135
Maaron to Israel iŋgin gabua naol isov
1-2 Aleluia, tapait Yoova!
Yam besooŋa to Yoova, apait eeza ve apakuru.
Yam tau abesbees pani ila rumei tooni loolo,
ve yam tau aleep muuri igharau rumei ziige na paam.
3 Apait Yoova! Pasaa, i poia le poia kat.
I eeza tiina pa ŋgar paghuuna tau ighamghamu na. Tauvene apait eeza ila mbouŋ.
4 Muuŋ, Yoova isiigh Yakop, ve ighamu imin le.
Tauta ighita iit Israela ighe iit tamtamon tooni kat. * Igham 19:5
5 Yau nawatagh: Yoova, i eeza tiina kat.
Maaron toit iliiv zimaronŋa tisov.
6 Isaav ighe Yoova loolo pa ghamuuŋ ŋgar eta izi sambam, ma izi taan,
ma ila te paavo, ma izila te loolo,
ene ighamu mon. Pasaa, gabua eta irau ikeeka mako.
7 I ta igham taitai indoundou ghi ila yaghur puughu.
Ve igham uman izizi, ve igham nugh ighani milia.
I ikakaak ruum tooni tau yaghur igheen iloŋ ila na atamana, leso ivot ve ilaan irau taan.
8 Muuŋ, i irav yes Isipa natuzŋa aidabazŋa tomania ŋgai toozi tau tipoop zi imin maata na le tisov timataar. * Igham 12:29
9 I igham gabua ŋgeretazi ve uraat tintiina izi Isip, le ivaghamun kinik toozi tomania uraata tooni tisov.
10 Saawe tau yes Israela tiloŋ tila taan to yes Kanaana, i irav tamtamon to nugh nugh timatmaat.
Kinik tau tapirizi tiina na paam, i irav zi timatmaat.
11 I irav Sihon tau kinik to yes Amora,
Og tau kinik to Basan,
ve kinik tisov to nugh nugh to Kanaan.
12 Ve igham taan toozi imin yes Israela lezi motot.
Leso tamtamon tooni tileep pani taghon taghon gha ila.
13 O Yoova, ezam tiina pale ighengheen tauvene irau saawe!
Tamtamon pale matazi iŋgalŋgal uraat tsio, ve tivotia varum taghon taghon gha ila.
14 Pasaa, Yoova iyozyooz pa tamtamon tooni, ve ighurghur atuya pa yes tau tigham saghatin zi na.
I loolo isasaghatin besooŋa tooni, ve iuluul zi.
15 Nugh nugh tigharaat maaron toozi pa silva ma gol.
Maaron karomŋa tawe, tamtamon tigharaat zi pa nimazi. * Mbo 115:4; Syg 9:20
16 Yes lezi avozi. Eemon irau tisavsaav mako.
Ve lezi matazi. Eemon tighita nugh mako.
17 Yes lezi taliŋazi. Eemon tilooŋ saveeŋ mako.
Ve yaghur eta ivot pa uzuzi mako. Pasaa, yes gabua matazi yaryaare mako.
18 Yes tau tighagharaat maaron karomŋa, ve tinumeer zi na,
tisov timin maaron toozi tawe. Tirau gabua eta mako.
19 Yam eval tiina to Israel, apait Yoova pa poia tooni!
Ve yam zeran to watooŋrau tau avot ila to Aron na, apait Yoova pa poia tooni!
20 Ve yam rumei Levi tau auluul uraat to rumei na paam, apait Yoova pa poia tooni!
Tauvene yam tau aroi pa Yoova ve ataghon ŋgar tooni na, asov apaiti pa poia tooni.
21 Yoova niia to lepoogh igheen izi Yerusalem.
Tauvene yam tau aleep izi nugh Zion na, apaiti pa poia tooni!
Aleluia, tapait Yoova!