23
Can Rìh Wa Caq Ŏi 'Màng Leq
Bàu 7
1 Jò ìh ha'ngui acaq ti mòiq ngai cwan,
ep rabiaq oq ngan mangai wa dahwèq caq ŏi jang ngìa ìh;
2 Tàng ìh ham ca acaq,
khòh đòiq chang ti ranŏng ìh.
3 Paq ham ca dahwèq caq da haq,
taiq aih dahwèq caq đòiq padô 'nùt.
Bàu 8
4 Ìh paq chìuq xalep đòiq chaq can padrŏng;
Phai yŏc manoh khôn rabiaq đòiq loq jò leq hêq.
5 Jò ìh bu cachìac mat ngan bìac can padrŏng, haq pi i hòm;
haq khoi hon panan, wa pan tŏc ta plình 'màng ca cliang.
Bàu 9
6 Apaq caq 'benh da mangai toq hèm ca dađeh,
wa apaq ham ca 'bài ngè caq jìang da haq.
7 Taiq ta manoh haq hèm 'màng leq, èh haq broq 'màng aih. Haq doi ca ìh:
“Caq ôq beq”, mahaq haq ùh mòiq manoh ca ìh.
8 Dahwèq ìh khoi caq, ìh jah hac 'noh dìq,
wa bàu manè da ìh ca haq loh 'ngwan.
Bàu 10
9 Apaq capoch ti don mangai blùng;
taiq haq jah khìn đac bàu khôn rabiaq da ìh.
Bàu 11
10 Apaq 'nhac đac long cŏc dùnh;
paq mùt ta đùng tamang da mangai lac;
11 Taiq Chuaq Rŏt Dèch Hlài da wì haq,
Haq i cwìang itai, jah broq ta-atoq am ca wì haq ta'blêq ca ìh.
Bàu 12
12 Phai yŏc manoh tiaq trong pariaq hnài beq,
wa halang don tamàng bàu 'nì loq.
13 Apaq cađac bìac hnài baxa con 'yoh;
'nhac ca blai haq xam long roi, haq ùh cachìt.
14 Jò ìh blai haq xam long roi,
ìh jah dŏih mahua yiang haq claih khoi ralùng hanang.
Bàu 14
15 Ô con, tàng manoh ìh khôn rabiaq,
èh manoh au hadai jah lem bùi;
16 Joq 'nàng,
manoh au lem bùi jò hacùng ìh capoch bàu lem jang.
Bàu 15
17 Manoh ìh paq ta'mrua ta'bì ca mangai ngang dù;
mahaq rìm hì crè yùq ca Chuaq beq.
18 Taiq joq 'nàng trùh lùch èh gêh lem,
wa bìac ngèh gòm da ìh ùh hìaq 'ngwan.
Bàu 16
19 Ô con, tamàng wa wìa khôn rabiaq beq,
khòh 'nong manoh ìh mùt trong ta-atoq.
20 Apaq broq bua ca 'bài mangai gìan ca alac,
loq ti 'bài mangai ham ca acaq;
21 Taiq mangai gìan ca alac wa mangai ham ca acaq jah loh ca pa;
mangai ham ca cùi jah caxùnh eo hyah hyai.
Bàu 17
22 Tamàng bàu dèh baq khoi broq loh ìh oq,
paq khìn đac miq ìh jò haq craq ìuq.
23 Rŏt yŏc bàu joq 'nàng wa paq tech đac;
hadai yŏc bìac khôn rabiaq, bìac hnài pariaq, wa bìac loq 'nì.
24 Baq da mangai rìh ta-atoq jah i can lem bùi càn,
wa mangai leq broq loh con khôn rabiaq jah lem bùi dèh ca haq.
25 Ngèh ca baq wa miq ìh jah i can lem bùi càn,
wa mangai khoi xa-ông ca ìh jah lem bùi.
Bàu 18
26 Ô con, dèch am manoh ìh ca au beq,
mat ìh khòh lem bùi ca trong da au.
27 Ma jah 'mang aih gu cadrì tango anang haq ralùng jrùq,
wa gu cadrì tango anang haq trom hàm chit.
28 Joq 'nàng haq yòng achop tìah ca mangai atùng,
wa broq loh tam bàc ngai calô ùh wèq dèh manoh.
Bàu 19
29 Cabô glàm bìac nan xa? Cabô 'bìq mango?
Cabô i bìac ta'miaq? Cabô hràng rayoih?
Cabô loh habau ùh i ca nen? Cabô i mat gòh?
30 Aih 'bài mangai ŏi hyàq jang doi alac,
lam lim thù alac pha.
31 Apaq ngan alac jò haq gòh, jò haq hliang ta talŏc li,
wa hoch clìh ta ranŏng xùang;
32 Pulùch, haq cap tìah ca bìh,
jôh tìah ca bìh plŏng;
33 Mat ìh ngan bìac crài craiq,
wa manoh ìh capoch bàu ranhùa.
34 Joq 'nàng, ìh jah tìah ca mangai ca'nùng ta'ne diac raxìq,
loq ùh crài cleq ca mangai ca'nùng ti bôi jrang tang bai bong.
35 Ìh doi: “Wì tong au, mahaq au ùh jìq;
wì jêh au, mahaq au ùh mòn;
Jò au rìu,
au lam chaq ôq hòm.”