1 तेपा कितुप योक्‍पुला देतुपतिवा तेरीकी दाक दाक्‍पी ज्‍यिन्‍दाकला ताङ्‍देन की। तुक क्‍यासिन सी साङ कोन्‍छ्‍योककी मिङ ताङ दाक्‍पी बिन्‍दुप येन्‍देनला मारे मोतोङ्‍गिवी। 2 ख्‍यिराङ तेपा कितुप योक्‍पुतिवा ज्‍यिन्‍दाककी वोक्‍ला लाका कितुप पेला तिवा दाक्‍पी तेपा कितुप अच्‍युनुप राङ यिन सिनी ताङ्‍देन कितुप ताङ तिवाला मङ ल्‍यामु क्‍यानी शब्‍ज्‍यी की। च्‍यिलासिसिन ख्‍यिरा लाका ल्‍यामु क्‍यासिमा ज्‍यिन्‍दाकला ख्‍येप्‍साङ वुङ्‍गिवी। ती ज्‍यिन्‍दाक ति तेपा कितुप ख्‍यिरा ङ्‍यिङ्‍ज्‍येवु अच्‍युनुपतिवा यिन। दी ताम्‍ङे ति ख्‍यिराङ ल्‍यामु क्‍यानी येन्‍देन तेरुप ताङ ख्‍याप्‍टाक की।

3 दोजो मी ललाइकी येन्‍देन मेटेङ्‍बुतिवा लोप्‍किवी, यिने दाक्‍पी चोवो येशू ख्रीष्‍टकी खक्‍छ्‍येवु सुङ ताङ दाक्‍पी मोवा कि गोवु येन्‍देनकी मुला मिडिकिवी सिसिन, 4 तुका मी ति ङ राङ यिन सिनी सिवी, तीकी काङ साङ येन्‍देन शेवु मेवी। तमा तीकी तेन्‍दोक मेतुप ताम्‍ङेला केवुल कितुप तिराङ क्‍यानी ताम्‍ङे छिक रे रेला थमु ग्‍यकुप छोल्‍गिवी। तीकी जोसालेन्‍सिन ठतोक कितुप ताङ खाँदा शोरुप ताङ मारे तोङ्‍गुप ताङ नाम्‍दोक मेलोवातिवा वुङ्‍गिवी। 5 तमा तुका मी तीकी सेम ना गलुप ताङ टेङ्‍बुला क्‍युर्नी ज्‍यकुप मीतिवी मुला खाँदा क्‍या क्‍यावा किवी। तमा तिवी कोन्‍छ्‍योकला मोवा कितुप ति ख्‍येप्‍साङ वुङ्‍गुप यिन सिनी नोकिवी।

6 यिन्‍सिनाङ सेमला लो दिवु क्‍यानी कोन्‍छ्‍योकला मोवा कितुप ति ख्‍येप्‍साङ यिन। 7 च्‍यिलासिसिन दाक्‍पु क्‍येप पेला दी जम्‍बुलिङला काङ साङ खुर्नी वावु मिन, याङ्‍ना काङ साङ खुर्नी डो साङ मुथुपी। 8 तुक क्‍यानी साप कोन्‍दुप चोयी लङ्‍सिन दाक्‍पु तीला राङ लो दिवा कि गोकिवी। 9 यिने छ्‍युक्‍पु डोप नो कितुपतिवा शैतानकी जिनोकला ख्‍येल्‍नी तोर्वाला ख्‍येलुप दोके डिवी। तमा तिवा अम्‍बारङ्‍शिङ कितुप ताङ मीला ना तोङ्‍गुप नासाम तिराङ तङ्‍नी खोरो राङ खुरुङला मेताला जोनी ना डिवी। 10 च्‍यिलासिसिन टङ्‍गा डेवाला चा कितुप नासाम नेसुर राङ तेरी परकी दिक्‍पातिवा गिवी। टङ्‍गी देर्पाला ख्‍येल्‍नी ललाइ मीतिवा तेपा कितुप क्‍युर्नी ज्‍योकिवी, तमा तिवी सेमला छासे पप लङ्‍गिवी।

11 यिने ख्‍युरुङ ति कोन्‍छ्‍योककी गिपा यिन्‍दुप तप्‍की तुका ताम्‍ङे मेलोवातिवा नासाम माताङ्‍नी टेङ्‍बु ताङ मोवा ताङ तेपा ताङ ङ्‍यिङ्‍ज्‍ये ताङ हम क्‍यानी देतुप ताङ कुसु ज्‍यम्‍बु कितुप छोल। 12 तमा चिर्मु चेपला छ्‍योङ्‍बाल ग्‍यकुप मी दोके तेपा रम्‍बु क्‍यानी नाम्‍साङ मिशिवु मिजी ङ्‍ये थुपा की। तीकी थोक्‍ला राङ कोन्‍छ्‍योककी ख्‍युरुङला पेन नङ्‍गुप यिन। तीकी कोर्ला ख्‍योरो मी बङीकी मिङ्‍गाला पङ्‍बु साङ बिन्‍दुप यिन। 13 मी तेरीला मिजी नङ्‍गुप कोन्‍छ्‍योक ताङ पन्‍तियस पिलातसकी दोङ्‍ला पङ्‍बु टेङ्‍बु नङ्‍गुप येशू ख्रीष्‍टकी थोङ्‍दाङला 14 ङ ख्‍युरुङला क तेरिन। दाक्‍पी चोवो येशू ख्रीष्‍ट माफेवा सेक ख्‍युरुङ ल्‍यामु क्‍यानी खोकी सुङला वोतुप क दोके मिजी क्‍योङ। तमा सी साङ ख्‍युरुङला मेटेङ्‍बु ताङ क्‍येन तेर मुथुपी। 15 कोन्‍छ्‍योककी तुजे छेसिमा चोवो येशू ख्रीष्‍ट ति येलुङ फेप्‍किवी। कोन्‍छ्‍योक ति च्‍यिक राङ वोतुप ताङ ग्‍येल्‍वी खकी ग्‍येल्‍वु ताङ चोवी खकी चोवो यिन। खोला दाक्‍पी सोवा बुल्‍गिवी। 16 खो तिराङ नरीकी नरी लुवु वे। खो ति वोसिरला ज्‍युकिवी, तमा ती वोसिरकी चिप्‍ला सु साङ डो मुथुपी। खोला सी साङ नाम्‍साङ माथोङ वे, याङ्‍ना थोङ साङ मुथुपी। खोला राङ ताङ्‍देन ताङ ओङ्‍ज्‍येन ति नरीकी नरी वुङ्‍शी। आमिन।

17 दी जम्‍बुलिङकी मी छ्‍युक्‍पुतिवाला दुक सिनी क बिन, “अम्‍बारङ्‍शिङ माकी, चेयी पर सेक तिराङ लुवु टोङ्‍बाला मिन, यिने दाक्‍पुला गोवु तेरी च्‍यालकतिवा लोदिमुकी थोक्‍ला ग्‍यक्‍चे क्‍यानी नङ्‍गुप कोन्‍छ्‍योकला तिराङ रेवा की।” 18 तमा तिवाला “मी यम्‍बाला ल्‍यामु कितुप ताङ लाका ल्‍यामु कितुप सेम वोतुप ताङ सेम बोल्‍मु वोतुप ताङ रङगी लोला वोतुप टोङ्‍बातिवा कतुकारला ख्‍येलुपतिवाला तेरुप सेम वोतुप च्‍युङ गोकिवी।” सिनी क बिन। 19 तुक क्‍यानी तिवा डम्‍ज्‍यी रम्‍बु तिङ्‍गुप दोके खोप्‍रे थोक्‍ला ज्‍युक्‍थमी नासाम तङ्‍नी मिजी टेङ्‍बु क्‍योङ थुप्‍शी।

20 आङ तिमोथी, कोन्‍छ्‍योककी ख्‍युरुङला काङ लाका चेक तेन नङ वे, ती ति ल्‍यामो क्‍यानी र्‍होक्‍नी ज्‍योक। तेन्‍दोक मेतुप ताम्‍ङेतिवा क्‍युर्नी ज्‍योक। तिवी रिक्‍पा वोतुप यिन सिवी, यिने ती वुतुङ्‍की रिक्‍पा मेतुप मीतिवी ताम्‍ङे नेसुर कुतुक दे। 21 ती रिक्‍पा मेतुप ताम्‍ङेकी जोसालेन्‍सिन ललाइ मीतिवा तेपा कितुप साङ क्‍युर्नी गल वे। कोन्‍छ्‍योककी कटिन ति नरी ख्‍योरो मुला लुशिता।