Batagaa kaŋ Žak nʼa hantum
Citaaboo fahamandiroo
Žak ka batagaa woo hantum. A nkʼa hantum Isa ganakey kul se kaŋ say-say aduɲɲa kul ra. A nee boro kaŋ sii nda lakkal mʼa wiri Irkoy ga, a ga duu a.
Hoyrayyaŋ ne kaŋ Žak nʼi hantum ganakey se:
• I ma duumi Irkoy bande waati šendey ra.
• I ma baa Irkoy meešennoo.
• I ma baa ngi cinaa ka gomni tee talkey se.
• I masi ngi boŋ cebe.
• I masi borey ciinay.
Boro si hin ka naanay Isa Almasihu Alhabar Boryaa ma goro mana teegoy henna tee, zama «naanay bila teegoy manʼti kala haya bukaw» (zamnaa 2.26).
1
Borey kaŋ se batagaa sanbandi maaɲey
nda fooyanoo kaŋ teendi i se
1 Agay Žak kaŋ ti Irkoy nda ir Koyoo Isa Almasihu tam ka batagaa woo sanba ka Izirayel alkabiila woy cindi hinkaa (12) kaŋ say-say foo.
Naanay nda lakkal
2 Agʼarmey, siiyan dumi-dumey kaŋ duu war, wʼi dii sanda ɲaali de, 3 ka bay kaŋ war naanaa siiyanoo ga muɲeyan hay. 4 Kala muɲeyanoo ma nga goyoo timmandi hala war ma nin ka tee boroyaŋ kaŋ tee ka timme, hala nongu kaŋ ra haya kul si war kuma. 5 Nda boro goo war ra kaŋ sii nda lakkal, a mʼa wiri Irkoy ga kaŋ ga borey kul noo nda kabedoonay bila citi, a gʼa noo a se. 6 A mʼa wiri nda naanay bila šikka, zama boro kaŋ ga šikka ga hima nda teekoo bonday kaŋ hewoo gʼa ka koy nongoo kul here. 7 Boraa woo dumoo masi hongu nga ga duu ir Koyoo do haya, 8 lakkal hinka-hinkakoyni no, nga fondawey kul ra, a si kay doo foo.
Talka nda almankoyni
9 Arma talkaa ma ɲaali nda nga jeryanoo, 10 almankoynoo ma ɲaali nda nga yeegandayanoo, zama haya bisante no sanda suboo kutukuryaa. 11 Zama waynaa fatta nda nga konnoo, a ga suboo kogandi, nga kutukuryaa ga kaŋ, nga booroo dere. Takaa din da, almankoynoo ga menne nga goyey ra.
Siiyaney
12 Boraa duu gomni kaŋ ga siiyan suuri, zama nda a duu maa henna, a ga duu hunayan fuulaa kaŋ ir Koyoo na nga allaahidoo zaa borey se kaŋ ga baa nga. 13 Boro kul kaŋ no, waati kaŋ a siyandi, a masi nee: «Irkoy kʼay sii ya ifutu tee», zama ifutu si hin ka Irkoy sii, nga mo si boro kul sii a ma ifutu tee. 14 Amma boro foo kul mma siyandi waati kaŋ nga boonay futaa nʼa cendi kʼa darga. 15 Woo banda ga, nda boonay futaa zandi, a ga zunubu hay, nda zunuboo nin, a ga buuyan hay.
16 War masi war boŋ darga, agʼarmey, ay baakey. 17 Nooyan henna kul nda nooyan timmante kul si hun kala beene, gaayey Baaba do. Nga kaŋ si barmay, a si tee bii kaŋ ga bere-bere. 18 Nga ibaayoo ra, a nʼir hay cimoo šennoo sabboo ra, hala ir ma tee sanda nga takahayey ize jina-jinawey.
Wa haŋajer Irkoy meešennoo se kʼa ka goy
19 War ma bay, agʼarmey, ay baakey, adamize kul ma cahã ka haŋa kayandi, amma a masi cahã ka šelaŋ, a masi cahã ka futu, 20 zama adamize futuyanoo si haya tee kaŋ ga šerre Irkoy jine. 21 Woo se war ma žiibi kul naŋ, nda laalay futu kul, wa Šennoo kaŋ dumandi war biney ra dii nda bineyaynay, a goo nda hini ka war hundey hallasi.
22 Wa Šennoo ka goy, war masi haŋajer a se hinne ka war boŋ darga. 23 Zama boro kaŋ ga haŋajer Šennoo se, amma a sʼa ka goy, boraa ga hima nda boro kaŋ na nga ndum cimoo guna diji ra, 24 a na nga boŋ guna, a koy, de dogoo din da a dirɲa takaa kaŋ ga nga goo. 25 Amma boro kaŋ na ašariya timmantaa kaŋ ga sawalandi guna boryo, a duumi a ra, a mana tee haŋajerkaw dirɲante, a gʼi ka goy, boraa ga duu gomni nga goyey ra.
26 Nda boro ga hongu addini boro ti nga, amma a si hin nga miɲoo, a mma nga boŋ darga, nga addinaa ti yaada. 27 Addinaa kaŋ ra žiibi sii, a ga henan Irkoy ir Baaba jine ti: ma alyatimey nda woyey kaŋ kurɲey buu gaakasinay ngi fararoo ra, ma ni boŋ dii aduɲɲa žiiboo ga.