1 ती तप्‍की ङ पावल ख्‍यिराङ यहूदी मिन्‍दुप मिरिक यम्‍बातिवी थोक्‍ला चोन्‍खाङला शोर्नी वे। 2 ख्‍यिराङ यहूदी मिन्‍दुप मिरिक यम्‍बातिवाला लेन ल्‍यामु ख्‍याप्‍टाक कितुपला कोन्‍छ्‌योककी ङला चेक तेतुप कटिनकी कोर्ला वुतुङ के ख्‍यिरा थोनी वे सिरुप ति ङला नोवा वे। 3 खोकी नोवा ति छ्‍याकला नोक। ती ति खोकी ङला ज्‍यल्‍का नेसुर हाक्‍को च्‍यिसुङ। तीकी कोर्ला तोङ्‍ला साङ ङे ख्‍यिराङला चेयी टिनी वे। 4 ती ङे टिवु ताम्‍ङे ति ख्‍यिरा रासिन ख्रीष्‍टकी छ्‍याकला वोतुप ताम्‍ङेकी कोर्ला ङे चो हाक्‍कोनोक सिरुप ति ख्‍यिरा साङ हाक्‍कोकितो। 5 तोङगी गिपाकी मीतिवाला हाक्‍को माच्‍यिवु ताम्‍ङे ति खोकी लोमा छ्‌येतिवा ताङ कोन्‍छ्‌योककी लुङ्‍तेम्‍बातिवाला खोरे थु चाङ्‍मा नेसुर तसाम ठछ्‍येली छ्‌या तेन वे। 6 ती छ्‍याकला वोतुप ताम्‍ङेकी तेन्‍दोक ति लेन ल्‍यामु नेसुर राङ यहूदी मिन्‍दुप मिरिक यम्‍बातिवाला साङ यहूदीतिवाला थोपुप कोन्‍छ्‌योककी मोलाम ति मुला राङ थोप्‍नी वे। तमा दाक्‍पु तेरी येशू ख्रीष्‍ट ताङ मुला जु च्‍यिक्‍पा राङ च्‍युङ्‍नी खोकी खोरे मीतिवाला थाक्‍छ्‌येन नङ्‍गुप साङ मुला राङ थोप्‍नी वे।

7 कोन्‍छ्‌योककी ओङ छ्‌येवु लाका नेसुर दी लेन ल्‍यामु ख्‍याप्‍टाक कितुपला ङला खोकी लावा जो नङ्‍गुप यिन। तुक क्‍यावु ति खोकी कटिनकी ङ्‍येम्‍बा यिन। 8 खोला तेपा कितुप मीतिवा तेरीकी पर्ला ङ ति तेरी सिनाङ छ्‍युङा यिन्‍सिनाङ ख्रीष्‍टकी मोलाम नङ्‍गुप ग्‍यक्‍चेकी लेन ल्‍यामु ति यहूदी मिन्‍दुप मिरिक यम्‍बातिवाला ख्‍याप्‍टाक कितुपला ङला दी कटिन ति नङ्‍गुप यिन। 9 तमा तेरी च्‍यालकतिवा ज्‍ये नङ्‍गुप कोन्‍छ्‍योककी ताङ्‍बो ताङ्‍बो नेज्‍युनी छ्‍याकला वोतुप नोवाकी तेन्‍दोक ति काङ यिन सिनी तेरी मीतिवाला ख्‍याप्‍टाक कितुप कटिन ति ङला नङ्‍गुप यिन। 10 ती ति चर्च नेसुर खोकी नम्‍बा कुतुक कुतुककी रिक्‍पा ति देवाच्‍येनकी ग्‍येला कितुप ताङ ओङ्‍ज्‍येन वोतुपतिवी पर्ला तसाम छ्‌या देन्‍दुपला खोकी दुक क्‍या नङ्‍गुप यिन। 11 खोकी तुक क्‍या नङ्‍गुप ति दाक्‍पी चोवो येशू ख्रीष्‍ट नेसुर थल्‍मा नेज्‍युनी खोरे नोवाला वोतुप दोके क्‍या नङ्‍गुप यिन। 12 दाक्‍पी खोला तेपा क्‍यावु तप्‍की दाक्‍पु तेन्‍तेन ताङ ङाडेङ क्‍यानी खोकी चिप्‍ला डोप ङ्‍येकिवी। 13 तुक क्‍यानी ङ ख्‍यिराङला गोङ्‍बा शोयी, ख्‍यिरा थोक्‍ला ङे छेटाङ खुर्सुङ सिनी ख्‍यिराङ यिछ्‍येता माकी। दी ति ख्‍यिरा थोक्‍ला छासे ताङ्‍देन वोतुप ताम्‍ङे यिन।

14-15 ती तप्‍की जम्‍बुलिङ ताङ देवाच्‍येनला वोतुप तेरी मिछाङतिवी मिङ जो नङ्‍गुप पपा कोन्‍छ्‌योककी चिप्‍ला पुमुङ चुनी मोपोर कितिन। 16 खो ताङ मुला ग्‍यक्‍चेकी मोलाम वोतुप तप्‍की खोकी थु चाङ्‍माकी ङारकी ख्‍यिरा सेमगी दिङ्‍ला रम्‍बु जो नङ्‍शी। 17 तमा ख्‍यिरा क्‍यावु तेपा नेसुर ख्रीष्‍ट ख्‍यिरा सेमला ज्‍युशी। ख्‍यिरा च्‍यिककी च्‍यिकला कितुप ङ्‍यिङ्‍ज्‍ये ति दोङ्‍बी मर क्‍यङ्‍गुप दोके रम्‍बु च्‍युङ्‍शी। 18 ख्‍यिराङ तेपा कितुपतिवा तेरी खोकी मिछाङ च्‍यिक राङ च्‍युङ्‍नी ख्रीष्‍टकी ङ्‍यिङ्‍ज्‍ये ति चो थेन्‍बु वोतुप ताङ चो मोमु ताङ चो रिङ्‍बु वोतुप ति हाक्‍को थुप्‍शी। 19 तमा ख्रीष्‍टकी ङ्‍यिङ्‍ज्‍ये ति चुका रिक्‍पा सिनाङ चोछ्‌ये वे सिनी ख्‍यिरा हाक्‍को थुप्‍शी। तमा काङ साङ ङ्‍युङ्‍मु मेतुप कोन्‍छ्‌योककी तेरी छाछिङीकी ख्‍यिरा मिजीला छाछिङी छेङ्‍शी।

20 कोन्‍छ्‌योककी दाक्‍पी नाङ्‍ला लाका कितुप खोरे ओङ्‍ज्‍येन नेमा राङ दाक्‍पी लङ्‍गुप ताङ नासाम तङ्‍गुप सिनाङ ल्‍हक्‍पा दाक्‍पुला नङ्‍गिवी। 21 ती कोन्‍छ्‌योकला राङ थल्‍मा नेज्‍युनी तिङ्‍मा सेक चर्च ताङ येशू ख्रीष्‍ट नेसुर नरीकी नरी मोवा वुङ्‍शी। आमिन।