1 तेसुर येशू फेपिन कितुप पेला क्‍येप पे नेज्‍युन मिक मोथोङ्‍गुप मी मिरा च्‍यिकला थोङ्‍सुङ। 2 ती थोङ्‍सिमा खोकी लोमातिवी खोला “गेकेन, दी मी ति क्‍येप पे नेज्‍युन मिक मोथोङ्‍गुप ति सी दिक्‍पा क्‍यावु तप्‍की यिन? तीकी दिक्‍पा क्‍यावु तप्‍की यिनाङ की, तीकी पपाआमी दिक्‍पा क्‍यावु तप्‍की यिनाङ?” सिनी टिसुङ। 3 तमा येशूकी तिवाला सुङ्‍सुङ, “दीकी दिक्‍पा क्‍यावु साङ मिन, दीकी पपाआमी दिक्‍पा क्‍यावु साङ मिन। यिने दीकी मिजी नेमा कोन्‍छ्‍योककी हलेवु लाका ति मीतिवी थोङ्‍शी सिनी तुकै च्‍युङ्‍गुप यिन। 4 ङ्‍यिमी गुङला राङ ङला तोङ्‍गुप तीकी लाकातिवा दाक्‍पी कि गोकिवी। नुपला याङ सी साङ लाका कि मुथुपी। 5 जम्‍बुलिङला वोता सेक ङ ति जम्‍बुलिङकी वोसिर यिन।” 6 तुक सुङ्‍सिमा खोकी सला च्‍येमाक क्‍युर्नी थला ताङ मुला नुप्‍सिमा ती नुपुप ति ती मिक मोथोङ्‍गुप तीकी मिकला कुसुङ। 7 तमा खोकी तीला “ख्‍युरुङ सिलोआम चोला गल्‍नी ख्‍योरो मिक ति शोल।” सिनी सुङ्‍सुङ। (दी सिलोआमकी तेन्‍दोक ति तङ्‍गुप यिन।) खोकी तुक सुङ्‍सिमा ती मी ति गल्‍नी मिक शाल्‍सुङ, तमा तीकी मिक ति थोङ्‍गुप गल्‍नी खाङ्‍बा लोक्‍नी गाल्‍सुङ। 8 तमा तीकी युल्‍वातिवा ताङ गोमाला तीला लाङ सयी वोतुप थोङ्‍गुपतिवी “दी याङ गोमाला देनी लाङ्‍साप ती मी ति मिन?” सिनी टिसुङ। 9 यम्‍बातिवी “यिन, दी मी ति ती राङ यिन।” सिनी सिक्‍यासुङ। तमा ललाइकी “मिन, दी ति ती दोके राङ थोङ्‍गिनोक।” सिनी सिक्‍यासुङ। यिने ती मिक थोङ थुपुप गलुप मी तीकी तिवाला “यिन, ती मी ति ङ राङ यिन।” सिनी सिक्‍यासुङ। 10 तमा मीतिवी “तुकै यिन्‍सिन ख्‍युरुङ चुक क्‍यानी मिक थोङ्‍गुप गाल्‍सुङ?” सिनी तीला टिसुङ। 11 तमा तीकी “येशू सिरुप मी यीकी थला नुप्‍नी ङे मिकला कुन बिन्‍सुङ। तमा ङला सिलोआम चोला गल्‍नी शोल सिनी सुङ्‍सुङ। तमा ङ गल्‍नी ङे मिक शलिन, शल्‍लुङ्‍मे ङे मिक थोङ थुपुप गाल्‍सुङ।” सिनी सिक्‍यासुङ। 12 तुक सिक्‍यासिमा मीतिवी तीला “ती मी ति कनी वे?” सिनी टिसुङ। तमा तीकी “ङला याङ छ्‍या मे।” सिनी सिक्‍यासुङ।

13 तमा मीतिवी ती गोमाला मिक मोथोङ्‍गुप तीला फरिसीतिवी चाला टि गाल्‍सुङ। 14 येशूकी थला नुप्‍नी ती मी तीला मिक थोङ च्‍यितुप ङ्‍यिमा ति ङासोप ङि्‍यमा यिनोक। 15 फरिसीतिवी तीला येलुङ चुक क्‍यानी तीकी मिक थोङ थुपुप गाल्‍सुङ सिनी टिसुङ। तमा तीकी “खोकी थला नुप्‍नी ङे मिकला कुसिमा ङे मिक शलिन, तमा ङे मिक थोङ थुपुप गाल्‍सुङ।” सिनी सिक्‍यासुङ। 16 फरिसीतिवी पर्ला ललाइ ललाइकी “ती मी ति याङ कोन्‍छ्‍योक नेमा वावु मिन, च्‍यिलासिसिन तीकी ङासोप ङ्‍यिमा मेतेन्‍नोक।” सिनी सिक्‍यासुङ। तमा यम्‍बातिवी “मी दिक्‍छेनकी चुक क्‍यानी दुका हलेवु ततिवा छ्‍या देन थुप्‍किवी रो?” सिनी सिक्‍यासुङ। तुक क्‍यानी तिवी पर्ला ताम्‍ङे माडिक। 17 येलुङ फरिसीतिवी गोमाला मिक मोथोङ्‍गुप मी तीला “ती मी तीकी ख्‍योरो मिक थोङ थुपुप जोसुङ सिनी ख्‍योरे सिक्‍यासुङ। त ख्‍युरुङ तीकी कोर्ला काङ नासाम तोङ्‍गिवी?” सिनी टिसुङ। तमा तीकी “खो याङ कोन्‍छ्‍योककी लुङ्‍तेम्‍बा यिन।” सिनी टिलेन बिन्‍सुङ। 18 यिने यहूदी गोमा कितुप छ्‍येतिवी ती मी ति गोमाला मिक मोथोङ्‍गुप नोक, तन्‍दा ति मिक थोङ्‍गुप गाल्‍नोक सिरुप ति लो मातेन। तुक क्‍यानी तिवी ती मी तीकी पपाआमाला कताङ्‍सुङ। 19 कताङ्‍सिमा तिवी तिवाला “दी ति क्‍येप पे नेज्‍युन मिक मोथोङ्‍गुप ख्‍यिरा पुज्‍युङ यिन? तन्‍दा चुक क्‍यानी दीकी मिक थोङ थुपुप गाल्‍सुङ?” सिनी टिसुङ। 20 तमा तीकी पपाआमा तीकी “दी ङ्‍यिरा पुज्‍युङ यिन, दी ति क्‍येप पे नेज्‍यु मिक मोथोङ्‍गुप वे सिनी ङ्‍यिराङला छ्‍या वे, 21 यिने चुक क्‍यानी दीकी मिक थोङ थुपुप गाल्‍सुङ सिरुप ति ङ्‍यिराङला छ्‍या मे। तमा सी दीकी मिक थोङ थुपुप जोसुङ, ती साङ ङ्‍यिराङला छ्‍या मे। दीला राङ टी। दी ति ज्‍येन्‍दा यिन, दीकी खोरो राङ लप्‍किवी।” सिनी सिक्‍यासुङ। 22 तीकी पपाआमा ति यहूदी गोमा कितुप छ्‍येतिवाला ज्‍यिवा लावु तप्‍की तुक सिक्‍यानोक, च्‍यिलासिसिन येशूला ख्रीष्‍ट यिन सिनी सिरुपतिवा सुला साङ यहूदी छ्‍योखाङ नेमा तेन तोङ्‍गुप सिनी तिवी तेन्‍तेन क्‍यानोक। 23 तुक क्‍यानी तीकी पपाआमी खोप्‍रे पुज्‍युङ ति ज्‍येन्‍दा यिन, तीला राङ टि सिनी सिक्‍यावु यिन।

24 येलुङ तिवी गोमाला मिक मोथोङ्‍गुप मी तीला कताङ्‍नी, “कोन्‍छ्‍योकला मोवा की, ती मी ति दिक्‍छेन यिन सिरुप ति ङि्‍यराङला छ्‍या वे।” सिनी सिक्‍यासुङ। 25 तमा तीकी तिवाला “खो दिक्‍छेन यिन्‍दे मिन्‍दे सिनी ङला छ्‍या मे, यिने ङला छ्‍या वोतुप ताम्‍ङे च्‍यिक ति तोङ्‍ला ङे मिक मोथोङ्‍गुप वे, तन्‍दा ति मिक थोङ थुपुप गाल्‍सुङ।” सिनी सिक्‍यासुङ। 26 येलुङ तिवी तीला “तीकी ख्‍युरुङला काङ क्‍यासुङ? चुक क्‍यानी तीकी ख्‍योरो मिक थोङ थुपुप जोसुङ?” सिनी टिसुङ। 27 तमा तीकी तिवाला “ख्‍यिराङला ङे हानाके सिक्‍यायी, यिने ख्‍यिरा ङे ताम्‍ङे लो मातेन। ख्‍यिराङ च्‍यिला येलुङ ती ताम्‍ङे ङ्‍येन्‍दुप नो किवी? काङ ख्‍यिराङ साङ खोकी लोमातिवा च्‍युङ्‍गुप नो किवी?” सिनी टिसुङ। 28 तमा तिवी तीला मारे तोङ्‍यिन सिरा “ख्‍युरुङ ति तीकी लोमा यिन, यिने ङ्‍यिराङ याङ मोशाकी लोमा यिन। 29 कोन्‍छ्‍योककी मोशाला ताम्‍ङे सुङ्‍गुप ति ङ्‍यिराङला छ्‍या वे, यिने दी मी ति कनीकी मी यिन सिरुप ति ङ्‍यिराङला छ्‍या राङ मे।” सिनी सिक्‍यासुङ। 30 तमा तिवाला तीकी सिक्‍यासुङ, “कङ ग्‍या, मिच्‍यिक्‍पा ताम्‍ङे यी! खोकी ङे मिक थोङ थुपुप जोसुङ, यिन्‍सिनाङ खो कनी नेसुर फेवु यिन सिनी ख्‍यिराङला छ्‍या मिन्‍दुक। 31 कोन्‍छ्‍योककी दिक्‍छेनतिवी ताम्‍ङे ति मेसेन्‍दी, यिने खोला ज्‍यिवा क्‍यानी सोवा देकुप ताङ खोकी नोवाला युकुपतिवी ताम्‍ङे सेन्‍गिवी सिरुप ति ङ्‍यिराङला छ्‍या वे। 32 क्‍येप पे नेज्‍युन मिक मोथोङ्‍गुप मीला मिक थोङ थुपुप जोवु ताम्‍ङे याङ जम्‍बुलिङ ज्‍येङ्‍गुप पे नेज्‍यु तन्‍दा सेक सी साङ नाम्‍साङ माथो वे। 33 दोजो ती मी ति कोन्‍छ्‍योक नेमा वावु मिन्‍सिन तुका लाका ति कि राङ मुथुपी।” 34 तमा तिवी तीला “ख्‍युरुङ याङ क्‍येप पेला नेज्‍युनी दिक्‍पाला ख्‍येलुप वुतुङ के दिक्‍छेन यिन, यिन्‍सिनाङ ख्‍योरो के ङ्‍यिराङला लोपुप छोल्‍गिवी?” सिनी तीला यहूदी छ्‍योखाङ नेमा तेन्‍नी ताङ्‍सुङ।

35 ती मी तीला यहूदी छ्‍योखाङ नेमा तेन ताङ्‍नोक सिरुप ताम्‍ङे येशूकी थोसिमा खोकी तीला ठेनी, “काङ ख्‍युरुङ मी पुज्‍युङला तेपा किवी?” सिनी टिसुङ। 36 तमा तीकी “ओ चोवो! खो ति सु यिन? ङला सुङ्‍नी, तमा ङ खोला तेपा कितिन।” सिनी सिक्‍यासुङ। 37 तीकी तुक सिक्‍यासिमा येशूकी तीला “ख्‍योरो तीला गोमाला के थोङ सिन्‍सुङ, तमा तन्‍दा ख्‍योरो मुला ताम्‍ङे कियी वोतुप ति ती राङ यिन।” सिनी सुङ्‍सुङ। 38 तमा तीकी येशूला “ओ चोवो, ङ चोवोला तेपा कितिन।” सिनी खोला शावा क्‍यासुङ। 39 येशूकी तीला “ङ दी जम्‍बुलिङकी मिक मोथोङ्‍गुपतिवाला मिक थोङ्‍गुप जोप ताङ मिक थोङ्‍गुपतिवाला मिक मोथोङ्‍गुप जोपला वावु यिन।” सिनी सुङ्‍सुङ। 40 ती ताम्‍ङे थोसिमा येशूकी चिप्‍ला वोतुप फरिसीतिवा ललाइ ललाइकी येशूला “काङ ङ्‍यिराङ साङ मिक मोथोङ्‍गुप मी यिन सिनी ख्‍योरो सिक्यावु यिन?” सिनी टिसुङ। 41 तमा येशूकी तिवाला सुङ्‍सुङ, “दोजो ख्‍यिराङ मिक मोथोङ्‍गुप यिन्‍सिन ख्‍यिराङला दिक्‍पाकी क्‍येन मोफोकुप्‍जा। यिने ख्‍यिराङ मिक थोङ्‍गिवी सिनी सिक्‍यासुङ, तुक क्‍यानी ख्‍यिरा क्‍यावु दिक्‍पाकी क्‍येन ति तुक राङ लुनी वे।”