46
Jacôp Loh ta Aicàp
1 Is-ra-ên loh lam, wê dŏng dèh dahwèq cùng hang trùh Bê-e-sê-ba, ta aih haq padon ngè tadreo ca Boc Plình da Isac, baq haq.
2 Boc Plình doi ca Is-ra-ên ta jò haq apô hnoq: “Ô, Jacôp, Jacôp.”
Jacôp tèo: “I au cô.”
3 Boc Plình doi: “Au Boc Plình, Boc Plình da baq ìh. Loh ta Aicàp beq, apaq crè cleq, ma jah 'màng aih, ta aih Au broq ca ìh wìa mòiq Diac càn. 4 Au loh ta aih ti ìh, hi khoi hadai ajèn ìh hlài jò ìh cachìt, èh Jôsep ma apot mat ìh.”
5 Enh Bê-e-sê-ba, Jacôp wa dìq con calô haq 'nong dèh baq wa cadrì con dađeh ta 'bài xê Pha-ra-ôn khoi am đòiq 'ràng wì. 6 Wì haq hadai 'ràng dèh cùng hang wa dìq ngè aban khoi i ta Ca-na-an lam trùh gùng Aicàp. 7 'Màng aih, Jacôp wa dìq ca hnem haq, 'bài con calô haq, 'bài xau calô, 'bài con cadrì, 'bài xau cadrì, dìq loh ta gùng Aicàp.
8 Cô con calô da mangai Is-ra-ên jò trùh gùng Aicàp:
Rubên, con ramua da Jacôp.
9 'Bài con calô Rubên:
Hênoc, Phalu, Hêtrôn wa Catmi.
10 'Bài con calô da Si-mê-ôn:
Jê-mu-ên, Jamin, Ôhat, Jakin, Xôha wa Saulò. Miq Saulò, mangai Ca-na-an.
11 'Bài con calô da Lêwi:
Getsôn, Kêhat wa Mê-ra-ri.
12 'Bài con calô da Juđa:
Êrò, Ônan, Sêlah, Perex, Xêra. Mahaq Êrò wa Ônan khoi cachìt ta Ca-na-an.
Con da Peret aih
Hêtrôn wa Hamun.
13 'Bài con calô da I-sa-ca: Tôla, Puwa, Jop wa Simrôn.
14 'Bài con calô da Xe-bu-lun:
Sêrêt, Êlôn wa Ja-lê-ên.
15 Cô 'bài con calô wa mòiq toq con cadrì hiniq haq Đina ma Lêa khoi xa-ông ca Jacôp ta Pađan Aram, xam 'bài xau, aih tagop hlài jah 33 ngai.
16 'Bài con calô da Gat:
Xi-phi-ôn, Haghi, Suni, Etbôn, Êri, A-rô-đi, A-rê-li.
17 'Bài con calô da Ase:
Imna, Ichwa, Ichwi, Bê-ri-a
wa Sêrah, aih oh cadrì 'bài aih.
Con da Bê-ri-a aih
Hêbe, Man-chi-ên.
18 Cô 'bài con calô da Xinpa xa-ông ca Jacôp, xam dìq ca con xau wì haq, aih 16 ngai. Xinpa aih hapŏng 'yoh da Laban khoi am tiaq wèq Lêa con cadrì dađeh.
19 'Bài con calô da Rachên mai Jacôp:
Jôsep wa Bên-ja-min. 20 Jôsep khoi i con ta gùng Aicàp, aih Ma-na-se wa Ep-ra-im, A-sê-na mai haq khoi xa-ông ca haq, aih con cadrì da Poti Phêra pajàu càn phôq Ôn.
21 'Bài con calô da Bên-ja-min:
Bêla, Bêca, Achbên, Gêra, Na-a-man, Êhi, Rôsò, Môpbim, Hôpbim wa Arêt.
22 Aih 'bài con calô da Rachên wa Jacôp. Dìq ca xinoi da Jacôp nhò Rachên, aih 14 ngai.
23 Con calô da Đan, aih
Husim.
24 'Bài con calô da Nep-ta-li:
Jat-sê-ên, Guni, Jêxe wa Silem.
25 Dìq con calô da Bila xa-ông ca Jacôp, wa dìq ca con xau wì haq, aih tapèh ngai. Bila hapŏng 'yoh da Laban khoi am tiaq wèq Rachên, con cadrì da Laban.
26 'Bài wì lam trùh Aicàp ti Jacôp, aih xinoi Jacôp, ùh rèn 'bài mai con, èh dìq ca 'bài wì 66 ngai. 27 Jôsep khoi xa-ông baiq toq con calô ta Aicàp, 'màng aih dìq dŏng 'bài mangai ta cadraq Jacôp, aih 70 ngai.
Jôsep Đìh Dèh Baq
28 Jacôp thê Juđa lam adroi đòiq doi ca Jôsep 'ràng haq trùh cròng Gôsen, 'màng aih wì haq trùh Gôsen. 29 Jôsep padon xê trùh gùng Gôsen đìh Is-ra-ên, baq haq. Jò glàm dabau, haq oc dèh baq hmoi dùnh.
30 Is-ra-ên doi ca Jôsep: “Manàiq cô au padon cachìt taiq au khoi jah hnoq hadrò con wa loq con xôq ŏi rìh.”
31 Hi khoi Jôsep doi ca oh daq wa dìq ca cadraq baq haq: “Cô èh au tŏc doi ca Pha-ra-ôn: Oh daq wa dìq ca cadraq baq au enh Ca-na-an khoi tŏc ta cô ti au. 32 Wì haq broq ngè ban trìu wa 'bo. Wì khoi 'ràng tiaq dìq 'bài cùng hang wì. 33 'Màng aih jò leq Pha-ra-ôn creo bòch oh daq: Pì broq ngè cleq? 34 Pì tèo haq, doi: ‘Enh 'yoh trùh manàiq, nhèn xôq rìh xam ngè aban tìah ca boc yaq nhèn.’ 'Màng aih bùa am pì ŏi ta gùng Gôsen, ma jah 'màng aih mangai Aicàp ramòt dìq ca mangai ban trìu.”