Kalata ya Paulo ku
Baefenso
Busansulushi.
Kalata ya ku Baefenso yalalembelwa pamo ne kalata yaku Bakolose mu 60 A.D. Mutumwa Paulo elyalambanga mwineti ewalailemba 1:1 Bantu beshikuyanda kwinshiba bingi, bakute kusuminishana kwambeti Paulo endiye walalemba libuku lya Baefenso nambi kulyeti muliya mitende yakendi mbuli isa ili mulibuku lya Bakolose. Pacebo ici lyalikuyandikowa kumwaiwa mumibungano ili mucimpansha. Kayi lambangeti walikuba mu jele pacindi mpwalikulemba kalata 3:1, 4:1 ne 6:20. Paulo walapa Tukiko, kalata iyi pabulendo bwakendi bwa kufwakashila mibungano mu Efenso 6:21-22.
Efenso walikuba munshi unene, mucimpansha ca Asiya mu Loma. Efenso walikuba ne mpuwo cebo cang'anda ya kambwanga ka citukashi kaci Giliki kalikukwiweti Atemi Incito 19:23-31. Mubungano wa mu Efenso walikuba wayuma pakutatika nomba kumapwililisho walatontola 2:1-7.
Paulo lambanga mucintimbwi cakalata iyi munshila Lesa njalasalilamo bantu bakendi kayi mbuli mwalabapulushila kufuma mu bwipishi bwabo kupitila muli Yesu Klistu. Lelenkanyanga mubungano ne mubili uwo mutwi wakendi ni Klistu, kayi eti ng'anda ikute Klistu eti libwe lyankokola. Mucintimbwi cakupwililisha ca libuku, Paulo lapanga malailile a bwikalo bwa ciklistu.
Mitwi ya makani
Mucimpansha ca 1:1-2 Paulo lalyambanga mwine kayi lapanga mitende ba Efenso.
Kayi lambanga sha lwikatano pakati pa mubungano ne Klistu 1:3 mpaka 3:21
Kayi lalembenga ncobela kwikala baklistu 4:1 mpaka 6:20
Pakupwililisha Paulo lambangaponga maswi akupwililisha 6:21-24
1
1 Njame Paulo, mutumwa wa Klistu mwakuyanda kwa Lesa. Ndalembelenga bantu ba Lesa bali ku Efenso bashomeka mubuyumi bwabo bwekatana ne Klistu.
2 Kwinamoyo ne lumuno bibe nenjamwe kufuma kuli Lesa, Bata ne Mwami wetu Yesu Klistu.
Kushoma Klistu kukute kuleta colwe
3 Katulumbaishani Lesa baishi Mwami wetu Yesu Klistu.Pakwinga mukwikatana pamo ne Klistu, Lesa walatupa colwe ciliconse ca mushimu kufuma Kwilu kupitila mu Mushimu Uswepa. 4 Lesa katanalenga cishi walatusalila limo cebo cakwikatana pamo ne Klistu kwambeti tukabe bantu bakendi baswepa babula kampenda.
Cebo ca lusuno lwakendi. 5 Lesa walabambilalimo kwambeti tukabe banabendi kupitila muli Yesu Klistu, pakwinga ecalamukondwelesha kayi encalikuyanda mwine. 6 Katulumbaishani Lesa cebo ca bulemeneno ne kwina moyo kwakendi nkwalatupa kupitila mu Mwanendi ngwasuni. 7 Kupitila mu lufu lwakendi, Yesu walatusungulula kayi tukute kulekelelwa bwipishi. Cakubinga kwinamoyo kwa Lesa nikunene, 8 nkwalatupa kupitila mu mano ne lwinshibo lwakendi. 9 Lesa walensa ciliconse ncalikuyanda ne kuyubulula kuli njafwe bubambo bwakendi bwalikuba bwasolekwa mucindi cakunyuma mbwalikuba wasalilalimo kwambeti bukwanilishiwe muli Klistu. 10 Lino cakashika cindi celela ca bubambo ubu, Lesa nakabike pamo bintu byonse mubwendeleshi bwa Klistu, bintu bya kwilu ne bintu bya pacishi capanshi.
11 Bintu byonse nibikenshike kwelana ne mwine Lesa ncalayeyenga, kayi Lesa ewalatusala kuba bantu bakendi pakwikatana pamo ne Klistu kwelana ne kuyanda kwakendi kufuma pacitatiko. 12 Neco, afwe twalatanguna kuba ne kupembelela kulico muli Klistu, katulumbaishani bulemeneno bwa Lesa.
13 Kayi nenjamwe mwalaba bantu ba Lesa kufuma pa cindi ncomwalanyumfwa mulumbe wancinencine, Mulumbe Waina walamuletela lupulusho. Mwalashoma muli Klistu, nendi Lesa walasuminisha pakubikapo cando cakendi palinjamwe ca Mushimu Uswepa ngwalamulaya, 14 Pakwinga Mushimu Uswepa engwalabenga Lesa, ecitondesho ca kwambeti nitukatambule colwe ico ncalalaya kupa bantu bakendi, lino tukute kwamba mu lushomo kwambeti Lesa nakalubule bantu bakendi. Neco katulumbaishe bulemeneno bwakendi.
Mupailo wa Paulo
15 Pacebo ici, kufuma pacindi ncendalanyumfwa sha lushomo lwenu muli Yesu Mwami wetu kayi ne lusuno ndomukute ku bantu ba Lesa. 16 Cindi conse ndalumbanyanga Lesa pacebo canjamwe mu mipailo yakame, nkankute kuluba kwambapo sha njamwe sobwe. 17 Ndapailinga ne kusengeti Lesa wa Mwami wetu Yesu Klistu, Ishetu wabulemeneno amupe mushimu kwambeti mube ne mano ne kunyumfwishisha cena bintu mbyalayubululunga Lesa kwambeti mumwishibe cena. 18 Ndapailingeti myoyo yenu icaluke ibone cena mumuni, kwambeti mukenshibe cena kwambeti kupembelela nkwalamukwili Lesa nicani, ne kwinshiba kwina kwabulemu ne colwe ico Lesa ncalashomesha bantu bakendi. 19 Kayi nicakubingeti mwinshibe ngofu shakendi shabula cakwelanikako isho shilasebensenga muli njafwe otwashoma. Ishi ningofu shabula cakwelanikako. 20 Isho Lesa nshalasebensesha pakumupundusha Klistu kubafu nekumwikalika ku cikasa cakendi cakululyo Kwilu. 21 Klistu Wekala pacipuna cabulemu capita bendeleshi bonse bamu makumbi, batangunishi bonse bakute ngofu kayi ne bami bonse. Ukute lina lyalemekwa kupita maina onse alipo pacino cindi nambi eti akabeko cindi cilesanga kuntangu. 22 Lesa walakoma bintu byonse nekubibika panshi pa bwendeleshi bwa Klistu kayi walamubika pelu pa bintu byonse kwambeti abe mutwi wa mubungano. 23 Mubungano emubili wa Klistu, kayi ewesulilwa ne Klistu, uyo ukute kwisusha bintu byonse cakupwililila.