1 عَمٌنِ مَنفّ نَشَسَ نَشَ يٌنكِن يَبّسِ تَا يَ رَ فَلَدِ بْشِ مَ. يَبّسِكَيٍ نَشَ عَ قَلَ عَ بّ، «وٌن شَ سَاتّ شِرِ، مُشُ شَ لُ عِ سَفٌي.» 2 نَشَسَ عَمٌنِكَ نَشَ عٍ يَابِ، «وٌن نْمَ سَاتّ شِرِدٍ، كْنْ قٌ وٌ شَ تِن ﭑ شَ وٌ يِرٍقَنيِ يَ كَنَ، عَلَكٌ يَافِ شَ دُ سُ عِسِرَيِلَ بِرِن شُن نَ.» 3 يَبّسِ كُنتِفِيٍ نَشَ عَ قَلَ عَ بّ، «شِ سٌلٌقٍرٍ قِ مُشُ مَ، عَلَكٌ شّيرَيٍ شَ سِفَ عِسِرَيِلَ تَا بِرِن. شَ مِشِ يٌ مُ نْمَ مُشُ رَتَنفَدٍ، مُشُ لُمَ عِ سَفٌي.»

4 شّيرَيٍ نَشَ سِفَ فِبٍيَ سْلُ شْنيِ. عٍ تٌ فّ دّنتّفّ سَدٍ، حَمَ بِرِن نَشَ وَ عَ شْرْشْي رَ. 5 نَ تّمُي، سْلُ نَشَ قَ كٍلِقٍ شّ مَ عَ شَ نِنفٍيٍ قْشْ رَ. عَ نَشَ مَشْرِنيِ تِ، «مُنقٍ رَ حَمَ نَ وَقٍ يِ مْولِ رَ؟» عٍ نَشَ يَبّسِكَيٍ شَ مَسٍنيِ دّنتّفّ عَ بّ. 6 سْلُ تٌ نَ مّ، عَلَتَلَ شَشِلِ نَشَ فٌرٌ عَ مَ، عَ بْحّ نَشَ تٍ سّنبّ رَ. 7 عَ نَشَ نِنفٍ قِرِن تٌنفٌ، عَ عٍ عِبٌلٌن عَ شُنتُن شُنتُنيِ رَ. عَ نَشَ نَ شُنتُنيِيٍ رَ سَنبَ عِسِرَيِلَ تَا بِرِن مَ نَ شّيرَيٍ سَابُي رَ، عَ قَلَقٍ رَ، «شَ نَشَن يٌ مُ بِرَ سْلُ نُن سَمُوٍلِ قْشْ رَ، نَ كَنيِ شَ نِنفٍيٍ قَن نَبَمَ يِ كِ نّ.» عَلَتَلَ شَ يَرَفَاشُي نَشَ فٌرٌ عِسِرَيِلَكَيٍ مَ، عٍ بِرِن نَشَ تٍ فٍرٍ شِلِ مَ لَنيِ كُي. 8 سْلُ نَشَ عٍ كْنتِ بٍسٍكِ. عِسِرَيِلَ شّمّ شَسَبِ لَن مِشِ وُلُ كّمّ سَشَن نَن مَ. يُدَ بْنسْي شّمّ لَن مِشِ وُلُ تٌنفٌ سَشَن. 9 عٍ نَشَ عَ قَلَ شّيرَيٍ بّ، «وٌ سَ عَ قَلَ يَبّسِكَيٍ بّ فَلَدِ بْشِ مَ، ‹تِنَ، سٌفٍ نَ شْنْ، وٌ شُن قَمَ رَكٍلِدٍ.›» شّيرَيٍ تٌ نَ شِبَارُ مَسٍن يَبّسِ حَمَ بّ، عٍ نَشَ حّلّشِن كِ قَنيِ رَ. 10 نَ كُي يَبّسِ حَمَ نَشَ عَ قَلَ عَمٌنِكَيٍ بّ، «تِنَ، مُشُ لُمَ وٌ سَفٌي، وٌ وٌ وَشْنيِ رَبَمَ نّ مُشُ رَ.»

11 نَ كُيٍ عِبَ، سْلُ نَشَ حَمَ قِندِ فَلِ سَشَن نَ. سُبَشّ عٍ نَشَ سٌ عَمٌنِكَيٍ يٌنكِندٍ، عٍ عٍ بْنبْ هَن يَنيِ تَفِ. مِشِ نَشٍيٍ مُ قَشَ، نٍيٍ نَشَ يٍنسٍن هَن مِشِ قِرِن مُ نْ لُدٍ يِرٍ كٍرٍن.

12 حَمَ نَشَ عَ قَلَ سَمُوٍلِ بّ، «ندٍيٍ عَ قَلَ عَ سْلُ مُ نْمَ مَنفّيَ رَبَدٍ وٌن شُن مَ؟ وٌ نَ مِشِيٍ رَ مِنِ، مُشُ شَ عٍ قَشَ.» 13 كْنْ سْلُ نَشَ عٍ يَابِ، «مِشِ يٌ مُ قَشَمَ تٌ، بَرِ مَ تٌ عَلَتَلَ بَرَ عِسِرَيِلَ رَكِسِ.» 14 سَمُوٍلِ نَشَ عَ قَلَ حَمَ بّ، «وٌن شّي فِلِفَلِ، عَلَكٌ مَنفّ شَ مَفٌرٌ عَ شَ كِبَنيِ كٍرٍنيِ رَ.» 15 حَمَ بِرِن نَشَ سِفَ فِلِفَلِ، عٍ نَشَ سْلُ تِ مَنفّ رَ عَلَتَلَ يَ عِ. عٍ نَشَ شَنُنتٍيَ سّرّشّ بَ مّننِ عَلَتَلَ بّ، سْلُ نُن عِسِرَيِلَكَيٍ نَشَ سّيوَ كِ قَنيِ رَ.