1 ख्रीष्‍टकी दाक्‍पुला रङ्‍ज्‍येन नङ्‍गुपला दिक्‍पा ने थर च्‍यिनी वे। तुक क्‍यानी ख्‍यिराङ तेपा रम्‍बु जोनी गोमी दोके योक्‍पुकी मिजी माक्‍योङ।

2 ङ्‍येना, ङ पावल ख्‍यिराङला सिरिन। ख्‍यिरा यहूदी च्‍येतुप लुक्‍सु तेन्‍सुङ सिसिन ख्रीष्‍ट नेमा ख्‍यिराङला काङ साङ ख्‍येप्‍साङ मेङ्‍गिवी। 3 यहूदी च्‍येतुप लुक्‍सु तेन्‍दुपतिवा तेरीला येलुङ ङ सिरिन। सी च्‍येतुप लुक्‍सु तेन्‍गिवे, तीकी तेरी मोशाकी ठिम ति तेन्‍दुपला चेक लाङ गोकिवी। 4 ख्‍यिराङ खुरुङला टेङ्‍बु जोपला मोशाकी ठिमला तेन्‍नी देसुङ सिसिन ख्रीष्‍टकी मुला तम्‍जी मे, तमा खोकी कटिन साङ ङ्‍ये मुथुपी। 5 च्‍यिलासिसिन दाक्‍पु ति कोन्‍छ्‍योककी थु चाङ्‍मा नेमा खोला तेपा क्‍यानी टेङ्‍बु च्‍युङ्‍गुप रेवाला गुनी देकिवी। 6 दाक्‍पु ख्रीष्‍टला तेपा क्‍यासिन च्‍येतुप लुक्‍सु तेन्‍सिनाङ मातेन्‍सिनाङ काङ साङ ख्‍येपर मे, यिने ताम्‍ङे च्‍यिक ति काङ यिन सिसिन ङ्‍यिङ्‍ज्‍ये नेसुर दाक्‍पी मिजीला तेपा छ्‍या देन गोकिवी।

7 ख्‍यिरा तेपा ति रम्‍बु डोयी नोक, यिने सी ख्‍यिराङला दी लाका टेङ्‍बु कितुप नेसुर क्‍येक्‍सुङ? 8 दी ग्‍येकुप लाका ति ख्‍यिराङला थर ज्‍यितुप कोन्‍छ्‍योककी क्‍यावु मिन। 9 खमीर चेयीकी टम्‍दोक तेरी बो च्‍यितुप दोके यिन। 10 ख्‍यिराङ तेरी यम्‍बा थाकाला मोडोवी सिनी ङ चोवो कोन्‍छ्‍योकला तेन्‍तेन वे। यिने सी खोकी मुला वोतुप मीला लुनी टिन डिवे, तीला कोन्‍छ्‍योककी पर्च्या फोकिवी। 11 ङे अच्‍युनुपतिवा, ङ च्‍येतुप लुक्‍सुकी कोर्ला तिराङ ख्‍याप्‍टाक किवी सिसिन, च्‍यिला तन्‍दा सेक साङ यहूदीतिवी ङला छेटाङ दुङल तेर्किवी? तुकै यिन्‍सिन ग्‍यङ्‍शिङला कलुप येशूकी दिक्‍पा ने थरुप लेन ल्‍यामु ख्‍याप्‍टाक कितुपला काङ साङ छेटाङ मे। 12 सी ख्‍यिराङला टुक्‍शिङ ग्‍यप्‍नी च्‍येतुप लुक्‍सु तेन ज्‍यितुप छोल्‍गिवे, तीकी खोरो जुकी येन्‍लक राङ च्‍येसिन वुङ्‍गुप्‍जा।

13 ङे अच्‍युनुपतिवा, कोन्‍छ्‍योककी ख्‍यिराङला कताङ नङ्‍गुप तेन्‍दोक ति ख्‍यिराङला रङ्‍ज्‍येन नङ्‍गुपला यिन। तुक क्‍यानी ख्‍यिराङ दिक्‍पा कितुप क्‍युर्नी च्‍यिककी च्‍यिकला ङ्‍यिङ्‍ज्‍ये क्‍यानी शब्‍ज्‍यी की। 14 तेरी ठिमतिवा ति क च्‍यिककी नाङ्‍ला वे, ती ति रङगी युल्‍वातिवाला खुरुङला दोके ङ्‍यिङ्‍ज्‍ये कितुप यिन।* ५:१४ लेवी १९:१८ 15 यिने ख्‍यिराङ नाठुङकी सेम्‍ज्‍येनतिवा दोके च्‍यिककी च्‍यिकला फेतुप ताङ सेवी सिसिन ख्‍यिरा पर्ला राङ ना डोप लाका यिनो। तीकी कोर्ला ख्‍यिराङ च्‍याङ्‍से देता।

16 ङ ख्‍यिराङला टोङ्‍गु तेरिन, ती ति काङ यिन सिसिन ख्‍यिराङ कोन्‍छ्‍योककी थु चाङ्‍माकी ओङला युसुङ सिसिन जुकी दुक्‍टा वोतुप दिक्‍पी ओङला दे मोगोवी। 17 च्‍यिलासिसिन दाक्‍पी जुकी दुक्‍टा वोतुप नासाम ति कोन्‍छ्‍योककी थु चाङ्‍माकी मुला मिडिकिवी। तुक राङ क्‍यानी थु चाङ्‍माकी नासाम साङ जुकी दुक्‍टा वोतुप नासाम ताङ मुला मिडिकिवी। तिवा ङ्‍यिवु ति ड दोके यिन। तुक क्‍यानी ख्‍यिरा काङ लाका कितुप नो क्‍या वे, ती ति कि मुथुपी। 18 ख्‍यिराङ थु चाङ्‍माकी ओङला युसुङ सिसिन ठिमकी ओङला मे। 19 दिक्‍पी च्‍योलामकी लाकातिवा शम्‍डेन कितुप ताङ मेटेङ्‍बु कितुप ताङ छ्‍येवु छ्‍येमु कितुप ताङ 20 ल्‍हलुला तेन्‍दुप ताङ ङ ग्‍यकुप ताङ डला जोप ताङ थमु ग्‍यकुप ताङ ठतोक कितुप ताङ ङ्‍यिर्मु कितुप ताङ खुरुङला तिराङ च्‍युङ्‍शी नो कितुप ताङ ख्‍ये पेनी दाक दाक्‍पी छोक्‍पा जोप ताङ 21 ठतोक ङर्केल कितुप ताङ छ्‍याङ्‍गेले ताङ खावाला मुदुवु यिन। तीकी कोर्ला ङे ख्‍यिराङला गोमाला सिक्‍यावे, येलुङ साङ सिरिन। सी दुका लाका किवे, तिवा ति कोन्‍छ्‍योककी ग्‍येल्‍खापला शुक मोछ्‍योवी।

22 यिने चो पेला दाक्‍पु कोन्‍छ्‍योककी थु चाङ्‍माकी ओङला देकिवे, ती पेला दाक्‍पी मिजीला डेलु गरुप दोके ङ्‍यिङ्‍ज्‍ये ताङ गा ताङ लोदिमु ताङ हम क्‍या देतुप ताङ च्‍यम्‍बा कितुप ताङ मी यम्‍बी थोक्‍ला लाका ल्‍यामु कितुप ताङ लोतेर्मु कितुप ताङ 23 कुसु ज्‍यम्‍बु ताङ डेकला देतुप तेरी लाकातिवा वुङ्‍गिवी। तीकी तेन्‍दोकला लङ्‍गुप ति काङ साङ ठिम मे। 24 सु येशू ख्रीष्‍टकी सुङला युकिवे, तीकी दिक्‍पाकी किताङ नालु ताङ नोवातिवा खोरो जु ताङ मुला राङ ग्‍यङ्‍शिङला कल वे। 25 दाक्‍पु कोन्‍छ्‍योककी थु चाङ्‍माकी ओङला मिजी क्‍योङ्‍गिवी सिसिन ती थु चाङ्‍माकी ओङला राङ युक गोकिवी। 26 दाक्‍पु ङ राङ यिन सिरुप मेवी, च्‍यिककी च्‍यिकला ङ्‍यिर्मु लोङ्‍गुप मेवी, तमा च्‍यिककी च्‍यिकला ठतोक साङ कितुप मेवी।