9
Ep-ra-im 'Bìq Baxa
1 Ô Is-ra-ên, paq lem bùi padràu hau troi 'bài jàn 'noiq!
Taiq ìh khoi tango anang,
cađac Boc Plình ìh.
Ìh ham ca 'bac tango anang ta xàn len 'mau ìh.
2 Xàn len 'mau, wa hàm hadroch plì nho ùh nui ban wì haq;
alac nho neo xôq thìuq ca wì haq.
3 Wì haq ùh jah ŏi ta taneh da Chuaq;
Ep-ra-im cô èh hi wìh hlài ta Aicàp,
caq dahwèq padrùh ta A-si-ri.
4 Wì haq pi broq lè dèch am alac nho ca Chuaq,
ngè tadreo dèch am pi lem manoh ca Haq;
'benh da wì haq jah tìah ca 'benh da hnem i mangai cachìt,
cabô hi caq dìq loh ca amùa;
ma jah 'màng aih 'benh wì haq toq cla wì haq caq,
ùh jah 'mùt ta hnem Chuaq.
5 Pì broq cleq ta hì lè càn,
ta hì hiniang da Chuaq?
6 Joq 'nàng, 'nhac ca wì haq khoi jah claih ca bìac ranàc.
Mahaq Aicàp xôq acom hlài wì haq,
Memphit catùh wì haq.
Nhat wa rôm wang jaq caq dahwèq canaq 'bac da wì haq;
brech breo hon mùt nòi traiq wì haq ŏi.
7 Hì baxa khoi trùh! 'Bài hì tabroq chao khoi trùh!
Is-ra-ên jah loq ro bìac aih.
Mangai capoch thai Boc Plình loh ca blùng,
mangai i yiang wèq manoh 'nong trong loh ca ranhùa,
taiq can ngang dù da ìh khoi bàc,
wa bìac git 'bŏn da ìh càn hrìn.
8 Au Boc Plình khoi 'nac mangai capoch thai Au
đòiq gòm rap Ep-ra-im jàn Au;
mahaq jàn Au khoi bet rahoch rìm nòi haq lam;
haq toq glàm bìac git 'bŏn ta hnem Boc Plình haq.
9 Wì haq cram dèh ta bìac tôiq lôi
tìah ca 'bài hì da Ghi-bê-a.
Boc Plình hmàng hlài ca bìac ngang dù da wì haq,
baxa tôiq lôi wì haq.
10 “Au glàm Is-ra-ên,
tìah ca glàm plì nho ta đùng wang wê;
Au khoi hnoq boc yaq pì
tìah ca plì pŏc dùm gàu mùa.
Mahaq wì haq khoi mùt ta nòi Ba-an Pêo;
am dađeh ca ngè 'mèq 'mac,
wì loh ca ramòt tìah ca dua 'mù wì haq ma cùh waiq.
11 Bìac 'ngah 'ngai da Ep-ra-im jah pan đac tìah ca chìm – pi xa-ông,
pi ŏi jiang, pi hadràp!
12 'Nhac ca wì haq i con ban,
Au xôq jêh đac,
trùh jò wì haq pi ŏi i ca mòiq ngai mangai calô leq.
Ranàc ca wì haq jò Au cađac wì haq.
13 Au khoi lah hnoq Ep-ra-im,
tìah ca phôq Tirò jah pìt ta nòi đùng nhat,
mahaq Ep-ra-im ep 'ràng dèh con
caiq am ca mangai jêh đac.”
14 Chuaq ôi, au khòh xìn Ìh am cleq
ca wì haq cô èh?
Xìn am ca pù con nga wì haq xa-ông ralàih
wa tôh ùh i ca diac tôh!
15 “Rìm bìac ngang dù da wì haq dìq ŏi ta Gingan;
Au baxèm git ca wì haq ta aih.
Taiq bìac ngang dù wì haq,
Au hnan wì haq loh khoi enh hnem Au;
Au pi xa-ŏch ca wì haq hòm.
Dìq ca 'bài cwan wì haq, aih 'bài mangai loq blàq.
16 Ep-ra-im 'bìq jêh đac;
riah haq khoi croh.
Wì haq pi nui loh plì.
'Nhac ca wì jah xa-ông con
Au xôq jêh đac 'bài con ma wì haq dìq jaq loq waq.”
17 Boc Plình au hi cađac wì haq,
taiq wì haq ùh tamàng bàu Haq.
Wì haq jah lam pac lac ta 'bài Diac 'noiq.