1 Targin̰ ɗang da, Jesu cor gandə managə kulə gaba amsa Mãr̰ĩ gənə̂ nare nə̂ Juwib day-ə̂. Gun gə əsə̂w mar bam ilə̂ me. 2 Nare nə̂ gə ꞌogəgə Parise kaw ilə̂, cendi ur ba gə aləw Jesu gwale dəwə̂, yande da, cendi asə angal day yə̂rgə gə Jesu dara gaba an̰ju ba ha swa aba mwom di daa wala gaba bwa gwayni-yə̂ mo. 3 Ər̰ə Jesu wayəw abe gə əsə̂w mar bam di ba da: «So ɗəbə daa nare dwar̰agələ̂!» 4 Me ur nare di ba da: «Wala gaba bwa gwayni-yə̂ da, bii gə ꞌwoo ənda ur dara ba mə̂ alna i mani nə̂ lade, labaa nə̂ acn̰e mo? Dara ba mə̂ bəlnə̂ gun daa, labaa ba mə̂ ꞌyanaw bam mo?» Me gun mən kaw aləw gwale lə̂ diyə̂ bə̂də̂. 5 Mwom da, Jesu cor yə̂rgə pad day-ə̂ gə man̰a, me səw kaw ꞌyoləw dədə̂gələ̂ bə̂də̂ dara nare nə̂ ta di dədə̂gə woy nan̰e. Mwom da, an̰ji wayəw abe di ba da: «Yə̂ əsə̂m dodə̂!», me an̰ji yə̂ə̂ əsə̂w dodə̂. Mana gə ta-lə̂ dog da, an̰ji ꞌyo labiya. 6 Me nare nə̂ Parise di dəmə̂gə iche, hargə kalang ꞌywa nare nə̂nə̂ dole gə Erod dara ba gə ha ala i man dara ꞌyaa gə Jesu mo?

7 Ɗang bi, Jesu day gə nə̂ woni gərsə̂ gwale duwa hargə gər managə kuray gə ɓəle gə Galile bəwə̂. Nare nan̰ paməw tarəwə̂. Nare nə̂ gər̰e nə̂ ta di dwar̰agələ̂ da, nə̂ yab swa i wama gə Galile-yə̂, me nə̂ yab bi da, swa i wama gə Jude-yə̂ 8 me i ciri də geche də Jursalem-mə̂, me nə̂ yab swa i wama gə Idume-yə̂, me nə̂ yab ɗang i nə̂ swa gangə̂r gənə̂ kuray gə Jurde-yə̂, me nə̂ yab da, swa i ciri də Tiir me Sidõ me tulbə̂də-lə̂. Managə cendi doy mani nə̂ Jesu algə di da, cendi haragə pad dara yara gə dərə̂gə.

9 Managə Jesu yə̂r narje di gər̰ə nan̰ da, an̰ji waygə woni gərsə̂ gwale duwa ba da: «Unən bərwa hane nəm, dara kal nare di ɗərbənə̂n bə̂də̂.» 10 An̰ji way yande dara managə an̰ji dee swa nare nə̂ mwom nan̰ daa pii da, nare pad nə̂ mwom jiga jiga ilə̂ gələ̂gə dərə̂gələ̂ da, ꞌyoləm dara ba gə hara səwə̂ ib ba gə ɓəlbə səw. 11 Managə nare nə̂ dundi də̂ acn̰e algə kaw ba gə yə̂r Jesu mwom da, dundi də acn̰e di nogəgə me cendi piy gubərə̂gə dodə̂ dərə̂wə̂ me sojə mar̰jagə daa way ba: «Əjəm, mə̂ i Mãr̰ĩ gorəndəw!» 12 Me an̰ji ər̰in̰ dundi də acn̰e əmdə waya gə nare ba i Mãr̰ĩ gorəndəw di bam.

13 Ɗang, Jesu nagə ha kur̰a-lə̂. An̰ji ꞌogə nare nə̂ an̰ji ur ba gərsənə̂ gwale duwa, me cendi hara səwə̂. 14 Mwom da, an̰ji an̰jər nare nə̂ mwaj dii sər bi managə kwandagə dwar̰agələ̂. An̰ji ꞌogəgə ba i paja duwa. An̰ji an̰jər nare nə̂ mwaj dii sər ta di dara ba ina i gandəw, me ɗan̰ baa ha kəjə̂gə dara waya gə Nõ də lade dənə̂ Mãr̰ĩ duwa, 15 me baa ha ꞌyagə dwana də idə ꞌywara dundi də acn̰e bam me ca. 16 Yarna, nare nə̂ mwaj dii sər nə̂ ta di sumdə̂gə, i ta: Simõ gə Jesu ꞌogəw Piyer, 17 me Jak day gə chendəw gə Jã, nə̂ i Jebede dəndaw me Jesu ꞌogəgə «Bwanerje», gəndəw də biyə̂ da, way i ba da: «nare nə̂ wun ya ər̰in̰ə̂ gənə̂ Mãr̰ĩ duwa de», me 18 Andəre, me Pilib, me Bartelemi, me Matiyə̂, me Toma, me Jak gənə̂ Alpe gorəndəw, me Tade, me Simõ gə i gun gə ur dara nare nə̂ Juwib ba damna gə dədə̂gə me bəlnə̂ sədə̂gə cendi me ca, 19 me Juda Iskariyod gaba ꞌyaa Jesu woni mar̰ande duwa əsəragələ̂ me ca.

20 Tar̰gin̰ ɗang da, Jesu day gə nə̂ woni gərsə̂ gwale duwa cwara hara ulay. Nare nan̰ ɗang bi hara dayar gandəw. Me Jesu day gə nə̂ woni gərsə̂ gwale duwa ꞌyo bərmə̂ gaba wama mani nə̂ wama bə̂də̂. 21 Managə Jesu war̰aw ba gə dwaya yande da, cendi waya an̰ji ba cor meyendə i bam ɗəm, me cendi swa daa hara dara walaw gə dwana hara nəm ulay.

22 Ər̰ə, nare nə̂ mən nə̂ woni gələ̂ bii gə ꞌwoo gənə̂ Moyis duwa swa managə Jursalem. Cendi gəra way ba da: «Sidan* 3.22 SidanManagə magtubu dənə̂ Mãr̰ĩ duwa də gə jangədə pii gə bii gə gərek da, gə jangəw i «Belsebil» mana gə ka-lə̂. Nare nə̂ Juwib ꞌogə Sidan gə bii day ɗang «Belsebil». ilə̂ Jesu səwə̂, i tandi də i dundi də acn̰e geche day me ꞌyaw dwana də idə ꞌywara dundi də acn̰e bam.» 23 Mwom da, Jesu ꞌogə woni gələ̂ bii gə ꞌwoo nə̂ ta di, me an̰ji waygə gwale gə diri: «I man me Sidan ha ꞌywara sədə dəra bam gang tug mo? 24 Wala gə nare nə̂ lew də dwãr̰ĩ-yə̂ mən jarna say gə sədə̂gə day gang da, dwãr̰ĩ də ta di ha ꞌya lə̂ bə̂də̂. 25 Me managə nare nə̂ ciri dwar̰ə-lə̂ mən damna dara jara say gə sədə̂gə day da, ciri də ta di ha ꞌya lə̂ bə̂də̂. 26 Me Sidan jarna gə sədə dəra gang, labaa yinə̂ sədə daa mən bə̂də̂ da, dwana dəra ha ꞌya lə̂ nan̰ mo? Bə̂də̂. Dwana dəra ha ꞌyan̰a i bam bər̰in̰.

27 «Managə gun urnə̂ ba gandəna managə gun gaba dwana† 3.27 gun gaba dwana Jesu way gwale gə diri gə ta di dara gələ̂gə nare ba əndə̂ Sidan dodə̂, me ta di me, an̰ji neyem ꞌywara gə nare dundi də acn̰e bam sədə̂gələ̂. An̰ji wayna gwale gənə̂ gun gaba dwana da, an̰ji way i dara Sidan, me aba magədaw dodə̂ me chaba gun gaba dwana mani duwa bam me da, i an̰ju gə Jesu səw duwa gang. Jesu ilə̂ ala i mani nə̂ Mãr̰ĩ biyəw gə bii pii ba alnagə di, yarna Esayi 49.24-26. kərə̂ duwa-lə̂ me ba chə̂bə mani duwa nə̂ ꞌywa pad bam da, ladni duwa da, an̰ji magədə gun gaba dwana di dodə̂, do me, an̰ji ha neyama gaba chaba mani duwa nə̂ ꞌywa nə̂ kərə̂ ta di bam pad sən̰. 28 I sədə. Dwayna, nə̂ wayang i gwale səw ɗang bi: Mãr̰ĩ i ib dara kala dusəw həlala nare acn̰a day gə jiga jiga dəwə̂ le, me acn̰a day gə cadəbə gə Mãr̰ĩ kaw, an̰ji ha kala dusəw həlala lə̂ diyə̂ me ca, 29 me gun gə cadəbəna i Dundi dənə̂ Mãr̰ĩ duwa da, Mãr̰ĩ ha kala dusəw həlala acn̰a duwa gə ta di dəwə̂ bə̂də̂. Gun gə ta di acn̰a duwa di wor ilə̂ dəwə̂ gə dərin̰ bər̰in̰.»

30 Jesu waygə woni gələ̂ bii gə ꞌwoo yande i dara cendi waya ba an̰ji ba i gə dundi də acn̰e lə̂ səwə̂.

31 Tar̰gin̰ ɗang da, Jesu iw me chamraw me haragə gəra ciri də Jesu ilə̂. Cendi ɗəbə iche me giyəw gun managə kərə̂ ba ꞌwagənaw. 32 Nare nan̰ dam ilə̂ gandəw, me gə wayəw: «Yə̂r, im me chamram me ilə̂ iche, cendi urəmme.» 33 Me Jesu cogə lə̂ diyə̂ ba da: «I wi me i in, i nə̂ wi me i chamran mo?» 34 Mwom da, an̰ji kal səw yə̂r nare nə̂ dam liwəw daa ta di ɓam, me way ba da: «In me chamran me, i ka. 35 Ə̂w, gun gə woy woy gə alna mani nə̂ Mãr̰ĩ dusəw urgə da, an̰ji me i chen, me i chidən, me i in me ca.»