1 ङे चे चेयी ताम्‍ङे अम्‍बारङ्‍शिङ क्‍यासिनाङ ख्‍यिराङ हम क्‍यानी दे सिरुप ति ङला रेवा वे। ङ येलुङ सिरिन, ख्‍यिराङ हम क्‍यानी दे। 2 ङ ति कोन्‍छ्‍योककी ख्‍यिराङला पप क्‍यावु दोके ख्‍यिरा थोक्‍ला छासे पप क्‍यानी ल्‍हटे किवी। च्‍यिलासिसिन ङे ख्‍यिराङला ख्रीष्‍टकी मुला जेन्‍दी कितुपला पुम्‍पेजा चाङ्‍मा दोके लङ्‍गुप यिनो। तमा ख्रीष्‍ट ति च्‍यिक राङ वोतुप ख्‍यिरा ख्‍योवा यिन। 3 यिने शैतानकी रुल नेसुर जिनोक जोनी हव्‍वाला क्‍येन बिन्‍दुप दोके ख्‍यिरा सेम ति ख्रीष्‍टला वोतुप टेङ्‍बु ताङ खोकी थोक्‍ला सेम च्‍यिक राङ जोनी तेन्‍तेन कितुप नेसुर कुतुक डिते सिनी ङला ज्‍यिवा लान वे। 4 च्‍यिलासिसिन मी ललाइ वानी ङ्‍यिरा ख्‍याप्‍टाक क्‍यावु येशू सिनाङ यम्‍बा येशूकी कोर्ला ख्‍याप्‍टाक क्‍यासुङ सिसिन, याङ्‍ना ख्‍यिराङला थोपुप कोन्‍छ्‍योककी थु चाङ्‍मा सिनाङ यम्‍बा थुकी कोर्ला ख्‍याप्‍टाक क्‍यासुङ सिसिन, याङ्‍ना ख्‍यिरा सेमला लावु सिनाङ यम्‍बा लेन ल्‍यामुकी कोर्ला ख्‍याप्‍टाक क्‍यासुङ सिसिन ख्‍यिराङ तिवी ताम्‍ङेला जोल्‍हमु क्‍यानी सेमला लङ्‍गिवी। 5 ती मीतिवा खोप्‍राङ ति चोछ्‍येवु लोमा छ्‍ये यिन सिनी सिवी, यिने ङ ति चेयी साङ ती मीतिवा सिनाङ छ्‍युङा मे। 6 ङ ति ताम्‍ङे लपुपला खामु मे सिनी सिवी, यिने ङे मुला कोन्‍छ्‍योककी रिक्‍पा ङ्‍युङ्‍मु मे। दी ताम्‍ङे ति ङ्‍यिरा ख्‍यिराङला तेरी ल्‍यामो क्‍यानी हाक्‍को च्‍यिन वे।

7 कोन्‍छ्‍योककी नङ्‍गुप सुङ ति ङे ख्‍यिराङला काङ साङ मालानी तुक राङ ख्‍याप्‍टाक क्‍यासिमा ख्‍यिराङला छ्‍ये जोपला ङ ति मो पापिन। काङ ङे तुक क्‍यावु ति मेलोवा यिन रो? 8 ख्‍यिरा थोक्‍ला लेन ल्‍यामु ख्‍याप्‍टाक कितुपला यम्‍बा चर्चतिवी टङ्‍गा डोसुम तङ्‍नी दाल्‍जा क्‍यासुङ। तुक क्‍यावु ति ख्‍यिराङला दाल्‍जा कितुपला तिवी नेसुर टङ्‍गा ठोवु दोके यिन। 9 ख्‍यिरा मुला वोतुप पेला ङला टङ्‍गी कतुकार ख्‍येल्‍सुङ, यिन्‍सिनाङ ङे ख्‍यिराङ सुला साङ कले मालाङ। च्‍यिलासिसिन माकेडोनिया नेसुर वावु तेपा कितुप अच्‍युनुपतिवी राङ ती ङे कतुकारला दाल्‍जा किटे क्‍यासुङ। ती तप्‍की ङे चुका पर यी क्‍यासिनाङ ख्‍यिराङला कले मेख्‍येल्‍शी सिनी हम क्‍या देतिन। ज्‍युक्‍ला सेक साङ ङ तुक राङ कितिन। 10 ख्रीष्‍टकी टेङ्‍बु ति ङे मिजीला वोता सेक अखैयाकी लुङ्‍बाला सी साङ ङे तेके क्‍यावु ताम्‍ङे ति ग्‍येक मुथुपी। 11 तुक सिक्‍यावु ति ङे ख्‍यिराङला ङ्‍यिङ्‍ज्‍ये माक्‍यावु तप्‍की यिन रो? ङ ख्‍यिराङला ङ्‍यिङ्‍ज्‍ये कितिन। ती ति कोन्‍छ्‍योकला तेरी छ्‍या वे।

12 ङ ङे क्‍यावु लाका ति नरी क्‍या क्‍यावा देतिन। तुक क्‍यासिन खोप्‍राङ राङ चोछ्‍येवु लोमा छ्‍ये दोके जोनी युकुप मीतिवी खोप्‍राङ साङ ङ्‍यिराङ दोके यिन सिरुप च्‍यु मेङ्‍येवी। 13 तुका मीतिवा ति लोमा छ्‍ये जुमा यिन। तिवी येन्‍देन मेटेङ्‍बु लोपुप लाका किवी। तिवा ति ख्रीष्‍टकी लोमा छ्‌ये दोके जोनी युकिवी। 14 यिने दी ताम्‍ङे ति हलेवु ताम्‍ङे मिन, च्‍यिलासिसिन शैतान साङ वोसिरला वोतुप देवाच्‍येनकी मीतिवा दोके जोनी युकिवी। 15 शैतान तिराङ मिन, शैतानला शब्‍ज्‍यी कितुपतिवी साङ कोन्‍छ्‍योककी थोङ्‍दाङला टेङ्‍बु वोतुप दोके जोनी युकिवी। तुक क्‍यानी दी ताम्‍ङे ति यम्‍जेन लङ्‍गुप ताम्‍ङे मिन। यिने ज्‍युक्‍ला तिवी काङ क्‍यावे, ती छ्‍येर्पा ति तिवी खुर गोकिवी।

16 ङ येलुङ सिरिन, सी साङ ङला अम्‍बारङ्‍शिङ यिन सिनी नो मिकिशी। यिने ख्‍यिरा सेमला तुकै राङ नोकिवी सिसिन ख्‍यिरा ङ ति अम्‍बारङ्‍शिङ राङ यिन सिनी सेमला लो। तुक क्‍यासिन ङ ति अम्‍बारङ्‍शिङ वोतुप दोके क्‍यानी चेयी तेके कि थुप्‍किवी। 17 दी ङे तेके क्‍यावु ति चोवो येशूकी ओङ्‍ज्‍येन नेमा क्‍यावु मिन, यिने ङरा राङ अम्‍बारङ्‍शिङ दोके क्‍यानी सिक्‍यावु यिन। 18 मी बङीकी जम्‍बुलिङला क्‍यावु लाकाकी थोक्‍ला ङराङ यिन सिक्‍यावु दोके ङ साङ ङराङ यिन सिनी सिरिन। 19 ख्‍यिराङ रिक्‍पा वोतुप तप्‍की अम्‍बारङ्‍शिङ वोतुप मीतिवी सिक्‍यावु ताम्‍ङेला साङ गा क्‍यानी हम क्‍या देकिवी। 20 ख्‍यिराङला मी ललाइकी योक्‍पु जोसिनाङ, याङ्‍ना टुक्‍तेर क्‍यानी सोसिनाङ, याङ्‍ना ख्‍यिराङ नेसुर ख्‍येप्‍साङ लासिनाङ, याङ्‍ना ख्‍यिराङला दप्‍शे ग्‍यप्‍सिनाङ, याङ्‍ना डम्‍बाला राङ पोप्‍सिनाङ ख्‍यिराङ हम क्‍यानी देकिवी। 21 ङ ङोछा लासिनाङ ती ताम्‍ङे किवी, ङ्‍यिरा याङ तिवी दोके काङ साङ कि मुथुपी।

यिने मी ललाइकी तेके किवी सिसिन, ङ साङ तेके राङ कितिन। ङला ती तेके कितुप ति अम्‍बारङ्‍शिङ यिन सिनी छ्‍या वे। 22 तिवा हिब्रू यिन सिसिन ङ साङ हिब्रू यिन। तिवा इस्राएलकी मीतिवा यिन्‍सिन ङ साङ इस्राएलकी मी यिन। तिवा अब्राहामकी गिपा यिन्‍सिन ङ साङ अब्राहामकी गिपा राङ यिन। 23 काङ तिवा ख्रीष्‍टकी थोक्‍ला शब्‍ज्‍यी कितुप मी यिन रो? ङ ङ्‍येन्‍बु दोके ताम्‍ङे किवी, ङ याङ मङ ख्रीष्‍टकी थोक्‍ला शब्‍ज्‍यी कितुप मी यिन। ङे छासे हुर्ताक क्‍यायी, ङ चोन्‍खाङला साङ थेङ्‍मा अलायी शोरुप यिन, तल्‍ज्‍येक साङ बङी ग्‍यप्‍सुङ, थेङ्‍मा बङी शेप ते ख्‍येल्‍सुङ। 24 यहूदीतिवी लक नेसुर ङे तल्‍ज्‍येक खल्‍ज्‍यिक ताङ च्‍युर्कु ति थेङ्‍मा ङ सेक सोयी। 25 थेङ्‍मा सुम ङला लकाम थ्‍वोनी पोप्‍सुङ, थेङ्‍मा यी दो थ्‍वोनी पोप्‍सुङ, थेङ्‍मा सुम याङ ङ शेन्‍दुप टु साङ शिक्‍सुङ, तमा ङ्‍यिमा च्‍यिक ताङ नुप च्‍यिक याङ ग्‍येम्‍छो नाङ्‍ला राङ यर्मिन मर्मिन गल्‍नी देतिन। 26 ङ नरी फार छुर युकुप पेला चङ्‍बु ग्‍यावु दासाला साङ ख्‍येल्‍सुङ, च्‍याक्‍पातिवी लकला साङ ख्‍येल्‍सुङ, रङगी गिपाकी मीतिवा ताङ मिरिक यम्‍बाकी मीतिवी लकला साङ ख्‍येल्‍सुङ, ग्‍येसातिवा ताङ दासा पाङ्‍थेरीला वोतुप दुक्‍पाला साङ ख्‍येल्‍सुङ, तमा ग्‍येम्‍छो नाङ्‍ला साङ ख्‍येल्‍सुङ, तेपा टेङ्‍बु मिकिवुतिवी लकला साङ ख्‍येल्‍सुङ। 27 ङ याङ लाका छाकुल ताङ लाका कलेला साङ ख्‍येल्‍सुङ, थेङ्‍मा अलायी ङ्‍यिलोकुप साङ माङ्‍येसुङ, ल्‍होवा कोम्‍बा लङ्‍गुप ताङ साप समा माङ्‍येसुङ, ख्‍योवा ताङ पेर्तुङ्‍बा साङ देतिन। 28 तोजो तिराङ मिन, ङला याङ तेरी चर्चतिवी थोक्‍ला साङ नरी पप लानी सेमला सेम्‍दुक लङ्‍गिवी। 29 ललाइ ङार मेतुप वोसिन ङ साङ ङार मेतुप च्‍युङ्‍सुङ, ललाइकी मी यम्‍बाला दिक्‍पा कि च्‍यिसिन ङे सेमला छासे पप लासुङ।

30 ङे तेके राङ कि गोसिन ङला ङार मेतुपकी थोक्‍ला राङ तेके किवी। 31 चोवो येशूकी पपा कोन्‍छ्‍योकला नरीकी नरी सोवा वुङ्‍शी। ङे नाम्‍साङ जिनोक मोजोयी सिरुप ति खोला छ्‍या वे। 32 दमस्‍कसला वोतुप अरितस ग्‍येल्‍वी ओङला लाका कितुप ती ग्‍येसाकी मी छ्‍ये तीकी ङला जिम्‍बुपला ती ग्‍येसाकी गोला र्‍हेन्‍दुप मी ज्‍याक्‍नोक। 33 यिन्‍सिनाङ ते वोतुप दाल्‍जातिवी ङला दोकरकी करुङ नेमा तोलुम नाङ्‍ला ज्‍याक्‍नी मर पापुप तप्‍की ङ ति तिवी लक नेसुर टो थुप्‍सुङ।