1 तुक क्‍यानी ख्‍यिराङ ति कोन्‍छ्‌योककी ङ्‍यिङ्‍ज्‍येवु आङातिवा यिन्‍दुप तप्‍की खोकी लुमु से गोकिवी। 2 येशू ख्रीष्‍टकी दाक्‍पुला ङ्‍यिङ्‍ज्‍ये क्‍या नङ्‍नी कोन्‍छ्‌योकला गा लङ्‍गुप बुल्‍वा ताङ जिन्‍बा च्‍युङ्‍नी दाक्‍पी दिक्‍पी थोक्‍ला टुङ्‍सुङ। तुक राङ क्‍यानी ख्‍यिराङ साङ च्‍यिककी च्‍यिकला ङ्‍यिङ्‍ज्‍ये की।

3 यिने ख्‍यिरा पर्ला शम्‍डेन कितुप ताङ तेरी परकी लाका मेटेङ्‍बु कितुप ताङ देर्पा कितुप लाकातिवा क्‍युर। च्‍यिलासिसिन तुका लाकातिवा कोन्‍छ्‌योकला तेपा कितुप मीतिवी कितुप पोमु मेङ्‍गिवी। 4 ताम्‍ङे चोताम लपुप ताङ अम्‍बारङ्‍शिङ कितुप ताङ ख्‍येप्‍साङ मेवु ताम्‍ङे ति क्‍युर, बोरु कोन्‍छ्‌योकला थुचिछे पुल। 5 दी ताम्‍ङे ति ख्‍यिरा तेन्‍तेन क्‍यानी हाक्‍कोवा की। शम्‍डेन कितुप ताङ मेटेङ्‍बु कितुप ताङ देर्पा कितुप ति कुला छ्‍यो तङ्‍गुप च्‍यिन्‍दै यिन। तुका मीतिवा ख्रीष्‍ट ताङ कोन्‍छ्‌योककी ग्‍येल्‍खापला शुक मोछ्‍योवी। 6 सी साङ ख्‍यिराङला ताम्‍ङे मेशोलोक लाप्‍नी जिनोक मोजोशी, च्‍यिलासिसिन ती ताम्‍ङेकी जोसालेन्‍सिन कोन्‍छ्‌योककी सुङ मेङ्‍येन्‍दुपतिवी खला खोकी पर्च्या फोकिवी। 7 तुक क्‍यानी ख्‍यिराङ तुका मीतिवी दला माशुक। 8 च्‍यिलासिसिन तोङ्‍ला कोन्‍छ्‌योकला ङो माशेवु पेला ख्‍यिराङ नकतोमीला युवु यिन, त याङ ख्‍यिराङला खोकी ठछ्‍येली जो नाङ्‍सुङ। तुक क्‍यानी ख्‍यिराङ ठछ्‍येलीला युसा। 9 ती ख्‍यिरा ठछ्‍येलीकी लाकातिवा ति ल्‍यामु वोतुप ताङ टेङ्‍बु ताङ काङ साङ जिनोक मेतुप यिन। 10 तमा कोन्‍छ्‌योककी सेमला डोप लाका ति काङ यिनोक ती ति लोपुप छोल। 11 नक्‍तोमी वुङगी तेर्मे वोतुप लाकातिवाला माशुक, बोरु तुका लाका ति मेलोक्‍पा यिन सिनी छ्‌या तेन। 12 च्‍यिलासिसिन तुका मीतिवी छ्‌याकला क्‍यावु लाका मेलोक्‍पातिवी कोर्ला ताम्‍ङे कितुप साङ ङोछा यिन। 13 ठछ्‍येलीकी छ्‍या देन्‍दुप पेला बानी ज्‍यकुप ताम्‍ङेतिवा तेरी ठछ्‍येली थोङ्‍गिवी। 14 च्‍यिलासिसिन तेरी ताम्‍ङेतिवा थोङ ज्‍यितुप ति ठछ्‍येली यिन। ती तप्‍की मीतिवी दुक सिनी सिवी,

15 तुक क्‍यानी ख्‍यिरा किताङ नालु ति चुकै वे, ल्‍यामो क्‍यानी नासाम तोङ! रिक्‍पा मेतुप मी दोके मिन, यिने रिक्‍पा वोतुप मी दोके क्‍यानी युसा। 16 त याङ तुजे ल्‍यामु मेतुप तप्‍की ख्‍यिराङला वोतुप च्‍युतिवाला तुक राङ डो माज्‍यी। 17 तुक क्‍यानी अम्‍बारङ्‍शिङ माकी, यिने कोन्‍छ्‌योककी नोवा काङ यिनोक सिनी हाक्‍कोवा की। 18 छ्‌याङ आराक थुनी जिनी रङगी जुला ना मातोङ, यिने खोकी थु चाङ्‍माकी क्‍येङ्‍नी देता। 19 च्‍यिककी च्‍यिकला कोन्‍छ्‌योककी थु चाङ्‍मा नेसुर वुङ्‍गुप खोला सोवा देकुप तेरी परकी लुतिवा लोसा। तमा दाक दाक्‍पी सेमगी दिङ नेज्‍युनी दातिवा तेन्‍नी चोवो येशूला सोवा तेक। 20 नरी तेरी ताम्‍ङेकी थोक्‍ला दाक्‍पी चोवो येशू ख्रीष्‍टकी मिङला पपा कोन्‍छ्‌योकला थुचिछे पुल।

21 येशू ख्रीष्‍टला ताङ्‍देन क्‍यानी च्‍यिक ताङ च्‍यिककी ओङला देता।

22 पेर्मीतिवा, कोन्‍छ्‌योककी कला युकुप दोके दाक दाक्‍पी ख्‍योवी ओङला देता। 23 च्‍यिलासिसिन ख्रीष्‍ट ति चर्चकी गो यिन्‍दुप दोके पेर्मीकी गो ति ख्‍योवा यिन। तमा चर्च ति ख्रीष्‍टकी जु यिन, खो ति चर्चला थर ज्‍यितुप यिन। 24 ख्रीष्‍टकी कला चर्चकी ङ्‍येन्‍दुप दोके पेर्मीतिवी साङ ख्‍योवी काङ सिक्‍यावु ति तेरी ङ्‍येन गोकिवी।

25 ख्‍योवातिवा, ख्रीष्‍टकी चर्चला ङ्‍यिङ्‍ज्‍ये क्‍यानी खोरो मिजी साङ चर्चकी थोक्‍ला जिन्‍बा च्‍युङ्‍गुप दोके दाक दाक्‍पी पेर्मीतिवाला ङ्‍यिङ्‍ज्‍ये की। 26 खोकी तुक क्‍या नङ्‍गुप ति चर्चला खोकी सुङ नेसुर चाङ्‍मा ताङ टेङ्‍बु जो नाङ्‍शी, 27 तमा टेमा माछ्‌यावु ताङ ङ्‍येर्मा माच्‍यम्‍बुप ताङ काङ साङ मडी मेतुप डछ्‌येर्मु चर्च जोनी खोरुङला राङ छ्‌या देन्‍शी, तमा ती चर्च ति चाङ्‍मा ताङ क्‍येन मेतुप वुङ्‍शी सिनी यिन। 28 तुक राङ क्‍यानी ख्‍योवातिवी साङ दाक दाक्‍पी पेर्मीला खोरुङला दोके ङ्‍यिङ्‍ज्‍ये कि गोकिवी। खोरो पेर्मीला ङ्‍यिङ्‍ज्‍ये कितुप तीकी खोरुङला साङ ङ्‍यिङ्‍ज्‍ये किवी। 29 च्‍यिलासिसिन चुका मी तीकी साङ खोरो जुला ङ्‍यिङ्‍मर मिकिवी, यिने तीला समा तेरुप ताङ ल्हाटे किवी। ती दोके ख्रीष्‍टकी साङ चर्चला तुक राङ क्‍या नङ्‍गिवी। 30 च्‍यिलासिसिन दाक्‍पु ति खोकी जुकी येन्‍लक यिन। 31 कोन्‍छ्‌योककी सुङला दुक सिनी टि वे, “तुक क्‍यानी मी तीकी खोरो पपा आमाला क्‍युर ज्‍याक्‍नी पेर्मी ताङ मुला थिन्‍नी देकिवी। तमा तिवा ङ्‍यिवुकी जु ति च्‍यिक राङ डिवी।”* ५:३१ उत्‍पत्ति २:२४ 32 दी ति छासे छ्‍याकला वोतुप ताम्‍ङे यिन। ङ ति दी ताम्‍ङे ख्रीष्‍ट ताङ चर्चकी तम्‍जीकी कोर्ला लपिन। 33 काङ यिन्‍सिनाङ ख्‍यिराङ तेरीकी दाक दाक्‍पी पेर्मीला रङला दोके ङ्‍यिङ्‍ज्‍ये किशी, पेर्मीतिवी साङ रङगी ख्‍योवाला ताङ्‍देन किशी।