31
Bìac Jùp Đò Ùh Xài Ta Aicàp Mahaq Ŏi Ta Boc Plình
1 Nan xa ca 'bài mangai ma loh ta Aicàp xìn wì jùp đò,
canòm ca 'bài axêh,
'bài xê axêh bàc,
'bài lình còi axêh i can tadêh,
mahaq ùh hmàng trùh Chuaq Hadròih da Is-ra-ên,
wa ùh creo dang Chuaq!
2 Mahaq Haq raq Chuaq khôn rabiaq.
Haq raq Chuaq ma ùc 'noh can ranàc, ùh blòq dèh bàu.
Haq yòng tajraq hlài ca hnem mangai dù,
wa tajraq hlài ca mangai ma jùp 'bài mangai dù.
3 Aicàp aih mangai, wì ùh xài Boc Plình;
'bài axêh wì haq joq axêh xam xech, ùh xài yiang.
Jò Boc Plình hnhè tì,
tajòi 'mòi mangai ma jùp jah catŏih,
mangai jah jùp èh tacro,
dìq ca wì baiq pah cachìt hnhung.
4 Ma jah 'màng aih Chuaq khoi doi ca au 'màng cô:
“Tìah ca baco hlari loq baco hlari hadròng grenh jò rùp jah jam caq,
'nhac ca 'bài mangai ban trìu gop dabau bình ca calùh,
haq ùh crè ca bàu cachech,
ùh crè ca atêh wì;
hadai 'màng aih,
Chuaq I Cwìang Itai jah loh
tajêh poh ta wang Siôn wa ta 'bài go.
5 Tìah ca chìm pan axràng 'màng leq,
èh Chuaq I Cwìang Itai wèq ban Jê-ru-sa-lem hadai 'màng aih.
Haq wèq ban wa dŏih claih,
Haq 'nong wa dèch claih.”
6 Ôi con jàn Is-ra-ên, wìh hlài ta Chuaq ma pì khoi blàq Haq aih beq, 7 ma jah 'màng aih ta hì aih, mangai leq ji cađac dèh 'bài dua 'mù kiac xam 'bac xam wang ma tì broq loh ta tôiq lôi.
8 “Mangai A-si-ri jah cro enh 'neq ca chang gùm,
ùh xài da con mangai; ùh xài pla chang gùm da con mangai.
Wì haq ep cadàu mot ca pla chang gùm aih,
mahaq 'bài con radam da haq dìq 'bìq rùp lam broq hapŏng.
9 Mangai yi tadêh tanuq da wì haq tarìt tariang jah lam đac taiq crè yùq;
'bài cwan haq cadàu jò hnoq dèch cò.”
Aih bàu da Chuaq,
ma i ùnh ta Siôn,
i tanùh ùnh khàng ta Jê-ru-sa-lem.