1 Ôi oh daq au ma loq waq, apaq lùi rìm ngai ma doi Yiang da Boc Plình ŏi ta wì haq, mahaq phai thù waq ca jah loq bàu hnài da wì aih joq trùh enh Yiang Hadròih da Boc Plình loq ùh, ma jah 'màng aih i bàc mangai amòng capoch bàu loq adroi khoi mahno loh ta crŏng taneh. 2 Nhò bìac cô pì jah canao loq mangai leq i Yiang Hadròih da Boc Plình: Mangai leq anoi 'noh Chuaq Jêxu Crich trùh ta crŏng taneh xa-ông loh caxùnh yŏc chac mangai, mangai aih i Yiang Hadròih da Boc Plình, 3 mahaq mangai leq doi Chuaq Jêxu Crich ùh trùh ta crŏng taneh, mangai aih ùh i Yiang Hadròih da Boc Plình, mahaq cla mangai aih raq i manoh tìah mangai tajraq Crich ma pì khoi tàng jah trùh; manàiq cô haq khoi trùh ŏi ta crŏng taneh.

4 Ôi con 'yoh da au, pì mangai da Boc Plình; pì khoi 'blêq wì haq, ma jah 'màng aih Haq ma ŏi ta pì càn yi hnao ca haq ma ŏi ta crŏng taneh. 5 Wì haq aih rìh tiaq crŏng taneh, 'màng aih wì haq capoch tiaq crŏng taneh wa crŏng taneh tamàng tiaq wì haq. 6 Bèn ŏi ta Boc Plình. Mangai leq canao loq ca Boc Plình èh mangai aih tamàng bèn. Mangai leq ùh ŏi ta Boc Plình, èh ùh tamàng bèn. Nhò jang aih bèn canao loq yiang da bàu joq 'nàng wa yiang da bàu ùh troq.

7 Ôi oh daq, au ma loq waq, bèn khòh loq waq ca dabau, taiq can loq waq loh enh Boc Plình. Rìm ngai loq waq, aih mangai khoi xa-ông loh enh Boc Plình, èh canao loq Boc Plình. 8 Mangai leq ùh loq waq, ùh canao loq ca Boc Plình, ma jah 'màng aih Boc Plình, Haq can loq waq. 9 'Màng cô can loq waq da Boc Plình khoi mahno loh ca bèn: Boc Plình khoi thê dèh Con Haq trùh crŏng taneh wa nhò Con aih bèn jah rìh. 10 Can loq waq ŏi jang cô: Aih ùh xài bèn khoi loq waq ca Boc Plình, mahaq Haq khoi loq waq ca bèn, Haq thê dèh Con wìa ngè tadreo rŏt hlài enh tôiq lôi đòiq baxŏng tôiq lôi bèn. 11 Ôi oh daq au ma loq waq, tàng Boc Plình khoi loq waq ca bèn 'màng aih, èh bèn hadai khòh loq waq ca dabau. 12 'Nhòq lah i mangai leq hnoq Boc Plình, tàng bèn loq waq ca dabau, èh Boc Plình ŏi ta bèn wa bìac loq waq Haq jah gêh tôm ŏi ta bèn.

13 Nhò bìac cô bèn loq dađeh ŏi ta Haq, wa Haq ŏi ta bèn, ma jah 'màng aih Haq khoi am Yiang Hadròih Haq ca bèn. 14 Nhèn khoi hnoq wa anoi hlài, Chuaq Baq khoi thê Chuaq Con loh crŏng taneh đòiq broq Mangai Dèch con mangai da crŏng taneh. 15 Mangai leq lùi wa pa'noh Chuaq Jêxu Con da Boc Plình, èh Boc Plình ŏi ta mangai aih, mangai aih ŏi ta Boc Plình. 16 Bèn loq wa lùi, manoh Boc Plình loq waq ca bèn.

Boc Plình, Haq can loq waq, mangai leq rìh ŏi ta can loq waq, aih haq rìh ŏi ta Boc Plình, Boc Plình rìh ŏi ta haq. 17 Nhò enh aih can loq waq ŏi ta bèn jah tôm gêh, đòiq bèn jah cajap manoh jò hì hadrah, ma jah 'màng aih Haq 'màng leq, bèn hadai 'màng aih ŏi crŏng taneh. 18 Ùh i bìac yùq crè ŏi ta can loq waq, mahaq can loq waq xùt đac dìq ca bìac yùq crè, ma jah 'màng aih mangai leq loq yùq crè, aih haq yùq bìac baxa. Mangai loq yùq crè 'nhòq i can loq waq tôm gêh.

19 Bèn loq waq ca Chuaq taiq Chuaq khoi loq waq ca bèn adroi. 20 Tàng i mangai leq doi: Au loq waq ca Boc Plình, mahaq git dèh ca oh daq, èh mangai aih capoch amòng, ma jah 'màng aih mangai leq ùh loq waq dèh ca oh daq bèn jah hnoq, èh ùh jò leq loq waq ca Boc Plình ma haq ùh lah hnoq. 21 Bèn khoi nhàn bàu thê da Haq cô: Mangai loq waq Boc Plình, èh hadai phai loq waq ca oh daq.