1 परमप्रभु यावेमी आं कली लोव़ पाप्‍तु। 2 मार लोव़ पाप्‍तु देंशा हना “ए मुर, टायर ङा पिप आ तौ कली परमप्रभु, परमप्रभु यावेमी ‘गे इ थुं ङा ठेयब लेत्‍तीकेम, गो परमप्रभु नङ। गो समुन्‍द्र आ दातेम देवी देवता आन बाक्‍‍तीकेम बाक्‍नुङ’ देंते। तन्‍न गे मुर ला बाक्‍नेवे। परमप्रभु मनवे। गे ठेयब लेश्‍शा, इ थुंम ‘परमप्रभु खोदेंशो जोक्‍ब तुइक्‍ब बाक्‍नुङ’ दे मिम्‍साक्‍वे। यसैया ३१:३; दानीएल ५:२०; प्रेरित १२:२३ 3 गे दानीएल क्‍येङा यो जोक्‍ब तुइक्‍ब बाक्‍नेवे। मारेइ ख्रुइक्‍तीक लोव़ इ रे मख्रुंइसी‍शो बाक्‍ब। इजीकीएल १४:१४; दानीएल १:१७ 4 गे इ रुप्‍तीक थुं नु मिम्‍तीकेम शुश शोंप चेम्‍शो बाक्‍नेवे। मिनु गे इ मार मार वोइक्‍तीकेम सुन नु चांदी तेल्‍शो बाक्‍नेवे। 5 गे इ रुप्‍तीक थुंम ग्‍याप्‍तीक लेयतीक गेय पा इ शोंप बारपाइश्‍शो बाक्‍नेवे। मिनु इ शोंपोम पतीके गे बोरशा ठेयब लेश्‍शो बाक्‍नेवे, देंशो बाक्‍ब” देंत। 6 मोपतीके परमप्रभु, परमप्रभु यावेमी “गे आंम इ कली परमप्रभु खोदेंशो सुंइ‍सीनेवे। 7 मोपतीके गो रागी रागी ङा नेल्‍ल क्‍येङा मरिम्‍शो पाइब मुर आन कली चाक्‍नुङ। मिनु मेकोमी आन तरवार इ दारस नु इ जोक्‍ब तुइक्‍ब थुं आ पर्बम शोइक्‍नीम। मिनु इ दारस ग्रांग्रा दिशो सेल्‍नीम। 8 मेकोपुकीम इ कली तुरसुम चाक्‍दीत्‍नीम। मिनु गे समुन्‍द्र आ दातेम हिंचा ङा दुम्‍शा बेक्‍नेवे। इजीकीएल २६:२० 9 मिनु मार, इ कली साइक्‍ब आन ङोंइती गे मुर दुम्‍शा यो ‘गो देवता का नङ’ देंनेवे ङा? ‘इ कली साइक्‍ब आन गुइमी बाक्‍शा यो मोदेंशो लोव़ पाइनेवे? 10 गे अर्को रागी ङा मुर आन गुइम ख्रोइक्‍तीक चिनु मख्रोइश्‍शो मुर खोदेंशो पा बेक्‍चा माल्‍नेवे’ दे गो, परमप्रभु, परमप्रभु यावेमी लोव़ पाता” देंत।

11 परमप्रभु यावेमी लेंशा आं कली लोव़ पाप्‍तु। 12 मार लोव़ पाप्‍तु देंशा हना “ए मुर, टायर ङा पिप आ पर्बम रोंका पावो। मिनु मेको कली परमप्रभु, परमप्रभु यावेमी इ कली ‘गे रिम्‍शो पा थोक्‍शो छाप खोदेंशो बाक्‍ते। मिनु रुप्‍तीक थुंम ब्रीशो नु थम दारशो बाक्‍ते। इजीकीएल २७:२ 13 गे परमप्रभु आ रू एदेनम खोदेंशो बाक्‍ते। गे हीराम ग्‍योम्‍सीशो बाक्‍ते। लल मानीक, हाव पुश्‍‍पराज, बुश नु नीलो पन्‍ना, पीतमनी, लल रङ ङा ओनीक्‍स, नीलो बि‍लौरा, बुश नीर, लल फिरोजा नु गिगी बेरूज माइश्‍शो हीराम ग्‍योम्‍सीशो बाक्‍ते। मिनु मेको हीरा ग्‍याइक्‍तीके नु आप्‍तीके सुन के बाक्‍तेक्‍म। गे दुमे नाक्‍तीन मेको नेल्‍ल ठीक पशो बाक्‍तेक्‍म। प्रस्‍थान २८:१७-२०; इजीकीएल ३१:८-९; उत्‍पत्ती २:८ 14 गो तेल लुक्‍शो करूब इ कली खाल पाइब सेल्‍ता। गे आं डांडाम बाक्‍शो नवे। गे मी ब्रशो फुल्‍लु आन दातेम गाक्‍बाक्‍ते। 15 गे सेल्‍चा पुंइसे नाक्‍त रे दोस मताइब बाक्‍ते। तन्‍न नोले मरिम्‍शो पाइब दुम्‍शो, बाक्‍ते। 16 मिनु इ एर ओंथ नेल्‍ल ङा ग्‍याप्‍तीक लेयतीक आ पर्बम हुश ख्राक्‍श पोक्‍शा, पाप पाप्‍तीवी। मोपतीके गो इ कली ताइक्‍तीक थोव़क खोदेंशो पा आं डांडा रे ताइक्‍ताक्‍ङ। मिनु इ कली खाल पाइब करूबम इ कली मी ब्रशो फुल्‍लु आन दाते रे खेरते। 17 गे इ दारसम प‍तीके इ थुं ठेयब लेश्‍शा बोरत। इ शुश शोंप दुम्‍तीके इ जोक्‍ब तुइक्‍ब थुं मरिम्‍शो सेल्‍तीवी। मोपतीके गो इ कली खपीम ताइक्‍ताक्‍न। मिनु इ कली पिप आन ङोंइती शुक्‍शी पतीक सेल्‍तन। 18 गे इ शुश मरिम्‍शो पशो नु इ जोल पा ग्‍याप्‍‍तीक लेयतीकेम इ आं कली ठेयब सेल्‍तीके ग्रांग्रा दिशो सेल्‍तीवी। मोपतीके गो इ आगा रे मी का ग्रुंइताक्‍ङ। मिनु मेकोमी इ कली नेक्‍तु। मिनु गो इ कली मुर आन ङोंइती पुलु सेल्‍तन। 19 मिनु इ कली तुइक्‍ब मुर नेल्‍ल इ कली तशा हिंतेक्‍म। गे हिंचा ङा दुम्‍शा बेक्‍ते। मिनु गे गेना हना यो बेक्‍शा लाइनेवे’ देनो” देंत। इजीकीएल २७:३६

20 परमप्रभु यावेमी आं कली लोव़ पाप्‍तु। 21 मार लोव़ पाप्‍तु देंशा हना “ए मुर, सीदोन गे कोव़ङो। मिनु मेको आ पर्बम आं लोव़ पावो। यसैया २३:२-४ 22 परमप्रभु, परमप्रभु यावेमी ‘ए सीदोन, गो इ कली सजाइ गेनुङ। गो इ दातेमी आं सक्ति कोंइनुङ। गो इ दातेमी आं सक्ति कोंइशा, निसाफ पाता हना, मेकोपुकीमी गोन परमप्रभु यावे नङ’ दे तुइक्‍नीम 23 गो मेको आ आगाम मुर बेक्‍तीक रोइ का सोइक्‍नुङ। मिनु मेको आ लां मेर हुश शाइक्‍पाइक्‍नुङ। मेको आन दाते ङा मुर तेइ तेइ तरवारम साइक्‍चा पुंइसीनीम। मिनु मेकोपुकीम ‘गोन परमप्रभु यावे नङ’ दे तुइक्‍नीम।

24 इस्राएल आ खिं ङा मुर नु मेको आन नेक्‍था ङा मुर आन दातेमी मुल श्‍येत गेब मुर मुल मबाक्‍नीम। मेकोपुकीम ‘गोन परमप्रभु, परमप्रभु यावे नङ’ दे तुइक्‍नीम” देंशो बाक्‍ब। 25 परमप्रभु, परमप्रभु यावेमी “गो इस्राएल आ खिं ङा मुर आन कली मेको आन ब्रशा बाक्‍शो रागी रागी ङा मुर आन दाते रे ग्रुम्‍पाइक्‍नुङमी। मिनु गो परमप्रभु यावे नङ, दे रागी रागी ङा मुर आन ङोंइती तुइक्‍पांइसीनुङ। मेना मेकोपुकी आं गेय पाइब याकूब कली गेशो रागीम बाक्‍चा ताइनीम। 26 मेकोपुकी मेकेर मारेइ मदुम्‍थु बाक्‍नीम। मेकोपुकीम खिं सेल्‍नीम। मिनु अङगुर ख्रुम्‍नीम। मिनु गो मेको आन कली तशा, ग्रांग्रा दीब नेल्‍ल आन कली सजाइ गेनुङमी। गो मेको आन नेक्‍था बाक्‍ब मेको आन कली मदाक्‍ब आन कली निसाफ पङानु, मेकोपुकी रिम्‍शो पा बाक्‍नीम। मिनु मेकोपुकीम ‘गोन परमप्रभु यावे, आन परमप्रभु नङ’ दे तुइक्‍नीम” देंत।