1 तेरी सिनाङ तिङ्‍ला अच्‍युनुपतिवा, चोवो येशूकी मिङला ङ्‍यिराङ ठाकुरे सिनी ख्‍यिराङला गोङ्‍बा शुनी टोङ्‍गु तेरिनो। ख्‍यिरा मिजी चुक क्‍यानी क्‍योङ गोकिवी, चुक क्‍यानी कोन्‍छ्‍योकला गा लोङ गोकिवी सिनी ख्‍यिरा ङ्‍यिरा नेसुर लाप्‍सुङ। तमा तन्‍दा सेक ती दोके कियी वे, तरोङ साङ ख्‍यिराङ मङ मङ फरिन ग्‍युक। 2 तमा चोवो येशूकी ओङला चुका चुका कतिवा ङ्‍यिरा ख्‍यिराङला बिन वे, ती ति ख्‍यिराङला राङ छ्‍या वे।

3 च्‍यिलासिसिन कोन्‍छ्‍योककी नोवा ति ख्‍यिराङ चाङ्‍मा देशी सिरुप यिन। तीकी तेन्‍दोक ति ख्‍यिराङ शम्‍डेन माकी, 4 ख्‍यिराङ दाक दाक्‍पुला टेङ्‍बु क्‍यानी रङगी पेर्मीला ताङ्‍देन की, 5 कोन्‍छ्‍योकला ङो माशेवु मिरिक यम्‍बातिवा दोके शम्‍डेन माकी सिनी सिक्‍यावु यिन। 6 तमा सी साङ खोरो नुपला मेलोक्‍पा मिकिशी। च्‍यिलासिसिन दी तेरी ताम्‍ङेकी छ्‍येर्पा तेरुप ति कोन्‍छ्‍योक राङ यिन। ङ्‍यिरा ख्‍यिराङला गोमाला राङ सिक्‍यायिन। 7 काङ यिन सिसिन कोन्‍छ्‍योककी दाक्‍पुला मेटेङ्‍बुकी थोक्‍ला मिन, यिने टेङ्‍बुकी थोक्‍ला कताङ नङ्‍गुप यिन। 8 तुक क्‍यानी सी दी ताम्‍ङेतिवा मेङ्‍येन्‍वे, तीकी मीला माङ्‍येन्‍दुप मिन, ख्‍यिराङला थु चाङ्‍मा नङ्‍गुप कोन्‍छ्‍योकला माङ्‍येन्‍दुप यिन।

9 त अच्‍युनुपतिवा ङ्‍यिङ्‍ज्‍येकी कोर्ला याङ सी साङ ख्‍यिराङला टिक गोवु मे। च्‍यिलासिसिन च्‍यिककी च्‍यिकला ङ्‍यिङ्‍ज्‍ये कितुपकी कोर्ला ति ख्‍यिराङला कोन्‍छ्‍योक नेसुर राङ येन्‍देन ङ्‍येतुप तप्‍की 10 माकेडोनियाकी तेरी अच्‍युनुपतिवाला ख्‍यिराङ वुतुङ के ङ्‍यिङ्‍ज्‍ये कियी वे। अच्‍युनुपतिवा, तरोङ साङ मङ ल्‍हक्‍पा तुक राङ क्‍यानी ङ्‍यिङ्‍ज्‍ये की सिनी ङ ख्‍यिराङला टोङ्‍गु तेरिन। 11 ङ्‍यिरा ख्‍यिराङला टोङ्‍गु बिन्‍दुप दोके मी यम्‍बी कोर्ला ताम्‍ङे माकी, यिने दाक दाक्‍पी लाकाला नासाम तङ्‍नी लाका की। 12 तुक क्‍यासिन तेपा मिकिवु मीतिवी ख्‍यिराङला ताङ्‍देन किवी। तमा ख्‍यिराङला मी यम्‍बी काङ रे च्‍यिक रे तेर्किते सिनी सुला साङ रेवा क्‍यानी मादे।

13 अच्‍युनुपतिवा शेपतिवी कोर्ला ख्‍यिराङ हाक्‍माकोवा क्‍यानी मेदेशी, तमा रेवा मेतुप मीतिवा दोके सेम्‍दुक क्‍यानी साङ मेदेशी सिरुप ति ङ्‍यिरा नोवा वे। 14 च्‍यिलासिसिन येशू टुङ्‍नी येलुङ ङोसु लावु ति ङ्‍यिराङ तेपा किवी। तुक राङ क्‍यानी येशूला तेपा क्‍यानी शेपतिवाला येशू येलुङ दी जम्‍बुलिङला फेपुप पेला कोन्‍छ्‍योककी येशू ताङ मुला राङ तिवाला कताङ नङ्‍गिवी। 15 चोवो येशू दी जम्‍बुलिङला ज्‍युवु पेला नङ्‍गुप सुङ नेसुर राङ ङ्‍यिराङ ख्‍यिराङला सिरिन। ती शेपतिवा ति चोवो येशू लोङ दी जम्‍बुलिङला फेपुप पेला सेक सेन्‍बु वोतुपतिवा सिनाङ गोमाला के येशूला ठेकिवी। 16 च्‍यिलासिसिन चोवो फेपुप पेला क नङ्‍गुप थोर ग्‍येर्पु ताङ देवाच्‍येनकी लेन क्‍योलुप थु छ्‍येकी वोरु ताङ कोन्‍छ्‍योककी ग्‍यङ्‍डा तोङ्‍गुप वोरु ताङ मुला देवाच्‍येन नेमा पाप्‍नी फेप्‍किवी। तमा ख्रीष्‍टला तेपा क्‍यानी शेपतिवा ति गोमाला के सेन्‍बु लङ्‍गिवी। 17 ती ज्‍युक्‍ला दाक्‍पु तेपा क्‍यानी ती पेला सेक सेन्‍बु लुवुतिवा तिवा ताङ मुला राङ नाम ने केला मुक्‍पी पर्ने चोवोला ठेतुपला तेक्‍नी डिवी। तमा दाक्‍पु नरी खोकी मुला राङ देतुप ङ्‍येकिवी। 18 तुक क्‍यानी च्‍यिककी च्‍यिकला चोवो येशूकी नङ्‍गुप दी सुङ नेसुर टोङ्‍गु बिना।