1 लो च्‍युप्‍ज्‍यी तिङ्‍ला बारनाबास ताङ तीतसला टिनी ङ येलुङ यरूशलेम गलिन। 2 कोन्‍छ्‍योककी ते ग्‍युक सिनी छ्‍या तेन्‍दुप तप्‍की ङ ते गल्‍नी यहूदी मिन्‍दुप मिरिक यम्‍बाला ख्‍याप्‍टाक क्‍यावु लेन ल्‍यामुकी कोर्ला ते वोतुप चर्चकी गोमा कितुप मी छ्‍येतिवी मुला दासा कुतुकला देनी ताम्‍ङे क्‍यायिन। तुक क्‍यावु ति ङे क्‍यावु गोमी लाका ताङ तिङ्‍ला कितुप लाका तेरी तेर्मे मोडोशी सिनी नो क्‍यावु तप्‍की यिन। 3 यिने ङे मुला वोतुप तीतस ति ग्रीककी मी यिन्‍सिनाङ तीला सी साङ यहूदीतिवी च्‍येतुप लुक्‍सु कि राङ गोकिवी सिनी माक्‍या। 4 च्‍यिलासिसिन मेटेङ्‍बु शेतुप अच्‍युनुपतिवी दाक्‍पुला च्‍येतुप लुक्‍सु कि गोकिवी सिनी सिक्‍यासुङ। तुक क्‍यावु तेन्‍दोक ति तिवी दाक्‍पु ख्रीष्‍टला तेपा क्‍यानी रङ्‍ज्‍येन थोपुपतिवाला खोरो योक्‍पु जोपला यिन। 5 तुक क्‍यानी ख्‍यिराङ नरी ख्रीष्‍टकी टेङ्‍बु वोतुप लेन ल्‍यामुला देशी सिनी तिवी सिक्‍यावु ताम्‍ङेला उकुर च्‍यिक साङ ङ्‍यिरा माङ्‍येन।

6 मी छ्‍ये यिन सिरुप मीतिवी ङे ताम्‍ङे काङ साङ मापो। तिवा छ्‍ये वोसिनाङ ङे थोक्‍ला काङ साङ मिन। च्‍यिलासिसिन कोन्‍छ्‍योककी मीला ल्‍हानी मिन, मी सेम ल्‍हानी ठिम क्‍या नङ्‍गिवी। 7 यिने पत्रुसला यहूदीतिवी पर्ला लेन ल्‍यामु ख्‍याप्‍टाक कितुपला पेतुप दोके ङला ति कोन्‍छ्‍योककी यहूदी मिन्‍दुप मिरिक यम्‍बाकी मीतिवी पर्ला लेन ल्‍यामु ख्‍याप्‍टाक कितुपला तङ्‍गुप ति तिवी हाक्‍कोसुङ। 8 च्‍यिलासिसिन कोन्‍छ्‍योककी पत्रुसला यहूदीतिवी पर्ला लेन ल्‍यामु ख्‍याप्‍टाक कितुपला लोमा छ्‍ये जो नङ्‍गुप दोके ङला ति यहूदी मिन्‍दुप मिरिक यम्‍बाकी मीतिवी पर्ला लेन ल्‍यामु ख्‍याप्‍टाक कितुपला लोमा छ्‍ये जोनी ताङ्‍सुङ। 9 तुक क्‍यानी ते चर्चकी खक्‍छ्‍येवु याकूब ताङ पत्रुस ताङ यूहन्‍नातिवी कोन्‍छ्‍योककी ङला कटिन नङ्‍गुप थोङ्‍नी ङ ताङ बारनाबासला मुला थिन्‍नी लाका कितुप सिनी सिक्‍यासुङ। तमा ङ्‍यिराङ ति यहूदी मिन्‍दुप मिरिक यम्‍बाकी मीतिवी पर्ला, तिवा ति च्‍येतुप लुक्‍सु क्‍यावु यहूदीतिवी पर्ला लाका कितुपला ताम्‍ङे डिक्‍सुङ। 10 ते तिवी ङ्‍यिराङला पेराङ्‍बुतिवाला दाल्‍जा किटे की सिनी टोङ्‍गु बिन्‍सुङ, ती लाका ति ङला साङ कितुप गा वोतुप्‍जा।

11 यिने पत्रुस* २:११ पत्रुसला केफास साङ सिवी। एन्‍टिओखियाला वावु पेला ङे तीला मी तेरीकी पर्ला ङोप्‍सुर ग्‍यपिन, च्‍यिलासिसिन तीकी क्‍येन फोकुप लाका क्‍यानोक। 12 ते याकूबकी तङ्‍गुप यहूदी दाल्‍जातिवा वुङ्‍गुप गोमाला पत्रुस ति यहूदी मिन्‍दुप मिरिक यम्‍बाकी मीतिवी मुला देनी साप थुङ्‍गुप क्‍यानोक। यिने तिवा ते वासिमा तीकी तिवी मुला साप थुङ्‍गुप क्‍युर ज्‍याक्‍नी गाल्‍सुङ। च्‍यिलासिसिन ती ति यहूदी च्‍येतुप लुक्‍सु तेन्‍दुपतिवी मुला ज्‍यिवा किनोक। 13 तमा ते यम्‍बा यहूदीतिवी साङ पत्रुसकी दोके खोनक्‍पु लाकाला तिङ्‍यासुङ। तुक राङ क्‍यानी बारनाबासकी साङ तिवी दोके लुमु सेसुङ। 14 तिवा कोन्‍छ्‍योककी सुङ टेङ्‍बुला मायुकुप थोङ्‍सिमा ङे पत्रुसला मी तेरीकी पर्ला “ख्‍युरुङ यहूदी गिपाकी मी यिन्‍सिनाङ यहूदी मिन्‍दुप मिरिक यम्‍बाकी मी दोके च्‍येर्पा किसिन चुक क्‍यानी मिरिक यम्‍बाला यहूदी दोके च्‍येर्पा कि गोकिवी सिनी सि थुप्‍किवी?” सिनी सिक्‍यायी।

15 दाक्‍पु ति यहूदी गिपाला राङ क्‍येवु यिन, यहूदी मिन्‍दुप मिरिक यम्‍बा दोके दिक्‍छेन मिन। 16 दाक्‍पु ति मोशाकी ठिमला वोतुप लाकातिवा क्‍यानी टेङ्‍बु च्‍युङ्‍गुप मिन, येशू ख्रीष्‍टला तेपा क्‍यासिमा टेङ्‍बु च्‍युङ्‍गुप यिन सिनी हाक्‍कोकिवी। तुक क्‍यानी मोशाकी ठिमला वोतुप लाकातिवा क्‍यानी टेङ्‍बु च्‍युङ्‍गुप मिन, यिने ख्रीष्‍टला तेपा क्‍यासिमा टेङ्‍बु च्‍युङ्‍गुप तप्‍की दाक्‍पु यहूदी साङ येशू ख्रीष्‍टला तेपा किवी। च्‍यिलासिसिन मोशाकी ठिमला वोतुप लाकातिवा क्‍यानी सु साङ टेङ्‍बु च्‍युङ मुथुपी। 17 दाक्‍पु ख्रीष्‍टला तेपा क्‍यानी टेङ्‍बु च्‍युङ्‍गुप छोलुप पेला मोशाकी ठिम मातेन्‍सुङ सिसिन दिक्‍पा कितुप मीतिवा यिन। काङ ती दिक्‍पा ति येशू ख्रीष्‍टकी जो नङ्‍गुप यिन रो? मिन! 18 यिने ङे क्‍युर्नी ज्‍यकुप मोशाकी ठिमकी लाकातिवा येलुङ क्‍यासुङ सिसिन ङ ति क्‍येन फोकुप मी दोके च्‍युङ्‍गिवी। 19 कोन्‍छ्‍योककी थोक्‍ला ङ सेन्‍बु लु थुप्‍शी सिनी ठिमकी थोक्‍ला ङ शिनी वे। 20 ङ ख्रीष्‍ट ताङ मुला ग्‍यङ्‍शिङ लोला कलुप यिन। तुक क्‍यानी तन्‍दा ङे क्‍योङ्‍गुप मिजी ति ङे ति मिन, ख्रीष्‍टकी ति यिन। दी मिजी ति ङला ङ्‍यिङ्‍ज्‍ये क्‍यानी खोरे मिजी साङ ङे थोक्‍ला नङ्‍गुप कोन्‍छ्‍योककी सेवुला तेपा क्‍यानी क्‍योङ्‍गिवी। 21 त ङ कोन्‍छ्‍योककी नङ्‍गुप कटिनला तेर्मे जो मुथुपी। च्‍यिलासिसिन मोशाकी ठिमकी लाकाकी दाक्‍पुला टेङ्‍बु जो थुप्‍सिन ख्रीष्‍ट टुङ्‍गुप ति तेर्मे डिवी।