1 माङ्‍शोक मी ललाइकी खुरुङ ति लाका ल्‍यामु कितुप मी यिन सिनी मी यम्‍बी टिवु यिकी खुर्नी गिवी, यिने ङ्‍यिराङ ख्‍यिरा ते वुङ्‍गुप पेला तुका यिकी खुर वुङ मोगोवी, याङ्‍ना ङ्‍यिराङ दासा यम्‍बाला डोप पेला ख्‍यिरा ङ्‍यिराङला तुका यिकी जो मोगोवी। 2 ख्‍यिराङ ति ङ्‍यिरा थोक्‍ला तेरीकी हाक्‍कोवु ताङ लोप थुपुपला टिवु यिकी यिनो। ती यिकी ति ङ्‍यिरा सेमला राङ टिनी वोतो। 3 वुतुङ के ख्‍यिराङ ति ख्रीष्‍टकी टिवु यिकी यिन। ती यिकी क्‍योलुप ति ङ्‍यिराङ राङ यिन। ती यिकी ति नक्‍ची थ्‍वोनी टिवु मिन, ङोसु वोतुप कोन्‍छ्‍योककी थु चाङ्‍माकी टिवु यिन। दे येम्‍ज्‍येला टिवु मिन, मी सेमला टिवु यिनो।

4 ख्रीष्‍ट नेसुर कोन्‍छ्‍योककी थोङ्‍दाङला तेन्‍तेन वोतुप तप्‍की ङ्‍यिराङ दी ताम्‍ङे ति सिरिन। 5 चुका लाका साङ ङ्‍यिरा राङ क्‍यावु यिन सिनी सि मुथुपी। ङ्‍यिराङला लाका कितुप ङार ति कोन्‍छ्‍योक नेमा राङ ङ्‍येतुप यिन। 6 खोकी ङ्‍यिराङला खो ताङ ङ्‍यिरा पर्ला थाक्‍छ्‍येवु ठिम सम्‍बाकी थोक्‍ला शब्‍ज्‍यी कितुप ङार नाङ्‍सुङ। दी थाक्‍छ्‍येवु ठिम सम्‍बा ति यिकीला टिवु मिन, कोन्‍छ्‍योककी थु चाङ्‍माकी टिवु यिन। यिकीला टिवु ठिमकी मीला शि ज्‍यिकिवी, यिने कोन्‍छ्‍योककी थु चाङ्‍माकी याङ मिजी नङ्‍गिवी।

7 कोन्‍छ्‍योककी मोशाला दे येम्‍ज्‍येला टिवु ठिम नङ्‍गुप पेला खोकी मोवा नेमा वुङ्‍गुप वोसिर ति मोशाकी ङुतुङला ठछ्‍येली गाल्‍सुङ। ती तप्‍की ती ठछ्‍येली ति चेयी पर सेक तिराङ देनी गलुप यिन्‍सिनाङ इस्राएलकी मीतिवी मोशाकी ङुतुङला ल्‍ह ल्‍हावा दे माथुप। तुक क्‍यानी मीला शि ज्‍यितुप ठिम ङ्‍यिङ्‍बाकी शब्‍ज्‍यी कितुप लाकाला साङ तुका वोसिर वोसिन, 8 मिजी थोपुप कोन्‍छ्‍योककी थु चाङ्‍माकी शब्‍ज्‍यी कितुप लाकाला याङ मङ चोके वोसिर वोते? 9 दोजो मीला क्‍येन तेरुप शब्‍ज्‍यीकी लाकाला साङ तुका वोसिर वोसिन मीला टेङ्‍बु जोप शब्‍ज्‍यी कितुप लाकाला याङ मङ चोके वोसिर ग्यकुप वोते। 10 ती ताम्‍ङे ति नासाम ताङ्‍सिन तसाम वावु ठिमकी वोसिर ति छासे सल्‍वु वोतुप तप्‍की गोमी ठिमकी वोसिर ति तोर्नी गाल। 11 चेयी पर सेक तिराङ लुवु ठिमला साङ तुका वोसिर वोसिन नरीकी नरी लुवु ठिमला याङ मङ चोके वोसिर ग्‍यकुप वोते।

12 तुक क्‍यानी ङ्‍यिराङला तुका रेवा वोतुप तप्‍की ङ्‍यिराङ छासे ङाडेङ कितुप गल वे। 13 मोशाकी याङ खोरो ङुतुङला वोसिर ङ्‍युङ्‍मु गलुप ति इस्राएलकी मीतिवी मोथोङ्‍शी सिनी खयिटो गुकुर ग्‍यप्‍सुङ। ङ्‍यिराङ ति मोशाकी दोके लाका मिकिवी। 14 ती पेला नेज्‍युनी इस्राएलकी मीतिवी सेम ति तन्‍दा सेक साङ क्‍योङ्‍बु राङ गल वे। च्‍यिलासिसिन तसाम सेक साङ मोशाकी ठिम लाप्‍सिन तिवी सेम ति गुकुर ग्‍यपुप दोके राङ वे। ती गुकुर ति ख्रीष्‍टला तेपा क्‍यासिन तिराङ पे थुप्‍किवी। 15 वुतुङ के मोशाकी ठिम लाप्‍सिन तसाम सेक साङ तिवी सेम ति गुकुर ग्‍यपुप दोके राङ गिवी। 16 यिने कोन्‍छ्‍योककी मोशाला सुङ्‍गुप दोके “चोवो कोन्‍छ्‍योककी थाकाला ग्‍युरुप पेला ती गुकुर ग्‍यपुप ति पेकिवी।”* ३:१६ प्रस्‍थान ३४:३४ 17 चोवो कोन्‍छ्‍योक ति थु चाङ्‍मा यिन। कनी कोन्‍छ्‍योककी थु चाङ्‍मा नोके, ते रङ्‍ज्‍येन थोप्‍किवी। 18 तमा दाक्‍पु तेरीकी गुकुर पेतुप ङुतुङला चोवो कोन्‍छ्‍योककी वोसिर ति ठछ्‍येली थोङ्‍गिवी। खो नेसुर वुङ्‍गुप वोसिरकी दाक्‍पुला खो दोके जोनी मङ मङ वोसिर ग्‍यकुप जो नङ्‍गिवी। ती तेरी चोवो कोन्‍छ्‍योककी थु चाङ्‍माकी क्‍यावु यिन।