1 कोन्‍छ्‍योककी थु चाङ्‍माकी टेङ्‍बु सुङ्‍गिवी। तिङ्‍मी तुजेला जिनोक जोप र्‍हेन्‍डी ताङ डेकी ताम्‍ङेला ङ्‍येन्‍नी मी ललाइकी तेपा कितुप क्‍युर्नी ज्‍योकिवी। 2 ती तेरी येन्‍देनतिवा ति मी खोनक्‍पुतिवा नेसुर गिवी। तिवी सेम ति शैतानकी ति यिन सिनी च्‍या छेन्‍दी थ्‍वोनी डाम ग्‍यपुप दोके यिन। 3 तिवी जेन्‍दी कितुप मेवी, ललाइ समा साङ साप मेवी सिनी ग्‍येकिवी। यिने ती समातिवा ति तेपा कितुपतिवा ताङ टेङ्‍बु काङ यिन सिनी ङो शेवुतिवी थुचिछे पुल्‍नी सापला कोन्‍छ्‍योककी ज्‍ये नङ्‍गुप यिन। 4 कोन्‍छ्‍योककी ज्‍येवु तेरी च्‍यालकतिवा ल्‍यामु वे। तुक क्‍यानी थुचिछे पुल्‍नी सोसिन साप मेवी सिनी सि मोगोवी। 5 च्‍यिलासिसिन तिवा ति कोन्‍छ्‍योककी सुङ ताङ खोला मोपोर क्‍यासिमा चाङ्‍मा वुङ्‍गिवी।

6 ती येन्‍देन ति ख्‍योरो अच्‍युनुपतिवाला साङ लाप्‍सुङ सिसिन ख्‍योरो तेपा क्‍यावु सुङ ताङ येन्‍देन टेङ्‍बुला सिक्‍यावु दोके मङ रम्‍बु च्‍युङ्‍नी ख्‍युरुङ येशू ख्रीष्‍टकी थोक्‍ला लाका ल्‍यामु कितुप डिवी। 7 कोन्‍छ्‍योकला मोवा मेतुप ताङ तेन्‍दोक मेतुप पेतिवा नेसुर ख्‍युरुङ कुतुक दे। तमा खोला मोवा कितुपला तालिम की। 8 च्‍यिलासिसिन जुकी थोक्‍ला तालिम क्‍यावु ति चेयी तिराङ फेन थोकिवी। यिने कोन्‍छ्‍योककी थोक्‍ला तालिम क्‍यावु ति तेरी ताम्‍ङेला फेन थोकिवी, तमा ज्‍युक्‍थमाला कोन्‍छ्‍योककी थाक्‍छ्‍येन नङ्‍गुप नाम्‍साङ मिशिवु मिजी थोप्‍किवी। 9 दी ताम्‍ङे ति टेङ्‍बु वोतुप ताङ तेरीकी सेमला लिङ गोवु वे। 10 तीकी थोक्‍ला राङ दाक्‍पु हुर्ताक ताङ टेमु कियी वे, च्‍यिलासिसिन दाक्‍पी रेवा ति ङोसु वोतुप कोन्‍छ्‍योकला वे। खो ति मी तेरीकी कोन्‍छ्‍योक यिन, खोकी खक्‍छ्‍येवुला तेपा कितुप मीतिवाला दिक्‍पा ने थर ज्‍यिकिवी।

11 तीकी कोर्ला मीतिवाला क बिन, तमा तिवाला लोप। 12 ख्‍युरुङ नाज्‍युङ वे सिनी सी साङ ख्‍युरुङला मो मेबेप्‍शी, यिने मीतिवी थोङ्‍दाङला ताम्‍ङे लप्‍ताङ ताङ किताङ नालु ताङ ङ्‍यिङ्‍ज्‍ये ताङ तेपा ताङ टेङ्‍बु वोतुप पङ्‍बु छ्‍या तेन। 13 तमा ङ वुङ्‍दा सेक ख्‍योरो मीतिवाला कोन्‍छ्‍योककी सुङ रानी तेरुप ताङ ख्‍याप्‍टाक कितुप ताङ येन्‍देन तेरुपला ङ्‍याम की। 14 ख्‍युरुङला थोपुप कटिनकी ङ्‍येम्‍बाला खोङ्‍याम की। ती कटिनकी ङ्‍येम्‍बा ति चर्चकी गोमा कितुपतिवी ख्‍योरो गोला लाक्‍पा ज्‍याक्‍नी मोपोर कितुप पेला नम्‍दर शेनी ख्‍युरुङला थोपुप यिन। 15 ख्‍योरो कि गोवु लाकातिवा तेरी किसा, तमा ती लाकाला राङ नरी ज्‍युनी देता। तुक क्‍यासिन ख्‍योरो मिजी ताङ ख्‍युरुङ मङ ल्‍यामु गलुप ति तेरी मीतिवी थोङ्‍गिवी। 16 ख्‍योरो थोक्‍ला ताङ ख्‍योरो लोपुप येन्‍देनकी थोक्‍ला च्‍याङ्‍से क्‍यानी देता। ख्‍योरो नरी तुक क्‍यासिन ख्‍युरुङ ताङ ख्‍योरो ख्‍याप्‍टाक क्‍यावु सुङ ङ्‍येन्‍दुप मीतिवा साङ र्‍होकितो।