1 गे इस्राएली, परमप्रभु यावे आ लोव़ नेनीन। मारदे हना परमप्रभु यावेमी रागीम बाक्‍ब इन कली दोस गेब। मार दोस गेब देंशा हना “एको रागी ङा मुरुमी आं कली प्रोंइतीमी, आं कली मदाक्‍थु, आं कली मटीनीम। 2 एकेर कसम जचा, जोल पचा, मुर साइक्‍चा, खुइ पचा नु तेल्‍लेम पचा ङा लाक्‍शा, अर्को मारेइ मबाक्‍ब। नेल्‍लेमी मरिम्‍शो ला पाइनीम। मेकोपुकीम मुर साइश्‍शा, हुश ख्राक्‍श पोक्‍नीम। 3 मोपतीके एको रागीमी रोंका पाइब। एकेर बाक्‍ब नेल्‍ले ओंखां पा जाम्‍शा लाइनीम। बस्‍तु भाव, चिक्‍ब नु समुन्‍द्र ङा ङांइ बेक्‍शा, जाम्‍शा लाइनीम।

4 तन्‍न सुइमी सुइ कली दोस मगेमेक्‍ल। मुरुमी मुर आन कली ‘मरिम्‍शो पाइतीनी’ मदेंमल। मारदे हना गो गे चढ़ेबपुकी नु लोव़ का पचा माल्‍नुङ। 5 गेपुकी काबु नाक्‍ती खतम दुम्‍नीनी। मिनु आं लोव़ पाइबपुकी यो गेपुकी नु काथा खतम दुम्‍नीम। मोपतीके गो इन खिं ङा मुर नेल्‍ल गे नु खतम सेल्‍नुङमी। 6 आं मुर मारेइ मतुइक्‍तीके खतम दुम्‍नीम। मारदे हना गेपुकीमी तुइक्‍तीक कली ताइक्‍ताक्‍नी। मोपतीके गो यो इन कली आं कली चढ़ेब दुम्‍तीक रे ताइक्‍नन्‍नी। मारदे हना गेपुकीमी इन परमप्रभु, आं अरेशो लोव़ कली क्‍यारी मपनी। मोपतीके गो यो इन आल आन कली क्‍यारी मपाइनुङ। 7 चढ़ेबपुकी दोशो बारमा, मोशोन आं कली मरिम्‍शो पाम्‍तेक्‍म। मेको आन ठेयब दुम्‍तीके ताइश्‍शा, मुने दोक्‍तीक गेय पाम्‍तेक्‍म। 8 मेकोपुकी आं मुर आन पाप आ पर्बम चढ़ेशो ब्‍वशा दोम्‍नीम। मिनु मुरपुकीम पाप पशो दाक्‍नीम। लेवी ४:१३-२१, २७-३५; लेवी ६:१९ 9 मिनु मुरपुकी दोदेंशो बाक्‍मा, मोदेंशो चढ़ेबपुकी बाक्‍नीम। गो मुरपुकी नु चढ़ेब नेल्‍ल आन कली सजाइ गेनुङ। मेकोपुकीमी दोदेंशो पामे, मोदेंशोन सजाइ गेनुङ। 10 मेकोपुकीमी जाइनीम ब्‍वाइनीम, तन्‍न मरूनीम। मेकोपुकीमी तेल्‍लेम पशा, सोशा बोशा मलाइनीम। मारदे हना मेकोपुकीमी तेल्‍लेम पचा कली परमप्रभु यावे कली प्रोंइतेक्‍म।

11 माइत अङगुर शांबु नु नक अङगुर शांबुम मुर आन रुप्‍तीके कली साम्‍ब। 12 आं मुरपुकीमी शी के मूर्ति कली हिल्‍लो पाइनीम। मिनु मेकोपुकीमी कोक्‍केमी साहीत कोव़नीम। मारदे हना तेल्‍लेम पतीक थुंमी मेको आन कली हेंथे गाक्‍पाइश्‍शो बाक्‍ब। मेकोपुकीमी तेल्‍लेम पचा कली परमप्रभु कली प्रोंइतेक्‍म। येरमीया २:२७; होसे ५:४ 13 मेकोपुकीमी डांडामी चढ़ेनीम। मिनु पहाडमी तुल्‍च, पिपल नु सेक्‍ल रवा आन वांकुम धूप चोइनीम। मोपतीके इन तमी तेल्‍लेम दुम्‍नीम। मिनु इन चाइमीपुकी अरु आन वोंइश नु बाक्‍नीम। इजीकीएल ६:१३ 14 गो इन तमी आन तेल्‍लेम पशो नु इन चाइमी अरु आन वोंइश नु बाक्‍शो आ पर्बम सजाइ मगेनुङ। मारदे हना मेको वोंइश मुर यो सुइ मबाक्‍तीकेमी तेल्‍लेम नु लशा देवी देवता आन कली चढ़ेनीम। मोदेंशो मरुप्‍ब मुरपुकी जाम्‍शा लाइनीम। होसे १:२

15 गे इस्राएलीपुकी, तेल्‍लेम पाइतीनी हना यो, यहूदा ङा मुर आन कली हेंथे मगाक्‍पतीन। गेपुकी गिल्‍गालमी नु बेथ-आवेनमी मलन। मिनु ‘परमप्रभु यावे ब्रोंइशा बाक्‍शो खोदेंशो पा’ दे कसम मजने” दे परमप्रभुमी देंत। आमोस ५:५; होसे १०:५; आमोस ८:१४ 16 इस्राएलीपुकी मटीब बी खोदेंशो बाक्‍नीम। दोपा परमप्रभु यावेमी भेडा कली योव़शो खोदेंशो पा योव़ने चाक्‍बा? 17 एफ्राइम मूर्ति आन वारच दुम्‍शो बाक्‍ब। मोपतीके मेको कली प्रोनीन। 18 मेकोपुकीमी शांबु थुम्‍शा यो तेल्‍लेम पना पन बाक्‍नीम। मेको आन सासन पाइब यो मुने दोक्‍‍नीम। 19 ठेयब फश गिवार पशा, मेको आन कली योल्‍ब। मिनु मेको आन चढ़ेशो आ पर्बम मुने दोक्‍नीम।