1 मेको तुइश्‍शा आं लुङगीर थाम्‍पा प्रेक्‍ब। मेको आ बाक्‍‍तीक प्रोंइ‍शा प्रेक्‍ब। 2 नेनीन, आ सेंदाम बुंबु पशो नेनीन। मिनु मेको आ शोव़म ब्‍वाक्‍शो ठेयब सेंदा नेनीन। 3 मेकोम सरीङ आ एर ओंथ आ सेंदा नेंपाइक्‍ब। आ चिला रागी ङा सुर सम्‍म दाप्‍पाइक्‍ब। 4 मेको आ नोले मेको आ ठेयब सेंदा नेंसीब। मेको आ मान पाइक्‍चा पुंइसीब सेंदा नेंसीब। मिनु मेकोम आ सेंदा नेंपाइक्‍ब। आ चिला पतीके मतेक्‍ब। 5 परमप्रभु आ सेंदा बुंबु पशो खोदेंशो हिं‍चा ङा पा नेंसीब। मेकोमी गोपुकीम मरुप्‍चा ङा पा ठेयब गेय पाइब। 6 मेकोम फुं कली ‘रागीम दोक्‍को’ देंब। मिनु रेउ कली ‘धारा खोदेंशो पा यीवो’ देंब। 7 मेको मुर नेल्‍ल आन चिन्‍ड का बाक्‍ब। मिनु आ सेल्‍शो मुर नेल्‍लेम ‘मेको परमप्रभुम पाप्‍तु’ दे तुइक्‍नीम। 8 मेना ब्‍वाकी ङा जन्‍तु आन पुक्‍खी गे लाइनीम। मिनु मेकेर लशा बाक्‍नीम। भजन संग्रह १०४:२१-२२ 9 फश गिवार आ बाक्‍‍तीक रे ग्रूब। मिनु फश रे पा ग्‍यू जाक्‍ब। 10 परमप्रभु आ सासमी फुं दुम्‍ब। मिनु ठेयब ब्‍वाक्‍कु नेल्‍ल रीब पा फुं दुम्‍नीम। 11 मेकोमी ठेयब गोस्‍स कली ब्‍वाक्‍कु कुरपाइक्‍ब। मिनु गोस्‍सपुकीमी आ चिला तेइ तेइ फ्राइनीम। 12 मेकोपुकी आ कोंइशो रागी आ एर ओंथ ङा लां नेल्‍ल गाक्‍नीम। मोपा मेकोपुकीमी परमप्रभु आ देंशो मुर बाक्‍शो रागी आ तार नेल्‍ल पाइनीम। 13 परमप्रभुम रागी जिप्‍पाइक्‍चा कली रेउ यिपाइक्‍ब। मेकोम मुर आन कली सजाइ गेचा कली नु आ रागी कली शिशी कोंइचा कली रेउ यिपाइक्‍ब।

14 अय्‍युब, गे एको लोव़ नेनीन। सिक्‍सी पा बाक्‍शा परमप्रभु आ छक लाक्‍चा ङा गेय मिम्‍तीन। 15 परमप्रभुम गोस्‍स आन गेय दोपा पपाइक्‍बा? मिनु आ गोस्‍स रे दोपा चिला दाप्‍पाइक्‍बा, मेको गे तुइक्‍नीनी ङा? 16 गोस्‍सपुकी दोपा सरीङम ग्‍युक्‍शा बाक्‍नीमी? मेको आ छक लाक्‍चा ङा गेय बाक्‍ब। मेको नेल्‍ल जोक्‍ब बाक्‍ब, दे गे मतुइक्‍नीनी? 17 दक्‍खिन ङा फशेम इन फेक्‍शो वा होश सेल्‍ब। रागी नेल्‍ल कली सिक्‍सी पपाइक्‍ब। 18 मार, गे परमप्रभु खोदेंशो पा कांसा के ऐना खोदेंशो सारो सरीङ कली प्राक्‍ने चाप्‍नीनी ङा? 19 मेको कली मार देंचा माल्‍बा, गे मेको आंइ कली शेंदीन। मारदे हना गो छिङछिङम पतीके मारेइ मिम्‍ने मचाप्‍नीकी। 20 गो मार देंनुङा, मेको कली हिल्‍लो पचा माल्‍नुङा ङा? सुइ मुरुम आंम कली दाक्‍चा पुंइसीचा मदाक्‍बा ङा? 21 हाम्‍सो बाक्‍त हना यो, गोस्‍सुम सुम्‍शो नां कली मुरुम तने मचाम्‍सीब। फशेमी गोस्‍स आन कली योल्‍दा नोले ला नां कली तने चाम्‍सीब। 22 मेको उत्तर रे हो हो पा दाप्‍शा ग्रूब। मेको परमप्रभु आ एर ओंथ छक लाक्‍चा ङा छेङछेङ बाक्‍ब। 23 तन्‍न गो नेल्‍ल क्‍येङा ठेयब सक्ति पाइश्‍शो कली थिन्‍ने मचाप्‍नीकी। मेको आ नेल्‍ल क्‍येङा सक्तिम गेय पाइब बाक्‍ब। मेकोमी निसाफ पशो नु ठीक पतीके गेनायो दूली मपाइब। 24 मोपतीके मुरपुकीम मेको कली तशा मान पा हिंनीम। मिनु आन थुंम ‘गो जोक्‍ब तुइक्‍ब नङ’ दे मिम्‍ब आन कली ठेयब ममिम्‍ब” दे एलीहुम देंमाक्‍त।