1 سُلٍمَنِ نَشَ شّمّ وُلُ تٌنفٌ سٌلٌقٍرٍ يَمَرِ عٍ شَ قِندِ كٌتٍ شَنِنيِيٍ رَ. عَ مَن نَشَ شّمّ وُلُ تٌنفٌ سٌلٌمَسَشَن تٌنفٌ فّمّ مَسٌلِيٍ رَ، نَشٍيٍ وَلِمَ فٍيَ مَ. عَ مَن نَشَ شّمّ وُلُ سَشَن كّمّ سٍننِ سْتْ وَلِ شُنيِيٍ رَ. 2 سُلٍمَنِ نَشَ شّيرَ شّي تِرٍ مَنفّ شِرَ مِ شْن، عَ شَ سَ عَ قَلَ عَ بّ، «تّمُي دَنفِشِ عِ بَرَ سّدِرِ وُرِ رَ سَنبَ ﭑ بَبَ دَوُدَ مَ عَلَكٌ عَ شَ عَ شَ بَنشِ تِ. 3 يَكْسِ ﭑ قَقٍ هْرْ مْبَنشِ تِدٍ ﭑ مَرِفِ عَلَتَلَ بّ، سّرّشّيٍ بَمَ دّننَشّ. مّننِ سُرَيِ قَمَ فَندٍ سّرّشّ رَ، تَامِ سّرّشّ سَمَ تٍيبِلِ مَ عَلَ بّ، سّرّشّ فَن دَاشِ بَمَ فّيسّفّ نُن نُنمَرٍ بِرِن، سَلِ رَبَمَ مَلَبُي لْشْييٍ رَ، كِكٍ نّينّيٍ رَ، نُن سَلِ شُنفبٍيٍ رَ. يِ سّرِيّ مُ كَنَمَ عِسِرَيِلَ بْشِ مَ عَبَدَن. 4 ﭑ هْرْ مْبَنشِ نَشَن تِمَ، عَ لَن عَ شَ قِندِ بَنشِ شُنفبٍ نَن نَ، بَرِ مَ مُشُ مَرِفِ عَلَ دَنفِ عَلَيٍ بِرِن نَ. 5 ندٍ نْمَ بَنشِ تِدٍ عَلَ بّ، نَشَن شَ فبٌي دَنفِمَ كٌورٍ شَ فبٌي رَ؟ ﭑ تَن نَشَن يَ، ﭑ مُ نْمَ هْرْ مْبَنشِ تِدٍ عَ بّ. ﭑ نْمَ نَشَن فبَنسَن نَ، ﭑ يِرٍ ندٍ يَءِلَنمَ سّرّشّ فَن دَاشِ بَمَ عَ بّ دّننَشّ.»

6 «يَكْسِ، مِشِ قَنيِ ندٍ رَ سَنبَ ﭑ مَ، نَشَن قَتَ شّيمَ، فبٍتِ، يْشُي، نُن وُرٍ رَوَلِدٍ. عَ شَ قَتَ فّسّ فبٍيلِ نُن عَ قْورّ رَوَلِدٍ، عَ مَن شَ قَتَ سٍ مَسٌلِدٍ. عَ شَ قَ يُدَيَ نُن دَرِ سَلَمُ، عَ شَ كَقُ ﭑ مَ وَلِكّ قَنيِيٍ مَ، ﭑ بَبَ دَوُدَ نَشٍيٍ سُفَندِشِ. 7 عِ شَ لِبَن وُرِ بِلِيٍ رَ سَنبَ ﭑ مَ عَلْ سّدِرّ، سِثِرِ، نُن سَنتَلِ. ﭑ عَ كٌلٌن عِ شَ وَلِكّيٍ قَتَ لِبَن وُرِ بٌلٌندٍ. ﭑ مَ وَلِكّيٍ قَن سِفَمَ نّ عٍ مَلِدٍ. 8 عٍ وُرِ فبٍفبٍ قٍنمَ نّ ﭑ بّ، بَرِ مَ ﭑ هْرْ مْبَنشِ نَشَن تِمَ، عَ لَنمَ عَ شَ شُنفبٌ، عَ شَ تٌقَن. 9 ﭑ سَرٍ نَشَن قِمَ عِ شَ وُرِ بٌلٌنيِيٍ مَ نَ نَن يَ؛ مّنفِ مَنِيّ بُسَلِ وُلُ تٌنفٌ سٌلٌمَسَشَن، قُندٍنيِ مَنِيّ بُسَلِ وُلُ تٌنفٌ سٌلٌمَسَشَن، وّنِ قِقَ وُلُ سُولِ، نُن تُرٍ قِقَ وُلُ سُولِ.»

10 تِرٍ مَنفّ شِرَ مِ نَشَ سُلٍمَنِ يَابِ بَتَاشّ رَ، «عَلَتَلَ نَن عِ تِشِ مَنفّ رَ عَ شَ شَنُنتٍيَ شَ قٍ رَ عَ شَ حَمَ بّ.» 11 عَ مَن نَشَ عَ قَلَ، «تَنتُي نَ عِسِرَيِلَ مَرِفِ عَلَتَلَ بّ، نَشَن كٌورٍ نُن بْشِ دَاشِ. عَ بَرَ دِ شّمّ قِ دَوُدَ مَ نَشَن شَ لْننِ نُن شَشِلِ فبٌ، نَشَن نْمَ بَنشِ تِدٍ عَلَتَلَ بّ عَ نُن مَنفّ بَنشِ عَ يّتّ كَن بّ. 12 يَكْسِ، ﭑ بَرَ شُرَ مَبِ شّي عِ يِرٍ. عَ قَتَ وَلِدٍ كِ قَنيِ رَ. 13 عَ نفَ كٍلِشِ دَنَ بْنسْي نّ، تِرٍكَ نَن نَ عَ بَبَ رَ. عَ قَتَ شّيمَ، فبٍتِ، يْشُي، وُرٍ، فّمّ، نُن وُرِ رَوَلِدٍ، عَ نُن فّسّ فبٍيلِ نُن عَ قْورّ رَوَلِدٍ. عَ دُفِيٍ كٌلٌن. عَ قَتَ سٍ بِرِن مَسٌلِدٍ عِ وَ مَ نَشٍيٍ شْن. عَ كَقُمَ عِ شَ وَلِكّيٍ مَ وَلِ كُي، عَ نُن ﭑ مَرِفِ عِ بَبَ دَوُدَ شَ وَلِكّيٍ مَ. 14 عِ نَشَن قَلَ مّنفِ مَنِيّ، قُندٍنيِ مَنِيّ، تُرٍ، نُن وّنِ شَ قٍ رَ، عِ شَ نَ رَبَ. 15 عِ وَ مَ لِبَن وُرِ شَسَبِ نَشَن شْن مَ، مُشُ نَ سّفّمَ نّ، مُشُ مَن عٍ مَشَنِنمَ نّ كُنكُييٍ كُي بَا مَ هَن يَقَ. مّننِ عِ نْمَ عٍ رَتٍدٍ دَرِ سَلَمُ.»

16 سُلٍمَنِ نَشَ مِشِيٍ كْنتِ نَشٍيٍ نُ نَ عِسِرَيِلَ بْشِ مَ، كْنْ عٍ مُ قِندِ عِسِرَيِلَكَيٍ رَ. عَ بَبَ دَوُدَ قَن نُ بَرَ نَ مْولِ رَبَ. نَ مِشِ شَسَبِ نُ لَنشِ مِشِ وُلُ كّمّ تٌنفٌ سُولِ نُن سَشَن كّمّ سٍننِ نَن مَ. 17 يِ مِشِيٍ يَ مَ عَ نَشَ شّمّ وُلُ تٌنفٌ سٌلٌقٍرٍ يَمَرِ عٍ شَ قِندِ كٌتٍ شَنِنيِيٍ رَ. عَ مَن نَشَ شّمّ وُلُ تٌنفٌ سٌلٌمَسَشَن تٌنفٌ فّمّ مَسٌلِيٍ رَ، نَشٍيٍ وَلِمَ فٍيَ مَ. عَ مَن نَشَ شّمّ وُلُ سَشَن كّمّ سٍننِ سْتْ وَلِ شُنيِيٍ رَ نَشٍيٍ مِشِيٍ رَوَلِمَ.