1 मिनु परमप्रभु यावेमी आं कली लोव़ पाप्‍तु। 2 मार लोव़ पाप्‍तु हना “ए मुर, कथा का देनो। गे इस्राएल आ खिं ङा मुर आन कली लोव़ पावो। 3 मिनु परमप्रभु यावेमी मेको आन कली ‘लाइश्‍शो, ठेयब फ्रां पाइश्‍शो ठेयब ककाकुली का बाक्‍त। मेको आ शुश ओफ्‍ला शुश रङ ङा बाक्‍तेक्‍म। मेको लेबानोनम जाक्‍शा, लाइश्‍शो रवा आ ङर प्रोइक्‍तु। 4 मेकोमी मेको रवा आ ङर लाइश्‍शा, ग्‍याप्‍तीक लेयतीक रागीम चाक्‍दीत्‍तु। मिनु मेको ग्‍याप्‍ब लेयब आन सहर काम ख्रुम्‍तु। इजीकीएल १६:२९ 5 मिनु नोले मेकोमी रागी ङा वांचेर लाइश्‍शा, रिम्‍शो खपीम ख्रुम्‍तु। मेकोम मेको वांचेर शुश ब्‍वाक्‍कु बाक्‍तीकेम ख्रुम्‍तु। 6 मिनु मेको वाशा एर ओंथ नेल्‍ल गे ब्राइब लहारा का दुम्‍त। मिनु मेको आ राशी मेको ककाकुली गे लेत्‍तेक्‍म। तन्‍न मेको आ शाक्‍श चहिं आगामीन लीतेक्‍म। मोपा मेको लहारा का दुम्‍त। मिनु मेको आ राशी दाप्‍तेक्‍म। मिनु मेकेर रे शुश सफा ग्रूतेक्‍म। इजीकीएल १९:१०

7 मिनु मेकेर अर्को ठेयब फ्रां पाइश्‍शो नु शुश ओफ्‍ला पाइश्‍शो ठेयब ककाकुली का बाक्‍त। मिनु मेको लहाराम आ शाक्‍श मेको गे ब्रपाइक्‍तु। ब्‍वाक्‍कु तचा कली मेको आ राशी यो मेको ककाकुली गे ब्रपाइक्‍तु। मेको ङोंइती ङा ख्रुम्‍तीके रे याक्‍शो बाक्‍त। 8 मेको के राशी दाम्‍मल। फल सिम्‍मल। मिनु मेको रिम्‍शो लहारा का दुम्‍ल, दे शुश ब्‍वाक्‍कु बाक्‍शो नु रिम्‍शो खपीम ख्रुम्‍शो बाक्‍त’ देंशो बाक्‍ब। 9 मिनु परमप्रभु, परमप्रभु यावेमी ‘मार, मेको ग्रेल्‍बा ङा? मार, मेको आ शाक्‍श तुल्‍चा मपुंइसीबा ङा? मिनु मेको आ फल मसोव़नीमी ङा? मिनु मेको मबेक्‍बा ङा? मेको आ नक वाशो कोच्‍वा नेल्‍ल बेक्‍नीम। मेको आ शाक्‍श तुल्‍चा कली शुश बोल्‍यो गुइ नु शुश मुर ममाल्‍नीम। 10 मेको कली याक्‍शा ला हना यो मेको ग्रेल्‍बा ङा? पूर्ब ङा फशेम आबानु मेको नेल्‍ल मसोव़बा ङा? रिम्‍शो खपीम ख्रुम्‍शो बाक्‍त हना यो, फशेम आबानु मेको मसोव़बा?’ दे मेको आन कली देंचा माल्‍नेवे” देंत।

11 मिनु परमप्रभु यावेमी आं कली लोव़ पाप्‍तु। 12 मार लोव़ पाप्‍तु देंशा हना “एको मटीब खिं ङा मुर आन कली ‘एको लोव़ आ अर्थ मार बाक्‍बा, मेको मतुइक्‍नीनी?’ दे हिल्‍लो पामी। मेको आन कली ‘बेबीलोन ङा पिप यरूसलेमम जाक्‍त। मिनु मेकोमी यरूसलेम ङा पिप नु आ ठेयब गेय पाइब आन कली बेबीलोनम लाइक्‍तीमी। २राजा २४:१०,१५,१६ 13 मिनु मेकोम पिप आ खिं ङा मुर का कली लाइश्‍शा, कसम जपाइश्‍शा, मेको नु कबल का पाप्‍तु। मिनु मेकोमी मेको रागी ङा ठेयब मुर आन कली लाइक्‍तु। २राजा २४:१७; २इतिहास ३६:१३ 14 मेको रागी बोल्‍यो मदुम्‍ल। लेंशा बोक्‍ने मचबल नु मेकोम आ पशो कबल ला खाप्‍ने चाप्‍शा बाक्‍ल, दे मोदेंशो पाप्‍तु’ देंत। 15 तन्‍न यरूसलेम ङा पिपमी मेको बेबीलोन ङा पिप कली मटिथु, इजीप्‍त रागीम शारा नु ठेयब हुल का लडाइ पाइब गेयीनी, दे मुर सोइक्‍ताक्‍व। मार, मेको कली रिम्‍शो दुम्‍बा ङा? मार मोदेंशो गेय पाइब मुर ब्रोंइने चाप्‍बा ङा? कबल पशो प्रोंइशा यो, मेको ब्रोंइने चाप्‍बा ङा?” देंत। 16 परमप्रभु, परमप्रभु यावेमी “गो आं ब्रोंइशा बाक्‍शो खोदेंशो पा, मेकोमी मेको कली पिप सेल्‍ब पिप नु जशो कसम प्रेंशा, आ पशो कबल प्रोंइशा, बेबीलोन ङा पिप आ बाक्‍तीक सहरम बेक्‍ब। 17 फाराओ आ सक्ति पाइश्‍शो लडाइ पाइब नु मेको आ मार मारमी मेको कली वारच पने मचाप्‍नीम। यरूसलेम कली पुम्‍ची ना नु गारो ङोइक्‍तीक सेल्‍शा शुश मुर साइक्‍ची ना वारच मपाइब। 18 मारदे हना मेकोम आ जशो कसम ममिम्‍थु, आ पशो कबल प्रोंइशा, सल्‍ला पा यो, मोदेंशो मरिम्‍शो पतीके मेको ब्रोंइने मचाप्‍ब” देंशो बाक्‍ब। 19 मोपतीके परमप्रभु, परमप्रभु यावेमी “गो आं ब्रोंइशा बाक्‍शो खोदेंशो पा, मेकोम आ कसम जशो प्रेंशा, आं कबल प्रोंइशो नेल्‍ल मेको आ पियामीन मोइक्‍नुङ। 20 गो आं ग्‍याइल मेको तार ब्‍वारनुङ। मिनु मेको आं ग्‍याइलीम रेप्‍ब। मिनु गो मेको कली बेबीलोनम चाक्‍नुङ। मिनु मेकोम आं थुं फाइक्‍तीके गो मेको कली निसाफ पाइनुङ। इजीकीएल १२:१३ 21 मेको आ प्रोक्‍शा लशो लडाइ पाइब नेल्‍ल तरवारम साइक्‍चा पुंइसीनीम। मिनु ब्रोंइशो नेल्‍ल एर ओंथ ब्राइ‍नीम। मिनु गो परमप्रभु यावेमीन एको लोव़ पशो नङ, दे तुइक्‍नीनी” देंशो बाक्‍ब।

22 परमप्रभु, परमप्रभु यावेमी “गो लेबानोन ङा लाइश्‍‍शो रवा आ ङर ङा आइक्‍च राशी का प्रोइश्‍शा लाइक्‍नुङ। मिनु गो मेको कली नेल्‍ल क्‍येङा लाइश्‍शो डांडाम ख्रुम्‍‍नुङ। यसैया ११:१ 23 गो मेको इस्राएल ङा लाइश्‍शो पहाड मेर ख्रुम्‍नुङ। मिनु मेकोम शुश राशी दाप्‍पाइश्‍शा फल सिप्‍पाइश्‍शा, थम दारशो लेबानोन ङा लाइश्‍शो रवा का दुम्‍ब। मिनु नेल्‍ल खाल ङा चिक्‍ब आ राशीम बाक्‍नीम। मिनु मेकेर ठेयब चिक्‍बपुकीम ग्‍योव़ सेल्‍शा, मेको आ वांकुम बाक्‍नीम। इजीकीएल २०:४०; १सामुएल २:७०८ 24 मिनु रू ङा रवा नेल्‍लेम गो, परमप्रभु यावे नङ, दे तुइक्‍चा माल्‍नीम। गो लाइश्‍शो रवा आन कली आइक्‍च सेल्‍नुङ। आइक्‍च रवा आन कली लाइश्‍शो सेल्‍नुङ। गो गिगी रवा आन कली सोव़पाइक्‍नुङ। मिनु सोव़शो रवा आन कली गिगी दुम्‍पाइक्नुङ। गो, परमप्रभु यावेमी एको लोव़ पाता। मिनु गो एको थमा पा पाइनुङ” देंत।