1 كِكٍ سَشَن يَتِ تٌ دَنفِ، كٍلِقٍ عٍ مِنِ مِسِرَ بْشِ رَ تّمُي نَشّ، عِسِرَيِلَكَيٍ نَشَ سٌ تُرُ سِنِنَ فبٍنفبٍرٍنيِ مَ. 2 عٍ تٌ كٍلِ رٍقِدِ مِ، عٍ نَشَ سٌ تُرُ سِنِنَ فبٍنفبٍرٍنيِ مَ، عٍ يٌنكِن فٍيَ يَ تَفِ. 3 مُنسَ نَشَ تٍ فٍيَ قَرِ سِفَقٍ عَلَتَلَ يِرٍ. عَلَتَلَ نَشَ عَ شِلِ فٍيَ قَرِ، عَ عَ مَسٍن عَ بّ، «عِ شَ عَ قَلَ عِسِرَيِلَكَيٍ يَشُبَ بْنسْي بّ، 4 ‹وٌ بَرَ عَ تٌ، ﭑ قٍ نَشَن نَبَشِ مِسِرَكَيٍ رَ. وٌ بَرَ عَ كٌلٌن ﭑ قَشِ وٌ رَ ﭑ يِرٍ كِ نَشّ. عَ لُشِ عَلْ وٌ بَكِشِ شْنِ نَن قَرِ. 5 شَ وٌ ﭑ شُي سُشُ ﭑ مَ سَاتّ رَكَمَلِقٍ رَ، وٌ قَمَ نّ قِندِدٍ ﭑ مَ حَمَ سُفَندِشِ رَ سِ بِرِن يَ مَ. ﭑ فبٍ نَن دُنِحَ بِرِن نَ، 6 كْنْ وٌ تَن قِندِ مَ ﭑ مَ سِ سّنِيّنشِ نَن نَ، نَشَن سّرّشّدُبّ وَلِ رَبَمَ.› عِ شَ نَ مَسٍنيِ تِ عِسِرَيِلَكَيٍ بّ.»

7 مُنسَ نَشَ فٌرٌ، عَ قٌرِ بِرِن شِلِ، عَ قَ عَلَتَلَ شَ مَسٍنيِ بِرِن دّنتّفّ عٍ بّ. 8 حَمَ بِرِن نَشَ عَ قَلَ، «مُشُ عَلَتَلَ شُي بِرِن سُشُمَ نّ.»

مُنسَ نَشَ حَمَ شَ يَابِ دّنتّفّ عَلَتَلَ بّ. 9 عَلَتَلَ نَشَ عَ مَسٍن مُنسَ بّ، «ﭑ قَمَ وْيّندٍ عِ بّ نُشُي كُي حَمَ يَ شْرِ، عَلَكٌ عٍ شَ لَنلَنتٍيَ سَ عِ مَ تّمُي بِرِن.»

مُنسَ نَشَ حَمَ شَ مَسٍنيِ دّنتّفّ عَلَتَلَ بّ. 10 عَلَتَلَ نَشَ عَ مَسٍن مُنسَ بّ، «عَ قَلَ حَمَ بّ، عٍ شَ عٍ يّتّ رَ سّنِيّن تٌ نُن تِنَ. عٍ شَ عٍ شَ دُفِيٍ قَن شَ. 11 عٍ شَ رّدِ تِنَ بٌرَ يَ رَ، بَرِ مَ ﭑ قَمَ نّ فٌرٌدٍ حَمَ بِرِن يَ تٌدٍ رَ نَ لْشْي تُرُ سِنِنَ فٍيَ قَرِ. 12 عِ شَ نَانِنيِ سَ فٍيَ رَبِلِنيِ بِرِن مَ، عِ قَ عَ قَلَ حَمَ بّ، ‹مِشِ يٌ نَشَ تٍ فٍيَ قَرِ، مِشِ يٌ نَشَ عَ مَكْرّ عَ رَ، بَرِ مَ نَشَن يٌ دِن عَ رَ، نَ كَنيِ قَشَمَ نّ.› 13 وٌ نَشَ وٌ بّلّشّ دِن نَ كَنيِ رَ، وٌ عَ مَفْنْ فّمّ رَ هَن عَ قَشَ. شَ نَ مُ، وٌ شَ عَ مَسْشْ شَلِيٍ رَ. عَ قِندِ دَالِسٍ رَ، عَ قِندِ مِشِ رَ، عَ لَنمَ عَ شَ قَشَ. مِشِ مُ لَنمَ عَ شَ تٍ فٍيَ قَرِ، قٌ سَرَ شُي نَ مِنِ مِشِ سُفَندِشِ ندٍيٍ قَ تٍ.»

14 مُنسَ تٌ فٌرٌ فٍيَ مَ حَمَ يِرٍ، عَ نَشَ مَرَ سّنِيّنيِ قٍ قَلَ عٍ بّ، عٍ شَ عٍ يّتّ نُن عٍ شَ دُفِيٍ رَ سّنِيّن. 15 عَ نَشَ عَ قَلَ حَمَ بّ، «وٌ شَ وٌ يّتّ يَءِلَن تِنَ بٌرَ يَ رَ. سَدٍ قٍ نَشَ لُ وٌ تَن نُن وٌ شَ فِنّيٍ تَفِ.»

16 عَ شِ سَشَن لْشْي، فَلَنيِ نُن سٍيَمَكْنيِ نَشَ بِرَ بْشِ مَ فّيسّفّ، نُشُي عِقْورْشِ نَشَ تٌ فٍيَ مَ. سَرَ شُي نَشَ مِنِ سّنبّ رَ. حَمَ بِرِن نَشَ فَاشُ. 17 مُنسَ نَشَ حَمَ مَتِ فٍيَ لَنبَنيِ عَلَ شُي رَ مّدٍ. 18 تُورِ نُ نَ تُرُ سِنِنَ فٍيَ مَ، بَرِ مَ عَلَتَلَ نُ بَرَ فٌرٌ تّ تَفِ. نَ تُورِ نُ تٍمَ نّ، عَلْ قِيلِ نَ فَن. فٍيَ نُ سّرّنمَ سّنبّ رَ. 19 سَرَ شُي نُ سِفَمَ فبٌ رَ. نَ تّمُي مُنسَ نَشَ وْيّن، عَلَ نَشَ عَ يَابِ.

20 عَلَتَلَ نَشَ فٌرٌ تُرُ سِنِنَ فٍيَ قَرِ، عَ قَ مُنسَ شِلِ. مُنسَ تٌ تٍ نَا، 21 عَلَتَلَ نَشَ عَ مَسٍن عَ بّ، «عِ شَ فٌرٌ، عِ شَ عَ قَلَ حَمَ بّ، عٍ نَشَ وُرُنتُن ﭑ تٌقٍ رَ دٍ، شَ نَ مُ عَ رَ، عَ فبٍفبٍ قَشَمَ نّ. 22 هَلِ سّرّشّدُبّ نَشٍيٍ عٍ مَكْرّ مَ ﭑ نَ، عٍ شَ عٍ يّتّ رَ سّنِيّن، عَلَكٌ ﭑ نَشَ قَ عٍ قَشَ.» 23 مُنسَ نَشَ عَ قَلَ عَلَتَلَ بّ، «حَمَ مُ نْمَ تِدٍ تُرُ سِنِنَ فٍيَ قَرِ، بَرِ مَ عِ حَن بَرَ مُشُ يَمَرِ نَانِنيِيٍ شَ سَ فٍيَ رَبِلِنيِ مَ، حَمَ شَ لُ عٍ شَتِ مَ.» 24 عَلَتَلَ نَشَ عَ مَسٍن عَ بّ، «عِ شَ فٌرٌ سِندٍن هَرُنَ قْشْ رَ. نَ تّمُي وٌ قِرِن شَ تٍ. سّرّشّدُبّيٍ نُن حَمَ نَشَ تٍ دٍ، شَ نَ مُ عَ رَ، عٍ قَشَمَ نّ.» 25 مُنسَ نَشَ فٌرٌ حَمَ يِرٍ، عَ قَ نَ مَسٍنيِ تِ عٍ بّ.