1 मिनु मोसामी “मिनु गे इस्राएली नेल्‍ले, गो इन कली परमप्रभु यावे आ फुल्‍लुम मुशा ब्रेक्‍शो लोव़ नु आ निसाफ पतीक लोव़ शेंनुङ। इन नोफा दाइक्‍तीन। मिनु आ शेंशो पने। मेको पाइतीनी हना, गे ब्रोंइचा ताइनीनी। मिनु गे परमप्रभु यावे, इन किकी पिपी आन परमप्रभुमी इन कली गेशो रागी ओव़चा नु इन के सेल्‍चा ताइनीनी। 2 मिनु गो इन कली परमप्रभु यावे, इन परमप्रभु आ लोव़ शेंशा ‘परमप्रभु आ शेंशो पचा माल्‍ब’ दे अरेनुङ। गेपुकीमी आं शेंशो लोव़ कली का यो मतेम्‍दीन। का यो मशोलीने। ब्‍यवस्‍था १३:१; हितोपदेस ३०:६; प्रकाश २२:१८-१९ 3 मिनु परमप्रभु यावेमी बाल-पेओर मूर्ति आ नोले खोइक्‍ब आन कली मार पवा, गे आंमा ताइतीनी। मिनु परमप्रभु यावे, इन परमप्रभुमी बाल-पेओर आ नोले खोइक्‍ब वोंइश मुर नेल्‍ल साइक्‍तु। गन्‍ती २५:३-९ 4 गे परमप्रभु यावे, इन परमप्रभु कली आ नोले खोइक्‍बपुकी चहिं नेल्‍ल ब्रोंइशो बाक्‍नीनी।

5 मिनु परमप्रभु यावे, आं परमप्रभुमी आं कली अरेशो खोदेंशो पा, गो इन कली आ फुल्‍लुम मुशा ब्रेक्‍शो लोव़ नु आ निसाफ पतीक लोव़ शेंतान्‍नी। मारदे शेंतान्‍नी देंशा हना, गे जाक्‍शा इन के सेल्‍चा चिक्‍शो रागीमी मेको नेल्‍ल पचा, दे शेंतान्‍नी। 6 मोपतीके गेपुकीमी एको लोव़ होस पा, टिने। मेकोमी इन कली तुइक्‍ब नु रुप्‍ब मुर सेल्‍ब। मिनु जात जात ङा मुरपुकी मेको फुल्‍लुम मुशा ब्रेक्‍शो लोव़ नेल्‍ल नेंशा, मेकोपुकीमी ‘मेको ठेयब जात ङा मुर थमा पा तुइक्‍ब नु रुप्‍ब मुर बाक्‍नीम’ देंनीम। यसैया २:३ 7 मिनु परमप्रभु यावे इं परमप्रभुमी आंइ नेक्‍था बाक्‍शो नु आंइ पुंइशो लोव़ नेंब खोदेंशो पा तेको अर्को ठेयब जात ङा देवी देवताम मोदेंशो पाइनीमी? २सामुएल ७:२३ 8 मुलाक्‍त गो इन कली परमप्रभु यावे आ अरेशो लोव़ नेल्‍ले नेंपाइक्‍नुङ। मिनु तेको ठेयब जात ङा मुर इं खोदेंशो रिम्‍शो पचा कली फुल्‍लुम मुशा ब्रेक्‍शो लोव़ नु निसाफ पतीक लोव़ नेंचा ताइनीमी। येरमीया ८:८

9 इन आंम तशो इन थुंम वोइश्‍शा, मप्रेंथु, होस पा बाक्‍कीन। गे ब्रोंइनी सम्‍म इन थुंम वोतीन। इन आल नु चच युइ आन आन कली शेंदीन। भजन संग्रह १०३:२

10 मिनु गेपुकी काबु परमप्रभु यावे, इन परमप्रभु आ ङोंइती होरेब डांडा तार राप्‍शो बाक्‍तीनी, मेको मिम्‍तीन। मिनु परमप्रभु यावेमी आं कली मुर आन कली आं ङोंइती पुक्‍मी। गो मेको आन कली आं लोव़ नेंपाइक्‍नुङमी। मिनु मेकोपुकी रागीम मबेक्‍मा सम्‍म आं कली मान पा हिंचा शेंसामल। मिनु मेकोपुकीमी एको लोव़ आन तमी तौ आन कली शेंचा माल्‍नीम” देंत। प्रस्‍थान १९:१७; ब्‍यवस्‍था ६:७ 11 मिनु गे आ नेक्‍था जाक्‍शा, डांडा आ पुंम राप्‍तीनी। मेको डांडाम सरीङ सम्‍म मी ब्रत। मिनु छिङछिङ, ठेयब गोस्‍स नु नाक्‍दो खोदेंशो बाक्‍त। 12 मिनु परमप्रभु यावेमी मी आ दाते रे गेपुकी नु लोव़ पाप्‍तु। गे मेको आ लोव़ नेंतीनी, तन्‍न मारेइ मतनी। ब्‍यवस्‍था ५:४,२४ 13 मिनु मेकोमी गे नु कबल पाप्‍तु। आ अरेशो १० ओटा लोव़ गे टिशा पने, दे गेप्‍तु। मिनु मेकोमी मेको लोव़ फुल्‍लु निक्‍शी तार मुशा गेप्‍तु। प्रस्‍थान ३१:१८ 14 मिनु मेना परमप्रभु यावेमी आं कली “मेको आन कली आं फुल्‍लुम मुशा ब्रेक्‍शो लोव़ नु निसाफ पतीक लोव़ शेंदो। नोले आन गाक्‍शो आंम के सेल्‍शो रागीमी मेको लोव़ टिशा पचा, दे मेको लोव़ शेंदो” दे माइक्‍ती।

15 मिनु परमप्रभु यावेमी इन कली होरेब डांडाम मी रे लोव़ पवानु, गे मारेइ मतनी। 16 मिनु गे इन कली मूर्ति सेल्‍शा, खतम मसेल्‍सीन। गे होस पा बाक्‍कीन। तेकोइ वोंइश मुर, मीश मुर, प्रस्‍थान २०:४ 17 रागी ङा बी ब्‍यफ, क्‍यारश भेडा, जन्‍तु सरीङम बेरब चिक्‍ब, 18 खपीम गाक्‍ब, ब्‍वाक्‍कुम बाक्‍ब ङांइ के मूर्ति काइ मसेलीन। 19 मिनु गे सरीङ इर कोव़शा, परमप्रभु यावे, इन परमप्रभुमी जात जात ङा मुर नेल्‍ल आन कली गेशो नां, तास्‍ला, सोरुल नेल्‍ल तशा, मेको आन ङोंइती सेउ पा पूजा मपने। होस पा बाक्‍कीन। ब्‍यवस्‍था १७:३; रोमी १:२३ 20 परमप्रभु यावेमी इन कली आंम मुर सेल्‍चा, दे फलम चोतीके खोदेंशो इजीप्‍त रागी रे ग्रुंइताक्‍व। मोदेंशो पा मुलाक्‍त बाक्‍ब, दे तुइक्‍नीनी। १राजा ८:५१; यसैया ४८:१०; येरमीया ११:४; प्रस्‍थान १९:५-६; यसैया १९:२५

21 मिनु परमप्रभु यावे इन पतीके, आं पर्बम गाइक्‍ताक्‍व। मेकोमी आं कली “गे यर्दन खोला मशोक्‍थु, इस्राएली आन कली गेशो रिम्‍शो रागी लचा मताइ‍नेवे” दे कसम जाप्‍तु। ब्‍यवस्‍था ३:२६ 22 मिनु गो यर्दन खोला मशोक्‍थु, मुल बाक्‍शो रागीमी बेक्‍चा माल्‍नुङ। तन्‍न गेपुकी यर्दन शोक्‍शा, मेको रिम्‍शो रागी इन के सेल्‍नीनी। 23 मिनु परमप्रभु यावे, इन परमप्रभुमी गे नु पशो कबल मप्रेक्‍थु, होस पा बाक्‍कीन। गे मप्रेंथु परमप्रभु यावे, इन परमप्रभुमी देंशो टिशा मारेइ के मूर्ति मसेलीन। 24 मारदे हना परमप्रभु यावे, इन परमप्रभु ठेयब मी खोदेंशो नु रुश पाइब परमप्रभु बाक्‍ब। ब्‍यवस्‍था ९:३; प्रस्‍थान २४:१७; यसैया १०:१७; हिब्रू १२:२९; प्रस्‍थान २०:५

25 मिनु गेपुकी मेको रागीमी शुश बर्स बाक्‍शा, तमी तौ, चच युइ थिशा बाक्‍नीनी। तन्‍न परमप्रभु यावे, इन परमप्रभुमी मदाक्‍चा ङा पा मारेइ के मूर्ति सेल्‍शा, परमप्रभु यावे कली गाइक्‍पाइक्‍तीनी हना, 26 गो मुलाक्‍ती सरीङ नु रागी कली इन दूली पशो आ पर्बम सांकछी वोइक्‍नुङ। गे यर्दन आइक्‍ची हांबु ङा इन के सेल्‍चा चिक्‍शो रागीम रीब पा खतम दुम्‍नीनी। गे शुश नाक्‍त मेकेर बाक्‍चा मताइनीनी। गे क्‍याम्‍चा पुंइसीनीनी। ब्‍यवस्‍था ३०:१९; ब्‍यवस्‍था ३१:२८; ब्‍यवस्‍था ३२:१; 27 मिनु परमप्रभु यावेमी इन कली जात जात ङा मुर आन दातेमी ब्रपाइक्‍ब। मिनु परमप्रभु यावेमी इन कली कोंइशो रागी रागी आन दातेमी इच्‍का ला लीनीनी। 28 मिनु गेपुकीमी मेकेर ङा मुर आन सेल्‍शो शी के, फुल्‍लु के मताइब, मनेंब, मजाइब नु मनाम्‍ब मूर्ति आन कली पूजा पाइनीनी। ब्‍यवस्‍था २८:३६; भजन संग्रह ११५:४-७

29 तन्‍न गे मेकेर बाक्‍शा, परमप्रभु यावे, इन परमप्रभु कली माल्‍नीनी। मिनु गे थमा पा इन थुं नेल्‍लेम माल्‍तीनी हना, गे मेको कली थित्‍नीनी। भजन संग्रह २७:८; येरमीया २९:१३-१४ 30 आं देंशो लोव़ मोदेंशो पा दुम्‍शा, श्‍येत जनीनु, गे नोले ङा नाक्‍तीम परमप्रभु यावे, इन परमप्रभु गे लेत्‍नीनी। आं देंशो लोव़ टीनीनी। ब्‍यवस्‍था ३०:२ 31 मारदे हना परमप्रभु यावे, इन परमप्रभु, शिशी पाइब परमप्रभु बाक्‍ब। इन किकी पिपी नु कसम जशा पशो कबल मप्रेंब। मेकोमी इन कली मप्रोंइथु, खतम मसेल्‍ब।

32 मिनु गे इन क्‍येङा ङोंइती ङा नाक्‍त मिम्‍तीन। परमप्रभुमी मुर नु रागी सेल्‍शो रे मुल सम्‍म ओदेंशो ठेयब गेय पशो आ पर्बम लोव़ नेंनी? तनी? 33 अरु सुइ मुरुम गे इन खोदेंशो पा परमप्रभुमी मी रे लोव़ पशो नेंन्‍मे?। मिनु गे नेंशा यो ब्रोंइशो बाक्‍नीनी। प्रस्‍थान २०:१,१९ 34 मिनु तेको देवी देवतामी इन कली खोदेंशो पा शुश रागी आन दाते रे आंम मुर सेल्‍चा कली योव़शो बाक्‍बा? मुर आन कली नाक्‍शा, चिनु कोंइ‍शा, छक लाक्‍चा ङा गेय पा, मेको आन पर्बम लडाइ पा, शुश हिंचा ङा सक्तिमी, परमप्रभु यावे, इन परमप्रभुमी इन कली इजीप्‍त रागी रे ग्रुंइशो गे ताइतीनी। ब्‍यवस्‍था ७:१९; ब्‍यवस्‍था २९:२ 35 गे मारदे मेको ताइतीनी देंशा हना, परमप्रभु यावे, का ला परमप्रभु बाक्‍ब। मेको क्‍येङा लाक्‍शा अर्को परमप्रभु मबाक्‍ब, दे तुइक्‍पाइक्‍चा कली इन कली कोंइताक्‍व। 36 मिनु मेकोमी सरीङ रे इन कली शेंचा, दे आ सेंदा नेंपाइक्‍तु। मिनु खपीम इन कली आ ठेयब मी कोंइताक्‍व। गे मी आ दाते रे आ लोव़ पशो नेंतीनी। प्रस्‍थान २०:१,१८,२० 37 मिनु इन किकी पिपी आन कली दाक्‍तीके, आन चच युइ आन कली योव़शा, मेकोमी आंमान आ ठेयब सक्तिमी इन कली इजीप्‍त रे ग्रुंइताक्‍व। प्रस्‍थान ३३:१४ 38 इन कली रागी गेचा, दे इन ङोंइती इन क्‍येङा सक्ति पाइश्‍शो नु शुश मुर आन कली आन रागी रागी रे ग्रुंइताक्‍व। मिनु गे रागी इन के सेल्‍चा कली ठीक दुम्‍शो बाक्‍नीनी। मोदेंशो मुलाक्‍ती बाक्‍ब, दे तुइक्‍नीनी। 39 मिनु गे मुलाक्‍ती परमप्रभु यावे, का ला सरीङ नु रागी ङा परमप्रभु बाक्‍ब। मेको ङा लाक्‍शा अर्को सुइ परमप्रभु मबाक्‍ब। एको लोव़ गे मुलाक्‍ती थमा पा तुइक्‍तीन। मिनु इन थुंम लील। 40 मुलाक्‍त गो इन कली माइश्‍शो परमप्रभु यावे आ फुल्‍लुम मुशा ब्रेक्‍शो लोव़ नु आ शेंशो टिने। मो पाइतीनी हना, इन आल नु चच आन कली रिम्‍शो दुम्‍ब। मिनु परमप्रभु यावे, इन परमप्रभुमी इन कली गेना हना यो बाक्‍चा कली गेशो रागीम गे शुश नाक्‍ती बाक्‍चा ताइनीनी।

41 मिनु मोसामी यर्दन खोला नां दाप्‍तीक गे सहर सां योव़तु। ब्‍यवस्‍था १९:२-१३; गन्‍ती ३५:६-२९ 42 ङोंइती मगाइक्‍मुशो, मतुइक्‍थु मुर का कली साइक्‍ब मुर मेकेर प्रोक्‍शा लने चाप्‍ब। मोदेंशो मुर मेको सहरम प्रोक्‍शा, ब्रोंइचा ताइब। 43 मोसामी रूबेन आ थर ङा मुर आन कली गोरशो रागी ङा दिंमम बेसेर सहर योव़तु। गाद आ थर ङा मुर आन कली गिलाद ङा रामोथ सहर योव़तु। मनस्‍से आ थर ङा मुर आन कली बाशान ङा गोलान सहर योव़तु।

44 मोसामी इस्राएली आन कली परमप्रभु यावे आ अरेशो लोव़ शेंताक्‍व। 45 मिनु मेको परमप्रभु यावे आ आ देंशो, आ फुल्‍लुम मुशा ब्रेक्‍शो लोव़ नु आ निसाफ पतीक लोव़ बाक्‍नीम। मोसामी मेको नेल्‍ल इस्राएली आन कली इजीप्‍त रे ग्रुंइची ना शेंताक्‍व। 46 मिनु मेना मेकोपुकी यर्दन ओंथ हांबु, बेथ-पेओर आ ङोंइती बाक्‍शो बेंसीम बाक्‍तेक्‍म। मेको ङोंइती हेश्‍बोनम बाक्‍शो सीहोन, एमोरी आन पिप आ रागी बाक्‍त। मेको रागी मोसा नु इस्राएलीपुकीमी इजीप्‍त रे गाक्‍मा नोले लडाइ पा ग्राशो बाक्‍तेक्‍म। गन्‍ती २१:२४ 47 मेको रागी आंम के सेल्‍शा, बाशान ङा पिप ओग आ रागी यो आंम के सेल्‍शो बाक्‍तेक्‍म। मेको निक्‍शी एमोरी आन पिप बाक्‍ताक्‍स। मेको रागी यर्दन ओंथ हांबु नां दाप्‍तीके गे बाक्‍त। 48 मेको रागी अरनोन खोल्‍सा आ नेक्‍था बाक्‍ब आरोएर सहर रे सिरीयोन माइश्‍शो, हेरमोन पहाड, ब्‍यवस्‍था ३:८-९ 49 मिनु यर्दन आ ओंथ हांबु नां दाप्‍तीके गे अराबाह नेल्‍ल पिस्‍गा डांडा नु आ दिंमम अराबाह समुन्‍द्र माइश्‍शो, हिक्‍सी समुन्‍द्र सम्‍म इस्राएलीपुकीमी आंम रागी सेल्‍ने थुम्‍शो बाक्‍तेक्‍म।