1 दाक्‍पुला छ्‍या वे, दाक्‍पी जु ति ती जम्‍बुलिङला देतुपला ग्‍यावु कुर दोके यिन। दी ति ना डिवी, यिने कोन्‍छ्‍योककी दाक्‍पुला जु सम्‍बा नङ्‍नी वे। ती ति देवाच्‍येनला नरीकी नरी देतुप खाङ्‍बा यिन। ती खाङ्‍बा ति मी लाक्‍पी जोवु मिन। 2 वुतुङ के दाक्‍पु दी जम्‍बुलिङला वोतुप पेला ङ्‍येन्‍बी सोक तोङ्‍गिवी, च्‍यिलासिसिन दाक्‍पु ति देवाच्‍येनकी जु सम्‍बा ङ्‍येतुपला छासे नो किवी। 3 तुक क्‍यासिन ते लेप्‍सिमा दाक्‍पुला जु सम्‍बा ङ्‍येनी पेर्तुङ्‍बा मुलुवी। 4 दाक्‍पु दी जम्‍बुलिङकी खाङ्‍बाला मिजी क्‍योङ्‍गुप पेला पप क्‍यानी ङ्‍येन्‍बी सोक तोङ्‍गिवी। ती ति जम्‍बुलिङकी जु ति क्‍युर्नी ज्‍योकुपला मिन, देवाच्‍येनकी जु ङ्‍येतुपला यिन। तुक क्‍यासिन दाक्‍पी शिनी डोप जु ति नाम्‍साङ मिशिवु जु सम्‍बाला फोकिवी। 5 दी तेरी दाक्‍पी थोक्‍ला टडिक क्‍या नङ्‍गुप ति कोन्‍छ्‍योक राङ यिन। ती थाक्‍छ्‍येतुपकी थोक्‍ला खोकी दाक्‍पुला थु चाङ्‍मा नङ्‍नी वे।

6 तुक क्‍यानी दाक्‍पु ङार क्‍यानी दी जम्‍बुलिङला जुला वोता सेक चोवो येशू ताङ मुला कुतुक देतुप यिन सिरुप ति छ्‍या वे। 7 चोवो येशूला दाक्‍पी मिककी माथोङ्‍सिनाङ खो दाक्‍पी मुला नरी ज्‍युकिवी। 8 वुतुङ के दाक्‍पु ङार क्‍यानी दाक्‍पी जु ति क्‍युर ज्‍याक्‍नी चोवो येशूकी मुला देवाच्‍येनला देतुपला छासे गा लानी वे। 9 तुक क्‍यानी दाक्‍पु दी जुला देसिनाङ दी जु क्‍युर ज्‍याक्‍नी देसिनाङ चोवो येशूला तिराङ गा लोङ्‍गुप नोवा वे। 10 च्‍यिलासिसिन दाक्‍पु रे रेला ख्रीष्‍टकी ठिम क्‍या नङ्‍गिवी। ती पेला दाक्‍पु खोकी चिप्‍ला लङ गोकिवी। तमा दाक दाक्‍पी दी जम्‍बुलिङला जुला वोतुप पेला ल्‍यामु मेलोवा काङ क्‍यावे, तुकै राङ खोकी ठिम किवी।

11 चोवो कोन्‍छ्‍योकला दाक्‍पी ज्‍यिवा कि गोकिवी सिरुप ति हाक्‍कोवु तप्‍की ङ्‍यिराङ मी यम्‍बाला साङ टोङ्‍गु तेर्किवी। कोन्‍छ्‍योककी ङ्‍यिराङला ल्‍यामो क्‍यानी ङो शेकिवी, तमा ख्‍यिरा दोङ्‍ला ङ्‍यिराङ चुकै वे सिरुप ति ख्‍यिरा सेमला साङ ठछ्‍येली छ्‍या वे सिरुप ति ङला रेवा वे। 12 ङ्‍यिरा येलुङ रङगी थोक्‍ला तिराङ तेके कितुप छलुप मिन, बोरु ख्‍यिराङला ङ्‍यिरा कोर्ला तेके कितुपला तुजे बिन वे। तुक क्‍यासिन ख तिराङ ङ राङ यिन सिनी सेम ति मेलोक्‍पा वोतुप मीतिवाला ख्‍यिरा टिलेन तेर थुप्‍किवी। 13 दोजो ङ्‍यिराङ ङ्‍येन्‍बु यिन्‍सिन ती ति कोन्‍छ्‍योककी थोक्‍ला राङ ङ्‍येन्‍बु वोतुप यिन, ङ्‍यिरा सेम थिला वोसिन ख्‍यिरा थोक्‍ला राङ सेम थिला वोतुप यिन। 14 ङ्‍यिराङ याङ ख्रीष्‍टकी ङ्‍यिङ्‍ज्‍येकी ओङला राङ वे। तुक क्‍यानी ङ्‍यिराङ दी ताम्‍ङे ति तेन्‍तेन वोतुप हाक्‍कोकिवी। मी तेरीकी दिक्‍पी थोक्‍ला ख्रीष्‍ट टुङ्‍सुङ। ती तप्‍की मी तेरी खोकी मुला राङ शेप यिन। 15 खो दाक्‍पु तेरीकी थोक्‍ला टुङ्‍सुङ। तुक क्‍यानी सेन्‍बु लुवुतिवी रङगी थोक्‍ला तिराङ मिन, तेरीकी थोक्‍ला टुङ्‍नी ङोसु लङ्‍गुप खोकी थोक्‍ला मिजी क्‍योङ गोकिवी।

16 तफेन्‍ला ङ्‍यिराङ सुला साङ जम्‍बुलिङकी मीतिवी मीला ल्‍हावु दोके क्‍यानी मल्‍हावी। थेङ्‍मा यी ङ्‍यिरा साङ ख्रीष्‍टला तुक राङ क्‍यानी ल्‍हावु यिन, यिने त याङ तुक क्‍यानी मल्‍हावी। 17 तुक क्‍यानी सी ख्रीष्‍टला तेपा क्‍यावे, ती ति मिजी सम्‍बा फोवु यिन। गोमी मिजी ति तोर्नी गाल्‍सुङ। ल्‍होसा, त याङ मिजी सम्‍बा च्‍युङ वे। 18 दी तेरी क्‍या नङ्‍गुप ति कोन्‍छ्‍योक राङ यिन। खोकी दाक्‍पुला ख्रीष्‍ट नेसुर खो ताङ मुला तम्‍जी ल्‍यामु जो नाङ्‍सुङ। तमा यम्‍बातिवाला साङ खोकी मुला तम्‍जी ल्‍यामु जोप लाका ति ङ्‍यिराङला नाङ्‍सुङ। 19 तीकी तेन्‍दोक ति येशू ख्रीष्‍ट नेसुर राङ कोन्‍छ्‍योककी तेरी मीतिवाला येलुङ खोकी मुला तम्‍जी ल्‍यामु जोवु यिन। तमा मीतिवी क्‍यावु दुक्‍चे क्‍येनकी लाकातिवाला खोकी काङ साङ छ्‍येर्पा माबिन्‍नी खोरे मुला तम्‍जी ल्‍यामु जोपला ख्‍याप्‍टाक कितुप लाका ति ङ्‍यिराङला चेक तेन नाङ्‍सुङ। 20 तुक क्‍यानी कोन्‍छ्‍योककी ङ्‍यिराङला ख्रीष्‍टकी थोक्‍ला ख्‍याप्‍टाक कितुपला तङ्‍गुप यिन। ङ्‍यिरा ख्‍याप्‍टाक क्‍यावु सुङ ङ्‍येन सिनी खोकी ख्‍यिराङला ठाकुरे सिनी सुङ्‍गिवी। ङ्‍यिराङ ख्रीष्‍टकी छ्‍योक नेसुर ख्‍यिराङला सिरिन, ख्‍यिराङ कोन्‍छ्‍योककी मुला तम्‍जी ल्‍यामु जो। 21 ख्रीष्‍टला दिक्‍पा मे, यिन्‍सिनाङ कोन्‍छ्‍योककी दाक्‍पी क्‍यावु दिक्‍पी थोक्‍ला खोला पर्च्या नाङ्‍सुङ। तुक क्‍यानी ख्रीष्‍ट नेसुर दाक्‍पु ति खोकी थोङ्‍दाङला टेङ्‍बु च्‍युङ्‍सुङ।