69
Suŋuuŋ to tamtamon tau ibaad pataŋani tiina pa Maaron eeza
Mbouŋ to David
Ŋeer tau imuŋmuuŋ pa mbouŋ na aat isaav pa tamtamon to timbou mbouŋ tane itaghon aliiŋa tauvene: ‘manman ruuŋgu pisosooŋa.’
1 O Maaron, uul ghau lak!
Pa yaa ivon izalam imuul luag gha naghe nazal tane.
2 Aazne, agheg brusia ila tiiŋ tiina.
Leg taan ariaaŋa eta to nayooz izala ne mako.
Yau naleep izila mazavan loolo.
Lepoogh tsiau ta aazne, ene imin yaa ivot toman tapiri, ve izugh ghau gha nalaleg.
3 Maaron, yau nasaghat wa.
Taŋiiz tsiau iŋaŋarui ghom le aliŋag imarmaar.
Yau naghurghur matag payo naghe yo pale uul ghau. Eemon mako.
Tauta tapirig isov.
4 Tamtamon tau tighurghur koi payau ne, yes eval le eval kat. Tiliiv dabag raua.
Irau nanin zi mako.
Koiagŋa tau tighe tivaghamun ghau na, tapirizi tiina,
ve tiŋgalŋgal saveeŋ karom naol payau.
Yau naum gabua toozi eta mako. Eemon tisavsaav payau tighe napamuul gabua toozi.
Pale napamuul saa? * Yo 15:25
5 Maaron, yo uwatagh: Yau nagham ŋgar sasaghati naol imin yes borauŋa.
Sosor tsiau ta naol ne, eta iyooŋ payo mako.
6 Yoova, yo Maaron saksakim ve uŋgin gabua naol isov. Uul ghau lak!
Mako pale nagham mayaŋa pa yes tau tinumeer ghom ve tighurghur matazi payo na.
Maaron to Israel, yau nagham ŋgar tiina pa yes tau tizuari zi tighe le tiwatagh katin ghom.
Isaav ighe yo uul ghau pa pataŋani tsiau tane mako, ene pale mayazi.
7 Yau nabesbees payo, tauta tamtamon tisiksik saveeŋ veleghiiŋ payau.
Yes tigham ghau mayag ve natudtud mon.
8 Taug siŋ tsiau tighit ghau imin yau ŋeer suumbu.
Ve toŋvetaz tsiau duduuŋ tau tinamai eemon na, tighur murizi payau imin yau to nugh ite. * Mbo 31:11; Yo 7:5
9 Ŋgar tsiau iyaryaaŋ naghe le nagharaat rumei tsio. Eemon ŋgar tane, ta aazne imin puughu pa nabaad pataŋani tiina imin yav ighan ghau.
Yes tau tivelegh ghom na, tivelegh ghau paam. * Yo 2:17; Ro 15:3
10 Saawe tau natatan taug, ve naŋgun taug pa ghaniiŋ aniiŋ,
tamtamon matazi veleghin ghau.
11 Ve saawe tau lolog ipataŋan, ve nagharaat taug mako, ve nanonogh ghau pa uuli to moŋiiŋ, tiŋiŋ payau.
12 Yes tau tiluplup zi ila maaran aate na, tisisinai ghau.
Ve yes ghunuuŋa timboumbou ghau imin ŋalalaŋ.
13 Eemon suŋuuŋ tsiau iŋaŋarui ghom mon.
Yoova, poia tsio, ene tiina le tiina kat. Lolom isaghatin ghau ve uul ghau lak!
Lolom isaghav tamtamon tsio, ve uluul zi irau saawe.
Tauvene saawe sindei tau ughita poia, na ulooŋ suŋuuŋ tsiau tane, ve uul ghau. * 2Kor 6:2
14 Upas ghau navot pa pataŋani tiina tane.
Mako pale agheg brusia ila tiiŋ ve malmalig nazila!
Ugham mulin ghau ila koiagŋa nimazi.
Uit ghau nazaa pa mazavan loolo.
15 Uul ghau. Mako pale yaa ivot toman tapiri ve izugh ghau, ve igherev ghau gha nalaleg!
Ughita. Paita nazal nazila mazavan loolo tane.
Aazne, yau naleep izila puura to yes mateegha, ve aavo ighe ivool tane. Upas ghau navot.
16 Yoova, yo poiam. Lolom isaghav tamtamon tsio ve uluul zi irau saawe. Tauvene ulooŋ suŋuuŋ tsiau tane ve uul ghau.
Yo lolom isaghatin ghei kat. Tauvene matam imuul ilam payau.
17 Yau besooŋa tsio. Uŋgooz naghom payau sov.
Pa aazne naleep ila pataŋani tiina loolo.
Tauvene ulooŋ suŋuuŋ tsiau, ve uul ghau rekia.
18 Ulam uyooz ila zigeg, ve uul ghau.
Ugham mulin ghau ila koiagŋa nimazi.
19 Ŋgar tau koiagŋa tighamgham payau ne, yo uwataghi wa.
Yes tivevelegh ghau, ve tipamayaŋin ghau, ve tivaghamunia ezag kat.
20 Saveeŋ veleghiiŋ tau tisiksiki payau, ene igham lolog ipataŋan kat. Naghita naghe irau poiag muul mako.
Yau naghe pale tamtamon lolozi isaghatin ghau, ve tilam tirav ateg.
Eemon mako. Eta ilam peria tsiau mako.
21 Saawe tau pitool ghau, koiagŋa tighur gabua lilia ila aniiŋ tsiau.
Ve saawe tau murun ghau, tigham leg vaen papaii. * Mt 27:34, 48; Yo 19:29
22 Tauvene suŋuuŋ tsiau iŋarui ghom naghe: Saawe tau koiagŋa yesŋa zetazŋa tilup zi pa ghanghaniiŋ, na ugham boor tau aniiŋ toozi igheen izala na, imin liis pazi ve ivaghamun zi. * Ro 11:9+
23 Ugham matazi ikumkuum, leso tighita nugh muul sov.
Ve ugham tapirizi isov, ve aghezi imatmaat.
24 Naghe uŋgal matazi ve tiyamaan katin aatyavyav tsio.
Aatyavyav tsio tana izaa toozi ve ivaghamun zi kat, o poi!
25 Upasov zi le nugh toozi balim.
Balbaal toozi ta naol ne, tamtamon eta ileep ila muul sov. * Mbaŋ 1:20
26 Pasaa, tamtamon tau yo ulosi ve ughur pataŋani pani na,
zeran sasaghati tawe tighur pataŋani izaa tooni muul, ve tisisinaii pa pataŋani tau ivot pani na.
27 Sosor to zeran tawe, lolom iveegh pani sov.
Matam kisini, ve ughur atuya pazi le tiyamaana kat!
Ughurghur zi sov.
28 Umus ezazi pa rau to lepoogh maata yaryaare.
Rau tau zeran duduŋazi ezazi igheen ila na, yes tawe ezazi ila tomani zi sov. * Igham 32:32+; Syg 20:12, 21:27
29 O Maaron, aazne nabaad pataŋani ve nayamaan yavyavuuŋ tiina.
Tauvene ulam uul ghau.
Uŋguaaz ghau nazala saaŋa. Leso naleep poi.
30 Yau aat nambou ve napait Maaron eeza. Pasaa, i igham ghau lolog poia kat.
Tauvene yau naghe napakuru.
31 Ŋgar tauvene, ene igham Yoova loolo poia kat le iliiv makau katini tau tighamgham zi pa watooŋrau na. * Mbo 50:9, 51:16+
32 Yes tau tinumeer Maaron ve tibadbaad pataŋani na, isaav ighe tighita Maaron iuul ghau, ene pale tintinizi.
Ve yes tau tizuzuari zi pa Maaron na paam. Ighe tighita uleeŋ tau i igham payau ne, ene pale ipalot zi. * Mbo 34:2
33 Pasaa, yes tau tibadbaad pataŋani ve tinumeer Yoova na, i iloŋlooŋ suŋuuŋ toozi.
Tamtamon tooni tau tileep ila koiazŋa nimazi na, i irau loolo iveegh pazi mako.
34 Sambam saamba, taan, ve te, tomania gabua naol isov tau tilepaar ila na, yam asov apait Maaron.
35 Pa i pale igham mulin nugh Zion, ve ipaburigin nugh tisov to Yudea muul.
Leso tamtamon tooni timuul tila ta sewe, ve tigham mulin taan toozi, ve tileep ila.
36 Ve murei, taan toozi pale izi pa paaghu toozi, ve tighamu imin lezi, ve tileep ila.
Tauvene yes tau lolozi igheen to Maaron na, pale tileep poia izi ta sewe.