1 दिन्‍जाकी ङ्‍यिमा थल्‍माला टोपला टेताङ ती पुम्‍पेजातिवा खोप्‍रे टडिक क्‍यावु टी जङ्‍बु खाप फे ताङ नुम खुर्नी येशूकी फुङ्‍बु ज्‍यकुप टककी फुकला गाल। 2 तमा ते लेप्‍सिमा टककी फुककी खला च्‍येतुप दो ति रिल्‍नी तङ्‍गुप तिवी थोङ्‍सुङ। 3 तिवा टककी फुककी नाङ्‍ला शुनी ल्‍हासालेन्‍सिन चोवो येशूकी फुङ्‍बु ति ते मिन्‍दुक। 4 तमा तिवा काङ कितुप काङ कितुप गल्‍नी वोतुप पेला शार्क्येक वो ग्‍यपुप मज्‍या कोन्‍दुप ख्‍योक्‍पेजा मिरा ङ्‍यी तिवी चिप्‍ला लानी देनोक। 5 ती थोङ्‍सिमा पुम्‍पेजातिवा कशेन ज्‍यिवा लानी सला खवुतुङ्‍मा देसुङ। तमा ती ख्‍योक्‍पेजातिवी तिवाला सिक्‍यासुङ, “ख्‍यिराङ च्‍यिला ङोसु वोतुप तीला शेपतिवी पर्ला छोलिन वे? 6 खो याङ दे मे, खो ङोसु लानी वे। खो गालीलला ज्‍युवु पेला ख्‍यिराङला सुङ्‍गुप ताम्‍ङे ति नासाम तोङ। 7 खोकी ‘ङ मी पुज्‍युङ ति दिक्‍छेनतिवी लकला चेक ते गोकिवी, तमा ग्‍यङ्‍शिङ लोला कल्‍नी ङ्‍यिमा सुमला शेप ने येलुङ सेन्‍बु लङ्‍गिवी।’ सिनी सुङ्‍सुङ।” 8 ती थोसिमा ती पुम्‍पेजातिवी खोकी सुङ्‍गुप ताम्‍ङे ति नासाम शार्सुङ।

9 तमा पुम्‍पेजातिवा शेप मीला ज्‍योकुप टककी फुक नेमा लोक्‍नी वानी लोमा च्‍युच्‍यिकतिवा ताङ मी यम्‍बा तेरीला ते काङ च्‍युङ्‍गुप ताम्‍ङे ति लाप्‍सुङ। 10 ती पुम्‍पेजातिवा ति मरियम मग्‍दलिनी ताङ योअन्‍ना ताङ याकूबकी आमा मरियम यिनोक, तमा तिवी मुला वोतुप यम्‍बा पुम्‍पेजातिवी साङ लोमातिवाला ती ताम्‍ङे ति सिक्‍यासुङ। 11 यिने लोमातिवी ती ताम्‍ङे ति तेर्मे यिन सिनी नासाम ताङ्‍नी पुम्‍पेजातिवी ताम्‍ङेला तेपा माक्‍या। 12 यिने पत्रुस ति लानी येशूकी फुङ्‍बु ज्‍यकुप टककी फुकला छ्‍योङ्‍बाल ग्‍यम गाल्‍सुङ। तमा तीकी कुक क्‍यानी टककी फुककी नाङ्‍ला ल्‍हासालेन्‍सिन ते येशूकी फुङ्‍बु तुम्‍बुप रा नेङेन तिराङ ज्‍याक्‍नी वोतुप थोङ्‍सुङ। ती थोङ्‍सिमा ती ति काङ च्‍युङ्‍नोक सिनी हलेवा कियी सिरा खोरो खाङ्‍बा लोक्‍नी गाल्‍सुङ।

13 तमा ती छेर्मु राङ येशूला तिङ्‍योकुप मी मिरा ङ्‍यी यरूशलेम नेसुर किलोमिटर च्‍युच्‍यिक चोयी थाक्‍रिङ्‍बु वोतुप इम्‍माउस सिरुप युल नेवा डोयी नोक। 14 तोजो पेला तिवा च्‍युङ्‍गुप तेरी ताम्‍ङेतिवा कियी नोक। 15 तिवा ताम्‍ङे कियी वोतुप पेला येशू तिवी चिप्‍ला फेप्‍नी तिवी मुला राङ युसुङ। 16 यिने तिवी खो येशू यिन सिनी ङो माशेनोक। 17 तमा खोकी तिवाला “ख्‍यिराङ युकिन सिरा च्‍यिककी च्‍यिकला केवुल कियी वोतुप ताम्‍ङे ति काङगी कोर्ला यिन?” सिनी टि नाङ्‍सुङ। ती थोनी तिवा ङोतुङ नाक्‍छिल ताङ्‍नी चोक चोके लानी देसुङ। 18 तमा तिवा ङ्‍यिवुकी पर नेमा क्‍लेओपास सिरुप तीकी येशूला टिसुङ, “ख्‍युरुङ यरूशलेमला कोरा ग्‍यप्‍नी वासिनाङ तसाम पेला ते च्‍युङ्‍गुप ताम्‍ङे ख्‍युरुङला तिराङ छ्‍या मे?” 19 तमा खोकी तिवाला “काङगी ताम्‍ङे?” सिनी टिन नाङ्‍सुङ। तिवी सिक्‍यासुङ, “नासरतकी येशूकी कोर्ला च्‍युङ्‍गुप ताम्‍ङे यिन। खो ति कोन्‍छ्‍योक ताङ तेरी मीतिवी थोङ्‍दाङला लाका ताङ सुङला ङार छ्‍येवु कोन्‍छ्‍योककी लुङ्‍तेम्‍बा वोतुप्‍जा। 20 यिने कोङ्‍यार छ्‍येतिवा ताङ ङ्‍यिरा मी छ्‍येतिवी खोला सेतुप छ्‍येर्पा ग्‍येलुपला चेक तेसुङ। 21 तमा खो ति इस्राएलकी मीतिवाला थर ज्‍यितुप मी यिन सिनी ङ्‍यिरा रेवा क्‍यानी वोतुप्‍जा। तोजो तिराङ मिन, ती ताम्‍ङे च्‍युङ्‍गुप ति हारिङ ङ्‍यिमा सुम गाल। 22 ङ्‍यिरा मुकी पुम्‍पेजा ललाइकी ङ्‍यिराङला छासे हलेवा लाङ्‍सुङ। तिवा ति हारिङ टोपला टेताङ येशूकी फुङ्‍बु ज्‍यकुप टककी फुकला गाल्‍नोक, 23 यिने तिवी ते येशूकी फुङ्‍बु ति माथोङ्‍नोक। तमा तिवा लोक्‍नी वासिमा ङ्‍यिराङला दुक सिनी लाप्‍सुङ, ‘ङ्‍यिरा ते देवाच्‍येनकी लेन क्‍योलुप थुतिवाला थोङ्‍सुङ, तिवी खो ङोसु लान वे सिनी सिक्‍यानोक।’ 24 ती ताम्‍ङे थोनी ङ्‍यिरा पर्ला ललाइ ति खोकी फुङ्‍बु ज्‍यकुप टककी फुकला गल्‍नी ल्‍हासालेन्‍सिन ती पुम्‍पेजातिवी सिक्‍यावु दोके खोकी फुङ्‍बु ति तिवी माथोङ्‍नोक।”

25 तमा येशूकी तिवाला सुङ्‍सुङ, “ओ ख्‍यिराङ अम्‍बारङ्‍शिङतिवा, ख्‍यिरा कोन्‍छ्‍योककी लुङ्‍तेम्‍बातिवी सिक्‍यावु तेरी ताम्‍ङेतिवाला तेपा कितुपला छासे काले नोक। 26 काङ ख्रीष्‍टकी वुतुङ के दी छेटाङ खुर्नी खोरुङला थोपुप मोवा ङ्‍ये मोगोवी रो?” 27 तमा येशूकी मोशा ताङ तेरी कोन्‍छ्‍योककी लुङ्‍तेम्‍बातिवा नेज्‍युनी तेरी कोन्‍छ्‍योककी सुङगी नाङ्‍ला खोरो कोर्ला टिवु ति तिवाला शेन नाङ्‍सुङ।

28 तमा तिवा ङ्‍यिवु डो गोवु युलला लेप्‍सिमा येशू ति तेसुर तरोङ फेचेक फेपुप छाल्‍सुङ। 29 यिने तिवी खोला “त याङ नाम ल्‍होसुङ, ङ्‍यिमा साङ गासुङ, ङ्‍यिरा मुला राङ ज्‍यु।” सिनी कार क्‍यानी सिक्‍यासुङ। तमा खो तिवी मुला ज्‍युवुला खाङ्‍बा शुसुङ। 30 तमा येशू तिवी मुला सोल शेवुला ज्‍युवु पेला शुब्‍ज्‍याङ लानी कोन्‍छ्‍योकला थुचिछे पुल्‍सिमा च्‍याक्‍नी तिवाला नाङ्‍सुङ। 31 ती पेला राङ तिवी मिक पेनी येशूला ङो शेसुङ। यिने खो तिवी थोङ्‍दाङ नेवा तोक तोर्सुङ। 32 तमा तिवी च्‍यिककी च्‍यिकला सिक्‍यासुङ, “खो लामला दाक्‍पु ताङ मुला अरा उरा सुङ्‍गुप ताङ दाक्‍पुला कोन्‍छ्‍योककी सुङगी तेन्‍दोक ति शे नङ्‍गुप पेला दाक्‍पी सेम ति छासे लोदिमु च्‍युङ्‍नी गा लावु मिन रो?”

33 तमा तिवा शार्क्येक लानी यरूशलेमला लोक्‍नी ल्‍हासालेन्‍सिन लोमा मिरा च्‍युच्‍यिक ताङ तिवी मुला वोतुपतिवा मुला राङ जोम्नी 34 दुक सियी नोक, “वुतुङ के चोवो याङ ङोसु लानी सिमोनकी चिप्‍ला छ्‍यार्सुङ।” 35 तमा ती मिरा ङ्‍यिवु साङ लामला काङ च्‍युङ्‍गुप ताम्‍ङे ताङ खोकी शुब्‍ज्‍याङ च्‍योकुप पेला तिवी खोला ङो शेवु ति तिवाला लाप्‍सुङ।

36 तिवा ती ताम्‍ङे कियी वोतुप पेला शार्क्येक येशू तिवी पर्ला लानी तिवाला “ख्‍यिराङला लोदिमु वुङ्‍शी।” सिनी सुङ्‍सुङ। 37 तमा तिवा र्‍हेन्‍डीला के थोङ्‍गुप यिन्‍दे नोनी ज्‍यिवा लानी पार्सुङ। 38 यिने खोकी तिवाला सुङ्‍सुङ, “ख्‍यिराङ च्‍यिला ज्‍यिवा किवी? ख्‍यिरा सेमला च्‍यिला यिन्‍दे मिन्‍दे नोकिवी? 39 ख्‍यिराङ ङे लाक्‍पा ताङ काङ्‍बा ल्हो। ङ राङ यिन! ङला थो ताङ्‍नी ल्हो। र्‍हेन्‍डी ति श ताङ रुकक मेवी, यिने ङ याङ ख्‍यिरा थोङ्‍गुप दोके श ताङ रुकक वे।” 40 तुक सुङ्‍सिमा येशूकी तिवाला खोरो छ्‍याक ताङ शाप ति छ्‍या तेन नाङ्‍सुङ। 41 तमा लोमातिवा छासे गा ताङ हलेवा क्‍यानी तरोङ साङ यिन्‍दे मिन्‍दे नो कियी वोतुप पेला खोकी तिवाला “ख्‍यिरा लोला काङ रे च्‍यिक रे साप समा वे?” सिनी टि नाङ्‍सुङ। 42 तमा तिवी खोला चोवु ङ्‍या च्‍यिक बिन्‍सिमा 43 खोकी ती ति लानी तिवी मिङ्‍गाला शेसुङ। 44 ती ज्‍युक्‍ला खोकी तिवाला सुङ्‍सुङ, “ङे गोमाला ख्‍यिरा मुला वोतुप पेला ख्‍यिराङला ‘मोशाकी ठिम ताङ कोन्‍छ्‍योककी लुङ्‍तेम्‍बाकी थेप ताङ भजनसंग्रहकी थेपकी नाङ्‍ला ङे कोर्ला टिवु तेरी ताम्‍ङेतिवा छे राङ गोकिवी।’ सिनी सिक्‍या वे।” 45 तमा खोकी तिवाला कोन्‍छ्‍योककी सुङ हाक्‍कोवु सेम नङ्‍यिन सिरा 46 तिवाला दुक सुङ्‍सुङ, “कोन्‍छ्‍योककी सुङला दुक सिनी टि वे, ‘ख्रीष्‍टकी छेटाङ खुर्सिमा ङ्‍यिमा सुमला शेप ने ङोसु लङ्‍गिवी, 47 तमा खोकी मिङला दिक्‍पा ने सेम ग्‍युर्सिन दिक्‍पा ताकिवी सिरुप लेन ल्‍यामु ति यरूशलेम नेसुर गो चुनी लुङ्‍बा तेरीकी मीतिवाला ख्‍याप्‍टाक किवी।’ 48 ख्‍यिराङ ति ती तेरी ताम्‍ङेतिवी पङ्‍बु यिनो। 49 ल्‍होसा, ङे पपी थाक्‍छ्‍येन नङ्‍गुप ति ङ ख्‍यिराङला तोङ्‍यिनो। यिने ख्‍यिराङ कोन्‍छ्‍योक नेमा ओङ माथोपा सेक्‍ला दी ग्‍येसाला राङ देता।”

50 ती ज्‍युक्‍ला येशूकी लोमातिवाला ग्‍येसा नेमा तेन्‍नी बेथानिया सेक टिनी फेप्‍सुङ, तमा खोकी छ्‍याक तेक्‍नी तिवाला मोलाम नाङ्‍सुङ। 51 खोकी तिवाला मोलाम नङ्‍यिन वोतुप पेला खो ति तिवी मु नेसुर क्‍येनी देवाच्‍येन ने तेक्‍नी फेप्‍सुङ। 52 तमा तिवा खोला सोवा देकिन छासे गा कियी सिरा यरूशलेम नेवा लोक्‍सुङ। 53 ती ज्‍युक्‍ला तिवा कोन्‍छ्‍योकला सोवा देकिन सिरा यहूदी ल्‍हङाङला नरी देसुङ।