92
Maaron igham zeran duduŋazi tileep poia
Mbouŋ to umbom patabuyaaŋ
1 Yoova, yo Maaron Tau Uliiv Zimaronŋa Tisov.
Isaav ighe yau napakur ghom pa poia tsio, ve nambou to napait ezam, ene igham lolog poia.
2 Mboŋoozo ta naol ne, navovotia ŋgar tsio tau lolom isaghav tamtamon tsio ariaaŋ ve uluul zi.
Ve mboŋ, yau navovotia gabuam tau utataghon saveeŋ mbuaaŋ tsio.
Ŋgar tauvene igham lolog poia kat.
3 Yau naravrav gita ve kulele, ve namboumbou to napakur ghom.
4 Pasaa, Yoova, uraat tsio igham lolog poia kat.
Matag ilala pa gabua naol tau nimam igharaat zi na, ve nambou toman tintinig.
5 Yoova, uraat tau yo ughamgham zi, ene tintiina kat.
Ve ŋgar tsio paam, puughu ariaaŋa. Ila le ila kat. Tauvene nagham ŋgar pani, eemon narao mako. * Ro 11:33
6 Eemon yes kankanooŋa tighilaal mako.
Ŋgar toozi imin borauŋa. Tauta pataŋani tau pale ivot pa zeran sasaghati na, yes tigham ŋgar pani mako.
7 Onoon, aazne, zeran sasaghati tivot timin naol imin oot sasaghati tau isaas le itav taan.
Ve yes tau tinoknok ghamuuŋ sosor na, taghita taghe lepoogh toozi, ene poia kat.
Eemon murei, yo pale upasov zi, le tisov kat.
8 O Yoova, yo uleep saaŋa, ve ughamgham pooz irau saawe.
9 Onoon kat, koiamŋa tau tighamgham ŋgar saghati na, yo pale ureu mbirisai zi gha tisov tilalez.
10 Eemon yau, yo upakur ghau, ve ugham tapirig ivot tiina imin makau sagsag.
Ve poia tsio izazaa tsiau, imin tiliŋ ŋgoreeŋ poia izala pavog.
11 Yo utatan koiagŋa ve naghit katin saghatiiŋ toozi.
Yo uvaghamunia zeran sasaghatizi tawe, ve nalooŋ katin taŋiiz toozi.
12 Eemon zeran duduŋazi pale tileep poia, ve ŋgar popoia katini ivotvot ila sosozi imin niu tau irav kat.
Ve irau tisaghat mako. Pale tiyooz tuŋia ve tileep malau, imin ai mezepur tintiina to Lebanon. * Mbo 1:3, 52:8
13 Yes timin ai tau tivazogh zi ila rumei patabuyaaŋ to Yoova ziige.
Pale tileep poia iloŋ ila Maaron toit rumei tooni sirsiira.
14 Ve saawe tau timin zikooŋ, tapirizi ighengheen soone, ve tighamgham ŋgar popoia ivotvot, imin ai paghpaaghu tau anoŋazi katini. * Yo 15:5
15 Ve tivovotia saveeŋ tauvene tighe: “Yoova iponpoon ghau imin maetaaz tau izala kat.
Sosor eta igheen tooni mako.
Ŋgar tooni isov, ene iduduuŋ mon.”