11
Boc Plình Xa-ŏch Ca Is-ra-ên
1 “Jò Is-ra-ên ŏi nga, Au loq waq ca haq;
Au creo con calô Au loh khoi enh Aicàp.
2 Au creo ca haq dàng leq,
haq mot ca Au dàng aih.
Wì haq khoi dèch am ngè tadreo ca Ba-an,
wa bùh jreo xua thùm ca dua 'mù.
3 Mahaq cla Au khoi hnài Ep-ra-im cadiang lam,
khoi ca'mình haq ta cŏng tì;
mahaq wì haq ùh 'nì
ca Au khoi broq brêh ca wì haq.
4 Au khoi 'nong Is-ra-ên
tìah ca mangai i manoh xa-ŏch wa loq waq.
Au cô khoi dŏih long ech enh ranŏng wì haq.
Au cùp ha'neq 'noh ca wì haq dahwèq caq.
5 “Taiq wì haq ùh chìuq wìh hlài ta Au,
wa ùh wìh hlài ta Aicàp,
èh ep patìh bùa A-si-ri.
6 Chang gùm jah mùt ta phôq wì haq,
raliang đac calêh 'mang wì haq,
lŏn dìq wì haq taiq trong hatình ngan dù da wì haq.
7 Joq 'nàng jàn Au dì dèh manoh cađac Au.
Wì creo Au Yi Ha'nhèq,
mahaq wì haq ùh padèch iu tiaq Au.
8 “Ô Ep-ra-im, broq 'màng leq Au ma jah cađac ìh?
Ô Is-ra-ên, 'màng leq Au jah cađac ìh?
Broq 'màng leq Au jah ta broq ca ìh troi Atma
loq troi Xê-bô-im?
Manoh Au mango dìq jaq;
manoh xa-ŏch da Au tìah ca ùnh cheo dêh.
9 Au padràng dèh can nòih,
ùh jêh Ep-ra-im hòm.
Ma jah 'màng aih Au Boc Plình, ùh xài con mangai;
Au Yiang Hadròih ŏi ta'ne ìh,
ùh yŏc can nòih lam trùh ta ìh.
10 Wì haq tiaq atìq ca Chuaq,
Haq grenh tìah ca baco hlari;
joq 'nàng jò Haq grenh;
'bài con caiq Haq enh mahì mùt tarìt tariang lam trùh.
11 Wì haq tarìt tariang trùh enh Aicàp tìah ca chìm pan,
enh taneh A-si-ri tìah ca chìm trù;
Au broq ca wì haq hlài ŏi dèh ta hnem cla,”
Chuaq doi 'màng aih.
12 Ep-ra-im capoch bàu amòng ŏi dudan ca Au
wa Is-ra-ên capoch bàu 'nùt;
Juđa hadai broq bìac ùh troq tajraq hlài ca Au,
aih tajraq hlài ca Boc Plình Hadròih ma wèq dèh manoh.