1 سْنشْي تٌ بَرَ حْن، ثْلُ نَشَ عِسَ قْشِرَبِرّيٍ مَلَن عٍ رَ سِقٍ مَ. عَ تٌ عَ حُنفُ عٍ مَ، عَ نَشَ سِفَ مَسٍدٌن. 2 عَ نَشَ نَ بْشِ عِسَ، عَ نُ عِسَ قْشِرَبِرّيٍ رَ سِ مَرَ سِ وُيَشِ رَ. نَ دَنفِ شَنبِ، عَ نَشَ سِفَ فِرّكِ بْشِ مَ. 3 عَ تٌ لُ نَا كِكٍ سَشَن، عَ نَشَ وَ سِفَقٍ سِرِيَ كُنكُي كُي، كْنْ يُوِقِيٍ نُ بَرَ يَنقَنتٍيَ يَءِلَن عَ شِلِ مَ. نَ كُي، عَ نَشَ نَتّ تٌنفٌ عَ شَ فبِلٍن مَسٍدٌن كِرَ رَ. 4 نَشٍيٍ عَ مَتِ هَن عَسِ نٍيٍ نَن يِ كِ؛ سٌثَتٍرِ، بٍيرٍكَ ثِرُ سِ شَ دِ، عَرِ سِتَرَكِ نُن سٍكٌندُ تّسَلٌنِكِكَيٍ، فَيُ دٍرِبٍكَ نُن تِمٌتٍ، تِكِكٍ نُن تِرٌقِمٌ عَسِكَيٍ. 5 نٍيٍ نَشَ تِ يَرٍ، عٍ نَشَ سَ مُشُ مَمّ تِرٌيَسِ. 6 تَامِ لّبِنِتَرٍ سَلِ لْشْي دَنفِ شَنبِ، مُشُ نَشَ بَكِ كُنكُي كُي قِلِثِ. بٍينُن شِ سُولِ، مُشُ نَشَ عٍ لِ تِرٌيَسِ. مُشُ نَشَ لُ نَا شِ سٌلٌقٍرٍ.

7 سَندٍ لْشْي مُشُ نَشَ مَلَن تَامِ عِفِرَقٍ رَ. ثْلُ نَشَ كَوَندِ تِ عِسَ قْشِرَبِرّيٍ بّ هَن كْي تَفِ. عَ لَن نّ عَ شَ سِفَ كُيٍ نَ عِبَ. 8 لَنثُي فبٍفبٍ نُ نَ نَ كٌورٍ بَنشِ كُي، مُشُ نُ مَلَنشِ دّننَشّ. 9 سّفّتَلَ ندٍ نَشَن شِلِ عٍيُتِكِ نُ دْشْشِ وُندّرِ رَ. ثْلُ شَ كَوَندِ شْن تٌ كُيَ، شِ شْلِ نَشَ عَ سُشُ عَ قَنيِ رَ، عَ بِرَ بْشِ مَ كٍلِقٍ بَنشِ دّكِ سَشَن ندٍ. عٍ نَشَ عَ لِ، عَ بَرَ قَشَ. 10 ثْلُ تٌ فٌرٌ، عَ نَشَ عَ قٍلٍن عَ شُن. عَ نَشَ عَ تٌنفٌ، عَ عَ قَلَ عٍ بّ، «وٌ نَشَ كْنتْقِلِ، بَرِ مَ عَ مُ قَشَشِ.» 11 ثْلُ تٌ تٍ، عَ نَشَ تَامِ عِفِرَ، عَ نَشَ عَ دٌن. عَ مَن نَشَ وْيّن هَن فّيسّفّ. نَ فّيسّفّ، عَ نَشَ سِفَ. 12 دَنشَنِيَتْييٍ نَشَ سّفّتَلَ شَنِن عَ حِحّ رَ بْحّسَ كُي.

13 مُشُ نَشَ كُنكُي بّلَ رَكٍلِ سِفَقٍ رَ عَسٌسِ ثْلُ يَ رَ عَلْ مُشُ لَنشِ عَ مَ كِ نَشّ. عَ نَشَ وَ سِفَقٍ عَ سَنيِ رَ. 14 عَ تٌ مُشُ لِ عَسٌسِ، مُشُ نَشَ عَ بَكِ كُنكُي كُي سِفَقٍ مِتِلّنِ. 15 كٍلِ مّننِ، مُشُ نَشَ سِفَ بَا كِرَ رَ. نَ قَن كُيٍ عِبَ، مُشُ نَشَ كِيٌ لِ. نَ شَنبِ، مُشُ نَشَ سِفَ هَن سَمٌسِ. نَ لْشْي كُيٍ عِبَ، مُشُ نَشَ مِلٍتٌ لِ. 16 ثْلُ نُ بَرَ نَتّ تٌنفٌ عَ شَ دَنفِ عٍقّسّ مَبِرِ عَلَكٌ عَ نَشَ بُ عَسِ بْشِ مَ. عَ نُ فبَتَشِ عَ شَ سٌ دَرِ سَلَمُ شّ شَبّ سَلِ لْشْي شَ عَ سَ سْونّيَمَ عَ بّ.

17 ثْلُ تٌ مِلٍتٌ لِ، عَ نَشَ شّيرَ تِ عَ عٍقّسّ دَنشَنِيَتْي حَمَ كُنتِفِيٍ شَ قَ. 18 عٍ تٌ قَ عَ يِرٍ، عَ نَشَ عَ قَلَ عٍ بّ، «وٌ عَ كٌلٌن ﭑ حّرّشِ وٌ تَفِ كِ نَشّ. كَبِ ﭑ سٌ عَسِ، 19 ﭑ مَرِفِ شَ وَلِ رَبَ يّتّ مَفٌرٌي نَن كُي. ﭑ يَيٍ بَرَ مِنِ، ﭑ بَرَ تْورْ يُوِقِيٍ شَ وَلِ حَاشِ سَابُي رَ. 20 وٌ عَ كٌلٌن عَ ﭑ مُ وٌ مُنَقَن سٍ يٌ نْشُن وٌ مَ. ﭑ بَرَ كَوَندِ تِ وٌ بّ كّنّ مَ نُن وٌ شَ بَنشِيٍ كُي. 21 ﭑ نُ عَ قَلَمَ نّ يُوِقِيٍ نُن فِرّكِكَيٍ بّ عٍ شَ تٌفٌندِيَ عَلَ مَ، عٍ شَ دَنشَنِيَ وٌن مَرِفِ عِسَ، عَلَ شَ مِشِ سُفَندِشِ مَ.»

22 «يَكْسِ عَلَ شَشِلِ سّنِيّنشِ وَ مَ نّ ﭑ شَ سِفَ دَرِ سَلَمُ، كْنْ ﭑ مُ عَ كٌلٌن نَشَن سِفَمَ ﭑ سْتْدٍ نَا. 23 تَا بِرِن كُي عَلَ شَشِلِ سّنِيّنشِ بَرَ ﭑ نَكٌلٌن عَ فٍيلِ نُن تْورّ قَمَ نّ ﭑ لِدٍ نَا. 24 كْنْ ﭑ نِي تِدٍ يٌ مُ نَ ﭑ بّ. ﭑ شَ ﭑ مَ شّيرَيَ رَكَمَلِ، ﭑ مَرِفِ عِسَ نَشَن تَشُشِ ﭑ نَ. ﭑ شَ قِندِ عَلَ شَ هِننّ سٍيدٍحْشْيَ بَ رَ، نَشَن قِندِشِ شِبَارُ قَنيِ رَ.»

25 «يَكْسِ ﭑ عَ كٌلٌن وٌ مُ ﭑ يَتَفِ تٌمَ سْنْن، وٌ تَن نَشٍيٍ بِرِن وٌ تُلِ مَتِشِ ﭑ مَ كَوَندِ رَ، عَلَ شَ مَنفّيَ نِينِ شَ قٍ رَ. 26 نَ نَ عَ رَ، ﭑ عَ قَلَمَ وٌ بّ تٌ، وٌ شَ كٌتٍ يٌ مُ نَ ﭑ شُن، 27 بَرِ مَ ﭑ بَرَ عَلَ سَفٌ بِرِن مَسٍن وٌ بّ، ﭑ مُ سٍسٍ نْشُن وٌ مَ. 28 عَوَ، وٌ شَ مّينِ وٌ يّتّ مَ عَ نُن دَنشَنِيَتْي بِرِن، عَلَ شَشِلِ سّنِيّنشِ وٌ قِندِشِ نَشٍيٍ شَ شُنمَتِ رَ، عَلَكٌ وٌ شَ مّينِ مَرِفِ شَ دَنشَنِيَتْي حَمَ مَ، عَ نَشَن سْتْشِ عَ يّتّ وُلِ رَ. وٌ شَ عٍ كَنتَ عَلْ شُرُ سٍيٍ دّ مَدٌنيِ فْورّ كَنتَمَ كِ نَشّ. 29 ﭑ نَ كٌلٌن، ﭑ نَ سِفَ، مِشِ حَاشِيٍ قَمَ نّ سٌدٍ وٌ تَفِ، عَلْ وُلَ بَرٍيٍ سٌمَ فْورّ يَ مَ كِ نَشّ. 30 مِشِ ندٍيٍ سٌمَ وٌ تَفِ، عٍ شَ شَرَنيِ حَاشِ تِ عَلَكٌ عٍ شَ عِسَ قْشِرَبِرّيٍ بّندُن عٍ مَ. 31 وٌ شَ وٌ مّينِ. وٌ شَ رَتُ يِ حّ سَشَنيِ بُن مَ ﭑ مُ وٌ كَوَندِقٍ عِتِ كْي نُن يَنيِ. ﭑ نَ بِرِن نَبَشِ يَيٍ نَن كُي.»

32 «عَوَ يَكْسِ، ﭑ وٌ تَشُمَ عَلَ رَ نُن عَ شَ هِننّ مَسٍنيِ رَ، نَشَن نْمَ سّنبّ نُن كّ قَنيِ قِدٍ سّنِيّنتْي بِرِن مَ. 33 ﭑ مُ نُ وَ مَ وٌ شَ كْبِرِ شَ شْن، شَ نَ مُ عَ رَ وٌ شَ شّيمَ، وٌ شَ سٌسٍيٍ. 34 وٌ يّتّ يَتِ عَ كٌلٌن عَ ﭑ وَلِ يِ بّلّشّيٍ نَن نَ عَلَكٌ ﭑ شَ بَلٌ ﭑ نُن ﭑ حّرّبٌورٍيٍ. 35 ﭑ بَرَ عَ مَسٍن وٌ بّ مْولِ بِرِن نَ، عَ وٌن لَن نّ وٌن شَ وَلِ عَلَكٌ وٌن شَ سٍتَرٍيٍ مَلِ. وٌ شَ رَتُ مَرِفِ عِسَ شَ وْيّنيِ مَ، عَ نَشّ، ‹حّلّشِنيِ نَ كِ نَن كُي، دَنفِقٍ عَ سْتْقٍ رَ.›»

36 عَ تٌ فّ وْيّندٍ، عَ نَشَ عَ شِنبِ سِن، عٍ بِرِن نَشَ عَلَ مَشَندِ. 37 عٍ بِرِن نَشَ سٌ وَقٍ. عٍ نَشَ قِندِفِلِن ثْلُ كْنيِ مَ، عٍ عَ مَسُنبُ. 38 عٍ سُننُن نّ بَرِ مَ عَ بَرَ عَ قَلَ عٍ مُ نْمَ عَ تٌدٍ سْنْن. عٍ نَشَ عَ مَتِ هَن كُنكُي دّ رَ.