22
मिजीकी चङ्बु
1 येलुङ देवाच्येनकी लेन क्योलुप थु तीकी ङला शेल दोके सल्वु वोतुप मिजीकी चङ्बु च्यिक छ्या तेन्सुङ। ती चङ्बु ति कोन्छ्योक ताङ लुक रुककी ग्येल्ठिक नेमा थेन्नी 2 ती ग्येसाकी लामकी पर नेमा ग्युकिनोक। तमा ती चङ्बी फला छुला मिजीकी दोङ्बु नोक। तीला ल टेङ डेलु नम्बा रे रे गोर्किनोक। तमा लो च्यिकला नम्बा च्यिङ्ङी डेलु गोर्किनोक। तीकी शोमाक ति मिरिक नम्बा कुतुक कुतुककी मीतिवाला टेक ज्यितुप मेन यिनोक। 3 ती ग्येसाला नाम्साङ कोन्छ्योककी मोताप मिन्दुक। ते कोन्छ्योक ताङ खोकी लुक रुककी ग्येल्ठिक नोक। तमा खोला शब्ज्यी कितुप मीतिवी खोला सोवा बुल्गिनोक। 4 तिवी कोन्छ्योककी शाल ति थोङ्गिवी। तमा खोकी मिङ ति टली लोला टिवु नोक। 5 ते नाम्साङ नाम मोल्होनोक। तिवाला दिप्ली ताङ ङ्यिमी वो साङ मोगोनोक। च्यिलासिसिन चोवो कोन्छ्योक ति तिवी थोक्ला वोसिर यिनोक। ते तिवी नरीकी नरी ग्येला किनोक।
येशू येलुङ फेपुप कोर्ला
6 ती ज्युक्ला देवाच्येनकी लेन क्योलुप थु तीकी ङला दुक सिक्यासुङ, “वुतुङ के ख्योरो थोवु सुङतिवा तेरी खोङ्तेर्मु ताङ टेङ्बु वे। लुङ्तेम्बातिवाला खोरे थु नङ्गुप चोवो कोन्छ्योककी खोरुङला शब्ज्यी कितुपतिवाला ङमु राङ तेन्तेन च्युङ्गुप ताम्ङेकी कोर्ला हाक्को ज्यितुपला खोरे लेन क्योलुप थुतिवा ताङ्सुङ।”
7 येशूकी सुङ्नी वे, “ल्होसा, ङ ङमु राङ वुङ्यिनो। दी थेप नाङ्ला टिवु लुङ्तेम्बातिवी सुङला सिक्यावु दोके ङ्येन्दुपतिवाला मोलाम थोप्कितो।”
8 दी ताम्ङेतिवा तेरी थोवु ताङ थोङ्गुप ति ङ यूहन्ना यिन। ती तेरी थोङ्गुप ताङ ल्हा सिन्सिमा दी ताम्ङे छ्या देन्दुप देवाच्येनकी लेन क्योलुप थु तीला शावा कितुपला ङ खोकी काङ्बी चाला खवुतुङ्मा देतिन। 9 यिने तीकी ङला “ख्योरो ङला दुक क्यानी शावा कितुप मेवी। ङ साङ ख्युरुङ ताङ ख्योरो अच्युनुप लुङ्तेम्बातिवा ताङ दी थेपला वोतुप सुङला युकुपतिवा दोके कोन्छ्योककी लावा तिराङ यिन। तुक क्यानी कोन्छ्योकला तिराङ शावा की।” सिनी सिक्यासुङ। 10 येलुङ तीकी ङला दुक साङ सिक्यासुङ, “दी थेप नाङ्ला वोतुप नम्दर शेतुप सुङ ति बानी माज्योक। च्यिलासिसिन त याङ तुजे वानी साङ वे। 11 तुक क्यानी लाका दुक्टा कितुपतिवा ति लाका दुक्टा राङ किशी, क्युक्टो लङ्गुप लाका कितुप ति क्युक्टो लङ्गुप लाका राङ किशी, टेङ्बु कितुपतिवा ति टेङ्बु राङ किशी, तमा चाङ्मा वोतुपतिवा ति चाङ्मा राङ देशी।”
12 येशूकी दुक सुङ वे, “ल्होसा, ङ ङमु राङ वुङ्यिनो। ङ वासिमा सु सुकी लाका ल्यामु मेलोवा क्यावे, तिवाला तिवी क्यावु लाकाकी छ्यक्तक ति तेरिनो। 13 ङ ति अल्फा ताङ ओमेगा, थल्मा ताङ तिङ्मा, जम्बुलिङकी गोमा नेज्युनी नरीकी नरी लुवु यिनो।”
14 मिजीकी दोङ्बी डेलु थोपुप ताङ ग्येसाकी गे नाङ्ला शुकुप ओङ थोपुपला खोप्रे मज्या टुवु दोके क्यानी सेम टेङ्बु जोपतिवा मोलाम थोपुप यिनो। 15 यिने ग्येसाकी फिला ति की दोके मेलोवा ताङ जिम्डुल छ्या देन्दुपतिवा ताङ शम्डेन कितुपतिवा ताङ शेन्बातिवा ताङ ल्हलु तेन्दुपतिवा ताङ जिनोक जोप ताङ जिनोकला गा कितुपतिवा तिराङ युकिवी।
16 “ङ येशू यिन, ङे राङ दी ताम्ङेतिवा चर्चतिवाला पङ्बु तेरुपला ङरा लेन क्योलुप थुतिवा तिवी ते तङ्गुप यिन। ङ ग्येल्वु दाऊदकी गिपा नेसुर वावु मी यिन, टोपला शरुप वो ग्यकुप कर्ज्याङ साङ यिन।”
17 कोन्छ्योककी थु चाङ्मा ताङ नमाकी दुक सुङ्गिवी, “फेप!” सी दी ताम्ङे थोकिवे, तीकी साङ “फेप!” सिनी सिशी। सुला कोम्बा लङ्गिवे, ती ति वुङ्शी। सी मिजीकी छ्यु थुङ्गुप नोकिवे, तीला तुक राङ थुङ्शी।
तिङ्मी टोङ्गु
18 दी थेपकी नाङ्ला वोतुप नम्दर शेतुप सुङ थोवु मीतिवा रे रेला ङ दी ताम्ङे ति छासे क्यानी सिरिन। दोजो सी दी थेपकी नाङ्ला टिवु ताम्ङेला ल्हक्पा ज्याक्सिन तीला दी कोन्छ्योककी थेप नाङ्ला टिवु पर्च्यातिवा ख्येल ज्यिकिवी। 19 येलुङ सी दी नम्दर शेतुप सुङला चेयी ङ्युङ्मु ज्याक्सिन तीला दी थेपकी नाङ्ला टिवु कोन्छ्योककी मिजीकी दोङ्बी डेलु ति ठोनी चाङ्मा वोतुप ग्येसा नेसुर तीला ङ्येतुप ति ठोकिवी।
20 दी ताम्ङेकी पङ्बु तेरुप तीकी दुक सुङ्गिवी, “वुतुङ के ङ ङमु राङ वुङ्यिनो।”
आमिन चोवो येशू फेप!
21 चोवो येशूकी कटिन ति तेपा कितुपतिवा तेरीला थोप्शिता। आमिन।