1 ती ज्‍युक्‍ला तेरी यहूदी छोक्‍पाकी मी छ्‍येतिवा लानी येशूला पिलातसकी चिप्‍ला टिनी गाल। 2 तमा तिवी खोकी तेन्‍दोकला दुक सिनी क्‍येन ग्‍यप्‍सुङ, “दी मी तीकी याङ ङ्‍यिरा मिरिककी मीतिवाला लुतिन नोक, रोमी ग्‍येल्‍वुला से तेतुप मेङ्‍गिवी सिनोक, तमा खोरुङ ति ग्‍येल्‍वु ख्रीष्‍ट यिन सिनोक।” 3 ती ताम्‍ङे थोनी पिलातसकी येशूला “काङ ख्‍युरुङ यहूदीतिवी ग्‍येल्‍वु राङ यिन?” सिनी टिसुङ। तमा येशूकी सुङ्‍सुङ, “ती ति ख्‍योरे राङ सिक्‍या वे।” 4 तमा पिलातसकी कोङ्‍यार छ्‍येतिवा ताङ मी माङ्‍छ्‍योकला सिक्‍यासुङ, “ङे याङ दी मी तीला काङ साङ क्‍येन तेरुप माथोङ।” 5 यिने मीतिवा ङार क्‍यानी दुक सिक्‍यासुङ, “दीकी याङ गालील नेज्‍युन दे सेक तेरी यहूदियाकी मीतिवाला खोरो येन्‍देन लाप्‍नी लुतिन नोक।”

6 ती थोसिमा पिलातसकी “दी मी ति गालीलकी मी राङ यिन?” सिनी टिसुङ। 7 तमा तीकी येशू ति हेरोदकी लुङ्‍बी मी यिन्‍दुप हाक्‍कोनी खोला हेरोदकी ते टिनी ताङ्‍सुङ। ती पेला हेरोद ति यरूशलेमला राङ नोक। 8 येशूला थोङ्‍सिमा हेरोद ति छासे गा क्‍यासुङ, च्‍यिलासिसिन तीकी येशूकी कोर्ला थोनी अला गोमा नेज्‍युन खोला ठेतुप नो क्‍यानोक। तमा तीकी खोकी काङ रे च्‍यिक रे हलेवु लाका कितुप ल्‍हापला रेवा क्‍यानोक। 9 तीकी येशूला टिवा बङी ग्‍यप्‍सुङ, यिने खोकी काङ टिलेन साङ मासुङ। 10 तमा कोङ्‍यार छ्‍येतिवा ताङ यहूदी छ्‍योकी गेकेनतिवी ते लान देनी खोला कशेन क्‍येन ग्‍यप्‍सुङ। 11 हेरोदकी खोरो मक्‍मीतिवा ताङ मुला खोला मारे तोङ्‍यिन सिरा मर्च्या क्‍यासुङ, तमा खोला ग्‍येल्‍वुकी कोन्‍दुप च्‍यिन्‍दै छ्‍योवा यी कोन बिन्‍नी पिलातसकी ते लोक्‍नी ताङ्‍सुङ। 12 गोमाला याङ पिलातस ताङ हेरोद ति च्‍यिककी च्‍यिकला ड यिनोक, यिने ती छेर्मु राङ तिवा थिन्‍नी दाल्‍जा च्‍युङ्‍सुङ।

13 तमा पिलातसकी कोङ्‍यार छ्‍येतिवा ताङ यहूदी गोमा कितुप मी छ्‍येतिवा ताङ मीतिवाला कताङ्‍नी 14 तिवाला दुक सिक्‍यासुङ, “दीकी मीतिवाला लुसुङ सिनी ख्‍यिरा दीला ङे चाला टिन लेसुङ। यिने ख्‍यिरा मिङ्‍गाला राङ ङे दीला ताम्‍ङेतिवा टिसिनाङ ख्‍यिरे दीकी तेन्‍दोकला क्‍येन ग्‍यपुप दोके ङे काङ साङ माथोङ। 15 हेरोदकी साङ तीला काङ क्‍येन माथोङ्‍नी तीला ङ्‍यिरा ते लोक्‍नी ताङ्‍नोक। दी मी तीकी याङ सेतुप छ्‍येर्पा तेर गोवु लाका मेलोक्‍पा काङ साङ माक्‍यानोक। 16 तुक क्‍यानी ङ दीला दुनी पि तोङ्‍यिन।” 17 (तमा ले टेङ यहूदीतिवी थरुप तुछ्‍येनला पिलातसकी चोन्‍खाङला शोरुप मिरा च्‍यिकला पि तोङ गोकिनोक।)

18 यिने पिलातसकी ताम्‍ङे थोनी मीतिवा तेरी मुला राङ च्‍यार ग्‍यप्‍नी, “दीला से! बरब्‍बाला ति पि तोङ!” सिनी सिक्‍यासुङ। 19 बरब्‍बा तीकी ग्‍येसाला वुल्‍दुङ्‍बा कितुप ताङ मीतिवा सेतुप क्‍येन फोक्‍नी चोन्‍खाङला शोर्नोक। 20 पिलातसकी येशूला पि तोङ्‍गुप नोनी येलुङ मीतिवाला सिक्‍यासुङ। 21 यिने तिवी “तीला ग्‍यङ्‍शिङला कल्‍नी काँडी दाप्‍नी से! तीला ग्‍यङ्‍शिङला कल्‍नी काँडी दाप्‍नी से!” सिनी मङ च्‍यार ग्‍यपुप ति ग्‍यप्‍तोक क्‍यासुङ। 22 तमा पिलातसकी थेङ्‍मा सुम्‍बाला सिक्‍यासुङ, “च्‍यिला? दी मी तीकी काङ लाका मेलोवा क्‍यासुङ? ङे याङ दीला से गोवु क्‍येन काङ साङ माथोङ, तुक क्‍यानी ङ दीला दुनी पि तोङ्‍यिन।” 23 यिने तिवी येशूला ग्‍यङ्‍शिङला कल्‍नी काँडी दाप्‍नी से सिनी मङ च्‍यार ग्‍यप्नी गोङ्‍बा शुसुङ। तुक क्‍यानी तिवी च्‍यार ग्‍यप्‍नी पिलातसला ग्‍येल्‍सुङ। 24 तमा तिवी गोङ्‍बा शुवु दोके राङ कितुप पिलातसकी तेन्‍तेन क्‍यानी 25 वुल्‍दुङ्‍बा कितुप ताङ मी सेतुप क्‍येन फोक्‍नी चोन्‍खाङला शोरुप तीला ति तिवी सिक्‍यावु दोके पि ताङ्‍सुङ, तमा येशूला ति तिवी नोवाला दोके कि ज्‍यितुपला तिवाला चेक तेसुङ।

26 तेसुर मक्‍मीतिवी येशूला टि डोयी कितुप पेला युल नेसुर ग्‍येसाला वुङ्‍यिन कितुप सिमोन सिरुप कुरेनी ग्‍येसाकी छ्‍यिग्‍यपकी मी यीला जिम्‍नी तीला ग्‍यङ्‍शिङ ति खुर च्‍यिनी येशूकी तिङ्‍ला डो च्‍यिसुङ। 27 तमा मी माङ्‍छ्‍योक खोकी तिङ्‍ला तिङ्‍यासुङ। तिवी पर्ला पुम्‍पेजातिवा खोकी थोक्‍ला ङोप ताङ ङुप्‍राङ कियी नोक। 28 तमा येशूकी ती पुम्‍पेजातिवी थाकाला ग्‍युर्नी सुङ्‍सुङ, “यरूशलेमकी पुमतिवा, ख्‍यिराङ ङे थोक्‍ला माङु, बोरु ख्‍यिराङ ताङ ख्‍यिरा पेजातिवी थोक्‍ला ङु। 29 च्‍यिलासिसिन दुका तुजे ति गिवी, ती पेला मीतिवी ‘रप्‍छ्‍येमतिवा ताङ नाम्‍साङ आङा माक्‍येवु खोक्‍पा ताङ नाम्‍साङ आङाला नुम मेतेरुप नुमला मोलाम थोपुप यिनो।’ सिनी सिवितो। 30 तमा तिवी रीतिवाला ‘ङ्‍यिरा खला लुम।’, तमा पम्‍दोकतिवाला ‘ङ्‍यिराङला उप।’ सिनी सिवितो। 31 दोजो दोङ्‍बु ङोर्मु वोतुप पेला साङ तुकै किसिन दोङ्‍बु कम्‍बुप पेला याङ काङ च्‍युङ्‍गी ताङ?”

32 ती पेला तिवी मी दुक्‍टा मिरा ङ्‍यीला साङ सेतुप छ्‍येर्पा ग्‍येलुपला येशूकी मुला टिनी गाल। 33 तमा कप्‍ली सिरुप दासा यीला लेप्‍सिमा तिवी येशूला ग्‍यङ्‍शिङला काँडी दाप्‍नी काल्‍सुङ। तुक राङ क्‍यानी च्‍याक्‍पा मिरा ङ्‍यीला साङ च्‍यिक ति खोकी यावी थाकाला ताङ च्‍यिक ति खोकी येन्‍बी थाकाला ग्‍यङ्‍शिङला काँडी दाप्‍नी काल्‍सुङ। 34 ती पेला येशूकी सुङ्‍सुङ, “ओ पपा, दिवाला माफ नङ्‍डे की, च्‍यिलासिसिन दिवी काङ कियी वे, ती ति दिवाला छ्‍या मे।” तमा मक्‍मीतिवी खोकी नम्‍सा ति ग्‍येन ग्‍यप्‍नी गोसुङ। 35 मीतिवा लानी ल्‍हयी नोक, तमा यहूदी मी छ्‍येतिवी खोला शा ग्‍यकिन दुक सिक्‍यासुङ, “दीकी मी यम्‍बाला याङ र्‍होक्‍सुङ। दोजो दी कोन्‍छ्‍योककी पेतुप ख्रीष्‍ट राङ यिन्‍सिन खोरुङला राङ र्‍होक ताङ।”

36 मक्‍मीतिवी साङ खोला मारे ताङ्‍सुङ, तमा तिवी खोकी चाला वानी खोला गुन्‍डुम छ्‍याङ क्‍युर्वु तेरिन सिरा दुक सिक्‍यासुङ, 37 “ख्‍युरुङ यहूदी ग्‍येल्‍वु राङ यिन्‍सिन खोरुङला राङ र्‍होक ताङ।” 38 तमा खोकी गो तेङ्‍ला “दी ति यहूदीतिवी ग्‍येल्‍वु यिन।” सिनी पङ्‍लिङ लोला टिवु यिकी ति ग्‍यम ज्‍याक्नोक। 39 येशू ताङ मुला ग्‍यङ्‍शिङला कलुप च्‍याक्‍पा ङ्‍यीकी पर्ला च्‍यिककी खोला मारे तोङ्‍यिन सिरा दुक सिक्‍यासुङ, “काङ ख्‍युरुङ ख्रीष्‍ट मिन? त ख्‍युरुङ ताङ ङ्‍यिराङला र्‍होक ताङ।” 40 यिने यम्‍बा च्‍याक्‍पा तीकी तीला वोरु देनिन सिक्‍यासुङ, “ख्‍युरुङ कोन्‍छ्‍योकला ज्‍यिवा मिकिवी? खोला ख्‍येलुप दोके छ्‍येर्पा ख्‍युरुङला साङ ख्‍येल्‍नी वे। 41 ङ्‍यिरा याङ रङगी क्‍यावु दुक्‍टाकी छ्‍येर्पा खुरिन वे, यिने दी मी तीकी याङ काङ साङ लाका मेलोवा माक्‍या वे।” 42 तमा तीकी येशूला सिक्‍यासुङ, “ओ येशू, ख्‍युरुङ ख्‍योरे ग्‍येल्‍खापला फेपुप पेला ङला नासाम तोङ।” 43 तमा येशूकी तीला सुङ्‍सुङ, “वुतुङ के ङ ख्‍युरुङला सिरिन, ख्‍युरुङ हारिङ राङ ङे मुला देवाच्‍येनला गिवितो।”

44 ङ्‍यिमी गुङगी छ्‍युजी च्‍यिङ्‍ङी गलुप पेला तेरी लुङ्‍बा ति छ्‍युजी सुम सेक नक्‍तोमी गाल। 45 तमा यहूदी ल्‍हङाङ नाङ्‍ला ग्‍यावु गोयोल ति पर नेमा रल्‍नी फेका ङ्‍यी गल्‍सुङ। 46 ती पेला येशूकी थोर ग्‍यप्‍नी सुङ्‍सुङ, “ओ पपा, ङे थु ति पपी छ्‍याकला चेक तेतिन।” तुक सुङ्‍सिमा खोकी उ छ्‍येसुङ।

47 ती च्‍युङ्‍गुप ति थोङ्‍सिमा रोमी मक्‍मी सयी च्‍यिककी खकी छ्‍ये तीकी “वुतुङ के दी याङ मी टेङ्‍बु यिनोक।” सिनी कोन्‍छ्‍योकला सोवा तेक्‍सुङ। 48 ते ल्‍हापला वावु मीतिवा तेरीकी काङ च्‍युङ्‍गुप ति थोङ्‍नी खोप्‍राङ खोप्‍राङ छेकोक दुङ्‍यिन सिरा लोक्‍नी गाल्‍सुङ। 49 यिने येशूला ङो शेवु मीतिवा ताङ गालील नेसुर खोकी तिङ्‍ला तिङ्‍यानी वावु पुम्‍पेजातिवा ति ते काङ च्‍युङ्‍गुप ति थाक्‍रिङ्‍बु नेसुर ल्‍हयी सिरा लानी देनोक।

50 यहूदी छोक्‍पाकी मी छ्‍येतिवी नाङ्‍ला योसेफ सिरुप मी मिरा च्‍यिक नोक। ती ति मी ल्‍यामु ताङ टेङ्‍बु यिनोक। 51 यहूदी छोक्‍पाकी मी छ्‍येतिवी येशूकी तेन्‍दोकला तेन्‍तेन क्‍यावु ताम्ङेला तीकी माङ्‍येन्‍नोक। ती ति अरिमाथिया सिरुप यहूदिया लुङ्‍बाकी युल नेमा वासुङ, तमा कोन्‍छ्‍योककी ग्‍येल्‍खाप वुङ्‍गुप ति गुनी देतुप मी यिनोक। 52 तीकी पिलातसकी चिप्‍ला गल्‍नी येशूकी फुङ्‍बु खुर्नी डो च्‍यी सिनी गोङ्‍बा शुसुङ। 53 तमा तीकी येशूकी फुङ्‍बु ति ग्‍यङ्‍शिङ लो नेमा पाप्‍नी तीला ति रा नेङेन नाङ्‍ला टिल्‍नी शेप मीला ज्‍योकुप टककी फुककी नाङ्‍ला ज्‍याक्‍सुङ। ती टककी फुक ति गोमाला सी रो साङ माज्‍यकुप फुक यिनोक। 54 ती ङ्‍यिमा ति टडिक कितुप ङ्‍यिमा यिनोक, तमा ङासोप ङ्‍यिमा गो जुवु पेला लेप्‍नोक। 55 गालील नेसुर येशूकी मुला वावु पुम्‍पेजातिवा ति योसेफकी तिङ तिङ्‍ला गल्‍नी ती टककी फुकला ल्‍हासुङ। तमा खोकी फुङ्‍बु ति चुक क्‍यानी ती नाङ्‍ला ज्‍योकिनोक सिनी ल्‍हासुङ। 56 ती ज्‍युक्‍ला तिवा खाङ्‍बा लोक्‍नी गल्‍नी टि जङ्‍बु खाप फे ताङ नुम टडिक क्‍यासुङ। तमा तिवा ङासोप ङ्‍यिमाला मोशाकी ठिमला वोतुप दोके ङप्‍सु ताङ्‍सुङ।