1 ङासोप ङ्‍यिमा सिन्‍सिमा जा ङ्‍यिमी टोपला टेताङ मरियम मग्‍दलिनी ताङ यम्‍बा मरियम ति येशूकी फुङ्‍बु ज्‍यकुप टककी फुकला ल्‍हापला गाल्‍नोक। 2 ते शार्क्येक सयी ग्‍येर्पु ग्‍यप्‍सुङ, तमा चोवो कोन्‍छ्‍योककी लेन क्‍योलुप थु यी देवाच्‍येन नेमा वानी टककी फुककी खला च्‍येतुप दो ग्‍येर्पु ति दोनी ती दे खला देसुङ। 3 तीकी ङुतुङ ति चिलाम ग्‍यपुप दोके ठदिङी ताङ तीकी मज्‍या ति वोमा दोके छासे कर्मु नोक। 4 तीला थोङ्‍सिमा ते र्‍हेन्‍दुप मक्‍मीतिवा ज्‍यिवा लानी र्‍हुकिन सिरा शेप दोके गाल्‍नोक।

5 यिने ती देवाच्‍येनकी लेन क्‍योलुप थु तीकी ती पुम्‍पेजातिवाला “ख्‍यिराङ ज्‍यिवा माकी। ख्‍यिराङ ग्‍यङ्‍शिङला कल्‍नी काँडी दाप्‍नी सेतुप येशूला छलुप ति ङला छ्‍या वे। 6 खो याङ दे मे, खोकी सुङ्‍गुप दोके खो टुङ्‍गुप ने ङोसु लासुङ। दे वानी खोकी फुङ्‍बु ज्‍यकुप दासाला ल्हो। 7 तमा ख्‍यिराङ टिम्‍बु गल्‍नी खोकी लोमातिवाला ‘खो याङ शेप ने ङोसु लानी ख्‍यिराङ सिनाङ गोमाला के गालीलला फेपिन वे। ख्‍यिरा खोला ते राङ ठेकिवी।’ सिनी लोप। दी ति ङे ख्‍यिराङला सिक्‍यावु ताम्‍ङे यिन।” सिनी सिक्‍यासुङ।

8 ती थोसिमा पुम्‍पेजातिवा सेमला ज्‍यिवा ताङ गा कियी सिरा तेसुर शार्क्येक थेन्‍नी ती लेन ति खोकी लोमातिवाला तेरुपला टिम्‍बु टिम्‍बु छ्‍योङ्‍बाल ग्‍यप्‍नी गाल्‍सुङ। 9 तिवा डोयी कितुप पेला येशू शार्क्येक लामला तिवाला ठेनी, “ख्‍यिराङला लोदिमु वुङ्‍शी!” सिनी सुङ्‍सुङ। तमा तिवा खोकी चाला गल्‍नी खोकी शापला जिमिन सिरा खोला शावा क्‍यासुङ। 10 तमा येशूकी तिवाला सुङ्‍सुङ, “ज्‍यिवा माकी। ख्‍यिराङ गल्‍नी ङे लोमातिवाला गालीलला ग्‍युक सिनी लोप। ते तिवी ङला ठेकिवी।”

11 तमा ती पुम्‍पेजातिवा लामला डोयी कितुप पेला येशूला ज्‍यकुप टककी फुकला र्‍हेन्‍दुप मक्‍मीतिवा ललाइ ति ग्‍येसाला गल्‍नी कोङ्‍यार छ्‍येतिवाला ते च्‍युङ्‍गुप तेरी ताम्‍ङेतिवा सिक्‍यासुङ। 12 तमा कोङ्‍यार छ्‍येतिवा यहूदी गोमा कितुप छ्‍येतिवा ताङ मुला जोम्‍नी केवुल क्‍यासिमा 13 र्‍हेन्‍दुप मक्‍मीतिवाला टङ्‍गा बङी तेरिन सिरा दुक सिक्‍यासुङ, “ख्‍यिरा ‘नुपला ङ्‍यिराङ ङ्‍यी गलुप पेला येशूकी लोमातिवा वानी तीकी रो ति कुनी खुन गाल्‍नोक।’ सिनी सिसा। 14 दोजो रोमी ठिम कितुप मी छ्‍येकी दी ताम्‍ङे थोसिनाङ ङ्‍यिराङ तीकी मुला ताम्‍ङे ल्‍यामु क्‍यानी ख्‍यिराङला काङ साङ दुक्‍पा तेर मिज्‍यितो।” सिनी सिक्‍यासुङ। 15 तमा र्‍हेन्‍दुप मक्‍मीतिवी टङ्‍गा लानी तिवी लापुप दोके तेरी क्‍यासुङ। ती ताम्‍ङे ति तसाम सेक साङ यहूदीतिवी पर्ला टम्‍नी नोक।

16 तमा येशूकी लोमा मिरा च्‍युच्‍यिकतिवा गालीलला गल्‍नी खोकी तिवाला ग्‍युक सिनी सुङ्‍गुप पम्‍दोकला गाल। 17 ते तिवी येशूला थोङ्‍नी खोला शावा क्‍यासुङ। यिने ललाइकी खो येशू यिन्‍दे मिन्‍दे सिनी नो क्‍यासुङ। 18 तमा येशू तिवी चाला राङ फेप्‍नी तिवाला दुक सुङ्‍सुङ, “जम्‍बुलिङ ताङ देवाच्‍येनकी तेरी ओङ्‍ज्‍येन ति कोन्‍छ्‍योककी ङला नङ वे। 19 ती तप्‍की ख्‍यिराङ गल्‍नी लुङ्‍बा तेरीकी मिरिकतिवाला ङे लोमा जो, तमा पपा कोन्‍छ्‍योक ताङ पुज्‍युङ ताङ खोकी थु चाङ्‍माकी मिङला तिवाला बप्‍तिस्‍मा बिन। 20 तमा ख्‍यिराङला ङे क बिन्‍दुप तेरी ताम्‍ङेतिवा तिवाला लाप्‍नी ङ्‍येन च्‍यी। वुतुङ के ङ दी जम्‍बुलिङ ना मागाला सेक ख्‍यिरा मुला राङ नरी देतिनो।”