِ سّرّشّدُبّيٍ رَ، عٍ شَ دُفِيٍ قَن بَرَ قِندِ سّرّشّدُبّ دُفِيٍ رَ.»

22 «عِ شَ يّشّي كٌنتٌنيِ تُرٍ تٌنفٌ، عَ نُن عَ شُلِ، عَ تُرٍ نَشَن نَ عَ قُرِنفّ مَ، عَ لَارٍ نَشَن عَ بْحّ مَكٌتٌشِ، عَ فُنفُييٍ نُن تُرٍ نَشَن عٍ مَكٌتٌشِ، عَ نُن عَ يِرٍقَنيِ تَبٍ، بَرِ مَ سّرّشّ نَ عَ رَ نَشَن عَ نِيَمَ مِشِ شَ تِ سّرّشّدُبّ وَلِ رَ. 23 عِ شَ نَ دٍبٍ تٌنفٌ تَامِ لّبِنِتَرٍ نَ نَشَن كُي نَشَن قِشِ عَلَتَلَ مَ. نَ كُي عِ شَ تَامِ دِفِلِنشِ كٍرٍن تٌنفٌ، عَ نُن تَامِ لّبِنِتَرٍ تُرٍ مَسُنبُشِ نَشَن نَ، نُن تَامِ لّبِنِتَرٍ شُنشُرِ ندٍ، 24 عِ شَ نٍيٍ سَ هَرُنَ نُن عَ شَ دِيٍ بّلّشّ، عِ نٍيٍ لِنتَن عَلَتَلَ يَ عِ سّرّشّ رَ. 25 نَ دَنفِ شَنبِ، عِ شَ عٍ بَ عٍ بّلّشّ، عِ عٍ سَ سّرّشّ فَن دَاشِ قَرِ سّرّشّبَدٍ. سّرّشّ فَنشِ نَ عَ رَ نَشَن نَقَن عَلَتَلَ مَ.»

26 «عِ شَ يّشّي كٌنتٌنيِ كَنكٍ تٌنفٌ، نَشَن بَشِ هَرُنَ بّ، عِ عَ لِنتَن عَلَتَلَ يَ عِ سّرّشّ رَ، عَ شَ قِندِ عِ فبٍ رَ. 27 نَ كَنكٍ نُن نَ تَبٍ عِ نَشَن لِنتَنشِ عَلَتَلَ يَ عِ سّرّشّ رَ سّرّشّدُبّيٍ تِقٍ شَ قٍ رَ، 28 نٍيٍ بَرَ قِندِ هَرُنَ نُن عَ شَ دِيٍ فبٍ رَ. سّرِيّ نَن نَ كِ عِسِرَيِلَكَيٍ بّ نَشَن مُ كَنَمَ عَبَدَن. عٍ لَن نّ عٍ شَ نَ مْولِ بَ عٍ شَ شَنُنتٍيَ سّرّشّ بِرِن مَ، عٍ عَ قِ عَلَتَلَ مَ.»

29 «هَرُنَ نَ قَشَ، عَ شَ سّرّشّدُبّ سٌسٍ رَدَنفِمَ عَ شَ دِيٍ نَن مَ. عٍ تِ تّمُي نَ وَلِ رَ، عٍ شَ عٍ رَفٌرٌ عٍ مَ. 30 هَرُنَ شَ دِ نَشَن قِندِ مَ عَ حْشْي رَ نَ نَن قَمَ نَ دُفِيٍ رَفٌرٌدٍ عَ مَ شِ سٌلٌقٍرٍ بُن مَ، بٍينُن عَ شَ سٌ يِرٍ سّنِيّنشِ هْرْ مْلِنفِرَ كُي، ﭑ عِ لِمَ دّننَشّ، سّرّشّدُبّ وَلِ رَبَقٍ رَ.»

31 «يّشّي كٌنتٌنيِ نَشَن بَشِ سّرّشّ رَ، هَرُنَ قِندِشِ سّرّشّدُبّ رَ تّمُي نَشّ، عِ شَ نَ سُبٍ حِن يِرٍ ندٍ نَشَن سّنِيّنشِ. 32 نَ سُبٍ نُن نَ تَامِ نَشَن نَ دٍبٍ كُي، هَرُنَ نُن عَ شَ دِيٍ شَ نَ دٌن هْرْ مْلِنفِرَ سٌدٍ دّ رَ، ﭑ عِ لِمَ دّننَشّ. 33 عٍ كٍرٍن شَ نَ يُنُبِ شَقَرِ سّرّشّ دٌن، سّرّشّ نَشَن بَ عٍ بّ عٍ تِ لْشْي سّرّشّدُبّيٍ رَ. عَ مُ لَنمَ مِشِ فبّتّ شَ نَ دٌن، بَرِ مَ سٍ سّنِيّنشِ نَن عَ رَ. 34 شَ نَ سّرّشّ سُبٍ نُن تَامِ ندٍ سَ لُ هَن فّيسّفّ، عِ شَ عَ فَن تّ شْورَ. عَ مُ دٌنمَ، بَرِ مَ سٍ سّنِيّنشِ نَن عَ رَ.»

35 «عِ شَ ﭑ مَ يَامَرِيٍ رَبَتُ هَرُنَ نُن عَ شَ دِيٍ شَ قٍ رَ نَ شِ سٌلٌقٍرٍ بُن مَ عٍ تِمَ سّرّشّدُبّيٍ رَ تّمُي نَشّ. 36 عِ شَ تُورَ كٍرٍن بَ لْشْ يٌ لْشْ يُنُبِ شَقَرِ سّرّشّ رَ. نَ نَن عَ تٌمَ سّرّشّبَدٍ قَن سّنِيّنمَ. نَ شَنبِ عِ شَ تُرٍ عِقِلِ سّرّشّبَدٍ قَرِ، عَلَكٌ عَ شَ قِندِ يِرٍ سُفَندِشِ رَ. 37 عِ شَ نَ وَلِ رَبَ شِ سٌلٌقٍرٍ بُن مَ، عَلَكٌ سّرّشّبَدٍ شَ سّنِيّن، عَ مَن شَ مِشِ رَ سّنِيّن نَشَن دِنمَ عَ رَ.»

38 «لْشْ يٌ لْشْ عَ لَنمَ عِ شَ يّشّي قِرِن بَ سّرّشّ رَ سّرّشّبَدٍ قَرِ، نَشٍيٍ بَرَ حّ كٍرٍن سْتْ. نَ شَ رَبَ كُدّءِ. 39 عَ سِنفٍ شَ بَ فّيسّفّ، بٌورٍ شَ بَ كْي سٌ تّمُي. 40 عِ نَ نَ يّشّي سِنفٍ بَ، عِ شَ قَرِن كٌنكٌرٌنيِ سُولِ، عٌلِوِ تُرٍ لِتِرِ كٍرٍن، نُن وّنِ لِتِرِ كٍرٍن سَ نَ قَرِ. 41 عِ نَ نَ يّشّي قِرِن ندٍ بَ كْي سٌ تّمُي، عِ شَ سَنسِ بٌفِ ندٍ نُن وّنِ سَ عَ قَرِ عَلْ فّيسّفّ دَاشِ. عِ شَ نٍيٍ بَ سّرّشّ فَن دَاشِ رَ، نَشَن نَقَن عَلَتَلَ مَ. 42 سّرّشّ فَن دَاشِ مْولِ نَن عَ رَ، عِ بْنسْي لَنمَ عَ شَ نَشَن بَ ﭑ تَن عَلَتَلَ بّ عَبَدَن. عَ بَمَ هْرْ مْلِنفِرَ سٌدٍ دّ نَن نَ ﭑ تَن عَلَتَلَ يَ شْرِ، ﭑ وٌ لِمَ دّننَشّ، ﭑ وْيّنمَ وٌ بّ دّننَشّ.»

43 «ﭑ نَن ﭑ يّتّ مَسٍنمَ عِسِرَيِلَكَيٍ بّ مّننِ ﭑ مَ نْرّ كُي، نَشَن مّننِ رَ سّنِيّنمَ. 44 ﭑ نَن ﭑ مَ هْرْ مْلِنفِرَ نُن ﭑ مَ سّرّشّبَدٍ رَ سّنِيّنمَ نّ، ﭑ عِ لِمَ دّننَشّ. ﭑ هَرُنَ نُن عَ شَ دِيٍ رَ سّنِيّنمَ نّ، عَلَكٌ عٍ شَ ﭑ مَ سّرّشّدُبّ وَلِ رَبَ. 45 ﭑ سَبَتِمَ نّ عِسِرَيِلَكَيٍ تَفِ، ﭑ مَن قِندِ مَ نّ عٍ مَرِفِ عَلَ رَ. 46 نَ كُي عٍ عَ كٌلٌنمَ نّ ﭑ تَن نَن عَلَتَلَ رَ، عٍ مَرِفِ عَلَ، نَشَن عٍ رَ مِنِ مِسِرَ بْشِ رَ، عَلَكٌ ﭑ شَ سَبَتِ عٍ تَفِ. عَلَتَلَ نَن ﭑ تَن نَ، عٍ مَرِفِ عَلَ.»