1 साइ आं कली इन ब्रेक्‍शो चिठीमी गेपुकीमी “ग्‍युंबे पचा नु मपचा, तेको रिम्‍शो बाक्‍बा?” दे हिल्‍लो पशो बाक्‍तीनी। मिनु मुल मार देंनुङ देंशा हना, वोंइश मुरुमी मीश मुर कली मथिथु बाक्‍चा रिम्‍शो दुम्‍ब। 2 मो हना यो हेंथे मगाक्‍मल देंशा, ग्‍युंबे पा वोंइश मुर मीश का नु मीश मुर वोंइश का नु बाक्‍चा रिम्‍शो दुम्‍ब। 3 ग्‍युंबे पशा, वोंइश मीश दाक्‍मुशा टिमुशा बाक्‍सल। 4 मीश मुर आ रां आ वोंइश आ अधिकारम बाक्‍ब। आ वोंइश आ रां आ मीश आ अधिकारम बाक्‍ब। 5 वोंइश मीश गार‍शा, नाक्‍त का निक्‍शी काथा मइप्‍थु, प्रार्थना पना पन बाक्‍स, दे लोव़सी गारपाइश्‍शा बाक्‍चा यो रिम्‍शो दुम्‍ब। मेको ङा लाक्‍शा चहिं ब्राशा बास मबाक्‍कीने। मारदे हना सैतानमी शुश नाक्‍त सम्‍म ब्राशा बाक्‍ने मचाप्‍नीम दे तुइश्‍शा, इन कली तेल्‍लेम पपाइक्‍ने चाप्‍ब। 6 एको आं पशो लोव़ बित्‍चान माल्‍नीनी दे मदेंनुङ। तन्‍न आं देंशो लोव़ बिस्‍साक्‍नी हना, इन कली रिम्‍शो दुम्‍ब। 7 मुर नेल्‍ले आं खोदेंशो दुम्‍मल दे मिम्‍नुङ। मो हना यो परमप्रभु यावेमी आ दाक्‍शो पा का निक्‍शी आन कली ग्‍युंबे पशा बाक्‍चा, का निक्‍शी आन कली चहिं ग्‍युंबे मपथु बाक्‍चा गेशो बाक्‍त। मत्ती १९:१२

8 मुल सम्‍म ग्‍युंबे मपथु बाक्‍ब, आन वोंइश बेक्‍शो मीश मुर नु आन मीश बेक्‍शो वोंइश मुर आन कली “आं खोदेंशो पा कान बाक्‍तेक्‍म हना, मेको इन कली रिम्‍शो दुम्‍ब” देंनुङ। 9 सु सु चहिं आन का ला बाक्‍ने मचाप्‍नीमी, मेकोपुकी ग्‍युंबे पांइसमल। मारदे हना वोंइश नु मीश माल्‍शा, हेंथे गाक्‍चा क्‍येङा ग्‍युंबे पचा रिम्‍शो दुम्‍ब। १तिमोथी ५:१४

10 मेको आं लोव़ ममाइ, ग्‍युंबे पशो आन कली, प्रभु आ देंशो लोव़ मिम्‍पाइक्‍नुङमी। मीश मुरुमी आ वोंइश प्रोंइचा मदुम्‍ब। मत्ती ५:१२ 11 प्रोंइशा गाक्‍त हना, अर्को वोंइश खोइक्‍चा मदुम्‍ब। आ वोंइश नु बाक्‍चा दाक्‍ब हना, आ वोंइश नुन दुशा बाक्‍सल। वोंइश मुरुमी आ मीश कली मप्रोनल। मत्ती ५:३२

12 एको लोव़ ङा लाक्‍शा, प्रभु आ लोव़ ममाइ, आं मिम्‍शो लोव़ मार देंनुङ देंशा हना, थमा सुइक्‍ब लोक्‍ब आ मीश थमा मसुइक्‍ब बाक्‍त हना, तन्‍न आ वोंइश नु बाक्‍चा दाक्‍ब हना, आ वोंइशेमी मेको कली मप्रोनल। 13 थमा सुइक्‍ब मीश मुर आ वोंइश थमा मसुइक्‍ब बाक्‍त हना, तन्‍न आ मीश नु बाक्‍चा दाक्‍ब हना, आ मीशेमी यो मेको कली मप्रोनल। 14 मारदे हना थमा मसुइक्‍ब वोंइश आ मीश आ थमा सुइक्‍तीकेमी आसीक ताइब। मिनु थमा मसुइक्‍ब मीश मुर आ वोंइश आ थमा सुइक्‍तीकेमी आसीक ताइब। मोदेंशो मदुम्‍त हना, आन आल प्रभु के मदुम्‍नीम। तन्‍न मोदेंशो दुम्‍त हना, मेको आल परमप्रभु यावे के दुम्‍नीम। रोमी ११:१६ 15 थमा मसुइक्‍ब वोंइश मुर नु मीश मुरुमी थमा सुइक्‍ब आन वोंइश मीश आन कली प्रोंइशा ब्राशा बाक्‍चा दाक्‍ताक्‍म हना, लचा गेमेक्‍ल। काथा बाक्‍चान माल्‍ब देंशो मबाक्‍ब। परमप्रभु यावेमी आ मुर आन कली दुशा बाक्‍शो तचा दाक्‍ब। रोमी १४:१९ 16 थमा सुइक्‍ब मीश मुर, गे इ वोंइश कली “थमा सुइक्‍ब सेल्‍ने चाप्‍नुङ” दे दोपा तुइक्‍नेवे? थमा सुइक्‍ब वोंइश मुर, गे इ मीश कली “थमा सुइक्‍ब सेल्‍ने चाप्‍नुङ” दे दोपा तुइक्‍नेवे? १पत्रुस ३:१

17 प्रभुमी इन कली दोपा योव़शा वोदा मोपान बाक्‍कीन। परमप्रभु यावेमी इन कली दोपा ब्रेत्‍ता मोपा बाक्‍कीन। मेको आं शेंतीक नेल्‍ल ग्रुम्‍तीक खिं आन कली बाक्‍ब। 18 गे ब्रेत्‍चा पुंइसीचा क्‍येङा ङोंइती ख्रोइक्‍तीक चिनु ख्रोइक्‍चा पुंइसीशो बाक्‍तीनी हना, मख्रोंइ‍सीशो दुम्‍चा बल मपने। मख्रोंइ‍सीशो बाक्‍तीनी हना, ख्रोंइ‍सीचा बल मपने। 19 मारदे हना ख्रोइक्‍तीक चिनु ख्रोइश्‍शो नु मख्रोइश्‍शो आन पर्बम मारेइ ममिम्‍सीब। तन्‍न परमप्रभु यावे आ अरेशो टिचा, ठेयब बाक्‍ब। गलाती ५:६; गलाती ६:१५ 20 मुर नेल्‍ल इन कली दोदेंशो पा ब्रेत्‍ता, मोदेंशोन बाक्‍कीन। 21 मेना वाइलीम वाइल बाक्‍तीनी हना, वस्‍ता मपने। प्रोंइचा पुंइसाक्‍नी हना, ग्‍येरशा लने। फिलेमोन १६; एफिसी ६:६ 22 मारदे हना प्रभुमी ब्रेत्‍ची ना वाइलीम वाइल बाक्‍तीनी, प्रभु आ ङोंइती प्रोंइचा पुंइसीशो मुर दुम्‍तीनी। ब्रेत्‍ची ना प्रोंइचा पुंइसीशो मुर बाक्‍तीनी हना, मुल ख्रीस्‍त आ वाइलीम वाइल दुम्‍तीनी। 23 गे थाप्‍शा, प्रोंइचा पुंइसीशो बाक्‍नीनी। मुल मुर आन वाइलीम वाइल मदुमीन। १कोरिन्‍थी ६:२० 24 आं लोक्‍बपुकी, परमप्रभु यावेमी इन कली दोपा योव़शा ब्रेश्‍शा वोदा, मोपान परमप्रभु यावे नु बाक्‍कीन।

25 ग्‍युंबे मपथु बाक्‍ब आन पर्बम प्रभुमी आं कली मारेइ मअरेव। तन्‍न गो प्रभु आ शिशी पतीकेमी थमा सुइक्‍ब मुर दुम्‍ती, गो आं मिम्‍शो देंनुङ। 26 श्‍येत जचाइतय। मोपतीके मुल दोदेंशो बाक्‍या, मोदेंशोन बाक्‍तय हना, रिम्‍शो दुम्‍ब, दे मिम्‍नुङ। १कोरिन्‍थी १०:११ 27 मीश बाक्‍शो मुरुमी मेको कली प्रोंइशा बाक्‍चा ममालीन। मीश मपाइश्‍शो बाक्‍तीनी हना, ग्‍युंबे पचा ममालीन। 28 तन्‍न ग्‍युंबे पनीनु, मरिम्‍शो मपाइनीनी। मीश आलम ग्‍युंबे पाप्‍तु हना, मेकोमी मारेइ यो मरिम्‍शो मपाइब। तन्‍न ग्‍युंबे पशोपुकीमी श्‍येत जाइनीम। मोपतीके मेकोपुकीम रागी ङा श्‍येत मजामेक्‍ल, दे अर्ती गेतन्‍नी। 29 आं लोक्‍बपुकी, प्रभु जाक्‍चा चिक्‍शो बाक्‍ब। मुल रे मीश बाक्‍शो मुर, मीश मबाक्‍शो खोदेंशो पा बाक्‍कीन। रोमी १३:११; लूका १४:२६ 30 रोंका पाइबपुकी रोंका मपाइब खोदेंशो पा बाक्‍कीन। मिनु ग्‍येरशा बाक्‍बपुकी मग्‍येरसीशो खोदेंशो पा बाक्‍कीन। मारेइ मारेइ ग्‍याप्‍शा वोइक्‍बपुकीमी मारेइ मवोइश्‍शो खोदेंशो मिम्‍तमेक्‍ल। 31 मुरपुकीम रागी ङा गेय पाइनी‍म हना यो, रागी ङा गेय मपशो खोदेंशो पा बाक्‍मल। मारदे हना रागी जाम्‍शा लचा चिक्‍शो बाक्‍ब। १यूहन्‍ना २:१५-१७

32 गे सुर्ता मपथु, थुं नाइश्‍शा बाक्‍शो तचा दाक्‍नुङ। ग्‍युंबे मपशो वोंइश मुरपुकीमी दोपा प्रभु आ दाक्‍शो पचा, दे मिम्‍नीम। 33 तन्‍न ग्‍युंबे पशो वोंइश मुरपुकीमी चहिं दोपा मीश कली ग्‍येरपाइक्‍चा? दे मिम्‍शा बाक्‍नीम। लूका १४:२० 34 मोपा गे निक्‍शी मिम्‍शो बाक्नीनी। ग्‍युंबे मपशो मीश मुर नु मीश आलपुकीमी प्रभु आ दाक्‍शो पा थुं नु रां नेल्‍ले प्रभु कली जिम्‍मा गेचा कली मिम्‍‍नीम। तन्‍न ग्‍युंबे पशो मीश मुरपुकीम चहिं रागी ङा गेय पा, दोपा आंम वोंइश कली ग्‍येरपाइक्‍चा, दे मिम्‍शा बाक्‍नीम। 35 इन कली रिम्‍शो दुम्‍ल, दे मोदेंशो पाता। तन्‍न श्‍येत गेचा कली ममाइ। इन ग्रुम्‍तीकेमी नेल्‍ल रिम्‍शो दुम्‍ल नु इन थुं नेल्‍लेमी प्रभु कली खोइश्‍शा, रिम्‍शो बाक्‍ने चापीन, दे मोदेंशो लोव़ पाता।

36 सुइ मुरुमी ग्‍युंबे पचा कली मीश आल पुंइने थुम्‍शा, मेको मीश आल कली प्रोंइचा मरिम्‍शो बाक्‍ब, दे मिम्‍ब नु मेको कली दाक्‍ब हना, ग्‍युंबे पवल। मेको पाप मबाक्‍ब। 37 तन्‍न सुमी ग्‍युंबे मपाइ‍नुङ देंशा, आ रां कली चलेब नु आ मीश आल कली मो वोइक्‍नुङ, दे आ थुंम मिम्‍ब हना, मेको रिम्‍शो दुम्‍ब। 38 मोपतीके सुमी आ मीश आल कली ग्‍युंबे पाइ‍बा, मेकोमी रिम्‍शो पाइब। सुमी मपाइबा, मेकोमी मेको क्‍येङा रिम्‍शो पाइब।

39 आन वोंइश बाक्‍ना बाक्‍न मीश मुरुमी अर्को वोंइश मुर नु ग्‍युंबे पचा मताइनीम। आन वोंइश बेक्‍म नोले आन दाक्‍शो मुर कली ग्‍युंबे पने चाप्‍नीम। तन्‍न प्रभु कली थमा सुइक्‍ब दुम्‍चा माल्‍नीम।‍ रोमी ७:२ 40 गो परमप्रभु यावे आ सोक्‍तीम ब्रीशो मुर नङ। गो मार मिम्‍नुङ देंशा हना, लेंशा ग्‍युंबे पचा क्‍येङा ग्‍युंबे मपथु बाक्‍चा रिम्‍शो दुम्‍ब। मिनु ग्‍येरशा बाक्‍चा तांइसीब दे मिम्‍नुङ।