1 मेना ब्‍वाक्‍कुमी ख्रुम्‍शा ग्रुंइब यूहन्‍ना यहूदीया ङा गोरशो रागीम बाक्‍शा लूका १:१३ 2 “इन थुं परमप्रभु यावे गे लेत्‍तीने। मारदे हना स्‍वर्ग ङा राज्‍य जाक्‍चशो बाक्‍ब” दे मुर आन कली शेंना शेंन बाक्‍माक्‍त। मत्ती ४:१७; रोमी १२:२ 3 साइ नेसी परमप्रभु यावे आ लोव़ पाइब यसैयामी “गोरशो रागीमी सेंदा कामी ओदेंशो नेंसीब ‘प्रभु आ लां सेलीने। आ गाक्‍तीके फुल्‍लु ग्रोक्‍शा थेलीने’ देंशो नेंसीब” देंशो बाक्‍माक्‍त। मेको लोव़ पाइब यूहन्‍ना बाक्‍माक्‍त। यसैया ४०:३; यूहन्‍ना १:२३ 4 यूहन्‍नामी दलओंठ आ चां के प्रोव़शो वा फेक्‍बाक्‍माक्‍त, कुशुल के पेटी किप्‍बाक्‍माक्‍त। मिनु सल्‍हा ब्‍वशा, रोका खुदो जशा बाक्‍बाक्‍माक्‍त। २राजा १:८ 5 मिनु गोरशो रागीम बाक्‍मेनु, यरूसलेम सहर नु यहूदीया रागी ङा गाउं सहर ङा मुर नेल्‍ल जाक्‍शा देल्‍मा बाक्‍त। यर्दन खोला आ नेक्‍था ङा मुरपुकी यो शुश जाक्‍शा देल्‍मा बाक्‍त। 6 यूहन्‍ना आ लोव़ नेंशा, शुश मुरुमी आन मरिम्‍शो पशो शोव़ङमे बाक्‍त। मो पा शोव़ब आन कली यूहन्‍नामी यर्दन खोलामी ख्रुम्‍शा ग्रुंइदीमी बाक्‍त।

7 मिनु यूहन्‍नामी फरिसी नु सदुकी शुश जाक्‍शो तशा, मेको आन कली “गे बुस्‍स आ खलकपुकी, सुमी परमप्रभु यावे आ सजाइ रे ब्रोंइचा तांइसीब, दे शेंदीनी?फरिसी रिती थीती सेल्‍शा, रिम्‍शो पचा कली कोव़ब यो बाक्‍शो बाक्‍तेक्‍म। सदुकी यहूदी आन सरकार ङा हुल ‘मुर मसेंसीनीम’ दे थमा सुइक्‍ब बाक्‍शो बाक्‍तेक्‍म। मत्ती २३:३३ 8 परमप्रभु यावे गे इन थुं लेश्‍शो तचा ङा पा फल सिप्‍पा कोंइदीने। 9 अब्राहाम इं आफ बाक्‍ब, दे शोर गाक्‍शा मबाक्‍कीन। मारदे हना परमप्रभु यावेमी एको फुल्‍लु रे अब्राहाम कली आल सेल्‍ने चाप्‍ब, दे तुइक्‍तीन। यूहन्‍ना ८:३३,३९; रोमी २:२८:२९; रोमी ४:१२ 10 तिम्‍चा, दे रवा आ पुंमी खा वोइश्‍शो बाक्‍ब। फल मसिप्‍ब रवा का का पा तिम्‍शा मीमी चोचा पुंइसीनीम, दे तुइक्‍तीन। लूका १३:६-९ 11 इन थुं लेत्‍‍चा कली इन कली ब्‍वाक्‍कुम ख्रुम्‍शा ग्रुंइनन्‍नी। गो ब्‍वाक्‍कुम ख्रुम्‍शा ग्रुंइब ला नङ। आं नोले जाक्‍ब चहिं आं क्‍येङा शुश सक्ति पाइश्‍शो ठेयब बाक्‍ब। गो मेको आ जु‍त्ता गुप्‍शा कुरचा लायो मशिरनुङ। मेकोमी इन कली परमप्रभु यावे आ सोक्‍तीमी ख्रुम्‍ब, मीमी यो हुम्‍ब। यूहन्‍ना १:२६,२७,३३; प्रेरित १:५; प्रेरित २:३-४ 12 आ गुइमी ग्‍योल बाक्‍ब। मेकोमी लाङगामी हाम्‍शो चेरब हुरशा, भूस नु गेडा तिल्‍ब। गेडा कोठोमी कुर पा वोइक्‍ब। भूस चहिं गेनायो मकाप्‍ब मीमी चोइब” दे माइक्‍मी बाक्‍त। मत्ती १३:३०

13 मिनु काबु येसु गालील रागी रे यूहन्‍ना नु ब्‍वाक्‍कुम ख्रुम्‍शा ग्रुंइसीथ यर्दन खोला यूहन्‍ना आ बाक्‍तीकेमी जाक्‍माक्‍त। 14 मिनु यूहन्‍नामी “गेमी आं कली कका ब्‍वाक्‍कुम ख्रुम्‍शा ग्रुंइचा गारब। मिनु मार आं गे पीनीनी?” देंमाक्‍त। यूहन्‍ना १३:६ 15 मिनु येसुमी “मुल ओन पय। मारदे हना रिम्‍शो पतीके नेल्‍ल पचा माल्‍नय” देंमाक्‍त। मिनु यूहन्‍नामी “लो, मो हना” देंशा, येसु कली ब्‍वाक्‍कुम ख्रुम्‍शा ग्रुंइदा बाक्‍त। 16 मिनु ब्‍वाक्‍कु रे ग्रूशा, खोला रे कुसानु, मार दुम्‍माक्‍त देंशा हना, येसुमी स्‍वर्ग रोक्‍सीशा, परमप्रभु यावे आ सोक्‍ती परवा खोदेंशो दुम्‍शा, यिशा आ रांमी जुक्‍चशो तवा बाक्‍त। यसैया ११:२ 17 मिनु सरीङ रे “एको आं दाक्‍शो तौ बाक्‍ब। एको कली तशा थाम्‍पा ग्‍येरसीनुङ” देंशो सेंदा ग्रूमाक्‍त। मत्ती १७:५; यसैया ४२:१