10
Aŋela igham rau marani pa Yoan
1 Ra matag ila le naghita aŋela ariaaŋa ite tau ileep sambam ve izilam. Taitai ikauu imin nonoghiiŋa tooni, ve taliŋbuuz igheen izala daaba paavo. Naagho isul imin aaz maata. Ve aaghe ru, ene imin rir tintiina tau yav ighanghan ila. * Ezek 1:28; Mt 17:2; Syg 1:15+
2 I ikis rau marani ee tau tiraraava pataghaaŋ. I ighur aaghe tapir ila te, ve ŋas ila taan. 3 I iboob aliiŋa tiina kat imin laion itaŋ, ve nalooŋ lalaav luutu tiina kat pai liim ve ru toman saveeŋ, ve iyol bobaaŋ tooni. * Mbo 29:3; Yo 12:29
4 Gabua tana isov, ra naghe nabood saveeŋ tawe ila rau. Eemon nalooŋ saveeŋ sambam ve izilam ighe: “Saveeŋ tau ivot toman lalaav luutu gha ulooŋa na, uboode sov. Igheen imin ŋgozaaŋ.” * Dan 8:26, 12:4, 9
5 Ra naghita aŋela tau aaghe ee iyooz ila te, ve aaghe ite iyooz ila taan na, iit niima tapir izala pa sambam, 6 ve ipariaaŋ saveeŋ tooni pa Maaron tau ileep irau saawe na eeza. I Maaron tau ighur sambam, taan, ve te, tomania gabua naol isov tau tileep ve tigheen ila. Aŋela tawe isaav ighe: “Irau tasaŋan muul mako. Saawe isov wa! * Igham 20:11; Mbo 146:6
7 Saawe tau aŋela tau imin liim ve ru na iviv tavuur tooni, ene aat Maaron ŋgar tooni yoŋgaaŋa isov ighur anooŋa itaghon saveeŋ tooni. Saveeŋ tawe, muuŋ i ivotia ila to yes propet tau tibesbees pani na.”
8 Ra ŋeer tau aliiŋa sambam ve izilam na, isaav payau muul ighe: “Aŋela tau aaghe ee iyooz ila te ve aaghe ite iyooz ila taan na, yo ula tooni, ve ugham rau marani tau tiraraava ve ikiskisi we.”
9 Tauvene yau nala tooni, ve naghasoni naghe igham rau marani tawe ilam tsiau. I isaav payau ighe: “Ughamu ve ughani. Pale uyamaana imonmoon ila avom imin tok suuru. Eemon izila apom, ene aat igham apom iyavyav.” * Ezek 3:3
10 Tauvene nagham rau tau igheen ila aŋela tawe niima, ve naghani. Nayamaana imonmoon ila avog imin tok suuru. Eemon saawe tau natoona, igham apog iyavyav. * Rau tau Yoan ighamu na, ene Maaron aliiŋa igheen ila. Maaron aliiŋa isov ene poia imin tok suuru. Eemon Maaron aliiŋa tawe isavia pataŋani tau pale ivot pa tamtamon. Tauta saawe tau Yoan itoona, ighamu aapo iyavyav. * Mbo 19:10, 119:103
11 Mako tisaav payau muul tighe: “Yo aat uvotia Maaron aliiŋa muul, ve usavia ŋgar tau pale ivot pa yes kinik ve eval tiina to nughmariŋ tau tinizi tomania gabuazi ve aliŋazi ite ite na.”
*10:1: Ezek 1:28; Mt 17:2; Syg 1:15+
*10:4: Dan 8:26, 12:4, 9
*10:9: Ezek 3:3
*10:10: Rau tau Yoan ighamu na, ene Maaron aliiŋa igheen ila. Maaron aliiŋa isov ene poia imin tok suuru. Eemon Maaron aliiŋa tawe isavia pataŋani tau pale ivot pa tamtamon. Tauta saawe tau Yoan itoona, ighamu aapo iyavyav.
*10:10: Mbo 19:10, 119:103