36
Ê-li-hu Anoi 'Noh Boc Plình Broq 'Màng leq ca Con Mangai
1 Ê-li-hu capoch hòm 'màng cô:
2 “Xìn ìh àt dèh manoh mòiq rahyàc, au jah patô ca ìh;
ma jah 'màng aih au ŏi i bàu palem ca Boc Plình.
3 Au 'ràng trùh bìac au 'nì loq,
wa pa'noh bìac ta-atoq da Chuaq ma broq plình crŏng taneh.
4 Joq 'nàng au ùh capoch amòng;
au mangai 'nì loq gêh tôm 'nang ŏi ti ìh.
5 “Boc Plình i cwìang itai ùh khìn cabô;
can 'nì loq wa can dêh da Haq dìq jaq càn caiq.
6 Haq ùh đòiq mangai ngang dù rìh dùnh,
mahaq hadrah ta-atoq ca mangai nan xa.
7 Haq wèq ban mangai ta-atoq;
Haq am wì ha'ngui ti 'bài bùa ta gèq bùa hloi hloi;
Haq broq wì cajap, wa wì jah padèch.
8 Tàng wì haq 'bìq càt caxi mem,
wa 'bìq tagwat caxi baxa,
9 èh Haq patô da wì bìac wì ma khoi broq,
'bài tôiq lôi wa manoh loq catèh da wì.
10 Haq pèh don wì am wì tamàng bàu hnài,
thê wì cađac trong dù.
11 Tàng wì loq iu wa patìh ca Haq,
èh 'bài hì lùch da wì jah xôq ramŏt,
wa 'bài hanam da wì jah lem bùi.
12 Mahaq tàng wì ùh enh tamàng,
èh wì 'bìq cachìt xam chang gùm,
wa cachìt taiq wì ùh 'nì loq.
13 “Mangai dù bình halùih can nòih;
jò Boc Plình rùp càt wì, xôq wì ùh creo dang Haq jùp đò.
14 Wì cachìt jò wì ŏi thì;
'nhòng rìh wì hù hnhung ti mangai tango anang ta hnem cùh waiq kiac dù.
15 Boc Plình yŏc bìac ranàc dèch mangai jò glàm bìac ranàc,
wa yŏc bìac padit padiang đòiq pèh don wì haq.
16 “Haq hadai enh 'noh ìh loh khoi ca nòi ranàc,
đòiq ìh ŏi nòi catèm, pi i ca bìac xalep;
'bài dahwèq caq tôm tàu ta ca'bŏng ìh.
17 Mahaq manoh ìh bình baoq bìac hèm tình da mangai dù;
bìac hadrah wa bìac baxa khoi rùp yŏc manoh hèm da ìh.
18 Ep hachang oq, paq đòiq bìac can padrŏng pawè ìh;
hadai paq đòiq ngè càn rŏt manoh broq ca ìh lac trong.
19 Ìh xoh dèh bìac can padrŏng wa cwìang da ìh,
jah dèch ìh claih ca bìac ranàc 'mòh?
20 Apaq ngèh ca damang,
aih jò con mangai hnhung khoi dèh ca nòi cla.
21 Wèq dađeh oq, paq tawìh pah ngang dù;
taiq Boc Plình 'noh bìac jìq xa cô đòiq padràng ìh khoi ca trong ngang dù.
22 “Ngan cô, Boc Plình i cwìang itai khoi jah padèch ha'nhèq;
i ca thài hnài leq tìah ca Haq ùh?
23 i cabô hnài Haq trong lam ùh? Cabô hùa doi Haq broq ùh troq?
24 Hmàng manè padèch bìac Chuaq ma khoi broq beq,
aih bìac con mangai phai yŏc 'bŏi calêu padèch hloi hloi.
25 Rìm ngai khoi ngan hnoq bìac aih,
con mangai yòng hanhoi ngan enh hangai.
26 Cô, joq 'nàng Boc Plình càn dìq jaq, bèn ùh nui loq ca Haq;
ùh i ca cabô loq ca hanam Haq.
27 “Haq hìt atŏc catôh diac,
khoi èh enh yùc diac aih loh mè,
28 yùc ùc 'noh mè aih,
pliang mè clìh bàc ca con mangai.
29 Ùh i ca cabô loq yùc jah hlìa 'màng leq,
loq atêh hilùng loh enh traiq Haq 'màng leq?
30 Ngan cô, Chuaq ca'naih camlet dudan ca Haq,
gùp glom nòi jrùq da diac raxìq.
31 Haq yŏc bìac aih hadrah con mangai,
am dahwèq caq bàc i rah.
32 Haq cadoc camlet ta plình xam tì,
thê camlet troq pah nòi leq Haq thê.
33 Atêh cađah hilùng aih enh doi Haq 'nang wèq cwìang,
ngè aban hadai loq ca jò bahùt ten trùh.”