13
Ep-ra-im Cùh Waiq Dua 'Mù
1 Jò Ep-ra-im capoch, wì yùq crè tarìt tariang.
Haq khoi jah padèch ta Is-ra-ên.
Mahaq taiq haq broq tôiq cùh waiq Ba-an, 'màng aih haq phai cachìt.
2 Manàiq, wì haq broq tôiq rai èh rai bàc;
yŏc wang 'bac broq ca dađeh dua 'mù,
broq dua 'mù tiaq dèh manoh rabiaq cla;
aih dìq bìac da tì mangai thòq rabiaq broq loh!
Wì doi ca dabau:
“Hìp 'bo cô beq hi khoi dèch am ngè tadreo ca haq.”
3 Taiq 'màng aih, wì haq tìah ca hiloc jò daxroq,
tìah ca diac ngom jò daxroq,
tìah ca aròm cayeo hlôi haprah enh xàn len 'mau,
tìah ca nhòi ùnh loh enh woi nhòi!
4 “Mahaq Au Chuaq Boc Plình ìh khoi 'nong ìh loh khoi enh taneh Aicàp;
enh gùng ca Au,
ìh ùh jah cùh waiq yiang leq ma 'noiq,
enh gùng ca Au ùh i ca Chuaq Dèch Claih ma 'noiq!
5 Au khoi ban ìh ta đùng braih càn,
ta nòi taneh croh crenh.
6 Au am wì caq panàc,
mahaq jò hi mech wì haq loh ca i manoh catèh dađeh;
taiq 'màng aih wì haq hèt ca Au.
7 Taiq 'màng aih, ca wì haq Au jah tìah ca baco hlari,
tìah 'beo rap wì haq ti kenh trong.
8 Au glàm wì haq tìah ca higàu ma 'bìq wì rùp da haq con.
Au hich rada wì haq;
lŏn wì haq 'màng ca baco hlari can.
9 “Ô Is-ra-ên, ìh jah raliang piang taiq ìh tajraq hlài ca Au,
Au cô raq ma jah jùp đò ìh.
10 Manàiq bùa ìh ta leq đòiq haq dèch dŏih ìh!
'Bài cwan hadrah ìh ta leq,
aih wì ma pì khoi xìn:
‘Am ca nhèn mòiq toq bùa wa cwan!’
11 Ta jò nòih, Au khoi am ca ìh mòiq toq bùa,
wa ta jò nòih Au don đac.
12 Bìac ngang dù da Ep-ra-im khoi jah achaoq
đòiq wa tôiq lôi da haq khoi jah hanìuq gop.
13 Bìac jìq xa-ông da gu cadrì jah trùh ta haq.
Mahaq haq ùh waq;
taiq khoi trùh
jò haq xôq ùh loh khoi enh cliac dèh miq.
14 “Au khòh dŏih wì haq claih khoi ca cwìang da can cachìt ùh?
Au khòh rŏt hlài wì haq claih khoi enh can cachìt 'mòh?
Ô can cachìt, 'bài hila ìh ta leq?
Ô Ralùng Hanang, can jìq da ìh ŏi ta leq?
“Can xa-ŏch khoi cadoc hlèp hangai ca mat Au.
15 'Nhac ca Ep-ra-im i con bàc yi hnao ca oh daq dađeh,
mahaq cayeo pah mat mahì loh,
aih cayeo da Chuaq hlôi tŏc enh braih càn;
gŏi diac haq jah wìa xŏt wa diac mŏng haq wìa croh;
cayeo aih tablah yŏc 'bài hang canaq ta kho.
16 Sa-ma-ri ep pòq tôiq,
taiq haq khoi blàq Boc Plình!
Wì haq cachìt ca pla chang;
chac hamac con 'yoh 'bìq jôq nanit đac,
wa 'bài gu cadrì ŏi jiang 'bìq pah cliac.”