1 मोसामी इस्राएली नेल्‍ल आन कली ब्रेश्‍शा “परमप्रभु यावेमी शेंशो इन पचा माल्‍शो गेय, मार मार बाक्‍ब देंशा हना, 2 गे ६ नाक्‍त सम्‍म गेय पने। ७ नाक्‍ती चहिं परमप्रभु यावे आ नाक्‍त दुम्‍तीके, मेको नाक्‍ती नाइक्‍तीक नाक्‍त बाक्‍ब। सु सुमी मेको नाक्‍ती गेय पाइनीमी, मेको साइक्‍चा पुंइसीनीम। प्रस्‍थान २०:८-११; प्रस्‍थान ३४:२१ 3 नाइक्‍तीक नाक्‍ती इन खिं नेल्‍लेमी मी मुइक्‍चा यो मदुम्‍ब” दे माइक्‍तीमी।

4 मिनु नोले मोसामी इस्राएली आन कली “परमप्रभु यावे आ शेंशो लोव़ मार बाक्‍ब, देंशा हना 5 ‘परमप्रभु यावे कली ग्रुम्‍तीक ताम्‍बु सेल्‍चा कली चढ़ेतीक मार मार पोक्‍चा माल्‍नीनी। सु सुम ग्‍येरशा गेनीनी, मेकोमी परमप्रभु यावे कली मार चाक्‍चा माल्‍नीनी देंशा हना, सुन, चांदी, कांसा, प्रस्‍थान २५:२ 6 नीलो, प्‍याजी नु लल श्‍येले नु रिम्‍शो पा किरशो सुती श्‍येले के प्रोव़शो वा नु क्‍यारश आ चां, 7 लल रङ नुप्‍शो बोका आ कुशुल, नेल्‍ल क्‍येङा रिम्‍शो कुशुल नु बोल्‍यो शी, 8 बत्ती दाचा कली तेल, लुक्‍तीक तेल कली ब्‍वाइक्‍तीक नु धूप कली ब्‍वाइक्‍तीक, 9 निसाफ पतीके ऊरीम नु थुम्‍मीम वोइक्‍तीक झोला नु कुचु तार वोइक्‍तीक सेल्‍चा कली ओनीक्‍स माइश्‍शो हीरा नु अरु हीरा चाक्‍चा माल्‍नीनी’ ” दें‍त।

10 मिनु मोसामी “इन दातेम सु सु जोक्‍ब बाक्‍नी, मेको नेल्‍ल जाक्‍शा, परमप्रभु यावे आ देंशो थोव़क नेल्‍ल सेल्‍चा माल्‍नीनी। 11 ग्रुम्‍तीक ताम्‍बु नु ताम्‍बु कली सुम्‍तीक, ग्‍याइक्‍पाइक्‍तीकपुकी, फलेक नु लाइश्‍शो कोक्‍केपुकी, थामपुकी नु राप्‍पाइक्‍तीकपुकी, 12 कबल पशो सन्‍दोस नु आ कुरतीक कोक्‍के निक्‍शी, सन्‍दोस आ सुम्‍तीके, फारतीके, 13 टेबल नु आ कुरतीक कोक्‍के, ग्‍योंब नेल्‍ल नु कोंइतीक शोब्‍ले, 14 बत्ती दातीक नु मेको आ दियारीपुकी, बत्ती कली ठीक सेल्‍तीक थोव़क नु बत्ती कली तेल, 15 धूप चोशा चढ़ेतीके नु मेको आ कुरतीक कोक्‍के, लुक्‍चा कली तेल नु ब्रोव़शो रिना पाइश्‍शो धूप, ताम्‍बु ओव़तीक ङा फारतीक वा, 16 चोशा चढ़ेतीके नु आ एर ओंथ ङा कांसा के थरपु, कुरतीक कोक्‍के नु आ मार मार, चिक्‍तीक ठेयब बोस नु मेको आ निप्‍पाइक्‍तीके, 17 ताम्‍बु आ लाङगा ङा फारतीक वा, आ थामपुकी नु मेको आन राप्‍पाइक्‍तीकपुकी, ओव़तीक ङा फारतीक वा, 18 ताम्‍बु आ किला नु लाङगा थरपु ङा किलापुकी नु डोरीपुकी, 19 नु हारून नु आ तौ परमप्रभु कली चढ़ेब दुम्‍चा कली फेक्‍तीक वासी सेल्‍चा माल्‍नीनी” दे मुर आन कली माइक्‍तीमी।

20 मिनु नोले इस्राएली नेल्‍ल मोसा आ ङोंइती रे लाम्‍तेक्‍म। 21 सु सु आन थुंमी “गो चाक्‍नुङ” देंमा, मेकोपुकीमी ग्रुम्‍तीक ताम्‍बु सेल्‍चा कली नु मेकेर ङा गेय पचा कली मार मार थोव़क नु फेक्‍तीक वा कली मार मार माल्‍दा, मेको परमप्रभु यावे कली गेचा, दे चाक्‍तेक्‍म। १इतिहास २९:५-९; २कोरिन्‍थी ९:७ 22 मीश मुर, वोंइश मुर नेल्‍लेमी मार मार चाक्‍तेक्‍म देंशा हना, मुन्‍द्री, मारवाडी, औंठी, सुन के चुरा नु अरु सुन के थोव़कपुकी परमप्रभु यावे कली चाक्‍तेक्‍म। 23 सु सु नु नीलो, प्‍याजी नु लल श्‍येले नु रिम्‍शो पा किरशो सुती श्‍येले के प्रोव़शो वा, क्‍यारश आ चां, लल रङ नुप्‍शो सांड आन कुशुल, नेल्‍ल क्‍येङा रिम्‍शो सेल्‍शो कुशुल बाक्‍मे, मेको चाक्‍तेक्‍म। 24 सु सु आन के चांदी नु कांसा बाक्‍मे, मेकोमी परमप्रभु यावे कली चाक्‍तेक्‍म। सु सु नु गेय पचा कली ठीक प‍शो बोल्‍यो शी बाक्‍मे, मेको चाक्‍तेक्‍म। 25 मिनु मीश मुर आन दातेमी सु सु जोक्‍ब बाक्‍मा, मेकोपुकीमी आन पांइशो नीलो, प्‍याजी, लल श्‍येले नु रिम्‍शो पा किरशो सुती श्‍येले के प्रोव़शो वा चाक्‍तेक्‍म। 26 सु सु जोक्‍ब बाक्‍मा, मेकोपुकीमी क्‍यारश आ चां पांइतेक्‍म। 27 मिनु ठेयब मुरपुकीमी ओनीक्‍स माइश्‍शो नु अरु हीरा कुचु तार वोइक्‍तीक नु निसाफ पतीक ऊरीम नु थुम्‍मीम वोइक्‍चा कली झोलाम क्‍येप्‍पाइक्‍चा कली चाक्‍तेक्‍म। 28 बत्ती कली तेल, लुक्‍चा कली तेल नु धूप कली ब्रोव़शो रिना पाइब ब्‍वाइक्‍तीक थोव़क चाक्‍तेक्‍म। 29 मोपा इस्राएली नेल्‍लेमी ग्‍येरशा, परमप्रभु यावे कली गेचा कली मारेइ मारेइ चाक्‍तेक्‍म। मीश मुर नु वोंइश मुरुमी मार मार माल्‍बा मेको नेल्‍ल चाक्‍तेक्‍म। परमप्रभु यावेमी मोसा कली अरेशो खोदेंशो पा ताम्‍बु सेल्‍तीक गेय पचा कली मार मार चाक्‍तेक्‍म।

30 मिनु मोसामी इस्राएली आन कली “नेनीन, परमप्रभु यावेमी यहूदा आ थर ङा हुर आ चच, ऊरी आ तौ बेचालेल कली आ नें थिशा, आ गेय पचा कली योव़तु। 31 मेकोमी मेको कली परमप्रभुमी आ सोक्‍तीम प्रिंशा, मार मार सेल्‍चा कली जोक्‍ब तुइक्‍ब सेल्‍तु। मिनु पने चाप्‍तीक सक्ति यो गेप्‍तु। 32 मेकोमी नेल्‍ल मिम्‍शा, सुन, चांदी नु कांसा के मारेइ मारेइ चेम्‍ने चाप्‍ब। 33 हीरा ख्रोइक्‍तीक नु सुनम क्‍येप्‍तीके, शी मुतीके नु मारेइ मारेइ सेल्‍चा जोक्‍ब दुम्‍पाइक्‍तु। 34 परमप्रभुमी बेचालेल नु दान आ थर ङा अहीसामाक आ तौ ओहोली-आब आस कली अरु आन कली शेंतीक सक्ति गेशो बाक्‍ब। 35 मिनु मेको आस कली जोक्‍ब तुइक्‍ब थुं गेशा, गेय पतीक सक्ति नेल्‍ल गेशो बाक्‍ब। मार गेय पचा कली जोक्‍ब तुइक्‍ब सेल्‍शो बाक्‍ब देंशा हना, दारशो मार मार गेय पाइब, मिम्‍शा ब्रेक्‍स ब्रेक्‍शा, नीलो प्‍याजी नु लल श्‍येले बुटा प्रोव़चा नु रिम्‍शो पा किरशो सुती श्‍येले के प्रोव़शो वामी बुटा आप्‍चा कली जोक्‍ब तुइक्‍ब सेल्‍शो बाक्‍ब।