1 मिनु एफ्राइम आ थर ङा मुरपुकीमी गिदोन कली “मारदे आंइ कली ओदेंशो पाइनीनी? मिदयान ङा मुरपुकी नु लडाइ पथ लनीनु, मारदे आंइ कली मब्रेन्‍नी?” देंमा बाक्‍त। मिनु गिदोन कली शुश दोस गेशा जिचा तोव़मे बाक्‍त। 2 मिनु गिदोनमी “गो मार पङा ङा? गे आं क्‍येङा ठेयब गेय पाइतीनी। मार, अबीएजेर आ मुरपुकीम मिदयान ङा मुर नेल्‍ल आन कली प्रोक्‍पाइक्‍चा क्‍येङा एफ्राइम आ थर ङा मुरपुकीमी मेको आन कली साइक्‍चा ठेयब मबाक्‍बा ङा? 3 परमप्रभुमी मिदयान ङा कप्‍तान ओरेब नु जेयब आस कली इन गुइमी गेशो बाक्‍ब। गेपुकीमी पशो खोदेंशो गो पङा ङा?” देंमाक्‍त। मिनु आ लोव़ नेंशा आन गाइश्‍शो नांइसे बाक्‍त।

4 मिनु गिदोन यर्दन खोला जाक्‍शा, शोक्‍से बाक्‍त। मिनु गिदोन नु मेको नु बाक्‍शो सहे सां मुरपुकी मिदयान ङा मुर आन कली खेदा पा दशा योलक योलुक दुम्‍शा शोव़लु बेक्‍शो बाक्‍मा बाक्‍त। 5 मिनु गिदोनमी सुक्‍कोथ ङा मुर आन कली “आं मुर आन कली इच्‍का शोब्‍ले गेन। मारदे हना एकोपुकी दशा, शोव़लु बेक्‍शो बाक्‍नीम। मिनु गो मिदयान ङा पिप जेबाह नु साल्‍मुन्‍ना आस कली खेदा पना पन बाक्‍नुङ” दे पुना बाक्‍त। उत्‍पत्ती ३३:१७ 6 तन्‍न सुक्‍कोथ ङा ठेयब मुरपुकीमी “मार, जेबाह नु साल्‍मुन्‍ना आस कली गे ग्‍याइक्‍ने थुमी ङा? इ लडाइ पाइब आन कली मारदे शोब्‍ले गेनीकी?” दे लोव़ लेत्‍मे बाक्‍त। 7 मिनु गिदोनमी “परमप्रभु यावेमी जेबाह नु साल्‍मुन्‍ना आस कली आं गुइमी गेप्‍तु हना, गो गोरशो रागी ङा चोंक चूमी युक्‍नन्‍नी” देंमाक्‍त। 8 मिनु पेनुएल सहरमी लमाक्‍त। मिनु मेकेर ङा मुर आन कली खाल का ङा लोव़ पवा बाक्‍त। मिनु मेकेर ङा मुरपुकीमी यो सुक्‍कोथ ङा मुरपुकीमी खोदेंशो पा लोव़ लेत्‍मे बाक्‍त। 9 मिनु पेनुएल ङा मुर आन कली “गो रिम्‍शो पा लेङङा नोले, गो मेको इन लाइश्‍शो खिं प्रेश्‍शा गेनन्‍नी” देंमाक्‍त।

10 मिनु जेबाह नु साल्‍मुन्‍ना १५ हजार लडाइ पाइब नु कारकोर सहरमी बाक्‍सा बाक्‍त। पूर्ब ङा लडाइ पाइब आन लीशो में मोशोन बाक्‍मा बाक्‍त। लाख का २० हजार लडाइ पाइब चहिं साइक्‍चा पुंइसमा बाक्‍त। 11 मिनु गिदोन नोबाह नु योग-बेहा आ पूर्बम बाक्‍शो ग्‍याप्‍ब लेयब आन गाक्‍तीक लां लशा, जेबाह नु साल्‍मुन्‍ना आस लडाइ पाइबपुकीमी लडाइ आ पर्बम मारेइ ममिम्‍थु बाक्‍मानु, गिदोनमी लडाइ तोवा बाक्‍त। 12 मिनु जेबाह नु साल्‍मुन्‍ना चहिं मेक रे प्रोक्‍सा बाक्‍त। गिदोनमी मेको मिदयानी पिप आस कली खेदा पा ग्‍याइक्‍ता बाक्‍त। मोपतीके मेको आन लडाइ पाइब नेल्‍ले वाम ग्‍याम दुम्‍मा बाक्‍त।

13 मिनु योआश आ तौ गिदोन लडाइ रे हेरेस इर गे लतीक लां रे लेम्‍माक्‍त। 14 मिनु सुक्‍कोथ ङा ठिटा का कली ग्‍याइश्‍शा, मेको कली “सुक्‍कोथ ङा ठेयब मुर नु खाल्‍पापुकी, सु सु बाक्‍नीमी?” दे हिल्‍लो पवा बाक्‍त। मिनु मेको ठिटामी सुक्‍कोथ ङा ७० जना ठेयब मुर नु खाल्‍पा आन नें ब्रेक्‍शा गेवा बाक्‍त। 15 मिनु नोले गिदोन सुक्‍कोथ सहरम जाक्‍शा, मेकेर ङा मुर आन कली “जेबाह नु साल्‍मुन्‍ना एकेर बाक्‍नीस। मेको आस पर्बम गेपुकीमी आं कली ‘मार, जेबाह नु साल्‍मुन्‍ना आस कली ग्‍याइक्‍ने थुमी ङा? इ लडाइ पाइब आन कली गो मारदे शोब्‍ले गेनीकी ङा?’ दे शुक्‍शी पाइतीनी” देंमाक्‍त। 16 मिनु सुक्‍कोथ सहर ङा ठेयब मुर नु खाल्‍पा आन कली लाइश्‍शा, गोरशो रागी ङा चोंक चूम युक्‍मी बाक्‍त। 17 पेनुएल सहरम बाक्‍शो लाइश्‍शो खिं कली प्रेश्‍शा, मेकेर ङा वोंइश मुर आन कली साइक्‍मी बाक्‍त।

18 मिनु गिदोनमी जेबाह नु साल्‍मुन्‍ना आस कली “गे निक्‍शीमी ताबोरमी साइश्‍शो मुर दोदेंशो बाक्‍मा?” दे हिल्‍लो पाम्‍सी बाक्‍त। मिनु “इन खोदेंशो बाक्‍तेक्‍म। पिप आ तौ खोदेंशो बाक्‍मा बाक्‍त” दे लोव़ लेत्‍मे बाक्‍त। 19 मिनु गिदोनमी “मेकोपुकी आं लोक्‍बपुकी बाक्‍तेक्‍म। आं आम आ तौपुकी बाक्‍तेक्‍म। मिनु मेको आन कली मसाइक्‍नी हना, परमप्रभु यावे ब्रोंइशा, बाक्‍शो खोदेंशो पा, गो थमा पा, इस कली ब्रोंइचा गेङ वा” दे माइक्‍सी बाक्‍त। गन्‍ती ३५:३१ 20 मिनु आ जेठा तौ, येथेर कली “बोक्‍शा, एको आस कली सांइ‍सी” देंमाक्‍त। तन्‍न आ तौ आल बाक्‍तीके हिंशा, आ तरवार मशोदा बाक्‍त। 21 मिनु जेबाह नु साल्‍मुन्‍नामी “आंमान बोक्‍शा, आंस कली सतीन। मारदे हना गे नु वोंइश मुर आ बोल बाक्‍ब” देंसा बाक्‍त। मिनु गिदोन बोक्‍शा, मेको निक्‍शी आस कली सांइ‍सी बाक्‍त। मिनु मेको आस दलओंठ आ शुरमी बाक्‍शो शुश क्‍येट लाइब गहनापुकी प्रुइश्‍शा लदा बाक्‍त।

22 मिनु इस्राएलीपुकीमी गिदोन कली “गो आंइ कली मिदयानी रे पा प्रोंइतीनी। मुल आंइ कली हुकुम पाइब दुमीन। मिनु इन तौ नु इन चच नेल्‍ल आंइ सासन पाइब दुम्‍मल” देंमा बाक्‍त। 23 मिनु गिदोनमी “गो नु आं तौ ममाइ, तन्‍न परमप्रभु यावेमी इन कली हुकुम पाइब” देंमाक्‍त। 24 मेकोमी “गो इन कली थोव़क का पुंइनुङ, मार पुंइनुङ देंशा हना, गेपुकीमी का का पा इन रोइश्‍शो रे पा नोफाम पांइतीक का का आं कली गेने” देंमाक्‍त। मारदे हना मेको आन जोरी सत्रु इश्‍माएली बाक्‍मा बाक्‍त। मेकोपुकीमी सुन के नोफाम पांइतीक पाइबाक्‍मा बाक्‍त। 25 मिनु मेकोपुकीमी “दुम्‍ब, गो मेको इन कली गेनीकी” देंमा बाक्‍त। मिनु वा का ब्रामे बाक्‍त। मिनु नेल्‍लेमी आंम के रोइश्‍शो सुन मेकेर वोदमे बाक्‍त। 26 मिनु अरु शुश क्‍येट लाइक्‍ब माला नु आन दलओंठ आ शुरम रेल्‍शो सुन के माला, पिप आन फेक्‍तीक वा मनाक्‍थु, मेकोमी पुंइशो सुन हजार का ७ सहे शेकेल दुम्‍माक्‍‍त। शेकेल का ११.५ ग्राम खोदेंशो बाक्‍ब। गन्‍ती ३१:५० 27 मिनु गिदोनमी मेको सुन रे पा निसाफ पतीक ऊरीम नु थुम्‍मीम बाक्‍शो झोला का सेल्‍शा, मेको कली आ सहर ओफ्रामी वोदा बाक्‍त। मिनु इस्राएली नेल्‍लेमी मेको कली ठेयब सेल्‍शा, आंम कली दूली पाइब सेल्‍मे बाक्‍त। मेको गिदोन नु आ खिं ङा मुर आन कली यो हेंथे पपाइक्‍चा कली बाक्‍माक्‍त। न्‍यायाधीस १७:५; 28 मोपा मिदयान ङा मुरपुकी इस्राएली आन गुइमी दुम्‍शा, मेकोपुकीमी लेंशा लडाइ मपामे बाक्‍त। मिनु गिदोन बाक्‍म सम्‍म इस्राएल रागी ४० बर्स सम्‍म लडाइ रे नांइसे बाक्‍त। न्‍यायाधीस ३:११; न्‍यायाधीस ५:३१

29 मिनु नोले योआश आ तौ येरूब-बाल आ खिं लशा, बाक्‍शो बाक्‍माक्‍त। 30 गिदोन आ तौ ७० जना बाक्‍मा बाक्‍त। मारदे हना मेको आ मीश शुश बाक्‍मा बाक्‍त। 31 मेको आ कान्‍छी मीश शेकेम सहरमी बाक्‍माक्‍त। मेकोमी यो तौ का थिमाक्‍त। गिदोनमी आ तौ आ नें अबीमेलेक वोदा बाक्‍त। 32 मिनु योआश आ तौ गिदोन शुश खूशो दुम्‍शा बेक्‍माक्‍‍त। मेको कली आ आफ अबीएजेर आ तुरस ओफ्रा सहरमी थिम्‍मे बाक्‍त। न्‍यायाधीस ६:११ 33 गिदोन बेक्‍म नोले इस्राएलीपुकीमी लें‍शा बाल देवता कली ठेयब सेल्‍मे बाक्‍त। मेकोपुकीमी बाल-बेरीत कली आंम देवता सेल्‍मे बाक्‍त। न्‍यायाधीस २:११; न्‍यायाधीस ९:४ 34 मिनु मेको आन कली एर ओंथ ङा जोरी सत्रु रे प्रोंइब परमप्रभु यावे, आन परमप्रभु कली प्रेंद‍मे बाक्‍त। 35 येरूब-बाल माइश्‍शो गिदोन आ पशो रिम्‍शो गेय प्रेंशा, मेको आन खिं ङा मुर आन कली ममिम्‍थु, आइक्‍च सेल्‍मे बाक्‍त। न्‍यायाधीस ९:५,९,२४